عيوب ومميزات الجين 2 بالكامل

[mohamed el hussien]

عيوب الجين (وجة عام)
1 خامات التابلوة مش قد كدة
2 عيوب التقفيل
(سنتر - زجاج - مفتاح المرايات الكهرباء - انذار - لمبة الصالون )
4 لمبة الengine بتنور لو حطيت بنزين 90 او 92 من بنزينة وحشة (حساسة زيادة عن اللزوم )
5 صوت خفبف ومشهور عند لف الدريكسون (في الاول بيظهر الصوت دة )
6 في بعض الناس اشتكت من المساعدين بس قليل اووي
7 صوت الموتور علي نوعا ما بس صوت عالي تحب تسمعة يحسسك بقوة الموتور مش عالي يضايقك
علي رأي سبعاوي (زئير الاسد)
8 سسمعت بعض شكاوي من مواتير المساحات
9 كنت بقول علي استهلاك البنزين عالي بس طلع معظم المواتير ال 1600 التوماتيك زيها
يعني هيا زي اللانسر كدة
10 العربية تحت ال RPM 3 بتكون بطيئة نوعا ما
وبعد ال 3 بتكون طلقة
11 فيها بعض المشاكل في الكهرباء (مرة من غير ما احس وانا بعمل صيانة قالي في عندك ماس في ضفيرة
الكهرباء لما بتشغل المساحات علي اقصي سرعة )
مع اني كنت بشغلها ولو حسيت بحاجة وعملوهالي لوحدهم
12عربية ضيقة من ورا
13عر اعادة البيع مش حلو وان كان احسن من الواجا

(دي يا جماعة عيوب الجين 2 بوجة عام مش خاص يعني صعب اووي تتجمع كلها في عربية واحدة
او مع شخص واحد ومنها عيوب انا شفتها بعيني وعيوب سمعتها بس اللة اعلم بصحتها وعيوب
حصلتلي كدة يعني )

وكل العيوب دي ياجماعة مفيش ولا عيب منها يوقف العربية ولا اي حاجة
كلة بيتعمل مع الصيانة الدورية ومعظمهم مش بياخد وقت خالص
يعني مثلا لمبة ال ENGINE دي بتتعمل بالجهاز في دقيقة بالظبط مش اكتر
ومعظم العيوب بتكون عبيطة كدة

يعني انا كل العيوب اللي حصلت معايا عيوب ال FINISH (لمبة الصالون - السنتر - لمبة ال ENGINE )
مفيش كل الباقي دة

بس انا حبيت اقول كل حاجة الصح واللي سمعنة عشان اكون خلصت ضميري

مميزات الجين
1 شكل تحفة من برة ومن جوة
2 قيمتها السعرية تحفة
في الدول العربية بتتباع بنفس تمن الكرولا والمازدا 3
3 كماليات كتير اووي
(مثبت سرعة - كاوتش عريض 195 علي 60 - باكينج سنسور - MULTI FUNCTION في الدريكسيون
- كاسيت نضيف اووي وسماعات تحفة بلو بانكت - عازل حراري علي الكبوت من جوة - شداد ماسك فردتين الشاسية - الموتور مقفل بنضافة اوي - جنط 15 وحاجات كتيرررررررررر

4 ثبات خرافي خرافي بمعني الكلمة علي اي سرعة واي ملف (الايرو ديناميكس بتاعها هايل)
5 صاج ممتاز بالمقرنة بالعربيات الجديدة مش ورق
6 كراسيها تحفة
7 شنطتها مش صغيرة
8 موتور قووي اووي بعض ال 3 RPM بيكون عايز يطير
9 التسارع بتاعها ممتاز لحد 170 -180
بعد كدة بيبدء يقل
10 الكاوتش SILVER STONE كويس اووي
11 الخلوص بتاع العربية ممتاز
بالرغم الثبات ركب 3 كبار مش حتحك في اي مطب
12 العربية بتسحمل البهدلة ومش بتقول لا
13 سوقتها تحفة (كنترول جامد اووي علي الطريق بتحسة وانت سايقها )
14 قطر دورانها قليل بسبب انها سبورت (بيكون ممتاز بالغرز )
15 لون التابلوة تحفة وشكلة يخطف الانظار
16 العربية شغلها مش معقد اووي زي الفرنساوي ولا الكلام دة بالرغم من التكنولوجيا العلية
17 قطع غيارها بدأت في الانتشار برة التوكيل واسعارها معقولة
18 الماليزين كل شوية في التوكيل وبيتابعوا جامد
واي شكوي بيهتموا اووي

من الاخر العربية دي بالرغم من عيوبها التافهة الكتير الا ان معظم اللي معاهم العربية دي بيعشقوها
وغير العيوب دي بقي كل العربية مميزات مش عادية مميزات جميلة

