Tweet
التقرير الوافي في اتيان الـ Gen-2 من زيلة
بسم الله الرحمن الرحيم
أجــمد تقرير لأجمــل أعضـــاء
معلش هو فى صيغة ادبية عشان كان نفسي ابقي كاتب :p
و في نفس الوقت س / ج عشان كان نفسي ابقى بوليس و اركب مواصلات ببلاش
و في نفس الوقت احياناً بيبقي بيئة و تشرد .... و دة اللي انا نجحت فية يا اولاد 
كما سبق وعـــدت بزيارة توكيل عز العرب عشـــان نشوف موضوع بروتون GEN-2
الأول كان الحـــظ حليفي لأني قابلت م / محسن صالح دون سؤال أو بحث
و الرجل فعلاً كمــا وصف الزملاء قمــــة الأخلاق و الذوق :o
و انتباه دهشة من إقبال العديد للسؤال علي Gen- 2 علي الموبيل الخاص به 
و أنهم حصلوا علية من علي الانترنت " طبعاً ما قلتلوش ازاى عرفوة ":p
و نوعية أسئلة المتصلين التي تدل علي اجراء بحث عن السيارة و خلفية ممتازة عنها ;)
و عموماً
الرجل مُرحب بأى استفسار و اى تُسأل عن السيارة ..... مفيش مشكلة دة " بس بس " يا شباب
نبتدي الحوار :
س1 : أعترف سعر السيارة ؟
ج1 :
بالنســـبة للمانيوال 84.000 ج
بالنســـبة للمانيوال اسبورت باكيدج 4.500 + 84.000 = 88.500 ج
بالنســـبة للاتوماتيك 90.000 ج
بالنســـبة للاتوماتيك اسبورت باكيدج 4.500 + 90.000 = 94.500 ج
يعني من الاخر يا رجالة الاسبورت باكيدج = 4.500 ج
س 2 : ما الفرق بين السيارة اسبورت باكيدج و بدون الاسبورت باكيدج ؟
ج 2 :
بالنسبة للاسبورت باكـــيدج يتكون من 5 قطع ( شنب أضافي فى الاكصدام الامامي + كساحات جانبية للسيارة + اسبويلر علي الشنطة من الخلف )
س 3 : هل يمكن تركيب الاسبويلر فقط او احد اضافات الاسبورت باكيدج دون الباقى ؟
ج 3 :
للاسف لأ ، لانها تأتى 5 قطع مع بعض ( امال اسمها باكيدج لية يا شباب .... انا بسأل الراجل اسألة تجيب الضغط )
س 4 : مانوعية الفرش ، و ما هي حكاية الفرش الجلد ؟
ج 4 :
الفرش هو الفرش العادي الموجود في 2007 و في اغلب السيارات ، و هو نفس الفرش في الاسبورت باكيدج
س 5 طيب لو انا عايز الفرش جلد زى اللي بيجي في صور النت " الأحمر في الأسود الحليوة دة " ؟
ج 5 :
للأسف غير موجود بالتوكيل ، و يمكن إرسال في طلبة كا طلبية خاصة لكن سيؤدى لزيادة ثمن العربية زيادة مبالغ فيها بالإضافة أنة سيأخذ حوالي 6 شهور ( يعنى إحنا في نص شهر 3 + 6شهور = أول شهر أكتوبر ) يبقى استني موديل 2009 أفضل .
س 6 طيب أنا معجب يالاسبويلر اللي علي الشنطة و عايز أركبة بس مش عايز أجيب الاسبورت باكيدج ؟
ج 6 :
للأسف مفيش في التوكيل تركيب لل أسبويلر فقط ، لازم يا تجيبها اسبورت باكيدج يا متجبهاش ، لكن في بعض محلات الأكسســـوار بتصنعها و بتركبها بالطلب ، و للأسف مفيش معلومات متوفرة عنها .
س 7 طيب بالنسبة للحجز و الشراء أية النظام ؟
ج 7 :
الحجز ( دفع مبلغ 1000 ج علي الأقل + صورة البطاقة الشخصية )
التسليم في 2 اتوماتيك دفع و تسليم فورا ً ( لون : " جراى / رمادى / فيرانى " + لون : رصاصي )
بالنسبة للمانيوال للأسف مفيش حالياً غير 2007 ( واحدة منهم تاكسي العاصمة مرفق صورها بالتقرير )
و بالنسبة لــ مانيوال 2008 الحجز الآن شهر مارس و الاستلام في شهر مايو " من النصف الأخير للشهر"
س 8 لفت انتباهي أن مفيش تابلو في السيارة لوضع شرائط الكاسيت / cd / اكسسورات / أوراق ؟
ج 8 :
لا يوجد بالسيارة تابلوة أمامي و ملحق بها كانسول واسع بين كرسي السائق و الكرسي الأخر + مكان لوضع الاكوب / الكانز .
س 9 هل تختلف كماليات السيارة من المانيوال إلي الاتوماتيك ؟
ج 9:
لا يوجد اختلاف علي الإطلاق ، كل الموديلات بها نفس الكماليات الفارق في نوعية ناقل الحركة ( مانيوال / اتوماتيك ) ، أما الاسبورت باكيدج فهي أضافية توضع بالكامل أو لا توضع .
س 10 هل هناك اختلاف في الأسعار بالنسبة للألوان ؟
ج 10
لا يوجد اختلاف الأسود مثل الرمادي مثل البرتقالي مثل الأحمر ....... و لا يوجد منها لون ابيض .
س 11 هل تم تحديث الموتور في 2008 ؟
ج 11
لا الموتور الموجود في 2008 هو نفس الموتور في 2007
س 12 ما هي إجراءات التسليم ؟
ج 12
إجراءات التسليم تتم بمجرد وصول الشحنة من الميناء علي ترلات نقل ( و ليس بسائقين .... خلي بالكم من النقطة دي ) و يتم دفع 100 ج إلي التوكيل في حالة رغبتك استعجال أوراق الترخيص و تحويلها مباشرة إلي إدارة المرور التي ترغب فيها ، أما إذا أردت أن تفعل الإجراءات بنفسك فلك مطلق الحرية ..... و طبعاً مش ها تستلم العربية إلا لما تدفع بقية المبلغ يا عم الأستاذ .
انطباعاتي عن الزيارة :
- أولا ً : مواعيد العمل من الساعة 10 صباحاً حتى 6 مساءاً طوال أيام الأسبوع عدا يوم الجمعة اجازة .
- ثانياً : لو أنت قادم من القاهرة ، الطريق حلو و بن حلال ، و أنت راجع اعمل في حسابك تشترى أكل في الطريق لأنهم بيصلحوا الجانب الأيمن من الطريق و الطريق حارتين فقط ......... مأساة
و اعتقد أن الحل انك تبعد عن مواعيد خروج الموظفين من العمل ( و ما تسألني ازاى )
أو انك ترجع القاهرة عن طريق القاهرة - الإسكندرية الزراعي – القاهرة ويبقى اسمك صيفت فى الشتاء .
- ثالثاً : السيارة عليها إقبال ملحوظ إلى حد ما ( كان باقي في التوكيل 8 سيارات 2008 منهم في انتظار التسليم و2 فقط اتوماتيك لم يتم بيعهم + 1 سيارة 2007 ) .
- رابعاً : السيارة علي الطبيعة جميلة ، و قلقي من ضيق الكنبة الخلفية تبدد عند جلوسي بها فوجدتها معقولة و مريحة ، أما بالنسبة لشنطة السيارة فهي واسعة و يمكن أنقصها و زيادتها حسب الرغبة إلى الثلث أو الثلثين .
- خامسـاً : حكاية عدم وجود مكان تخزين في التابلو الامامى ..... سخيفة إلى حد ما + فتح كبوت السيارة من خلال مفتاح تحت التابلوة الأمامي عن الكرسي المجاور إلى السائق كوميدية إلى حد ما " كل ما افتح الكبوت أقول للي جنبي ...... أيديك و النبي معي يا حاج و شــد المفتاح ده "
- سادســاً : لا يمكن إنكار أن سيارة بها جميع الكماليات + صاج مميز + موتور جيد بهذا السعر أمر يحسب لها .
- سابعــا : نوعية البلاستيك المكون منها تابلو السيارة ..... ليست بالسيئة الفجة كلعب الأطفال ، و ليست بجودة BMW أو مر سيدس ..... لكنة مقبولة للعين و غير مستفزة .
- ثامناً : مقبض السيارة الأمامي يذكرك بمقابض السيارة فيات ريتمو .
- تاسعـــا ً : في الجزء التالي من الموضوع أضع لكم صور للزيارة المهيبة العظيمـــة الفظيعــــة
Comment