شكرا رينــــــو فرنســـا

**Sharky** · 22-01-2008 11:09 PM

أنا ححكى على تجربة ليا حصلت مع توكيل ريـــنو فى مصر و شركة رينو فى فرنسا و عايز أسمع رأيكو فيها

التجربة بدأت صباح يوم الوقفة و أنا بشغل العربية لقيتها بتترج و كإنها متلتة و قلت يمكن باردة قلت أعمل مشوار على السريع و أشوف حتعمل إيه و خلصت المشوار و روحت البيت و برضه زى ماهيه قمت مكلك نمرة الطوارئ و حولونى على المهندس و قال دى حاجة إسمها كويل الموبينة و دول بيبقوا 4 فوق البوجيهات يعنى كل بوجيه له كويل و قالى ممكن يكون واحد أو إتنين أو كلهم فسألته تكلفتهم كام قالى 550.0 جم الواحد فسألت عن سبب عطلهم إيه قالى دا عمر إفتراضى فطلبت منه الحضور للتغيير و فعلا جالى فى خلال 20 دقيقة و بعد الكشف قالى المطلوب تغيير إتنين يعنى التكلفة 1100.00 فقلتله دول المفروض يتغيروا فى الضمان لإنهم كدا باظوا بدرى عن أقل من 40000 الف فقالى إن ضمان العربية خلص لإنى معدى السنتين و الـ 40.000 الف (موديلات 2005 كان الضمان سنتين أو 40.000 الف كم فقط أيهما أقل ) و السنتين خلصوا فحاولت أكلم حد من الإدارة فى التوكيل لكن كان اليوم دا أجازة فإضطريت أدفع الفلوس و قد تم تغيير الكويل المعدل ذو اللون الاحمر و قد أفاد المهندس بأن عمره الإفتراضى أعلى من الكويل الذى تم تغييره ذو اللون الرصاصى و قررت الإنتظار لحد ما أجازة العيد تنتهى .

رحت التوكيل بعد إنتهاء أجازة العيد و حاولت إقناعهم إنها المفروض تتغير على حسابهم لإنها باظت بدرى من وجهة نظرى و فى نفس الوقت يتم تغييرها بدون مقابل للسيارات التى بداخل الضمان لكن بصراحة الناس رفضت بكل أدب و ذوق و قالولى إحنا أقصى حاجة ممكن نعملها لك هى خصم 10% عليهم لكن لو عايز حاجة أكتر من كده ممكن تبعت لرينو فرنسا لإن التوكيل فى مصر مش حيقدر يغير أى حاجة بعد إنقضاء مدة الضمان ببلاش إلا بتصريح من رينو فرنسا

و فعلا خدت الخصم الـ10% و بعد كده إنشغلت تقريبا فترة فى الشغل لحد من إسبوع تقريبا قررت أجرب أبعت للناس بره و فعلا بعت لهم e-mail و شرحت لهم و جهة نظرى فى تغيير الكويلين بدون مقابل لإنى عامل أقل 40.000 كم فقط و فى نفس الوقت يتم تغييرهم ببلاش فى حالة إن السيارة داخل الضمان فتم الرد عليه بعد 48 ساعة بإن الشكوى وصلت لهم و سيتم تحويلها للمختص و سيتم الرد عليه خلال 24 ساعة و فعلا تانى يوم الصبح الساعة 8 صباحا لقيت E-mail جايلى من الأستاذ خالد شرف Deputy Technical Director فى توكيل رينو المقطم بيقولى ممكن تبعت لى رقم شاسية العربية و فعلا بعت له رقم الشاسية و رد عليه بعد ساعتين و قالى إنه سيتم إعتبار الكويلين ضمن Goodwill و بالفعل ذهبت إلى توكيل العبور أفاد بإنه لن يستطيع رد المبلغ لكن سيتم خصمه من الصيانة المقبلة أو عن طريق تغيير الـ2 كويل الأخرين مجانا مع أخد الكويلين الأخرين التى سوف يتم تغييرهم و قد قمت بإختيار تغيير الكويلين بالكويللين المعدل (الأحمر ) مع الإحتفاظ بالإتنين التى تم تغييرهم لإنهم بحالة جيدة (الون الرصاصى )

و هذا هو نص الميل الذى تم إرساله من توكيل رينو فى مصر

Dear Mr Ahmed,
Regarding your megane, this is to confirm EIM will re-imburse you for the value of the 2 coils, against any labour or spare parts service on your car. Kindly present this email and a copy of your invoice when you visit EIM workshop next time.

