مقارنة بين الانسر والألنترا 2007

[Hossam Mounir]

الحقيقه يا جماعة ... من خلال تجربتي لشراء سيارة ... أكتشفت ان الموضوع صعب أوى يمكن علشان انا مهندس ميكانيكا ... ويمكن علشان جزء من طبيعة شغلي بتخليني قريب جداً من مجال سوق السيارات ... فكنت محسوك أوى أوى ... وانا بختار عربيتى الجديدة ...

مش هطول عليكم ... المهم كثر الحديث فى الفترة الأخيره عن المقارنة بين الانسر 1600cc 2007 ... والألنترا 1600cc 2007 حيث انهم فى نفس الفئه ... من حيث السعة اللتريه و نفس range الفلوس ... تقريباً
وقلت ما بدهاش ... هاعمل المقارنة بينهم من جميع النواحي ... ويا ريت أقدر أغطي كل الجوانب الهندسيه والفنيه وأختلاف الأوبشن بينهم وسامحوني على الأطالة ... بس علشان اغطي كل الجوانب تقريباً ...
ولنبدأ على بركة الله ....

أولاً : الموديلات والأسعار ...
الانسر ...
1- 1.6 M/T 98,000 L.E ... فى بعض المعارض 97,000 L.E
2- 1.6 A/T 102,000 L.E ... فى بعض المعارض 101,000 L.E
3- 1.6 A/T Sport 110,000 L.E ... فى بعض المعارض 109,000 L.E
4- 1.6 A/T SAM 113,000 L.E ... فى بعض المعارض 112,000 L.E
جميع الموديلات :
تكييف ، باور ستيرنج ، زجاج كهربي ، مرايات كهرباء ، فرامل ABS
الموديل 1و 2 لا يوجد كاسيت ، ويوجد Air Bag للسائق
3- فتحة سقف ، أسبويلر خلفي ، مقابض نيكل ، كاسيت وCD Exchanger 6CDs ، جنوط 15” ، 2 Air Bags
4- يزيد عن 3 ... فرش جلد طبيعي بالكامل ... الدركسيون جلد طبيعي ... الفتيس جلد طبيعي

الألنترا ...
1- 1.6 GL M/T 92,000 L.E
2- 1.6 GL A/T 100,000 L.E
3- 1.6 GLS A/T 110,000 L.E
4- 1.6 GLS A/T 118,000 L.E
5- 1.6 GLS A/T 122,000 L.E
جميع الموديلات :
تكييف ، باور ستيرنج ، زجاج كهربي ، مرايات كهرباء ، ....
3- المقابض والمرايات بلون العربية ، مصابيح الضباب الأماميه ، المرايات الجانبية والمقابض بلون السيارة ، الشنطه تفتح بالريموت ، الاريال Automatic ، التكييف Automatic و Touch Screen ، جراب نظارة ، كرسى السائق يمكن تعديل وضعه لأعلى وأسفل
4- يزيد عن 3 ... فرامل مدعومة ب ABS و Air Bag للسائق و دركسيون Multi Function
5 – يزيد عن 4 ... جنوط سبور 16”

ثانياً : المحرك ... Engine
الانسر ...
1584cc , 16-V DOHC , CVT , 6,000 RPM @ 105 HP , 14.1 kg.m @ 4,500 RPM

الألنترا ...
1591cc , 16-V DOHC , CCVT , 6,200 RPM @ 121 HP , 15.6 kg.m @ 4,200 RPM

ثالثاً :التعليق (العفشة) ... Suspension
الانسر ...
Front : McPherson strut, coil springs with stabilizer bar
Rear : Multi-Link with stabilizer bar

الألنترا ...
Front : McPherson strut type
Rear : Multi-Link with stabilizer bar

رابعاً : الأبعاد والوزن ... Weight & Dimensions
الانسر ...
الطول الإجمالي : 4,535 mm
العرض الإجمالي : 1,695 mm
الأرتفاع الإجمالي : 1,445 mm
قاعدة العجلات : 2,600 mm
الخلوص من الأرض : 165 mm
الوزن الإجمالي (السيارة فارغة ) : 1,140 kg

الألنترا ...
الطول الإجمالي : 4,505 mm
العرض الإجمالي : 1,775 mm
الأرتفاع الإجمالي : 1,490 mm
قاعدة العجلات : 2,650 mm
الخلوص من الأرض : 165 mm
الوزن الإجمالي (السيارة فارغة ) : 1,250 kg

خامساً : ملاحظات عامة (خاصة بي فقط ..)
1-الانسر
بمقارنة الأمكانيات وانها ياباني ... يعتبر سعرها رخيص بمقارنتها بنفس الكماليات اللى فى الألنترا اللي هيا كوري ... ودى لا أجد لها مبرر ...

