رجاء المساعدة...تكييف الصني!!!

[hh]

يا جماعة النهاردة فتحت التكييف في عربيتي الصني الجديدة لكن كان بيطلع هوا سخن زي ما تكون المروحة بس اللي شغالة. انا قلت اكيد التكييف فيه عطل و بصراحة اتدايقت جدا لأن العربية ما بقالهاش أسبوع. المهم لمبة البنزين كانت منورة فرحت البنزينة و فولت و بعد كدة لما شغلت التكييف اشتغل. أنا قلت واضح ان لما البنزين بينقص لدرجة ان اللمبة تنور التكييف مش بيشتغل عشان يوفر استهلاك البنزين. يا ترى الموضوع ده عادي فعلا و لا فيه مشكلة في التكييف؟

[loai-omar]

الحمدلله سليمة

بس معروف ان التكييف بيخليك تستهلك بنزين اعلى
فا وانتا ماعكش بنزين حبكت تشغل التكييف :)

جرب اطلع طرق فاضي كده امشي على 60 80 و شغل التكييف حتلاقيه ان شاء الله اتعدل

[hh]

انا كنت بجربه بس. و جربته بعد كدة لما حطيت بنزين لقيته شغال. يا جماعة انا عايزة اعرف ده طبيعي و لا تكييف العربية فيه عطل؟

[hesham2004]

انا ماسمعتش ان فيه عربية بتفصل التكييف لما البنزين يكون قليل ، و بعدين التكييف فى الصنى مش تاتش او بمعنى اخر ذو تحكم الكترونى عشان نقول ان وحدة التحكم الألكترونية الخاصة بالموتور اتجننت فى عقلها و اتحكمت فى التكييف كمان ، فمفيش قدامنا الا انه يكون تخريف من الكتاوت الخاصة بالكومبريسور او اى سويتش كهروميكانيكى بدائرة التكييف .
على العموم رقاب التكييف لفترة وشوف
( على فكرة ممكن يكون خطاء من عندك انت يعنى ما شغلتش التكييف اصلا و المروحة بس هيه الى اشتغلت )

[hh]

لا انا متأكدة اني كنت مشغلاه. طيب معنى كدة ان فيه مشكلة؟

[hesham2004]

لا مشكلة و لا حاجة ، اذا تكرر نفس الموضوع تانى او بصورة تانية ، عليكى و على التوكيل
و اهم حاجة عاوزين نعرف ايه العطل بالضبط و ما تم لأصلاحه

[hh]

طالما هي مش حاجة عادية ازاي حضرتك يتقول مفيش مشكلة؟ يبقى كدة فيه عطل او حاجة بتعلق في التكييف, صح ؟

[hesham2004]

عشان كده بقول لحضرتك لو الموضوع اتكرر تانى يبقى فيه حاجة بايظة او مش شغالة كويس ( زى ما بيحصل فى كتاوت النور او الكلاكس ، فى بعض الأحيان النور او الكلاكس بيعلق مرة واحدة ، لو اتكرر يبقى لازم نغيره او نصنفره على الأقل ) فمن الممكن يكون مثلا كتاوت الكومبريسور علق مرة ، لو اتكرر يبقى مثلا نغيره
و على العموم مشاكل التكييف مش من المشاكل الى تخوف زى لمبة الزيت او البطارية او التشيك انجين او الأير باج ......
مجرد المراقبة فقط لفترة حيبان اذا كان فيه عطل ولا لأ

[hh]

شكرا ليك يا استاذ هشام. انا حجرب فترة و اشوف الموضوع حيتكر ولا لأ

[hh]

يا ترى مفيش حد حصل له الموضوع ده في الصني؟ أرجو المشورة من جميع الاعضاء

[Ahmed Hassan]

طيب انتي استنيتي اد ايه اول مره علشان تحكمي انه مش شغال؟؟ عموما اشتغلى بيه عادي و شوفي المشكله هتتكرر و لا لأ.. و غالبا مش هتتكرر.

الحاجه التانيه.. مفيش علاقه بين ان العربيه لمبه البنزين نورت و ان التكييف ميشتغلش.

[hh]

انا استنيت شوية كتير, و بعدين لما حطيت ايدي قدام مخرج الهوا كان بيطلع هوا سخن.

[hh]

على فكرة انا جربته بعد كدة اكترمن مرة و كان شغال كويس بس عايزة اراء الناس في نايل موتورز عشان اعرف السبب ممكن يكون ايه

[Ahmed Hassan]

ممكن تكوني كان بقالك فنره مشغلنيش التكييف لإاخد وقت على ما الفريون ياخد دورته في المواسير. المفروض انك تشغلى التكييف حتى في الشتاء مره و يستحسن اتنين في الشهر لمده من 5 الى 10 دقائق للحفاظ على كفاءه التكييف.

[sab3aawy]

اعتقد والله اعلم ان الموضوع ابسط من كدة لكن الصدفة لعبت فيه دور

تكييف الصنى بيشتغل ويفصل على حرارة الفريون وليس على درجة حرارة هواء الصالون فمكن تكونى شغلتية على 1 مثلا والجو مش حر أوى فاشتغل لحظات وفصل وبالتالى اصبح الهواء اللى طالع مقارب لدرجة حرارة الجو لأن الكباس مش شغال

مع الحركة وسخونة العربية بعد التفويل او ممكن تكونى رفعتى سرعة المروحة وبالتالى ساعدتى فى تسخين الفريون فده خلا الكباس اشتغل

عموما هو فيه معلومة هامة بخصوص تكييف الصنى، ان الثرموستات بتاعه لا يسمح بحكاية (التلاجة) ، يعنى بيفصل على درجة حرارة مقاربة لدرجة حرارة الجو شتاء، وده بيخلينا لو شغلنا التكييف فى الشتاء مبنحسش ان فيه اى تبريد لأن الكباس بيشتغل ثوانى بسيطة ويفصل، لكن فى الصيف تكييفها ممتاز وبيوصل الصالون الى درجة حرارة حوالى ال 20 درجة فى وقت قياسى، لكن مش بينزل عن كدة علشان الثرموستات بيفصله