سؤال مهم جدا فى حد بيبيع شاسيهات

[taswos]

السلام عليكم ورحمة الله وبركاته
مش عارف هو ده المكان الصحيح لموضوعى ولا لأ ....
انا عايز استفسر عن موضوع هل فى حد بيبع شاسيهات بالورق بتاعها فى مصر ولا لأ لأنى سمعت عن الموضوع ده
فياريت اللى عنده أى خلفيه عن الموضوع يقولى احسن انا مش عارف اى حاجة
وشكرا على القسم الجميل جدا

[taswos]

معلش ياجماعه للرفع وياريت لو حد يعرف اى معلومة يفيدنى ضرورى جدا

[Karim_Monir]

اسال زميلنا اكسبرت ممكن يكون يعرف ناس من دول

[Ahmed Hassan]

فيه في القاهره بتكون "لوتات" جيش او شرطه تجار بيشتروهم من المزاد و يبيعوهم بعد كده. فيه شاسيهات حربي (تتعمل جيب) و ساعات 205 او 405 و فيه حاجات تانيه كتير.. المكان بالظبط مش فاكره بس ممكن اجيبهولك

[Xpert]

ماهه حسب انت عاوز ايه بالظبط ..
بص يا سيدي .. المتعارف عليه ان الشاسيهات ممنوع دخولها مصر .. ده من قانون الجمارك .. الله اعلم ان كان اتغير ولا لاء ... بس ماعتقدش ..
المهم .. انت عاوز ايه و محتاجه ليه و نشوف ان كنا نقدر نفيدك ولا لاء .. بس النظام الماشي في مصر الاتي :
يأما بيتباع نص امامي او خلفي او غيره ... و ده بيجي استيراد من بورسعيد ..
يأما بيجي هربيه حوادث . و دي من الاعلانات بتاع الحوادث اللي في الجرنان بتاع الاهرام اللي يقولك عربيات حوادث ..
يأما بيجي شاسيهات فاضيه من اللوطات زي اللوط بتاع الجيش او كده .. و دي من شارع الجسر او الوكاله ..
اللي بيحصل ان الناس بتجيب عربيه حوادث من بتوع الجرنال دي .. تجيب نص كامل استيراد من بورسعيد .. و تركب النص في الحوادث .. و اصبحت العربيه فابريكا حوض و شنطه (لو جبت نصين طبعاُ .. بيبقي اللحام في انصاص القوايم و في العتب .. و دي بتيجي قضره جديده تركب و كان الله في عون المحسنين ..) ...
السيناريو 2 : عربيه من الخليج تنزل .. تيجي هنا .. تجيب عربيه حوادث نفس الموديل .. تنقل ارقام الشاسيهات .. و تقدم بلاغ في القسم ان العربيه عملت حادثه و تتسلم في الجمرك (طبعاُ لازم موتور العربيه بتاعه الخليج يرجع مع العربيه الحوادث ) .. و ده معروف باسم : نظام ليبيا ..
انت بقي عاوز تعمل ايه ؟

[Xpert]

يعني من الاخر .. يأما بتستري نمره شاسيه + نمره مرور .. يأما بتشتري نص شاسيه بدون نمره مرور ...ده اللي اعرفه .. عرفني انت عاوز ايه .. هيلب مي هيلب يو :d

[Ahmed Hassan]

يعني من الاخر .. يأما بتستري نمره شاسيه + نمره مرور .. يأما بتشتري نص شاسيه بدون نمره مرور ...ده اللي اعرفه .. عرفني انت عاوز ايه .. هيلب مي هيلب يو :d

و الله انت راجل سكر... بس مش شايف انك ناوي تسجن الراجل بموضوع ليبيا دا؟!!! :o

[Xpert]

و الله انت راجل سكر... بس مش شايف انك ناوي تسجن الراجل بموضوع ليبيا دا؟!!! :o

انا ماليش دعوه يا عم .. ده درس تعليمي علشان محدش يتضحك عليه في شراء العربيات .. و انا لا اتحمل اي مسؤليه قانونيه نتيجه نشر الكلام ده و ليس لي علاقه باي ما كتب في التعليق ..و انا نفسي باستحرم اعمله ... و علي قاريء الموضوع تحمل نتائج قراراته بنفسه .....

[mohamed_88sk]

معلش يا جماعة ايه موضوع ليبيا ده ؟؟
وضحولي أكتر يمكن امشي فيه ويبقى نظام الكويت ههههه
طيب يدفع جمرك؟؟؟وضحولي لو سمحتوا..

