سؤال بخصوص الفيرنا 1600 اوتو

[eng / AhmeD]

السلام عليكم
يا جماعة اللي عنده فيرنا 1600 اوتوماتيك يقولي سحبها عامل ازاي و استهلاك البنزين و صوتها و الفتيس و الثبات و ....................

معلش هتعبكم شوية:o

[Ahmed Anwer]

م / أحمد ،،،،، حبيبي ،،،،

أنا عندي فيرنا أوتو ،،

السحب و لا أروع ،، متحسش بإنها أتوماتيك

استهلاك البنزين علي حسابتي تقريبا 10 أو 11 لتر كل 100 كم

صوتها ،، عالي فعلا بس مش مزعج بالنسبة ليا ،، بس مش واطي ،،

الفتيس ،، حتي الآن مفهوش مشاكل مؤثرة بس طبعا دول يدوب 11 الف كم ،،

كان بس اول ماستلمتها عصاية الفتيس خفيفة اوي ، و خليتهم يتقولها في التوكيل ،

الثبات ،، كالعادة اول ماستلمتها كانت بتحدف و فيه رجة علي سرعة 120 ،،

و اضبطت تماما في التوكيل ،، و اعتقد هتضبط اكتر لما اغير الكاوتش بنوع محترم

الثبات كويس لأنها نازلة عندي بجنوط 14 كوري مش الجنوط المصري ،،

أنا أقصي سرعة جبتها 170 عشان أنا بخاف ،، دي كانت مجرد تجربة ،،

عموما حتي الآن ثلاثة أصحابي استلموا فيرنا الشهرين اللي فاتوا و محدهش فيهم اشتكي من الزوايا ،،

مش عارف ضبطوها في الإنتاج الجديد و لا هما حظهم كده ،،

الميزات إنها بتنزل بكل الأوبشنز ، فوج لايت ، 4 زجاج كهربا ، كاسيت سي دي ، 2 مرايات كهربا ، كنبة قابلة للطي ، لمبة استوب ، اريال كهربا ،، سنتر ، إنذار ، مسند يد ، ساعة ، عداد rpm ، مزيل ضباب للزجاج الخلفي ،

مش عارف ايه اللي زايد منهم عن المانيوال ،،

سؤال أخير ،،،

هتشتري أمتي و هتشتري أيه ؟؟؟

عشان أنا نفسي اباركلك ،،

يا باشمهندس اشتري بقه و خلاص ،، سيبها علي الله ،،،

[Nile_Storm]

كلام استاذ احمد صحيح
الاتوماتيك بتاعها ماشاء الله حلو جدا
توكل علي الله

[eng / AhmeD]

يا حبيب قلبي و الله
انا بقيت بحالات
بس انا كنت قلت في منتدي شيفروليه ((أيام مكانت الافيو رخيصة))
اني هشتري في شهر 5 الجاي ده.......
و ألف شكر علي معلوماتك
علي فكرة المعلومات دي لواحدة قريبتي هتجيبها... مش ليا
بس مين عارف ممكن ارسي عليها في الاخر
و بيني و بينك مش عايز أجيبها عشان أقعد أسألك عنها و أتكلم معاك شوية..كلامك مايتزهقش منه.....

و ألف شكر يا أحمد بيه علي الرد و علي مرورك الكريم
انما هي تعملها كام دلوقتي 73000 ولا اكتر؟

[Ahmed Anwer]

لأ يا حبيبي 73 ده كان زمان ،،،

أنا اشترتها بكده ،،

دلوقتي 76 حسب اخر سعر عندي من التوكيل ،، و قليلة جدا

نصيحة افضلها في الفئة دي تشتري جيتز كوري ،، ممتازة و نفس وسع الفيرنا بس الشنطة

أو سيريون بس تستحمل ارتباطها الروحي بالتوكيل فقط و انتشارها الضايع

أفضل من التقفيل المصري ،،

معلهش الواحد لازم يبقي صريح و يقول الحقيقة ،،

الفيرنا رغم إنها كعربية ممتازة و انا بقولها في كل رد ،، عيوب التقفيل فيها سخيفة ،،،،،

صحيح بتبقي حاجات بسيطة بتضبط في الضمان ،، ( و ده أنا عارفه قبل ماشتري ) بس أكيد عيب مش بسيط ،،

و بصراحة مش متفاءل بتقفيل الأفيو بعد ما شفتها عند منصور لأني كنت شفت الأفيو الكوري ،،

مفيش وجه مقارنة ، حسيتها من أول ما قعدت فيها ،،

[eng / AhmeD]

76000 ؟؟؟
لا كده كتير عليا و علي الفيرنا
خلاص هفوق من احلام اليقظة بتاعت الاوتوماتيك
و اخليني مع عامة الشعب المانيوال
و نشوف هترسي علي ايه

[ahmed]

بالتوفيق ان شاء الله وأ/احمد انور اراءه دائما كويسه وحيادية الصراحه بس هو بيزهق من كتر الاسئله اصلى انا زهقته زيك قبل كده :) بس بعدها جيبت افيو سبحان الله

[Ahmed Anwer]

بالتوفيق ان شاء الله وأ/احمد انور اراءه دائما كويسه وحيادية الصراحه بس هو بيزهق من كتر الاسئله اصلى انا زهقته زيك قبل كده :) بس بعدها جيبت افيو سبحان الله

يا باشا ،، انتا بتحرجني بذوقك ،،

بعدين أنا عمري زهقت من أسئلتك ؟؟؟

هيا كل الحكاية بس إني ببقي شايف الدنيا بسيطة ،،

و يعني حتي لو الواحد اساء الإختيار هيحصل ايه ؟؟

هيا عروسة هاجوزها ؟؟ و ميشهينفع اطلقها عشان العيال ،،،

ههههههه ،،،،

[ahmed]

ههههههه يا باشا انا شفتك قاعد قلت لازم انكشك بس ده انت حبيبى يا باشا ومع ذلك انا بحب اقضى معظم وقتى مع الهيونداوية

[Nile_Storm]

صحيح بامانه شديده استاذ احمد من اساتذتي هنا و هو اللي علمني كل حاجه تقريبا عن الفيرنا هنا من ساعه التفكير قيها لقبل الاستلام بايام ااهه