Matrix or GEN2 or what?

[kedab2a]

بصراحة يا جماعة انا عايز أجيب عربية سعرها فى التمنينات و بفكر فى الGEN2 أو الMatrix و كنت قرأت عن الGEN2 هنا فى المنتدى أكتر من مرة انها قوية و سريعة وانا شخصيا معجب بيها شكلا وامكانياتا و لكن ناس كتير فى المنتدى هنا بيشتكوا من ضعف الخامات الداخلية للعربية و انا شخصيا رحت لمعرض عربيات و عينتاها من جوه و فعلا حسيت ان الخامات مش أد كده فى التابلوه و الزراير و أ ُكر الأبواب ... بالمناسبة انا مش عامل حسابى أغير العربية قبل خمس أو ست سنين

السؤال دلوقتى هل الخامات ضعيفة فعلا لدرجة تخلينى مجبش الGEN2 و هل الخامات دى تستحمل الأستخدام لمدة تزيد عن ست سنوات ... يعنى سخونة الشمس مش هتأثر على التابلوه ولا الأ ُكر بتاعت الأبواب ممكن تتكسر و هل لو فعلا ضعيفة يبأى أجيب Matrix ولا فى حاجة تانية كويسة ممكن أجيبها وتكون فى التمنينات ؟؟؟
وعندى سؤال تانى عن توكيل الGEN2 و قطع الغيار ... ايه أحولهم و أسعرهم
وشكرا و آسف على الإطالة

[Tamer-Ezzat]

Matrix ... عربية أثبتت وجودها بشكل قوى ... حلوة فى قطع الغيار ... شوية صغيريين وحتلاقى كل الميكانيكية بتشتغل فيها .... سعر اعادة بيع ممتاز .. لو متقبل شكلها هاتها فورا بدون تردد

Gen 2 رائعة يعبها حاجتين ... الوكيل اللى مصر يموت اى عربية يمسك توكيلها وسعر أعادة بيع صدمة ... فميا عدا هذا عربية هايلة

[MoToRiZeR]

لو انا مكانك هجيب جين تو .. بس دي ازواق

شوف ايه عاجبك اكتر و مقتنع بامكنياته و هاته فورا .. لأن في العربيات هتسمع من الناس 100 رأي كل واحد غير التاني

[kedab2a]

Matrix ... عربية أثبتت وجودها بشكل قوى ... حلوة فى قطع الغيار ... شوية صغيريين وحتلاقى كل الميكانيكية بتشتغل فيها .... سعر اعادة بيع ممتاز .. لو متقبل شكلها هاتها فورا بدون تردد

Gen 2 رائعة يعبها حاجتين ... الوكيل اللى مصر يموت اى عربية يمسك توكيلها وسعر أعادة بيع صدمة ... فميا عدا هذا عربية هايلة

شكرا يا t5554983 على الإفادة بس يعنى ايه الوكيل بيموت أى عربية يمسك توكيلها

لو انا مكانك هجيب جين تو .. بس دي ازواق

شوف ايه عاجبك اكتر و مقتنع بامكنياته و هاته فورا .. لأن في العربيات هتسمع من الناس 100 رأي كل واحد غير التاني

أنا فعلا مقتنع أكتر بGEN2 بس اللى مخوفنى موضوع قطع الغيار و سعر اعادة البيع و خامات الطابلوه و الأجزاء الداخليه فى الصالون الضعيفة

[TAG_Turbo0]

نرجع نقول تانى دى فأه ودى فأه تانية خالص
يعنى لو حضرتك عايز عربية عائلية صغيرة بأى الماتريكس
لو عايز عربية شبابية وتنفع عائلية لو معندكش أطفال كتير يبأى الجين تو
وانا شخصيا متحيز للجين تو

[Nile_Storm]

بصراحه افضل جين 2

[Ahmed Anwer]

السؤال المحير دائما ،، أمشي جنب الحيط و لا اشتري اللي يعجبني ،،

الجين 2 بكل المقاييس Best Value for Money ،، ايرباج ، Abs،، موتور حديث 1600 شكل حديث ،، مفيش عربية بكل هذه الإمكانيات و بهذا السعر غيرها ،،

لو هتمشي جنب الحيط اشتري الماتريكس أفضل عربية هيونداي حاليا ،، و كل الناس بتشكر فيها و عربية عمر إنشاء الله ،،

وكيل بروتون عز العرب و ده تقييم واحد قريبي عنده واجا ،،

توكيل فاشل جدا في التسويق و المبيعات و كويس جدا أو معقول في خدمة ما بعد البيع و الصيانة

و لاحظ بنفسك تقريبا عمري ملمحت إعلان عن بروتون في أي ملحق سيارات أو مجلة و لا حتي عمري شفته نزل في معرض من معارض السيارات و لا عروض و لا إعلانات تليفزيون و لا راديو ،،، يعني بيبيع بالبركة

