مركزخدمة تويوتا "شركة الرزق التجارية" .... سيئ جدا جدا!

[goodwave]

السلام عليكم

عربيتي الياريس بقالها معايا حوالي إسبوعين ولكنهم إسبوعين حافلين! العربية عاملة 504 كم وخلال هذة الفترة زرت التوكيل عندنا في الإسكندرية "الرزق التجارية" أكثر من مرة ..... اولا السبب الذي دفعني للذهاب إلي شركة الرزق او توكيل تويوتا "شركة الرزق التجارية" وليس توكيل "تويوتا مصر" هو إني شاري العربية من عند الرزق وقلت حيعملوا معايا واجب علشان زبونهم............ ولكن هيهات هيهات!!!

التجربة الاولى لما العربية إتخبطت بعد ما جبتها بإسبوع وكانت محتاجة فقط تغيير فانوس ولحام كليبس الإكصدام وإستعدال جزء حوالى 20 سم من الباب اليمين و رش جزء من الباب وجزء من الإكصدام! المهم كان المتوقع الوقت ياخد 3 أيام حسب تقدير المهندس المختص! وبالمناسبة المهندس المختص كان عاوز يغير الإكصدام بالكامل مع إنة فية كسر بالكليبس الاخير فقط! ولكنة كان مقتنع إنة لازم يتغير بالكامل وقال إية قالي ممكن نكسرة خالص علشان التأمين يرضى يغيرة!؟ طبعا انا ما وافقتش وقلتلة طب يا حلو ماذا لو كسرتة والتأمين قال بردة صلحة!!!!

المهم العربية سلمتها ومهندس التأمين وافق على الإصلاح للإكصدام والباب وتغيير الفانوس!

بعد 6 أيام (مش تلاتة زي ما المهندس وعد) قالوللي تعالى خد العربية وياريتهم كانوا بيتصلوا بيا ...لأ.... انا إتصالات طول الوقت وموبايلات للمهندس إللي مرة يرد ومرة لأ..... المهم روحت أستلم!!!

لقيت الإكصدام معمول شربة والمهند س بيقوللي سيبها كمان يوم؟؟؟ لية؟؟؟ سيبها بس؟؟؟؟ يا عم لية هي إيجار؟؟؟! سيبها علشان اللون ما إتظبطش مننا......... إية؟؟؟؟؟؟؟؟ معلش اصل اللون دة جديد يا أستاذ!!!

هنا شعرت إني بكلم صبي في ورشة مش مهندس في توكيل تويوتا!!!!!! وقلتلة العربية بتنزل من سنتين عاوز تقنعني إنة لون صعب (بترولي) ... وكمان دة لون بيتعمل على الكمبيوتر .... قالي معلش وبكرة حتستلم وإحنا عندنا "ضمير" وكان ممكن نسلمهالك كدة! قلتلة لأ يا حلو ما هو لو حد خد بالة منها كنت حجيبهالك تاني وأعملك شوشرة!! المهم سيبتها وأنا بردة إللي أتصل تاني يوم ويقولوا لسة! الفار لعب في عبي وقلت جايز خبطوها! روحت شفتها وكانت لسة بتتعمل وقالوللي فووت علينا بكرة! كدة 8 ايام عندهم!

بالمناسبة كنت طالب يتركب سنتر بريموت بالمرة وهي هناك 8 (ثمانية) ايام وإستلمت ولم يتركب نظرا "لضيق الوقت"!!!!

المهم روحت أستلم والفاتورة 1600 جنية والفانوس الخلفي محسوب ب 525 جنية بجانب المصنعيات النااااار! اللون إتظبط بصراحة بس الإكصدام ياخد 8.5 من عشرة بس أحسن من أول مرة شوفتة كان 6 من عشرة! وبالرغم إحتجاجي ولكني كنت محبط فأخدت العربية ومشيت!

المهم أخدوا الفانوس المكسور والتأمين قالي لازم أرجعة فروحت النهاردة الصبح علشان أخدة ,,,,,,, والمفاجأة مش لاقينة؟؟؟؟؟؟؟؟؟؟؟ إزاي .........!!!! المهم مسئول المبيعات قالي مش حضرتك كنت بتسأل على السنتر بريموت من فترة؟ قلت ااه! قاللي هو موجود وممكن نركبهولك النهاردة والدنيا هدوء والتسليم في نفس اليوم!

