تكلفة امتلاكك للسيارة كام؟ What's your car cost of ownership

[جندى مجند]

الحقيقة أنا عندى هواية سيئة مش قادر أبطلها، ألا و هى تسجيل كل مصاريفى اليومية و الشهرية بالتفصيل الممل (بأستخدم فى الموضوع دة برنامج Microsoft Money) و بعد عدة سنوات من الانتظام على تلك الهواية الغريبة بقى عندى كم هائل من المعلومات و الاحصائيات اللى ملهاش لازمة :-)

النهاردة جاتلى فكرة بالاستعانة بالبيانات دى انى أحسب تكلفة امتلاكى للسيارة مقدرة بتكلفة الكيلومتر الواحد ... و اليكم النتيجة:

نوع السيارة: هوندا سيتى 1500 مانيوال
تاريخ استلام السيارة على الزيرو: 24 مايو 2006
قراءة عداد الكيلومتر اليوم 11 نوفمبر 2007: 32980 كيلو -- نقول 33 ألف للتسهيل

اجمالى مصاريف التسجيل: 700 (شاملة الطفاية، التأمين، الضريبة، الاكراميات، تأجير لوحات تجارية ... الخ)
اجمالى مصاريف البنزين: 3312
اجمالى مصاريف الصيانة: 1894
اجمالى مصاريف اكسسوارات و فرش و خلافه: 1970
اجمالى مصاريف الركنة (اجرة منادى + تذاكر جراجات عمومية + 3 مخالفات): 288
======================
اجمالى المصاريف: 8164

تكلفة الكيلومتر الواحد = حوالى 25 قرش فقط لا غير

الحسبة دى ينقصها أخذ قسط الاهلاك فى الاعتبار ... بمعنى لو أنا اشتريت العربية بـ س و بعتها بعد فترة بـ ص يبقى الفرق بين البيع و الشراء (س-ص) المفروض يتقسم على اجمالى الكيلومترات اللى قطعتها بالعربية لحد ما بعتها و خارج القسمة يتضاف لتكلفة الكيلومتر أعلاه ... و هنا بقى يبان قوى تأثير شراء عربية ليها سوق و عربية سوقها ضعيف ...

يعنى مثلاً لو عربية لانسر سوقها ممتاز حتلاقى الخسارة فى البيع 10 آلاف مثلاً لو قسمتهم على اجمالى الكيلوات تلاقى التكلفة زادت 30 قرش لكل كيلومتر

لكن لو عربية سوق اعادة بيعها تعبان زى حالاتى حتلاقى التكلفة الاضافية ممكن تكون 60 أو 65 قرش لكل كيلومتر و فى الحالة دى الأفضل ألا يتم بيع العربية إلا بعد فترة كبيرة تكون قطعت فيها مثلاً 100 ألف كيلو فتلاقى تكلفة الاهلاك قلت جامد ...

أعتقد الدراسة دى ممكن تكون مفيدة فى تحديد اقتصاديات كل سيارة لمن يفكر فى شراء سيارة جديدة و عايز يحسب حتكلفه كام بعد الشراء ... ياللا بقى عايزين نشوف تكلفة الكيلومتر لباقى أنواع السيارات لكل من يهوى الاحتفاظ ببيانات المصاريف التفصيلية زى حالاتى

:roll: :roll:

[Ahmed Hassan]

ياللا بقى عايزين نشوف تكلفة الكيلومتر لباقى أنواع السيارات لكل من يهوى الاحتفاظ ببيانات المصاريف التفصيلية زى حالاتى

فكره جامده جدا.. بس اللي زي حالاتك ده تجيبو منين؟!!!

انا عن نفسي معنديش أي احصائيات او حتى تسجيل للمصاريف... و عمري ما عملت ميزانيه و لا بفتكر سعر حاجه.

انا اول مره اسمع عن MICROSOFT MONEY ... ممكن يكون ده العلاج... يا ترى الواحد يجيب البرنامج ده منين؟

[Hisham_ElFeky]

اختراع بجد يا جندي باشا فكرة جامدة جدا وهبدأ في تنفيذها ;) ;) ;)

[ahmedfd]

تحليل محترف جداً و أكثر من ممتاز...
أحييك عليه..

