الياريس ؛؛؛ من الألف الى الياء ؛؛؛

[Abonora]

أخوانى الافاضل ملاك الياريس
اتمنى منكم تجميع خبراتكم و تجاربكم الخاصه بالياريس فى موضوع واحد
من اول يوم استلام السياره
يعنى مثلا الاشياء الواجب مراعتها اثناء قيادتها لاول مره
طريقه التسخين
نوع البنزين - نوع المياه - شرح للمبات - عداد لفات الموتور
طرق العنايه بالسياره ( الفرش و انواعه و اسعاره - الدواسات كذلك - اى شىء اخر يجب علينا فعله)
ما هى طريقه تليين العربيه ( السفر مثلا - او السير عالهادى لفترات طويله )
و كل شىء يخطر ببالكم ؛؛
و شكرا

[KiNgMaX]

طيب انا هبتدى معاكى فى الموضوع ده على قد ما أقدر وان شاء الله ابقى اكمل تانى بعد كده
اولا بالنسبة للى هتستلميه مع العربية :
1 - اهم حاجة الإفراج الجمركى والمبايعة
2 - العربية ماتكونش ماشية كتير (انا عربيتى كانت عاملة 15 كم بس )
3 - طفاية سجاير وولاعة ومفتاح ريموت و2 مفتاح عادى
4 - الكتالوج والضمان وكان فى جلدتين صغيرين كده مش عارف بتوع ايه
5 - غطاء صغير بلون العربية بيركب مكان الشدادة اللى بتبقى فى العربية من قدام ومتنسيش الشدادة دى بتبقى عبارة عن حتة حديده بتركب فى العربية من قدام عشان تتحب منها
6 - جراب جلد بيبقى فيه شوية عدة ( مفك ومفتاح وشوية حاجات )
7 - الكوريك وده بيكون افل كرسى السواق ( لما تستلمى ان شاء الله ابقى اشرحلك بيطلع إزاى )
8 - استبن و4 طاسات بيبقو فى الشنطة

* بالنسبة للتلين ده بيبقى فى الالف كيلو الاولى وهو بانك متقرصيش على العربية يعنى تنقلى على طول عند سرعة قلية و rpm قليل ( يعنى متخليش صوت العربية يعلى )
والسرعة عموما فى التليين متزوديش عن 80 او 100 بالكتير
وتشغيل التكييف يكون فى اضيق الحدود او يفضل ماتشغليهوش اول 1000 كم

* ال rpm ده عبارة عن عداد جنب عداد السرعة وده بيحسب عدد لفات الموتور يعنى الحمل على الموتور والمفروض انه بيحددلك امتى تنقلى على السرعة الى بعدها ( المفروض لما يوصل ل 3 تنقلى على السرعة الاعلى أو لما يوصل ل 2.5 فى التليين )
هتلاقى فى اخر العداد منطقة حمرا عند 6 و 7 المفروض متوصليش العداد عند المنطقة الحمرا عشان هيكون غلط على الموتور

*البنزين يفضل طبعا 92 وتفولى قبل ما البنزين يخلص يعنى فولى لما يبقى فاضل شرطتين متستنيش الشرطة الواحدة
طبعا عداد البزين فى الياريس عبارة عن شرط ديجتال زى بتاعة شحن الموبيل مش مؤشر

*الفرش ضرورى تعلمى فرش فوق الاصلى لان اللون البيج بينوسخ بسرعة جدا
أنا عملت فرش جلد بيج x أحمر اتكلف 650 جم والسعر بيختلف حسب الخامة والسروجى ممكن تعمليه اقل من كده

* هتحتاجى تشترى طقم دواسات ويفضل تشتريها بيج عشان تمشى مع العربية وياريت تجيبى الى بتبقى حتة واحده ورا لان الياريس من ورا مافيهاش مقب ( انا جبتها بحوالى 100 جم )

كفاية كده دلوقتى عشان ايدى وجعتنى وعندى مذاكرة وان شاء الله لو افتكرت حاجة تانى هقولك واى استفسار يدور فى بالك قوليلى وانا تحت امرك

[Abonora]

شكرا يا كينج
معلوماتك جديده عليا و يا ريت تكمل فى اوقات فراغك بعد المذاكره

[aya]

غطاء صغير بلون العربية بيركب مكان الشدادة اللى بتبقى فى العربية من قدام ومتنسيش الشدادة دى بتبقى عبارة عن حتة حديده بتركب فى العربية من قدام عشان تتحب منها
هو الغطاء دة ممكن نشترية اصل بتاعى وقع او اتسرق اللة اعلم ابة الى حصل فية

[hazem_khidr]

ممكن و انت في التوكيل تقولي عليه لانه من الصعب تلاقيه.