[Xpert]

الفكره هيا ترخيص العربيه علي ورق عربيه مرخصه حالياً بدون دفع جمارك .. و التخلص من العربيه التانيه باي طريقه ممكنه و غالباً ما تكون ارخصها .. هي اصلاً طريقه اللي يتكشف فيها بيتسجن بقضيه تزوير في اوراق رسميه و شويه كلام تاني صغير كده .. يعني خلاصته بتاع 5 سنين ولا حاجه .. عادي يعني .. السجن للجدعان ..
لو ماتكشفتش بقي في الحوار ده .. بتبقي راكب مرسيدس او بي ام فابريكا بره و جوه ;)

[mohamed_88sk]

ههههههههههههههههه لاحول ولا قوة الا بالله والله يا جماعه عقلياتنا المصريه جباره هههههههههههههه
بالذات في التلاعب يعني اللي فكر في كده وطلع الفكرة دي أول مرة ده بصراحه عبقري في رأيي

بس كده لو حد أتمسك حيبقى كلابيشو مع هيثم اللي كان ماشي مع الفواتير ماشي بطال ههههههههههه

بس عايزة واحد مسنود قوي ...لأن بعد كده لما تبيع أو تجدد ترخيص حتتجاب صح؟؟لما تعمل البصمه بتاعة الشاسيه..كمان متهيألي التربتك بتاع الخليج العربيات المحروقه أو الحادثه لاقدر الله بيتدفع عليها جمارك بتحددها الدوله اللي حصل فيها كده ..

يعني لو يشيلو الجمارك ولا ينزلوها شويه مش كانت الناس مشيت قانوني والكل استريح ؟!!!

[Xpert]

احب اضيف الاتي :
كباين النقل بانواعه سواء ربع او نص نقل او نقل تقيل بتنزل الكابينه كامله ..
الشاسيه الخاص بالنقل بيتباع في شارع الجسر لوط بس ممنوع ترخيصه
لما حد بيلعب لعبه ليبيا دي .. السمكريه ليها طرق تخلي الكلام ده مايكتشفش ..
ايوا طبعاً عقليتنا جباره .. و ان كان ابوهم القانون .. احنا ابونا التحايل علي القانون ...
لو خفضوا الجمارك كله هايرتاح .. الا مصانع النصر اللي بيبيعوا فيها دلوقتي .. "لتشجيع الاستثمار و المنتج المصري قال "

[mohamed_88sk]

أنا مش عارف ليه مش بنصنع بإيدنا والله عندنا عقليات جميله جدا وقدرات خلاقه بس ليه مش بنستعملها؟؟؟و كبيرنا اللي بنعمله بنجمع ... حاجه شلل ... عارف حضرتك طول عمري بحلم أبقى مهندس ميكانيكا سيارات أو معماري بس للأسف دخلت تربيه رياضيات -ما علينا - بجد أنا وصحابي كان نفسنا نبقى نبني مصنع ... دلوقتي كبيرنا أجنس ولا محل تعديلات
والله كنت بصمم تابلوهات سيارات على أساس المصنع ههههههههههه بس بح خلاص ...


حبة زكريات بقى كفاية منها
طيب حضرتك ليبيا مش بيدفعو جمارك ولا ايه لو حصل لعربياتهم حاجه هنا ولا ده كله على كل الدول ؟

[Ahmed Hassan]

الفكره هيا ترخيص العربيه علي ورق عربيه مرخصه حالياً بدون دفع جمارك .. و التخلص من العربيه التانيه باي طريقه ممكنه و غالباً ما تكون ارخصها .. هي اصلاً طريقه اللي يتكشف فيها بيتسجن بقضيه تزوير في اوراق رسميه و شويه كلام تاني صغير كده .. يعني خلاصته بتاع 5 سنين ولا حاجه .. عادي يعني .. السجن للجدعان ..
لو ماتكشفتش بقي في الحوار ده .. بتبقي راكب مرسيدس او بي ام فابريكا بره و جوه ;)

و يا ريت اللي هيخرج من السجن هيلاقي العربيه... لأ دي هتتصادر كمان!!!!

[taswos]

انا سعيد جدا بأن الموضوع فى يوم بقى فيه كل الردود دى
اولا الفكرة اللى عندى انى اشترى شاسيه وبالضبط زى ماقالو الاخوان انى هشترى عربيه نصين من بور سعيد واركبهم هتبقى ارخص واوفر
بس انا سألت اللى بيجيب العربيات دى وقاللى انه فيه وانها مش ضد القانون بس تلاقى الشاسيه لانه نادر وقبل ماتجيب العربيه تجيب الشاسيه بس يبقى ليه ورق
وده كل الموضوع واكيد فى ناس كتير جدا عملت الموضوع ده
فدلوقتى عرفنا ان فى شاسيهات موجوده بس ياهل ترى ليها ورق ولا الموضوع شاسيه بس من غير ورقه
وشكرا لكل اللى رد بالنسبة لموضوع
اما بالنسبه للعقليات اللى عندنا فده اكيد ان عندنا عباقرة فى كل مجال فى الدنيا بس المشكله توافر الفرصة ويأس الشباب عديم الخبرة او قليل الخبرة
وبرضة ياجماعه هى حاجة تقهر بصراحه لما تبقى عربيه بره بـتقريبا 80 الف وهنا فى مصر 320 الف اللى يشتريها بالسعر ده يبقى اسمه ايه حتى ولو معاه مبلغها كله اسمه استكراد وضرب على القفا العالم كله عايش مستريح وواكل وشارب من شغل ايده الا احنا عايشين عاله على المجتمع اكل (معونات) سكن (احتكار) حتى العربيه (جشع)
فى ايه
وعمار يامصر