2-تقفيل الكبوت
... فى الانسر تقفيل عادى جداً ... كل الأسلاك باينه و شرايط اللحام باينه ... وبصراحة مش هوه ده اللى الواحد مستنيه من عربية ياباني ... الألنترا الكبوت متقفل زى ال BMW تقفيل أقل كلمة تقال عليه أنه شييييك طبعاً ... هوه مش بالشكل ... لكن ده أنطباعي ...

- ملحوظة بره الموضوع للي بيستخدم بنزين 92 أوكتان مع الانسر 1600 الخليجى ... عرفت وتأكدت أن هذا الموديل لا بد من أستخدام بنزين 95 أوكتان عكس اللي بضمان الوكيل علشان شوفت بعينى التعديل على جهاز الانجيكشن ... فى العربيات اللي جايه مصر ... وممكن أشرح التعديل للي يحب ...

3-التابلوه ...
والمقصوره الرأيسية ... فى الانسر عاديه جداً ... جداً ... الألنترا عربيه حقيقى نازلة بشكل ... فى منتهى ال Luxury ... الحقيقة هو ده التعبير المناسب على مقصورة العربية الى جه على بالي ... الخامات المستخدمه تقريباً ... هيا هيا .. ولكن الألنترا لها طله مبهرة ... وبالذات مع التكييف التاتش...

4-عوامل الأمان
اعتقد أنها متوفرة فى الانسر أكثر ... فرامل ABS فى كل الموديلات و 2 أيرباج فى الموديل SAM يعنى غير متوفره فى أعلى موديل من الألنترا سواء ABS و أيرباج واحده فقط ... مع ملاحظة فرق السعر ...

لدى الكثير من الفروق لكن الوقت عامل هام ... لهذا سوف أكتفي بهذا ... وكل ما ذكرته مدعم بالكتالوجات الخاصة بالعربيتين اللى بينزلوا مصر ... وتحت أمر أى حد عايز الكتالوجات هما بصيغة PDF ممكن أبعتهم على ال e-mail للى عايز ...
وأترك الحكم النهائي لسيادتكم والمسائلة فى الأخر أذواق ... وكل واحد حر يركب اللي هوه عايزه ...

أختبار التصادم الخاص بالانسر
[youtube]http://www.youtube.com/watch?v=QAGBbrb4JS0[/youtube]

أختبار التصادم الخاص بالالنترا
[youtube]http://www.youtube.com/watch?v=KnY9JSg-VQM&mode=related&search=[/youtube]

تحياتى للجميع ...

أخوكم م/ حسام منير

[fahd_628]

الف شكر يا باشا على المقارنة الجميلة دية و لكن مقلتلناش اخبار ثبات الانترا بالنسبة لللانسر اية ؟

و هل فعلا العفشة فى الموديل السبور و السوبر اكشن موديل عفشة سبور ؟؟؟؟؟؟

و شكرا

[mohamed el hussien]

اكتر من ممتاز واللة

[sokasoon]

صاج اللانسر واضح انو خفيف شوية عن صاج الالنترا

[Abdallah]

مشكور يا اخى, بس انا نفسى اعرف برضة موضوع عفشة اللانسر دة ايه

[Karim_Monir]

صباح الجمال يا حسام باشا
والله انا سعيد جدا جدا بالمقارنة الهايلة دي
وسعيد اكتر انك فكرت فيا وانت بتعملها لانه احساس جميل جدا انك تلاقي حد حاسس بهمك
انا بس كنت عايز اسال عن موضوع الانجيكشن في الوكيل ده حقيقي ولا لاء
وكمان لوزن بتاع الالنترا انا عارف انها اخف من كدة
الثبات يا ريت تكلمنا عنة
انت نسيت تقول ان الالنترا فيها ESP لكن اللانسر باور زيت عادي
بتقول الحصان بتاع اللانسر 105 بس والوكيل كان بيقول 118 حصان
موتور اللانسر ال 1600 عارف انه DOCH 16 صباب وانت كاتب انه كامة واحدة
انا اعرف ان اللي بكامة واحدة ال 1300 12 صباب

واخر حاجة انا مش عارف ليه غبور بيرغمني اني اخد عربيات بكماليات مش محتاجها واتوماتيك عشان يكون فيها ABS &AB

يا ريت لو كتبت التعديل ابعتهولي عشان اعدل موضوعك واحط الحاجات دي فيه عشان موضوعك يبقي كامل ان شاء الله ويتثبت كموضوع من افضل الموضوعات
وكمان ياريت ترفق ملفين الكتالوجات بتوع العربيتين