[دموع الثلج]

بصرررررراحه الموووووووضوووع ده تحفه اااااااوى وعجبنى جدا بس انا مش معايا ياريس وبفكر فيها فعليا وهنتظر مساعدات الاعضاء اللى معاهم ياريس

والف شكر لصاحبه الموضوع وللاخ كينج ربنا يوفقك فى المذاكره وتنجح

[Abonora]

العفوووووو يا دموع الثلج

و أضيف ايضا بعض الملاحظات التى قام بكتابتها حازم خضر فى موضوع سابق :
1.العربيه مش بدور غير لما تحطي رجلك علي الدبرياج
2.اول ما بتشغلي الكونتاكت فيه لمبه التشيك و فرامل اليد طبعا و الاير باج و لمبه الحراره الحمرا
3.لما تيجي تدوري العربيه يدوب تديها سنه مارش بسيطه و هيا اتوماتيك تشتغل لوحدها!! و بصراحه حاجه جميله جدا,
4.لو لعربيه كنت لسه بارده لمبه لحرره الخضرا هيا اللي حتنور و ما ينفعش تمشي بالعربيه قبل ما اللمبه تطفي علشان يكون الموتور مستعد للحركه.
5-البنزين 92 و الميه انا جايب جركن ميه خضرا موبيل
6-بالنسبه للتليين ف انا مش بلين بالمعني المتعارف عليه يعني انا بقرص علي النقلات دلوقتي لحد ل rbm يبقي علي 3 او 3.5 و اول ما جبتها لحد 300 كيلو ما كنتش بزود عن 2 rpm.
بس انا بعمل كده علشان عاوز اخلي الموتور شديد و جاهز للشد ف بفتح المكنه وحده واحده و طبعا بسمع صوتها كويس و بحس بيها .
7-بالنسبه للمرايات ف انا في اي عربيه مش بيعدي 10 ثوان غير لما بكون باصص علي المرايه اللي في النص و المريات الجانبيه لما باجي اكسر يميم او شمال لازم بص و كمان ابص بعيني ور القايم لان الزويه دي ميته المريه مش بتجبها في اي عربيه(ما عدا السيفيك الجديده !!!!!)
__________________
حـــــــــــــازم خــــــــــضر

[mohamed ibiza]

Al Yaris 3rbya 3mlia Gedan Gedan Motor 7amol Ala 7d Kber Shkl Monasb Ab3adha Re5ma Shwya Bs 3ade 3alia Mt7ksh Fi Al Mtbat Lk L Kol 3rbya 3yob 3iob Al Yaris 2 Al Wzn Al 5fif Awe 1040 Kilo W Stability B3d 140 Lw Fi Hawa Msh Htb2a Sabta Lw Mfish Htb2a M3o2la Bs 3momn Al Wa7ed Byshtri 3rbya 3shan W2t Al Gry Ygry B Aman Anma Lw All 3ayezha Msh Bygri Y3ni A5ro 120 140 Ygebha W Ytwkl 3la Allah 3rbya Gamda






















Ibiiiiiiiiiiiiiiiiiiiiiiiiiiiiiiiiiiiiiizzzzzzzzzz zzzzzzzzaaaaaaaaaaaaaaaaaaaaaaaaaaa For Ever

[KiNgMaX]

الياريس من الالف الى الياء ( الجزء التانى )

بما إن الموضوع عجبكم وانا خلصت إمتحانات إمبارح الحمد لله نكمل الوضوع
هبتدى بتصحيح بعض النقط الى كتباها سندريلا