[BASHAR]

اختراع بجد يا جندي باشا فكرة جامدة جدا وهبدأ في تنفيذها ;) ;) ;)

+10000000 ;) ;)

[tutankhamoun]

أنا أحتفظ بسجل كامل لمصاريف السيارة و بعد أن أقوم بالحسابات اللازمة سأوافيكم بالنتائج

[GoldenManEye]

من أحلى المواضيع اللى شوفتها ;)

إيه الحلاوة دى طيب بما إنك عندك بيانات كتير كده ممكن تقول لنا على حاجة إكتشفت انها بتكلف كتيير وممكن نسغنى عنها؟
وايه أغرب نتيجة وصلتلها من تحليل مصاريفك غير العربية يعنى حاجة عامة بردو .أصل أنا حاسس انى بعك كتيير فى الصرف :shock:

[sab3aawy]

انا عملت التطبيق ده فى الماضى على مجموعة من السارات ، لكن ايام ما كان البنزين بجنيه اللتر،

واكشتفت ان ارخص تكلفة للكيلومتر تحصل عليها من استخدام عربية سعة اقل من 1000 سى سى تشتريها كسر زيرو او موديل 3 الى اربعة سنوات فاتوا تليها الزيرو وغلى تكلفة هى تكلفة المستعمل القديم

اذكر هذة الارقام :

128 عمرها 15 سنة، تكلفة الكيلومتر 30 قرش (متوسط التكلفة بعد على 60 ألف كيلومتر)
126 عمرها 3سنوات تكلفة الكيلومتر 15 قرش
لانوس زيرو تكلفة الكيلومتر 25 قرش
شاهين زيرو تكلفة الكيلومتر 20 قرش ايام اللتر ابو جنيه و 24 قرش ايام اللتر ابو 140 قرش

[جندى مجند]

أشكركم يا جماعة و فى انتظار تحليل الأخ توت عنخ و باقى الناس اللى بتسجل مصاريف ...

أستاذ أحمد حسن: برنامج Microsoft Money برنامج رائع جداً ... هو فى البداية حتحس انه غلس شوية و صعب بس أول ما تاخد عليه و تنتظم فى استعماله حتحس انك مش قادر تستغنى عنه ... هو بيتيح لك تفتح مجموعة حسابات فيه و تسجل كل المصاريف و الواردات لكل حساب على حدة: مثلاً حساب الكاش، حساب توفير البنك الفلانى، حساب جارى البنك العلانى، حساب الفيزا، ... الخ. و لما تدخل مصاريف و واردات كل حساب بتعملها بند رئيسى و بند فرعى ... مثلاً Food: Dining out أو Education: Fees أو Automobile: maintenance أو Automobile: Gasoline و هكذا

بعد فترة شهر و طالع لو حضرتك انتظمت فى تسجيل كل التفاصيل (الموضوع دة مع التعود مش حياخد منك غير 10 دقائق كل يوم) حتلاقى MS Money بيقدر يديلك تقارير رائعة عن حضرتك بتصرف فلوسك فى ايه و الفرق بين الدخل و الانفاق و يحذرك لو مصاريفك فى شهر زادت عن الحد المسموح بيه فى بعض البنود و يفكرك بمواعيد الفواتير الشهرية و السنوية قبل ميعادها بفترة كافية عشان تعمل حسابك و هكذا ... زائد الكثير من المميزات الرائعة اللى حضرتك حتكتشفها لما تستخدمه و حتحس انه منظملك موضوع المصاريف دة بطريقة ممتازة حتستغرب بعدها ازاى كنت عايش من غيره!

لتحميل Money باستخدام برنامج BitTorrent أو أى برنامج Torrents ممكن تنزله من اللينك دى: http://isohunt.com/download/27438482/microsoft+money



أستاذ GoldenManEye: دة يا سيدى ريبورت من البرنامج عن أكتر بنود انفاق عندى من أول 2007 الى الآن (تم استبعاد المصاريف الخاصة بالعمل و عرض البنود الشخصية و العائلية فقط) و مترتبة حسب حجم الانفاق:


أول و تانى و رابع بند مجموعهم 45% من النفقات دول يمثلوا مصروف البيت اللى زوجتى بتاخده و اللى بأحاول معاها بقالى 3 سنين انها تسجل تفاصيله فى Money على الكمبيوتر بتاعها و مش عارف أقنعها الى الآن و بالتالى مقدرش أفيدك بالضبط هو بيروح فين!! سادس بند اللى هو مصاريف الأكل فى المطاعم بأعتبره بند له وزن جامد دون أى داعى لأنى بأصرف عليه تقريباً أد اللى بأصرفه على الملابس طوال العام!! و فوق كدة حتلاحظ ان الشوكولاتة ليها بند مخصوص لوحدها و بيمثل 2% من الميزانية -- بصراحة مش بأقدر أقاوم البند دة و لا زوجتى و لا بنتى

باشمهندس سبعاوى: كدة تكلفة امتلاك 128 أعلى من تكلفة امتلاك شاهين أو هوندا أو لانوس ... يا ترى ايه أكتر بند انفاق بيعلى تكلفة امتلاكها؟ هل هو مصاريف الصيانة؟

حتى الآن الـ 126 أكتر عربية موفرة فى تكاليف امتلاكها ... يا للا يا جماعة عايزين باقى التحليلات

[ahmedfd]

[quote="جندى مجند"][size=18]


لتحميل Money باستخدام برنامج BitTorrent أو أى برنامج Torrents ممكن تنزله من اللينك دى: http://isohunt.com/download/27438482/microsoft+money




معلش هوا سؤال خارج عن الموضوع لكن موضوع الـ BitTorrent ده عاملي أرتكاريا ... لو بعد إذنك تشرحلي أعمل إيه بالظبط لحد ما البرنامج ينزل أكون شاكر جداً.

