تكيييف شاهين 1400

[ymoniem]

هل تركيب تكييف ع الشاهين 1400
1- يؤثر علي كفاءه السياره و الموتور
2- و ياتري استهلاك البنزين بيزيد بنسبه كام
3-ماهي النصائح التي يجب اتباعها عن تركيب التكييف
4-لماذا لايمكن الابقاء ع الدفايه (السخن) عند تركيب التكييف

[sab3aawy]

[sab3aawy]

هل تركيب تكييف ع الشاهين 1400
1- يؤثر علي كفاءه السياره و الموتور

لا يوثر بدرجة ملحوظة، انا ركبته على الشاهين 1400 وعملت بيها 100 الف كيلومتر على مدى 4 سنوات والتكييف راكب بدون اى مشكلة لا فى الموتور ولا فى التكييف

2- و ياتري استهلاك البنزين بيزيد بنسبه كام

لا يتغير بنسبة ملحوظة، مش هاتحس بفرق كبير فى البنزين

3-ماهي النصائح التي يجب اتباعها عن تركيب التكييف

1- ركب تكييف ساندن اليابانى ، كباس ساندن وسرينتينة ساندن وكويل داخلى(مبرد الصالون) ساندن، يجب الإنتباه ان مقاس الكويل يجب ان يكون مناسب للصالون، فيه بعض الناس اللى بتركب تكييف للشاهين بيركبولها كويل صغير (على ما اذكر كان رقمه 202) في حين ان الكويل المناسب لها رقمه 404 برضه على ما اذكر

2- استعمل خراطيم التكييف من نوع دايكو(ايطالى)

3- بتوع التكييف اللى بيركبوا تكييف للشاهين بيعرفوا يستعملوا زراير التابلوة الأصلية بتاعة الشاهين، فيتم استعمال رزار مروحة الصالون لتشغيل مروحة التكييف(سرعات 1و2و3) كما يتم استعمال زرار الريسايكل الموجود فى التابلوة لتشغيل او فصل الكباس، لا تجعل صنايعى التكييف يستسهل و يركب لك ازرار خارجية لأانها بتبوظ منظر التابلوه

4- اللى هايركبلك التكييف لازم يظبط ضقيرة الكهرباء بحيث ان الكباس مايقومش غير لما تكون المروحة الداخلية شغالة ، سواء 1 او 2 او 3، برضه بعض الصنايعية بستسهل انهم يعملوا كل واحد على حدة وده ممكن يحرق الكباس او يربى تلج على الكويل

5- خراطيم الهواء بتتوصل على الأربعة فتحات بتاعة التابلوه، الصنايعى الشاطر بيوصل الخراطيم بدون ما يبوظ الوظائف الأصلية لفتحات التابلوه، يعنى الفتحتين اللى فى النص لهم بكرة فتح وغلق بتفضل شغالة، والفتحتين اللى فى الجنب كل واحدة لها بكرتين، واحدة بتفتح الريسايكل او تلغية، والتانية بتخرج الهواء من التابلوه فى وجه الراكب او انحةي الباب الجانبى، لازم بعد التركيب كل الحاجات دى تفضل شغالة، فيه صناعية عايزة الحرق بيروحوا قاطعين الميكانيزمات دى كلها ويلزق الخرطوم فى الهواية وخلاص، فلازم تنبه على الصانيعى انه بيوصل خراطيمه من قبل الميكانيزمات دى ومابيوظهاش ، ولو قاللك مايفنعش شوف غيرة لانى مـاكد انه ينفع لأنى عملتها كدة فى سيارتى السابقة

6- بالنسبة للفتحتين الجانبيتين فى التابلوه دول لهم خراطيم جاهزة، كل اللى بيعملة الصانيعى انه بعمل وصلة بين خرطوم الكويل وخرطوم الفتحة من غير ما يقطع اي حاجة

7- الشاهين تكييفها بيركب بدون فك التابلوه، وأؤكد بدون فك التابلوه، الكونسول اللى فى النص فقط هو اللى بيتفك، متروحش لصنايعى غشيم عايز يستسهل ويفك لك التابلوه

9- بعد التركيب مفروض ميكونش فيه اى خراطيم هواء باينة من تحت التابلوه،

10- الصانيعى لازم يضبط دايرة الكهرباء بحيث ان لما التكيف يشتغل كل من مروحة السربنتينة ومروحة الردياتير يشتغلوا مع بعض وليس واحدة فيهم علشان العربية ماتسخنش

11- مكونات التكييف اللى انت هتاخدها هى:
داخل الصالون: كويل صالون(مبرد الصالون)-ثرموستات يركب على كويل الصالون-عدد 4خراطيم هواء لتوصيل الكويل بفتحات التهوية-خرطوم فايض المياه لتفريغ مياه التكاثف من الكويل حتى لا تغرق الصالون،
فى غرفة المحرك:كباس-قاعدة كباس ومساميرها-طنبورة اضافية تركب على الموتور لتدوير الكباس-سير تكييف-مجموعة خراطيم الفريون-فلتر فريون-سربنتينة التكييف-مروحة سربنتينة التكييف-ضفيرة الكهرباء تشمل السلك وعدد 3 كتاوت وفيوز-مثبت سرعة سلانسيه لو عربيتك كاربراتير(غير مطلوب فى حالة الإنجكشن)-شحنة الفريون

12- قبل القيام بشحن الفريون لازم الصنايعى يختبر عدم التسرب فى الدورة ويشاهد من خلال كبس الدورة بالهواء ومراقبة ضغط الدورة لمدة لا تقل عن عشرة دقائق، يجب عدم هبوط مؤشر مقياس الضغط خلال هذة الدقائق

13- يقوم الصانيعى بسد مدخل الكويل الأصلى للسيارة، يجب ان يسده لك بقطعه صاج مجلفن، اياك ثم اياك ان يقوم بسده بقطعة خشب ابلاكاش، قطعة الخشب ستتحول الى نشارة خشب فى خلال شهرين او تلاتة

14- عند الغاء خط المياة الداخل الى دفاية التكييف يجب ان يقوم الصانيعى بتوصيل الخط الداخل الى الخط الخارج بقطعة خرطوم كاوتش (اسود من نوع جيد) وربطها جيدا ب 2 قفيز، اياك ان يقوم الصنايعى بسد الداخل والخارج بقطعتى خشب او عمل طبة من اى نوع، وصل الداخل فى الخارج انضف

4-لماذا لايمكن الابقاء ع الدفايه (السخن) عند تركيب التكييف

لا يمكن الإبقاء عليها لانه لابد ن تفريغ مكانها حتى يثبت به كويل التكييف( فى نفس جحمها تقريبا او اكبر منها) ولا مكان له سوى مكان الدفاية وكذلك لانه يتم توصيله بالهوايات بدلا منها

[شريف]

ممكن الواحد يركب تكييف مستعمل للشاهين؟
وده يكلف كام تقريبا؟

[ymoniem]

جزاكم الله خيرا ع الاجابه الكافيه ..
انا من سكان المعادي فهل توصي بمكان محدد يراعي كل هذه الامور
و لا اروح اركب في توكيل ساندن تقريبا 3500 جنيه

[sab3aawy]

انا من سكان المعادي فهل توصي بمكان محدد يراعي كل هذه الامور
و لا اروح اركب في توكيل ساندن تقريبا 3500 جنيه

افضل انك تعمله فى توكيل ساندن،

على ان تكون واقف معاهم ومتابع كل النصايح اللى انا قلتلك عليها علشان تحصل على تكييف مثل تكييفات الفابريكة

ممكن الواحد يركب تكييف مستعمل للشاهين؟
وده يكلف كام تقريبا؟

ممكن وهايتكلف حوالى 1500 الى 2000 جنيه حسب حالة المكونات

[شريف]

مكن وهايتكلف حوالى 1500 الى 2000 جنيه حسب حالة المكونات

شكرا و ممكن فين الواحد يسال؟
وهو فيه ساندن ده مستعمل ولا انا هركب استيراد :?:

[abou_sama]

احسن مكان نركب فية فين علشان ميحصلش مشاكل فى العربية

[حسام كرم]

استاذى الفاضل سبعاوى
الشرح وافى وجبار ولا يخرج الا من سبعاوى
ولى سوال لك هل من الممكن تنفيذ ما قلتة على السيارة اللادا 1600 سى سى
وهل تنصح بتركيب تكيف فى اللادا ام لا علماً بان التوكيل ينزل اللادا الان بالتكييف
وهل تنصح بتركيبة فى التوكيل ام خارجة
وما هو عنوان توكيل ساندن
وشكرا جزيلاً

[nabilaly]

الاخ الاستاذ حسام كرم
العنوان 62شارع النصر المعادى الجديده ، بجوار سيراميكا كليوباترا المسئول المهندس / سمير موبيل0122113921
تحياتى
نبيل عبد الحميد
ياريت الاخ المشرف يثبت هذا الموضوع لاهميته الصيفية شكرا للاخ سبعاوى شكرا الاخ حسام

[abdofawzy]

السلام عليكم
انا لسه بايع عربيتي شاهين 1400
-
2001
كنت مركبلها التكييف و الحمدلله كان حظي كويس لأنه كان متركب كويس و كان نوعيه ممتازه
كان ياباني بس مش فاكر اسمه
كان ماشاء الله مريحني جدا طبعا ما كنش زي العربيات الياباني بس كنت مقتنع بيه خصوصا موجة الحر الي فاتت ربنه لا يعودها :roll:
يعني لو تم تركيب نوعيه كويسه + المتور مظبوط كويس ان شاء الله هيكون ادائه كويس
بصراحه كنت بحس فعلا استهلاك البنزين بيزيد بس ما كنش بيفرق جامد لأن الشاهين استهلاكها معقول في البنزن
عبدالله

[abdofawzy]

نسيت اقول الله ينور عليك يا سبعاوي

[Adham]

فعلا كلام كبير و جميل مايجيش الا من سبعاوي جزاك الله خير و كل سنة و انت طيب

بس انا كان لي سؤال يمكن هو مش في صلب الموضوع يا سبعاوي باشا بس ياريت تجاوبني علية لو تكرمت

هل لو قام صنايعي التكييف بكبس دائرة التكييف هواء للتجربة و تركها لمدة يوم يحدث تلف فيها, يعني الاكسبنشن وفلتر الدراير يتلفوا (يرطبوا) او السربنتينة تملح زي مابيقولوا وللا اية رأيك في الحكاية دي

[sab3aawy]

بالنسبة للسيارة لادا فالتكييف الساندن بيركب فيها وممتاز، وله ميزة عن الشاهين ان فتحاته فى التابلوه فوق مش تحت ودة بيودى الى ان الهواء البارد بيوصل بسهولة لركاب السيارة، وبرضة الصنايعية حافظينه كويس جدا

بالنسبة لموضوع كبس الدائرة لمدة يوم كامل فأنا مش شايف له فايدة كبيرة لأن فعلا لو الدائرة فيها اى تسريب بيبان فى خلال دقائق بعد الكبس ولو قعد 10 دقائق-ربع ساعة بدون تسريب فهيقعد سنوات بدون تسريب ان شاء الله

[Sameh Aziz]

مش عارف اكتب اي تعليق
بس الموضوع جامد مووووووووووووووووووووووووووووووووووووووووووووووووو وووووووووووت

Sameh Aziz