1- التسخين --- لما تدور العربية وهى باردة اللمبة الخضرا هتنور ولكن المفروض منستناش لحد ما العربية تسخن ولكن المفروض ندور ونمشى على طول ولكن بدون قرص على العربية يعنى مجرد تتحكم من الدبرياج لان العربية وهى باردة بتبقى عاطية سنة بنزين وال rpm عالى لوحده أوتوماتيك وبالتالى مجرد مانرفع رجلنا عن الدبرياج العربية تمشى ونفضل على الحالة دى لحد اللمبة ماتطفى وبعدها براحتك

2- التليين --- المفروض مانزودش ال rpm عن 2.5 خلال فترة التليين ( اول 1000 كم كاملة ) وده يعتر ظروف التليين العادية التى تحافظ على العمر الإفتراضى المحرك إنما الطريقة الى زميلنا قال عليها والى سندريللا نقلتها هنا فده يعتبر ظروف تللين غير عادية للحصول على اداء معين للعربية بدون النظر لعمر المحرك
N.B --- المفروض فى التليين انى مريحش الموتور بشكل مبالغ فيه ( يعنى ماتنقلش عند RPM أقل من 2 بغرض إراحة المحرك ) لان ده هيجيب نتيجة عكسية وخير الأمور الوسط

نبتدى بقى بالنقط الجديدة اللى هحاول أفتكرا النهارده :

1- ظبط الكاوتش مكتوب فى الكتالوج المفرض يتظبط على 32 ( كاوتش الياريس BRIDGESTONE )

2- إستهلاك البنزين فى المتوسط جوه البلد 8ل / 100 كم وبتقل طبعا جدا على الطرق الطوالى
ودى اهم ميزة فى الياريس

3- مياه المبرد : المياه المستخدمة مياه حمراء وممكن نستخدم مياه حمرا او اى نوع يعجبك بس انا بفضل الحمرا زى اللى فيها
المياه المفرض نبص عليها كل فترة ( أسبوع مثلا ) نبص على قربة المياه هنلاقى علامة مكتوب عليها FULL المفروض مستوى المياه يكون عندها
أنا عربيتى ماشاء الله من ساعة ماجبتها حتى الان عاملة 8000 كم لسة مزوتلهاش نقطة مياه بإيدى

4- زيت المحرك : طبعا أفضل الانواع هى الزيوت التخليقية اللى بتقعد 10000 كم وبالتالى أمامنا خيارين أولا موبيل وده اللى التوكيل بيستخدمه وهتلاقى كمان أستكير لو فتحتى الكبوت مكتوب عليها ( MOBIL 1 IS THE RECOMENDED ENGINE OIL ) طبعا دى التوكيل حاططها دعاية
النوع التانى ( SHELL HELIX ULTRA ) وده فى أعضاء هنا كتير بتشكر فيه
انا عن نفسى حطيت موبيل على اساس ان اللى الى نعرفه أحسن بس ممكن أغير بعد كده
طبعا فى مقياس زيت فى الموتور بنكشف عليه كل فترة للتاكد ان الزيت فى المستوى المطلوب

5- الباور حتى الان انا مش متاكد اذا كان عادى ولا كهربا بس هو ممتاز وخفيف جدآ

6- الإير باجز : حاجة مهمة عايز اقولها عليهم العربية فيها 2 اير باج واحدة فى الدركسيون والتانية فى التابلوه امام الراكب الامامى وهنا المهم وهو ضرورة عدم وضع اى شىء ( علبة مناديل او دبدوب او اى حاجة تانية ) فى المكان ده من التابلوه امام الراكب الأمامى
والموضوع ده بشوفه كتير فى عربيات ياريس وبيبقى هاين عليا انزل انبه السواق
طبعا خطورة الحاجات دى انه فى حالة لاقدر الله فتحت الإير باج تتحول هذه الاشياء الى قذيفة تؤذى من أمامها ( ربنا يكفيكو شر الطريق وشر الإير باج بس معلش دى نقطة مهمة حبيت أوضحها )
وتلاقو تحذيرين فى العربية بضرورة عدم جلوس اى شخص بشكل عكسى امام الاير باجز يعنى محدش يريح على مكانهم جامد