We have informed Renault Paris of this decision and they accept EIM to make the Goodwill towards valued customer.

Best Regards
Khalid sharafeldin
Deputy Technical Director-Egypt

فى النهاية بصراحة أن معجب برد الفعل الخاص بشركة رينو فرنسا (لكن أعيب عليهم الرد على باللغة الفرنسية رغم إنى باعت باللغة الإنجليزية ) و فى نفس الوقت من التعامل المحترم من رينو مصر و أقتراحهم لى بإرسال e-mail لفرنسا لكى أستطيع تغييرهم بدون مقابل

شكرا رينو فرنسا و شكرا توكيل رينو فى مصر

.

**PRO-DRIVE** · 22-01-2008 11:22 PM

بجد ممتاز :) كل يوم بيزيد اعجابي برينو و نيسان :)

**Hesham A.Megid** · 22-01-2008 11:33 PM

زي غبور بالضبط!!! :d:d

**ASD peugeot** · 22-01-2008 11:44 PM

هي قطع غيار الرينو غاليه قوي كده

**الريس** · 23-01-2008 12:26 AM

كلام جميل جدا .. الله ينور

**tutankhamoun** · 23-01-2008 12:43 AM

إدارة رينو .... إدارة محترمة جدا و هي بالفعل من الشركات المحترفة و التي تحترم عملائها و احلى سلام و تحية لغبور باشا :D

**Dr Ahmed** · 23-01-2008 01:06 AM

القصة بأقرأها كأنها من روايات "ملف المستقبل" ..
حلم دا وللا علم ؟؟؟

**Karim_Monir** · 23-01-2008 11:50 AM

خالد شرف ده الدراع اليمين لمحمد نصير وواحد من التقال قوي في عالم السيارات
وشخصية محترمة فعلا وواضح ان محمد نصير بيعرف يختار الرجالة بتاعتة
يا خسارة توكيل كيا
كان هايتعمل منه حاجة بجد

**mido777** · 23-01-2008 12:30 PM

فعلا رينو فرنسا ناس محترمين ومثقافين جدا جدا

انا والدى كان معاه زماااااااااان عربية رينو 19 وقعدت معاه كتير وكان محافظ عليها كويس وبيعملها صيانة بانتظام والعربية عملت معاه 600.000 كيلو ...........
متخيلين الرقم !!!!!

تخيلوا ان شركة رينو فرنسا بعتت جواب شكر لوالدى لمحافظته على العربية طوال الفترة دية .....

ملحوظة يا أ/ sharky
انا سافرت فرنسا اكتر من مرة وهما بيعتزوا بلغتهم جدا جدا لدرجة انك ممكن تكلم حد انجليزى يبقى فاهم السؤال ويرد عليك بالفرنساوى

-

الموضوع: شكرا رينــــــو فرنســـا

LinkBack

أدوات الموضوع

عرض

-

-

-

-

-

-

-

المواضيع المتشابهه

مفاجأة رائعة من شركة الأمل . تحقق بها الأمل . شكرا .. شكرا .. ثم شكرا .

الحمد لله استلمت اللوجان ورخصت .. تقييم صغير + شكرا رينو+ شكرا داتشيا

الحمد لله اولا واخيرا ........ ثم شكرا رينو ..... شكرا مصر للتأمين

شكرا توكيل رينو العبور- شكرا م/أحمد

شكرا استاذ شنورى شكرا منتدانا العزيز

الكلمات الدلالية لهذا الموضوع

المفضلات

المفضلات

ضوابط المشاركة