::: أعطـــال الميجـــان من مالكى السيارة :::

[Sharky]

أنا رأيت إن من كتر الإشاعات اللى طلعت على الميجان من الأعطال اللى ظهرت فيها إننا نعمل موضوع فى المنتدى يكتب فيه ملاك الميجان فقط جميع الأعطال اللى ظهرت فى العربية و قطع الغيار اللى إتغيرت بره الصيانة العادية

لذا أرجو من جميع ملاك الميجان فى المنتدى الكتابة حتى يستفيد الاخرين من تقيمنا للعربية و الأعطال اللى ممكن تظهر فيا و أعراض ظهورها

[Sharky]

بالنسبة ليها أنا شارى السيارة من 4/2005 و تم تغيير الاتى خارج الصيانة العادية:

1- البطــــــــــارية
المبلغ :
بدون مقابل - داخل الضمان
ثمن البطارية العادى فى السوق - لو خارج الضمان

الأعراض :
لما تيجى تشغل العربية حتلاقى العربية ما بتشتغلش و تلاقى المساحات بتشتغل لوحدها و السنتر بيعلق و ممكن ما يقفلش العربية .



2-كويـــــــــل الموبيــــــنة
المبلغ :
بدون مقابل - داخل الضمان
550.00 جم - لو خارج الضمان

الأعراض:
لما تيجى تشغل العربية حتلاقى العربية بتترج و تحس إنها بتقطع منك

[ahmed_gamal]

موضوع رائع فعلا احيك عليه يا شاركي باشا انا بحب العربية ديه وفي ناس كتيير خاييفين وبيخوفوني منها ياريت كل واحد معاه ميجان يدخل ويعمل زي حضرتك كده

[د.محمود صلاح]

تيل الفرامل
تم تغييره عند 21 ألف كم ( الأمامى ) بعد 7 شهور استخدام
السعر :
340 شامل الضريبة

الأعراض :
صوت حك التيل فى الطنابير

بس.......
( ركبت الميجان لمدة شهرين والآن أدخر لكى أشتريها مرة أخرى )

[Amr_Moh]

ana ma3aya megan 2005 47000km
غيرت فيها خارج الصيانة
- متور مية اربة المساحة
- علبة دركسيون
على حساب الوكيل

اما ما تم تغيرة على حسابى:
- كوتش goodyear التركى الرديء @42000km
- ال بطرية

[Sharky]

ana ma3aya megan 2005 47000km
غيرت فيها خارج الصيانة
- متور مية اربة المساحة
- علبة دركسيون
على حساب الوكيل

اما ما تم تغيرة على حسابى:
- كوتش goodyear التركى الرديء @42000km
- ال بطرية

عمرو باشا ممكن تقولنا إيه الاعراض اللى خلتك تعرف علبة الدريكسيون عايزة تتغير ومتور مية اربة المساحة

هل الكاوتش اللى كان راكب فيها قبل ما تغييره كان goodYear و لا اللى إشتريته هو GoodYear لإن اللى نازل فيها معايا هو برجيستون

[rady]

شكرا لك يا sharky غلى هذا الموضوع الرائع ... وياؤيت لو تحطوا موضوع مشابه في معظم العربيات المشابهة ، زي السيفيك ، 307 ، وغيرها

وشكرا للمتفاعلين مع الموضوع .

[hero]

فعلا الموضوع دة اكثر من رائع وهيوضح مشاكل العربية لو فعلا فيها مشاكل...

[Abu Aly]

ابوخ مشكلة تعبانى فى الميجان - موديل 2001 - هو اعطال الكويل ( الكويل مجرد بوبينة صغيرة
و يوجد 4 كويل لكل بوجية ) فجاءة تلاقى العربية بتقطع و تنتش بشكل مشابه لعطل بوجيه عادى .. المشكلة ان سعر هذا الكويل اللعين كان فى التوكيل فى المقطم 600 + 25 مصنعية لتغيير كويل .. !! مجرد بوبينه صغيرة حجمها يزيد قليلا عن البوجيه ..طبعا سعر مبالغ فيه جدا بلا مبرر ..