انا عن نفسي قسيت اووي علي العربية ودلوقتي عرفت فيمتها الحمد للة
انا عامل بالعربية 45000 كم
في سنة ونصف تقريبا
5 حوادث
دة غير الخبطات
وفي ايام بعمل بيها اكتر من 300 كيلو بالتكييف وفي الحر
وجري وبهدلة ومش بتقول لا
بحسها حمالة قسية
كنت مرة بجري علي 180 في طريق الاسماعيلية مع جولف 5
طلع غشيم وخد غرزة مقفولة من امامي علي 180
راح خبطني من قادم وحكين انا في الرصيف وفضلت احك فية لحد لما عديتة
انا اليوم دة مش عارف ازاي متقلبتش اصلا
واللة كل اللي كانوا راكبين معايا استغربوا
بس طبعا دة بستر ربنا مش بسبب اي حاجة تانية

واتسرقت مني فترة والحمد للة رجعتلي
انا بهدلت العربية بهدلة معتقدش انها ممكن تحصل مع حد تاني

من الاخر اللي حيركب العربية دي حيحبها اوووي اوووي
فعلا جميلة

ملحوظة المهندس ابو عبد الرحمن بيقول ان عربية اخوة موديل 2007
ومفيهاش العيوب دي خالص
وكل الكلام دة كان في 2006

لو الكلام دة اكيد يبقي ولا كلمة بعد كدة ;)

[Ahmed Anwer]

ربنا يباركلك ،،

بسم الله ما شاء الله ،،

أحييك علي حياديتك ،، و أمانتك

[ahmed_gamal]

حرام كفاية انا عايز اشتريها يا رجالة لو حد يعرف يخلصني من عربيتي دي يساعدني علشان اشتريها ...... و الف شكر يا استاذ محمد انا كنت عايز اعرف تقيم واحد العربية بقالها فترة معاه وبتستحمل الشقي ولا لا والحمد لله انت طمنتني ربنا يباركلك ;)

[Anti_virus_abdo]

الف اف شكر علي تقييمك الجميل ده

[ahmed ismail]

العربية معايا

بصراحة لو رجعت بتفكيرى تانى حشترى بروتون و انا مغمض

انا بحب العربية ديه اوىىىىىىىىى وفعلا كل يوم بيزيد اعجابى بيها

[Islam_galal]

جزاك الله خيرا
تقرير حيادي و عادل

[Sharky]

شكرا يا باشا على تقييمك

[TAG_Turbo0]

ربنا يباركلك فيها
ويطل شقاوه مش كل مرة ربنا هيسترها معاك
وشكراً على النقد الموضوعى ده

[unounobebo]

اشكرك علي التقييم الجميل ده انا بحب العربية دي جدا بس عايزة أعرف من حد مستعملها فترة طويلة رأيه في كذا حاجة و حضرتك رديت علي معظمها ياريت ترد علي الباقي . يعني انا لو محملة علي العربية في الشنطة جامد و معايا 3 ورا في السفر و مشغلة التكييف و العربية اوتوماتيك هتكون أحسن من الياريس أو الهوندا سيتي (الإتنين 1300 أوتوماتيك) اكيد حضرتك سألت كتير قبل ما تجيب . و كمان عايزة أعرف هل فعلا اللون بتاع التابلوة و عصاية الفتيس الشامبين ده بيقشر و لا إشاعات و كمان هل أبعاد العربية متعبة و لا ممكن ألمها بسرعة و شكرا .

[fahd_628]

جزاك الله خيرا على التقييم الجاااااااااااااامد دة الف الف شكر

[A. Ibrahim]

جزاك الله خيرا على التقييم الجام ;) د و انا كمان نفسي فيها و لكن اخص قسط إلي معاية و اجبها علطول :lol: :lol: :lol:

[mino]

تقييم رائع خاصة انه من واحد معاه العربية من سنة ونصف
الله ينور ;)

[717]

بارك الله فيك

[yasserayad]

روح ياشيخ الله يباركلك
جزاك الله كل خير
رائى الخاص
احد افضل ماكتب عن الجين 2 فى منتدى البروتون كله
انت وضحت كل مايور فى عقول كل من يريد هذه السياره
شكرا جزيلا سيدى الفاضلmohamed el hussien

[hazem_khidr]

بسم الله ما شاء الله يا محمد
بجد تقييم رائع رغم انه طويل لكن الواحد قرأه من اول كلمه لاخر كلمه
بس يا ريت لو تقول متوسط اسعار قطع الغيار عامله ازاي زي الفوانيس و تيل الفرامل و سير الدينامو و الكاتينه و الحاجات دي