و لو دخلت علي موقع بروتون هتلاقي موديلات كتير جدا ،، حاليا هوا مش جايب غير الجين 2

فواضح إنه عنده خلل ما في سياسته التسويقية ،، رغم إني شايف إن بروتون ممكن تكون الحصان الرابح في مصر ،، سمعة كويسة عشان الناس شايفة الويرا موديل 99 حالتها لسه ممتازة ،، أسعار أقل من أسعار الكوري بكثير ،، تقريبا بسعر الصيني ،،،

فحضرتك اختار بقه تمشي جنب الحيط و لا تاخد المغامرة ( البسيطة )

[الريس]

العربيتين كويسين جدا.. و متقاربين في التقييم مع اختلاف الاستخدام
انا احترت كتيييييييييير بينهم
لو عاوز عربية ستايل و جري و حركات .. هات جين تو .. و متفكرش تبيع بسرعة ابدا.. و حافظ على التابلوه لان الالوان بتغير و بتتقشر .. بس كثبات وتسارع .. ممتاااااازة


لو عاوز انتشار و سعر بيع و وسع و اسعار و انتشار قطع غيار ... هات ماتريكس

انا عن نفسي اخترت الماتريكس

لاني عارف الكوري و الماليزي مش هيعيشو معايا طول العمر 3 سنين مثلا حلو اوي.. ده غير اني بحب اغير .. ومش عاوز اخسر كتير .. و طبعا الماتريكس سعرها حلو ما شاء الله في السوق

و برضو خفت من غباء السواقين .. مش كل شوية هالبس في الحيط عند عز العرب علشان فانوس و لا اكصدام
ده بالظبط اللي هو المشي جنب الحيط .. و شايفه مش حاجة وحشة اوي في بلادنا ..

الحاجة التانية ..الوسع .. بجد فظيع ... و لو انه على حساب الشنطة .. بس في اوبشن انك تقدم الكنبة الخلفية لقدام شوية و هتفرق معاك كتير في وسع الشنطة .. اما لو حابب تنقل حاجات كبيرة فيها .. تحفة ... تقفل الكنب خالص وتلزق الظهر بالقاعدة في الكرسي اللي قدامك .. و حمل يا ريس

اما موضوع خامات التابلوه .. هي احسن من الفيرنا .. واللانوس .. والنيو اكسنت .. و ممكن تقول زي الافيو .. بس اكيد التابلوه مش بجمال تابلوه الجين تو

هي عربية متعددة الاغراض .. و علشان كده بتلاقي فيها افتكاسات كده زي 3 فيش ولاعة و حوامل اكواب لكل الناس و اماكن تخزين خفية و كتيرة ..
بالمناسبة الجين تو مفيهاش درج تابلوه + فتح الكبوت من عند الكرسي اليمين

يا رب اكون افدتك

[fahd_628]

جين 2222222222222222222

[badblood]

جين 2 من غير كلام ولا تفكير

[tutankhamoun]

موضوع خامات التابلوه لا يعيب العربية لأن موتور الجين 2 أفضل من موتور الماتريكس
تسارع عالي ......... قوة الموتور ....... وسع العربية من الداخل ..... الجين 2 أوسع
شنطة العربية أوسع .......... عائلية و رياضية و شبابية في نفس الوقت
التوكيل جيدا جدا في الصيانة و محترمين
و لو قارنت توكيل عز العرب بتوكيل غبور في خدمة ما بعد البيع ...... عز العرب يكسب و ده ممكن يكون راجع للضغط الشديد على غبور
الماتريكس دي ما بتعجبنيش خالص من ناحية الشكل ( أذواق )
و برضه اشتري العربية اللي تستريحلها
و على فكرة البروتون ماركة محترمة جدا و تدخل في فئة الأوروبي على طول ( في جودة الأوروبي ) ........ زي ما هيونداي بأعتبرها في جودة الأوروبي ( شركة هيونداي شركة محترمة جدا جدا جدا )
على العموم ....... أنا أرشح جين 2

[dreslam]

الماتريكس عربيه عائليه محترمه لو بطلنا نتكلم على غبور وعالكماليات الاساسيه اللي شايلها منها وكمان استثنينا الموديل الاوتوماتيك اللي التسارع فيه مش قد كده واستهلاك البنزين فيه مخيف شويه

الجين 2 عربيه مغريه وكماليتها تمام وسنه بعد سنه عيوب التقفيل بتقل تابلوهها مميز وسواقتها متعه
بلاش تفكر في سعر اعاده البيع دلوقتي وهات عربيه وبعد خمس سنين مثلا فكر في التغيير ساعتها معظم العربيات حتبقى في حد واحد لان انا شايف ان الموديلات الجديده حتتطور وتزيد وده حيخلي كل المستعمل فئه سعريه متقاربه.