جزاك الله كل خير علي المعلومات القيمة دي
كريم منير

اولا، شكرا على مجهودك فى تجميع المعلومات، بس كنت عايز اقول شوية ملاحظات، حكاية البنزين 95 دية اونطة لانى ببساطة معايا الخليجى و بحط عادى 92، تانى حاجة ان العربية فى الكتالوج 122 حصان مش 105 ، تالت حاجة موضوع الكاسيت ده اختيارى، انت تطلبه او لا، انما فى الموديلات الاعلى بيبقى اساسى، اخر حاجة اسعار الخليجى بينزل فيها السعر اقل 8 الاف جنيه عن اللى حضرتك كاتبه، و اخيرا طبعا موضوع المقصورة، انا بصراحة مقعدتش فى الانترا الجديدة فمش هفتى بس انا شايف مقارنة بالعربيات اللى انا شفتها ان الخامات اللى فى مقصورة الانسر و التقفيل الداخلى من انضف ما يكون، و شكرا مرة تانية

[Hossam Mounir]

السادة الأفاضل ...

و هل فعلا العفشة فى الموديل السبور و السوبر اكشن موديل عفشة سبور ؟؟؟؟؟؟

بس انا نفسى اعرف برضة موضوع عفشة اللانسر دة ايه

العفشة فى جميع الموديلات الخاصة بالانسر 1600cc اللى بضمان الوكيل مصرية ... هيا هيا كلها عفشة سبور... يعني مش بتتغير فى أى موديل ... دى معلومة أكيدة ...

انا بس كنت عايز اسال عن موضوع الانجيكشن في الوكيل ده حقيقي ولا لاء

صدقني يا باشمهندس شفت التعديل بعيني ومستعد أشرحة ... الموتور فى العربيه طبعاً محطوط بالعرض ... خلفه ومواز له جهاز الأنجيكشن ... عبارة عن أسطوانه من الألمونيوم ... أو ممكن يكون سبيكة من معدن ما لونها فضي تدخل اليها انبوبه ... من النحاس أعتقد قطرها ... حوالي ...من 3 إلى 5 مللي هذه الانبوبه هيا اللي بتغذى الأنجيكشن بالوقود ... فى العربيات القادمه من الخليج تتفرع الأنبوبه دى إلى ثلاث أنابيب ... وهو ده السبب فى أستعمال وقود 95 أوكتان (الاعلى فى الجوده ) ... وبالتالي ال HP بتاع العربية الخليجى أعلى ...والله اعلم ...

وكمان لوزن بتاع الالنترا انا عارف انها اخف من كدة

أيضاً وزن الالنترا أنا متأكد منه ... طن وربع ... 1.25 Ton وده هوه سر ثبات العربية الفظيع اللى شفته برده بعيني ...

انت نسيت تقول ان الالنترا فيها ESP لكن اللانسر باور زيت عادي

المعلومة بتاعة الباور أستيرنج ان سمعت عنها فى الألنترا ... بس غير متاكد منها ... علشان كده ما جيبتش سيرتها ... زى ما سيادتك تفضلت وقلت أنا سمعت فعلاً أنها ...ESP بس ده أعتقد مش فى المواصفات اللى بتنزل مصر وده هو التحكم الكهربائي فى الباور ... وليس هيدروليكي مثل الانسر ...

بتقول الحصان بتاع اللانسر 105 بس والوكيل كان بيقول 118 حصان

دى بقى كل واحد بكلمة ... الكتالوج بيقول 105HP عند 6000 لفه ... فى التوكيل مره قالي 118HP ... ومره قالي 122HP .... الأكيد أن الخليجى هيا اللي 122HP ... أما اللي بضمان الوكيل دى بقى الله وأعلم ....

موتور اللانسر ال 1600 عارف انه DOCH 16 صباب وانت كاتب انه كامة واحدة

دى بقى سيادتك عندك حق ... فعلاً أنا غلطت الموتورفعلاً DOHC ... كامتيين علويتيين مش كامه علويه واحدة ....

واخر حاجة انا مش عارف ليه غبور بيرغمني اني اخد عربيات بكماليات مش محتاجها واتوماتيك عشان يكون فيها ABS &AB

دى بقى مش تبعي ... دى يا باشمهندس كريم سياسة بيع وتسويق ... ومصالح ... فيه حاجات أحنا مش بنبقى شايفنها ... على سبيل المثال ممكن يكون بيضرب فى موديل أخر أو توكيل أخر ... وهكذا ... بس اللي برده اكيد انه مش بيهزر علشان ياخذ 28% من التورته لوحده أقصد سوق السيارات فى مصر لعام 2006 ... والاول بأنفراد فى مصر ... وفى أفريقيا ....