لكن مؤخرا بعد تعاملى مع ورشة عثمان بفيصل وجدت ان تغيير الكويل يكلفنى 420 فقط ( 400 كويل و 20 مصنعية ) .. معرفش هل سعر الكويل نزل فى التوكيل ام ان عثمان يستخدم قطع غيار غير اصلية ؟ - هو واخد رسمى توكيل صيانة من رينو - لكن بالتجربة وجدت انها جيدة كالاصلية ..
خلال 6 سنوات غيرت تقريبا الكويل 6 او 7 مرات .. !! و فيما عدا هذه المشكلة لم اصادف اعطال الا نادر جدا .. سمعت ان هناك بعض السيارات الانجيكشن بها كويل واحد مش 4 زى الرينو ..هل ده معلومة صحيحة ؟ و هل يوجد سيارات لا تستخدم الا البوجيهات فقط ؟ و ايه اخبار هذه الكويلات اللعينة فى الموديلات الاحدث فى الميجان .. هل يتم تغييرها كتير والا العيب ده فى عربيتى انا بس ؟

[Abu Aly]

( الكويل مجرد بوبينة صغيرة و يوجد 4 كويل لكل بوجية )

مجرد ايضاح للجملة السابقة : يوجد 4 كويل .. واحد فقط لكل بوجيه ..

[Sharky]

ايه اخبار هذه الكويلات اللعينة فى الموديلات الاحدث فى الميجان .. هل يتم تغييرها كتير والا العيب ده فى عربيتى انا بس ؟

أنا معرفش هل الكويل بتيغير كتير و لا لأ بس أنا غيرت واحد فقط عند الـ40.000 الف تقريبا

حضرتك بتقول غيرته تقريبا 7 مرات يعنى غيرت الطقم كله (الأربعه) مرتين خلال 7 سنوات ؟؟

[Abu Aly]

بالبحث فى ملف العربية لقيت غيرت 6 مرات و مش عارف هل تم احيانا تغيير نفس الكويل ام
فى واحد او اتثنين متغيروش؟؟ و هل تم تغييره بدون داعى ام لا ..معرفش بصراحة .. انا عملت حتى الان 66000 كم ..

[Sharky]

بالبحث فى ملف العربية لقيت غيرت 6 مرات و مش عارف هل تم احيانا تغيير نفس الكويل ام
فى واحد او اتثنين متغيروش؟؟ و هل تم تغييره بدون داعى ام لا ..معرفش بصراحة .. انا عملت حتى الان 66000 كم ..

يا باشا حضرتك ممكن تعرف هل تم تغيير ه بدون داعى و لا لأ لإن حضرتك ذكرت الأسباب اللى بتؤدى إلى تغيير ه و هى تقطيع و نتشة العربية فكام مرة حصل معاك الموقف دا ؟
و ممكن حضرتك تقولنا غيرت كل واحد على كام كيلومتر ؟

[Abu Aly]

التقطيع و النتشه هى اعراض مشتركة ممكن تنشأ عن البوجيهات او الكويل و يمكن حاجات تانيه و محتاجة لظبط .. الواحد بيسلم العربية فى الصيانه و يقعد زى الباشا يتفرج على التليفزيون و غير مسموح للعميل بالتواجد اثناء الكشف او معرفة سبب العطل او المشكلة ..و فى الاخر بس يقولولوه ادفع يا باشا .. و يدفع الباشا !! .. على فكرة مش رينو بس توكيلات كتير دلوقتى بتستخدم نفس الاسلوب .. اكرام الباشوات جلوسهم فى حجرة مكيفة يشوفوا التليفزيون و مالهمش دعوه بالعربية !

[Sharky]

حضرتك يا فندم لو بتعمل الصيانة الدورية بتاعة العربية فى ميعادها و الأعراض ظهرت مش فى مواعيد الصيانة تبقى بتاعة الكويل فقط لإن فى الصيانة يتم تغيير البوجيهات فهل حضرتك غيرتهم وقت الصيانة ولا مش فى مواعيد الصيانة؟