7-قفل الاطفال : فى نظام امان فى العربية وهو عبارة عن زرار صغير فى الابواب الخلفية بيقى باين والباب مفتوح وبيتغطى مع قفل الباب وده وظيفته قفل البواب الخلفية لحماية الاطفال يعنى لو ظبطنا الزر على وضع LOCK بيخلى الأبواب الخلفية ماتفتحش من جوه حتى لو المسوجر مفتوح ولازم تنفتح من بره بس ( وعلى فكرة بينفع العصابات كمان فى حالة خطف الضحايا عشان ميهربوش LOL )

8- الأبعاد : طبعا وانت جوه العربية مش شايف اى حاجة لا كبوت ولا شنطة ولكن فى اى موقف توقع الاقل للكبوت على ضمانتى ( الكبوت صغير جدا جدا وتقدرو تتاكدو بانكوا تخلوا اى شخص يقف ادام الكبوت وانت جوه عشان تتعود على حجمه

9- الصيانة : أفضل شىء الإعتماد على الوكيل فى كل اعمال الصيانة وفى جدول صيانة للعربية كل 10000 كم ودى ميزة كمان للعربية ان مافيش صيانة 5000 كم ( اول صيانة عند 1000 كم مجانا وبعد كده 5000 , 15000 , 25000 , 35000 , وهكذا )

10- الطاسات : يفضل ربطهم بكلبسات بلاستيك لانهم بيكونو فوق مسامير العجل وبالتالى سهولة فكهم وسرقتهم او يطيرو مع السرعة

11- وزن العربية فعلا 1025 كم فقط وده قليل جدا عشان كده الثبات بيكون مش كويس بعد 140

12- ميزة كمان فى العربية فى حالة فتحا بالريموت وعدم فتح اى من الابواب خلال 45 ثانية العربية تقفل تانى اوتوماتيك عشان لو ضغطت على الريموت خطأ

13- بعد ايقاف الموتور العربية بتديلك مدة 30 ثانية لغلق الزجاج الكهربا بدون الحاجة للتدوير مرة اخرى بشرط عدم فتح اى من البابين الاماميين (ميزة ممتازة على فكرة )

14- احب اوضحلكم ان الياريس دى عربية وسط المدينة الاولى انما مش بتاعة الاداء الخارق يعنى عربية إقتصادية من الدرجة الاولى بس بفخامة

15- حاملات الاكواب : 2 امام السائق والراكب الامامى الى احب اوضحه ان الحاملات دى غدارة ماتحطوش فيها اى كباية مليانة على آخرها عشان مع اى مطب هتلاقو المشروب فى بقكم وبالهنا والشفا ( لازم نتعلم من أخطاء الآخرين )

15- باقى الحاجات عادية زى اى عربية ( التكييف وسخان الزجاج الخلفى والكاسيت )
انا مش لاقى حاجة تانى اقولها دلوقتى واى استفسار أنا تحت أمركم

[bobosssss]

هو فى سؤال بسيط انا كنت شوفت فى كاتالوج الياريس على النت ان فى جالك aux
وموجود تحت الكونسول بالظبط على اليمين عشان لو حد حابب يوصل اى بوود او اى حاجه زيه
بس هو فعلا الجاك دا موجود ولا لأ ؟؟؟؟؟؟؟؟؟؟؟؟؟؟؟؟؟

[bobosssss]

هو فى سؤال بسيط انا كنت شوفت فى كاتالوج الياريس على النت ان فى جالك aux
وموجود تحت الكونسول بالظبط على اليمين عشان لو حد حابب يوصل اى بوود او اى حاجه زيه
بس هو فعلا الجاك دا موجود ولا لأ ؟؟؟؟؟؟؟؟؟؟؟؟؟؟؟؟؟

[hazem_khidr]

لا مافيش جاك بس كان في الكاسيت القديم موديلات 2006
لكن الموديلات الجديده الكاسيت بتاعها متغير و ما فيهوش اي جاك

[bobosssss]

ميرسى يا حازم على ردك
ودا طبعا مايغيرش فى رايى ان الياريس عربيه محترمه جدا

[tafy80]

kingmax أنا كان عندي سؤال عن قفل الأطفال هل موجود في المانيوال الهاف اوبشن؟

[tafy80]

معلش سؤال كمان يعني ايه سخان الزجاج الخلفي؟