[جندى مجند]

معلش هوا سؤال خارج عن الموضوع لكن موضوع الـ BitTorrent ده عاملي أرتكاريا ... لو بعد إذنك تشرحلي أعمل إيه بالظبط لحد ما البرنامج ينزل أكون شاكر جداً.

الموضوع بسيط جداً ... نزل برنامج uTorrent (دة البرنامج اللى أنا بأفضله شخصياً) من http://www.utorrent.com/download.php و اعمله setup عادى خالص و بعدين اضغط على لينك التحميل اللى أنا حاططها فوق و اليو تورنت حيقوم بالباقى ... مع ملاحظة بس ان برامج التورنتس مش بتشتغل كويس مع النت اللى عن طريق التليفون ... لازم يكون خط دى اس إل أو وصلة منه

[Islam_galal]

تكالبف تقريبيه
متوسط كيلومترات: 1500كم/شهر
متوسط استهلاك بنزين: 15كم/لتر
استهلاك بنزين=140ج/شهر

اهلاك العربية (انا باحسبه=استهلاك البنزين)=140ج/شهر
يبقي الاجمالي 280 ج/شهر

يعني حوالي 19 قرش/كيلو

باضافة مصاريف التسجيل + فرق السعر عند البيع (انا شاريها مستعملة) + المخالفات ان وجدت

نقول تقريبا 25 قرش /كيلو

الحسابات تقريبيه بس اعتقد مش حتفرق كتير

[ahmedfd]

معلش هوا سؤال خارج عن الموضوع لكن موضوع الـ BitTorrent ده عاملي أرتكاريا ... لو بعد إذنك تشرحلي أعمل إيه بالظبط لحد ما البرنامج ينزل أكون شاكر جداً.

الموضوع بسيط جداً ... نزل برنامج uTorrent (دة البرنامج اللى أنا بأفضله شخصياً) من http://www.utorrent.com/download.php و اعمله setup عادى خالص و بعدين اضغط على لينك التحميل اللى أنا حاططها فوق و اليو تورنت حيقوم بالباقى ... مع ملاحظة بس ان برامج التورنتس مش بتشتغل كويس مع النت اللى عن طريق التليفون ... لازم يكون خط دى اس إل أو وصلة منه

ألف ألف شكر يا باشا.... حاجرب في البيت و ادعيلك إن شاء الله

[sab3aawy]

باشمهندس سبعاوى: كدة تكلفة امتلاك 128 أعلى من تكلفة امتلاك شاهين أو هوندا أو لانوس ... يا ترى ايه أكتر بند انفاق بيعلى تكلفة امتلاكها؟ هل هو مصاريف الصيانة؟

حتى الآن الـ 126 أكتر عربية موفرة فى تكاليف امتلاكها ... يا للا يا جماعة عايزين باقى التحليلات

تلكفة امتلاك ال128 عالية ليس لأنها 128 ولكن لانها كانت قديمة وباالتالى طلباتها كتير فى الصيانة، النهاردة طقم شنبر، بكرة مساعدين، بعده علبه ديريكسيون بعده شكمان وهكذا

بالنسبة لل126 فكانت موفرة ليس لأانها فقط 126 ولكن لانها كانت كسر زيرو ، اشتريتها رخيص لأنها كسر زيرو وبعتها بنفس سعر شرائها ومصاريفها علىمدى 90 ألف كيلومتر انحصرت فى 4 فرد كاوتش وطقم أكس وفلانشة والصيانات التقليدية وطبعا استهلاك بنزين يتراوح من صفر الى زيرو لأانها 2 سلندر و 560 سى سى

وبالتالى انا ارى ان البديل العملى لها حاليا هو الماروتى كسر زيرو

[Akram]

موضوع جامد أقوي بس المشكلة ان الواحد بيكسل يكتب المصاريف في ساعتها و بعد فترة بينسى , يعني أهم حاجة في الموضوع ده ان الواحد يكتب المصارف في نفس اليوم على الأقل.
شكراً يا جندي مجند , أعتقد انك بتشتغل محاسب . :lol: