أنواع و نقشات الكاوتش النسر

[tutankhamoun]

نسمع من كل إنسان مصري طريقة غريبة في الدفاع عن البلد و الدفاع عن إسم مصر
إذا ذكر أي بني آدم أي عيب من عيوب مصر يتم مهاجمته هجوم شنيع و ضاري بحيث تشعر أنك سترمى بالرصاص في لحظات قليلة
و لكن لا يكون هذا الدفاع المستميت عن الصناعة المصرية التي هي عصب أي اقتصاد و التي يعمل بها معظمنا من مصريين أو أعضاء المنتدى
و النصايح الغبرة اللي كل واحد ربنا بيقدره و يقولها
" أوعى تشتري المصري " تحس أنه بيقول أوعي تشتري اسرائيلي
يا جماعة حرام ............ أتقوا الله في أنفسكم
يوجد الكثير من الصناعات المصرية الناجحة و ذات الجودة الجيدة و المقبولة
منها الكاوتش النسر الخاص بجميع أنواع المركبات
فيوجد أشاعة عنه أنه ليس به نقشات و أن شركة النسر تقوم بإنتاج نقشة واحدة منذ خمسينيات القرن الماضي
و طبعا هذا الكلام غير صحيح 100 %
إليكم أخواني و أخوتي صورتين لمنتجات شركة النسر

[tutankhamoun]

على فكرة أنا كنت مجرب النقشة pyramid في البونتو و كان زي الفل و كان ثبات العربية زي الفل و توقفها عن طلب الفرامل و مقاس الكاوتش ده هو
185 70 14
--------------
موقع شركة النسر
http://www.trenco-tire.com.eg
-------------
أرجوا أن يستفيد الجميع ............ لا تكون سلبي و تتحدث فيما لا تعرف و تعيب صناعة بلدك ....... على الأقل ...قل لا أعرف

[sab3aawy]

مع كامل احترامى لوطنتيتك لكن فعلا الوطنية ليس مبررا للدفاع عن منتج من اسوأ ما يمكن، انا يمكن كما ذكرت قبل كدة احرص تماما على شراء المنتج المصرى وكل السيارات الزيرو اللى انا اشتريتها تجميع محلى وكل اجهزتى فى البيت صناعة مصرية ، لكن النسر فعلا سئ وعن اكثر من تجربة اسفرت احداهما عن انقلاب سيارة بى واسفرت الأخرى عن تدمير عفشة سيارة ، وليس عن لا اعرف او عن كلام سمعته ، لا للنسر مهما كنا وطنيين ، انا لا يمكن احط فلوسى فى كاوتش جودته خاضعة لحسن تقدير عم عبده اللى ماسك الساعة وبيظبط الطبخة|(وده اللى بيحصل فى المصنع وعن رؤية فعلية)، يعنى لو عم عبده دخل الحمام ، اتقلب انا واموت؟ الكاوتش من عوامل الأمان اللى الغلطة فيها بفورة ، لا استطيع ان اضع حياتى وحيات اسرتى امانة فى يد عم عبده الجاهل ومديره الفاسد

لو ضميرك الوطنى مش قادر يتغضى عن مسألة الكاوتش فيه عندك منتج أسمه بيريللى بتعمله شركة فاروس فى غرب الإسكندرية، واعتقد انه حتى لو مكانش على المستوى العالمى لكن هيكون احسن ميت مرة من النسر

[memo_hefnawy]

يا توت باشا الموضوع قبل ما يبقى وطنية و قومية لازم يكون منطقى

يعنى مش أركب فى عربيتى كاوتش ربنا وحده إللى يعلم به عشان خاطر صناعه وطنية

طب تقدر تقولى إنت راكب جين 2 ليه ؟ كنت إشتريت نيسان صنى ؟ (مصرى) - أو شاهين (مصرى)
أعتقد إن الموضوع له حسابات أخرى

و سبعاوى أفضل مثال للكلام فى الموضوع ده لأنه فعلا منتجاته كلها صناعة محلى و أنا أعرف خالد شخصيا مش على المنتدى بس ودى حقيقة ده طبعا غير خبرته التى لا غبار عليها فى مجال السيارات

[tutankhamoun]

يا توت باشا الموضوع قبل ما يبقى وطنية و قومية لازم يكون منطقى

يعنى مش أركب فى عربيتى كاوتش ربنا وحده إللى يعلم به عشان خاطر صناعه وطنية

طب تقدر تقولى إنت راكب جين 2 ليه ؟ كنت إشتريت نيسان صنى ؟ (مصرى) - أو شاهين (مصرى)
أعتقد إن الموضوع له حسابات أخرى

و سبعاوى أفضل مثال للكلام فى الموضوع ده لأنه فعلا منتجاته كلها صناعة محلى و أنا أعرف خالد شخصيا مش على المنتدى بس ودى حقيقة ده طبعا غير خبرته التى لا غبار عليها فى مجال السيارات

على فكرة يا حفناوي باشا
أنا كل منتجاتي مصرية ( جميعها ) بأستثناء السيارة
و كان أختياري للسيارة راجع لسببين
1 لأن شكلها عاجبني جدا جدا و لو كانت مصرية كنت برضه هاشتريها ( و مش علشان مستوردة و الكلام ده )
2 المدام برضه كانت مصممة عليها
3 قام بأنتاجها دولة اسلامية صديقة
-----------------------------
و أنا قلت أني جربت الكاوتش النسر نقشة
pyramid
و لغاية ما العربية اتباعت كانت بعفشتها الأصلية و كنت بكشف على العفشة على طول في التوكيل و بسألهم أيه الأخبار دائما و كان الرد أنها جيدة
و ممكن أغلبية الأخوة الأعضاء جربوه الكاوتش النسر اللي بينزل في الشاهين
و أنا لم أجربه و لكني حكيت عن تجربتي أنا فقط
و حبيت أوصل رسالة لأعضاء المنتدى
إذا عجبك منتج أجنبي و حبيت تشتريه و لم تجد المصري منه .... اشتريه و لكن لا تعيب على منتج بلدك
----------------
و اشمعنى لما واحد يذكر حقيقة عن عيوب البلد و يقول أن الناس همج ....... تلاقي الهجوم التتاري المصري عليه و كأنه سب الملائكة المصريين ؟؟؟؟؟؟؟؟؟
-------------
و تحيا ج .م . ع همجية متخلفة إلى الأبد

[memo_hefnawy]

يا عم توت لو تفتكر هاتلاقى إن عمرى ما هاجمتك على توقيعك ولا إنت ولا حد غيرك :)

بل بالعكس أنا يمكن بعانى نفس معاناتك و زيادة - بس أنا رأى دائما فى صالح الأصح و الأفضل بغض النظر عن محلى ولا هندى المهم مايكونش إسرائيلى (عشان معادى للسامية ههه)

يعنى لو أمامى إنى أشترى بى إم تجميع محلى و بى إم ألمانى - هاخد الألمانى لأسباب معروفه إن المصرى ظهر فيها عك كثيير من أكثر من شخص أعرفهم شخصيا فى موديلات متعددة فى حين أنه لا يظهر مثل هذا العك فى الألمانى - أقل حاجة كفاية العزل - عزل الصوت فى المصرى يقرف و فى المقابل يا ترى بفاريا المصرية بتبيعلى المتجمع ده بسعر يناسب التكلفة التى تكلفتها الشركة فى مصر ؟ لأ البيه بيبيعهالى كأنها مستورده ؟ و كأنى رابط الفيل على باب شركته و داخل لابس هندى !!!

طب أنفعه ليه ؟ عشان يكسب فيها 3 أضعاف و يعكنن عليا و أحس إنى مضحوك عليا

هو ده المبدأ .... تدينى منتج جيد .... أدفع و أكسبك .... تسترخص و تقدملى منتج سئ (مش متوسط على قد فلوسه) أو متوسط و تبيعه غالى ....هاقولك إشربه سواء كان مصرى أو هندى

يعنى لازم المنتج يكون حاجة من دوول عشان يبيع:
--------
1- منتج جيد سعره مناسب
2- منتج جيد سعره مغالى فيه - بس مفيش غيره (إحتكار)
3- منتج مقبول و سعره مناسب
4- منتج يؤدى الغرض و سعره رخيص


أى بند خامس مش هايبيع

و بناء عليه ------- معيار الجودة ممكن يكون مختلف ما بينى و ما بينك ---------

يعنى إنت تقولى الجين 2 ممتازة - أنا أركبها أقولك سورى مش عاجبانى خالص -- يركبها سبعاوى يقولك إيه القرف ده -- يركبها سيد يقولك واو روعه ......

و عشان كده ظهرت مقاييس الجودة العالمية المتفق عليها و إنت عارف باقى الحدوته :)

[Khalid_Mostafa]

معلش حأقتبس ردي من الموضوع السابق عشان ده مش رأي سماعي ..ده رأي واحد عارف الماده الخام بتاعة الكاوتش النسر بتبقي عامله ازاي

يا استاذ فادي انا كنت مثلك مقتنع بأن كاوتش النسر ده فخر الصناعة المصرية وكان كلامي من واقع انه كان راكب في اول عربة سقتها وكانت بيجو 304 موديل 1973 وكانت اسبابي انه فعلاً بيطول في العربية بل انك ممكن تنساه اما عن اداء العربية فكنت بأعتقد ان ده بسبب عمرها الطويل وحتي لم اشتريت عربية موديل حديث (كانت سويفت موديل 97 وكان الكلام ده في 2000) وطبعاً كانت السويفت ساعتها من العربيات الحلوه لأن الكوري مكنش منتشر زي دلوقتي..المهم ان العربية اشترتها بكاوتش مليزي ومستعمل وطبعاً حالته كانت وحشه فقررت اني اغير اربع فرد نسر وشكلهم حلو و سعرهم مناسب و حيعيشوا في العربية .
الي حصل انهم طلعوا عيني لفترة ومفيش 10000 وكنت بايعهم و مغير لكوتش كوري نانكانج وحسيت ان بعدها السويفت دي اصبحت مرسيدس..مفيش صوت كاوتش مفيش احساس بالطريق مفيش طالع نازل مفيش كل شويه ترصيص (ودي اكبر مشكله في النسر لأن العجله مبتتكلش بشكل منتظم نظراً لأن الخلطه بتاعتها مكلكعه) .وطبعاً ساعتها قلت يمكن الي انا اشترتهم دول كانو مركونين او قدام او حاجه (مع ان الي جابهملي كان واحد معرفه موثوق فيه) لحد معرفت بعد عدة سنوات سبب ليه كاوتش النسر ردئ بالشكل ده.