وكمان ياريت ترفق ملفين الكتالوجات بتوع العربيتين

دى برده صعبه لأن الملفيين عبارة عن PDF ... واحد حوالي 2MB والثاني حوالي 5MB ... دول أفرقهم أزاى ... الأخ هاني PAYOO ... قعد معايا يشرحلي رفع صوره فى نصف ساعة .... طب الملفيين دول أرفعهم أزاي ... ممكن ابعتهملك e-mail ... لو حابب ... وانت أتصرف وممكن احطهم على CD ... وابعتهملك لحد عندك ...

بس كنت عايز اقول شوية ملاحظات، حكاية البنزين 95 دية اونطة لانى ببساطة معايا الخليجى و بحط عادى 92، تانى حاجة ان العربية فى الكتالوج 122 حصان مش 105

تم الرد بالأعلى ...

تالت حاجة موضوع الكاسيت ده اختيارى، انت تطلبه او لا، انما فى الموديلات الاعلى بيبقى اساسى،

لا يوجد كاسيت فى العربيه اللى بضمان الوكيل فى الموديل 1 و 2 ... كلام أكيد ...

اخر حاجة اسعار الخليجى بينزل فيها السعر اقل 8 الاف جنيه عن اللى حضرتك كاتبه،

الأسعار كلها خاصة بالعربيات اللي بضمان الوكيل ... أنا لم أذكر العربيات الخليجى فى مشاركتي مطلقاً ... إلآ فى ملاحظة الوقود وذكرت قبلها انها ملاحظه بره الموضوع

انا شايف مقارنة بالعربيات اللى انا شفتها ان الخامات اللى فى مقصورة الانسر و التقفيل الداخلى من انضف ما يكون، و شكرا مرة تانية

أنا لم أنفي بل على العكس ... أنا ذكرت أن الخامات المستخدمه فى التقفيل الداخلي ...جيده جداً فى الانسر ... وبالمثل فى الألنترا ... ولكن أكملت بأن الألنترا لها طلة مبهرة ... ودى وجهة نظرى الشخصية ولم افرضها على احد ...

تحياتي للجميع ...

م / حسام منير

[amrnader]

صدقني يا باشمهندس شفت التعديل بعيني ومستعد أشرحة ... الموتور فى العربيه طبعاً محطوط بالعرض ... خلفه ومواز له جهاز الأنجيكشن ... عبارة عن أسطوانه من الألمونيوم ... أو ممكن يكون سبيكة من معدن ما لونها فضي تدخل اليها انبوبه ... من النحاس أعتقد قطرها ... حوالي ...من 3 إلى 5 مللي هذه الانبوبه هيا اللي بتغذى الأنجيكشن بالوقود ... فى العربيات القادمه من الخليج تتفرع الأنبوبه دى إلى ثلاث أنابيب ... وهو ده السبب فى أستعمال وقود 95 أوكتان (الاعلى فى الجوده ) ... وبالتالي ال HP بتاع العربية الخليجى أعلى ...والله اعلم

بخصوص الموضوع ده، هاقولك على حاجة، انا واحد جارى اشترى لانسر 1600 وكيل و لقيته جالى بيقولى عايز اشوف حاجة فى العربية عندك، قلتله اتفضل، راح باصص فى الكبوت و تفحص شوية و قاللى انت الانجكشن عندك 3 و انا عندى واحد، الصراحة انا مفهمتوش ساعتها و محاولتش اسأل، بس كلامك فكرنى بالموقف، فغالبا هو ده التعديل اللى انت بتقول عليه، و بالتالى ده يأكد اونطة الوكيل فى موضوع البنزين ده، حتى تلاحظ انهم اتخرصوا و مبقوش بيتكلموا عليه.

[Hossam Mounir]

فغالبا هو ده التعديل اللى انت بتقول عليه،

الحقيقه يا أستاذى الفاضل انا مش فاهمك ... سيادتك بتأكد بالموقف ده كلامي ... بأنه في فرق فى جهاز الانجيكشن بين المواصفات اللي نازلة مصر ... وبين المواصفات الخليجي ...

ثم أكملت ...

و بالتالى ده يأكد اونطة الوكيل فى موضوع البنزين ده، حتى تلاحظ انهم اتخرصوا و مبقوش بيتكلموا عليه.

لو فيه فرق يبقى الوكيل صح أن العربية الخليجي بتحتاج نوع وقود غير اللى ممكن يستخدم ... فى العربية الخاصة بمواصفات السوق المصري ...
ومحدش قال أن البنزيين 92 أوكتان خطر على العربيه ... أو ممكن يحرق الموتور لقدر الله ... لكنه اكيد بيفرق فى اداء العربيه ... يعني مش بتستفيد بكل ال Power بتاع العربيه ...
ولو سيادتك عايز تقتنع خير ... مش عايز تقتنع .... سيادتك حر ...

م / حسام منير