تجربتي المريره مع الجين 2 و وكيلها الزفت !!!

[liquidator]

السلام عليكم ..
هذه أول مشاركه لي في هذا المنتدي ... أمتلك سيارتان واحده ماتريكس 2005 كوري و التانيه جين 2 2006 و اسمحولي أقول لكم اللي حصلي مع الجين 2 و وكيلها مقارنة بالماتريكس و وكيلها ( غبور ) ...
أولا مشاكل الجين 2 :
بعد ما اشريت الجين 2 بشهرين بس ظهرت فيها كل المشاكل دي :
1- زجاج شباك السائق وقع من مكانه و بعديها باسبوع اللي في الناحيه التانيه حصله و كنت كل نا أروح التوكيل يقولولي مفيش قطع غيار و قعدوني كده ست شهور و لما زهقت في الأخر زعقت معاهم شويه قاموا فكولي مكن زجاج من عربيه زيرو ... ( شفت مسخره ـكتر من كده ) !ّ!
2-فرامل اليد سقطت من مكانها و عملوها و سقطت تاني و كل مايعملوها تسقط تاني و هي دلوقتي ساقطة برده !!!
3-لمبة حساس الشكمان ( O2 sensor ) نورت و لما رحتلهم و حطوها علي الجهاز , الجهاز كتب خطأ في حساس الشكمان و مع ذلك مارضوش يغيروا الحساس و قالولي الجين 2 كده عادي !!!
(برده شفت مسخره أكتر من كده )
4-كنت بسمع خبطه في الدريكسيون لما كنت بحود يمين أو شمال و رحتلهم كذا مره لحد ما غيرولي المساعدين الأماميين في الأخر !!!
5-ده غير طبعا الفينيش وما أدراتك ما الفينيش ... جلد الأبواب مش مظبوط و الأبواب مفارقه و بتدخل هوا و تراب ..
6- ده غير بقي ان عمرك ما هتلاقي قطع غيار في التوكيل ولو لقيتها بتبقي غاليه جدا ...
يعني سألتهم علي تيل الفرامل الخلفي قالولي ب 500 جنيه و ياريته موجود ,
سألتلهم علي كف مرايه يمين قالي 80 جنيه و ياريته موجود ,
مقص أمامي يمين ب 600 جنيه و طبعا مش موجود ..
7- يعني ايه مركز خدمه مافيهوش جهاز ضبط زوايا ؟ !!! ( مش دي مسخره )
8- يعني مركز خدمه أروحلهم الساعه 7 الصبح و أبقي العربيه رقم أربعه و يخرجوني 7 بالليل علي تغيير زيت و تربيط عفشه ... مش دي مسخره ؟ !!!

قصتي مع الماتريكس تختلف تماما !!!
اشتريتها يوم 10 شهر 4 سنة 2005 و لحد دلوقتي 62000 كلم من غير أي مشاكل ... التوكيل لحد دلوقتي مش تاعبني في حاجه و أسعار قطع الغيار معقوله يعني تيل الفرامل ب260 جنيه مش ب 500 مثلا ...
علي ال35000 كلم واجهتني مشكله حسيت بان استهلاك البنزين زاد و ريحة العادم وحشه و لما رحت التوكيل غيرولي الكنترول يونيت و حساس الشكمان في الضمان ... و دول سعرهم حوالي 6000 جنيه ... غيروهملي ببلاش !!!!
و علي ال 50000 كلم حسيت ان كرسي السواق المكنه بتاعته تعبت من سوق الاستخدام و مش هتصدقوا رحتلهم و غيرولي شاسيه الكرسي كله ببلاش في الضمان و دا سعره 4200 جنيه بالضبط ( Track ASSY DRIVER SEAT ) ...
شوفوا الفرق في العربيات و التوكيلات بقي و قرروا انتوا و أقسملكم بالله كل اللي أنا قلته صح ...

[magedfarid]

بصراحه تجربه مؤلمه - انا بافكر اشتري عربيه اليومين دول وحصرت اختياراتي في عربيتين النيسان صني و الجين 2 بس مش عارف بعد تجربتك دي ساعيد التفكير مره اخرى
بس منتظرين رد من الاخوه مالكي الجين 2 يمكن يساعدوك ويقولوا رايهم برضه

[liquidator]

شكرا أخي علي المرور و الاهتمام و اوعي ترمي فلوسك في قطعة الخرده دي ...
باعتزر ليك و للأعضاء الأخرين عن بعض الغلطات الاملائية لاني كنت باكتب بسرعه ... شكرا جزيلا لمروركم

[IAbdou]

لله يكون فى عونك بس غبور بردة من التوكيلات الزحمة والمقرفة بعض الشيئ
ولاكن عندة أستك من قطع الغيار كتير
الحاجات الصغيرة بس ممكن تتعب علشان تجبها زى الكلبسات
ولاكن باقى قطع الغيار زى الفل

[ahmed_gamal]

انا واحد صاحبي معاه جين 2 2007 ما شاء الله عامل بيها 10000 كيلو و مافيهاش حاجة واحدة من اللي حصل معاك ده وانا دايما معاه العربية ما شاء الله زي الفل انا مستغرب اوي من كلامك بصراحة

[tutankhamoun]

أنا العربية الجين 2 معايا بقالها شهر تقريبا و عامل بيعا حوالي 800 كم و لم تظهر أي مشاكل على الأطلاق
و لكني لسه في البداية !!!!!!!!
و لكن سمعة العربية في انجلترا زي الفل و الناس ما بتشتكيش كدا
و معايا واحد صحبي معاه العربية من 2005 و مفيش فيها أي مشاكل خالص و لا مشاكل في التوكيل كمان

و لكن أنا مصدق حضرتك و ممكن فعلا تكون العربية اللي أنت اشترتها هي اللي فيها المشاكل زي أي منتج أخر

[Ahmed Anwer]

أنتا صدمتنا ،،

أنا كنت بقول عربيتي القادمة إنشاءالله بروتون ،،

هوا عموما غبور رغم عيوبه بس فعلآ قطع الغيار متوفرة بكميات كبيرة عمرك ماتقلق و اسعار معقولة و ضمانه حقيقي

اللينك ده ،،

http://www.proton.com/about_proton/p...orld/egypt.php

فيه موبايل و إيميل أ / حبيب ابراهيم حبيب ،، المدير الإقليمي لبروتون في مصر ،،

اللي دايما كان بيكلم عليه م / أبو عبد الرحمن ،،

يمكن يساعدك أو أي حد من ملاك بروتون يحتاجله

[الريس]

ياللهول .. بص يا سيدي الفاضل .. اكيد حضرتك حظك وحش اوي او العربية كانت مشمومة
انما موضوع قطع الغيار .. و حاجات بسيطة في التقفيل ده حقيقي
انا معاييش جين تو بس اصحابي مبسوطين منها عموما ... ماعدا النقطتين دول

[Hossam_Hassan]

فى كام نقطة عاوز استوضحها من حضرتك علشان الأمور تبقى واضحة لكل واحد بيفكر فى شراء العربية دى:

- يا ترى حضرتك بعت أى شكوى للشركة الأم بسبب تصرفات الوكيل و لو حصل، ممكن تحكيلنا ردهم
- يا ترى أسلوب سواقتك و المناطق اللى حضرتك بتروحها اثرت فى العيوب اللى حكيتها
- يا ترى قابلت حالات مشابهة من المشاكل مع ملاك أخريين فى التوكيل؟ و ياريت تحكيلنا عليها

شكرا مقدما

[Sharky]

أن ابرضه ليه واحد صاحبى معاه الجين 2 و مبسوط من أداءاها و الاوبشنز اللى فيها لكن اللى منكد عليه إن تقفيل العربية وحش و برضه عامل زيك كل شويه حاجة تبوظ او تتفك و التوكيل تعامله زى الزفت