هو السبب علي فكره مش النقشه زي ما الزملا قالوا (او علي الأقل مش هي السبب الأساسي)
تصادف اني اشتغلت في شركة في الإسكندرية اسمها اسود الكربون وهي شركة هندي ولمن لا يعرف فالمكون الأساسي في كاوتش السيارة هو بودرة سوداء اسمها اسود الكربون (شبه البودرة الي بتبقي في التونر بتاع البرينتر الليزر) . ومن هناك عرفت الحقائق التالية :
1- هذا المصنع هو المورد الأساسي لميشلن في اوروبا و البرازيل و تركيا
2-مورد اساسي لبريدجستون في عدة دول
3-مورد اساسي لبريللي في عدة دول ومنها مصنع بريللي في الإسكندرية (فاروس)
4-مورد لبعض مصانع دانلوب و شركات اخري
5- وطبعاً المورد الوحيد لشركة النسر
اكتشفت ان هذا المنتج ينتج بدرجات متفاوتة من الجوده و النقاء وان افضل الأنواع تورد للشركات الأخري في حين ان شركة النسر تأخذ منتج ذو جودة متواضعة وطبعاً الي بيتحكم في ده معايير الجوده في كل شركة من الشركات دي (يعني كل شركه هي الي بتختار المنتج الي بيرحولها) ده بقي غير مراحل الإنتاج و التصنيع في الشركات دي

احنا مش ضد الصناعة المصرية طبعاً بس تقدر تقولي ليه شركة النسر مبتصدرش كميات مادامت بهذه الجوده ؟؟؟ ومع ان جودته سيئة ليه سعرها مش اقل من الأنواع المستورده مع ان الأنواع الأخري عليها جمارك و حماية منتج محلي و كلام من ده ؟؟

[tutankhamoun]

أستاذ حفناوي
أنا عمري ما أشتكت من حضرتك .......... حضرتك من الناس المحترمة جدا في هذا المنتدى
و لم أقصد بكلامي حضرتك خالص
................................................
و إن كان هناك الكثير من الصحة في كلام حضرتك في موضوع المبالغة في أسعار السيارات المجمعة محليا
...............................................
و أختلاف الرأي لا يفسد للود قضية

[MMamdouh]

و كما احب اضيف ان الموضوع مش كتر نقشات و خلاص... ما انا ممكن اعمل مليون رسمه نقشة فى كراسة رسم فى ساعتين المهم النقشة دى على الاسفلت و على الميه و فى الملفات حتعمل ايه؟؟

انا طلبت من فادى مواصفات الفردة النسر اللى معجب بيها و طبعا معلقش على الموضوع فا ياريت حد بس يقولنا الموصفات بتاعت اى فردة بيقولوا عليها كويسة من النسر عشان نقارنها بعدد من الفرد الشائعة الاستخدام

و كنت برضة طلبت مسافات التوقف بالفرامل على الاسفلت الناشف و المبلول و برضة محدش اضاف حاجة... هو النسر خطر اوى لدرجة ان الناس خايفة تفرمل بيه؟؟

الحاجات دى هى الاختبار الحقيقى لان اى فردة لو ماركة قرد حتبقى كويسة و انت ماشى عادى فى خط مستقيم على اسفلت ناشف و بسرعة ثابتة... العبرة لما تضغط على الكاوتش او زى ما بيقولوا push it to the limit و هنا حيبان المعدن الحقيقى للكاوتش

يا جماعة مش كل فردة كوتش ركبت على جنط تبقى حلوة و العبرة مش و انا ماشى 60 على اسفلت ناشف... العبرة بالتماسك فى الفرامل و الملفات و على الطرق المبللة

الموضوع دة بيفكرنى باللى يمشى بعربية بسرعة 200 و يقولك العربية ثابتة... ما طبعا حتبقى ثابتة لانك ماشى فى خط مستقيم... المهم لما تحاول تحود او تعمل مناورة او حتى تفرمل العربية حيبقى رد فعلها ايه؟؟... هل حتبقى برضة ثابتة ولا حنقرا عنك فى صفحة الوفيات؟؟؟

MMamdouh

مواصفات نوعين من كاوتش نسر تم تجربتهم
الأول بواسطتي و هو النوع بيراميد و الثاني بواسطة قريب لي معه سيارة 405