هنا تأتي خيبتي الثقيلة إني وافقت!!!!!!!!

سيبت العربية الساعة 10 صباحا وروحت أخدتها الساعة 4 مساءا والملاحظات:

1- مفتاح الريموت معكوس! اللوك بيفتخ والأنلوك بيقفل!!! "المهندس" وخد بالك من مهندس يقوللي أصل دة عيب في نوع السنتر دة علشان الريموت! مش مشكلة دي مسألة تعود!!!

2- التابلوة البيج علية بقعة وساخة زي شحم اوحاجة كدة.... إللي بيركب السنتر متوسخ وبيحط إيدة في كل حتة!

3- الفرش متوسخ لأنهم مش بيغطوا الكراسي بكياس بلاستيك وبيقعدوا عليها من غير إي إهتمام

4- التكييف شغال ومتساب والعربية مش دايرة... كأنها عربية ابوهم! وكأن أصحاب العربيات فأة غنية بتلاقي الفلوس في الأرض!

5- ودة إللي حيقتلني العربية فيها صوت "تزيييييق حيجنني ومش عارف جي منين".... الصوت جوة الكابينة وكانة من تحت الكرسي او في الباب... مش عارف؟؟؟ وبيظهر كل لما أخد مطب او انزل في حفرة من حفر العجمي! ممكن يكون ما قفلوش الأبواب كويس؟ ولا إية!!!

طبعا عقبال ما دفعت ورجعت أستلم لم أجد أحد أتكلم معاه وكلة فص ملح وداب وأصلا مكانش في ناس كتير لأنة أجازة وكام واحد بس شغالين النهاردة!

إتصلت بالمهندس المسئول عن العربية ويرد ببرود ويقول هاتهالي يوم السبت ونشوفها!!!!!


بصراحة دمي محرووووووق وحطأ!!!! أعمل إية؟؟؟؟؟؟

- أروح تاني يوم السبت علشان يبوظوها أكتر؟
- اشتكيهم فين ولمين وإزاي علشان لازم أعرف الناس عن جهلهم وسووء معاملتهم
- هل لو روحت توكيل تويوتا مصر يروا يشوفوا المشكلة حتى ولو ما كنتش ركبت السنتر عندهم؟
- هل تويوتا مصر أحسن ولا أسؤ من الرزق؟؟؟

بصراحة محبط وقلت أفضفض لإخواتي يمكن عندهم حل وكمان أحذرهم من التعامل مع شركة الرزق بتوع "الكفتة" مش بتوع "صيانة"! وعلى فكرة المركز ده توكيل ديهاتسو كمان وهو ف الكيلو 24 طريق إسكندرية الصحراوي.

أفيدوني يا إخواني

[Ahmed Anwer]

ربنا يصبرك يا أخ جود ويف ،،،

و لا تقلق ،، و إن شاء الله يكون خير ،،

طبعا صوت التزييق ده عليك و عل توكيل تويوتا ،، ده حقك ،،

السنتر ترجعلهم تاني طبعا ،، انتا دافع فلوس و لازم تستلم حاجة مضبوطة ،،

البقع و الوساخة في الصالون اي كار كير نظيف و إن شاء الله كله يروح لا تقلق

عندهم سوائل و حاجات زي كده بتطلع الحاجات دي كويس جدا ،،

بخصوص الخبطات بقه و الكلام ده ،،

نصيحتي ليك بعد كده مادام حاجات ضغيرة تروح لحد نظيف تقف علي ايده بنفسك

و تتطمن ان الشغل معمول مضبوط بدون زيادة لأن ساعات بيفضحوا العربية في حاجات بسيطة ،،

و تبعد عن التأمين و التوكيل في الحاجات الصغيرة و توفر وقتك و تضمن شغلك

ان عربيتي كان فيها خبطات في الإكصطدامات ورا و قدام و في الرفرف الأمامي و باب السواق

و رغم اني عندي تأمين عملتها في مركز محترم من غير ماسيبها و اعطل عليها

و ضحيت بمبلغ بسيط بس عملت حاجة مضمونة و نضيفة

التأمين خليه للحاجات الكبيرة عشان المصاريف الكبيرة ربنا يبعدها عنا و عنك ،،،

الادارة (!)

[أبو عبدالله]

لا حول ولا قوة الا بالله

ربنا يصبرك ان شاء الله

اما صوت التزييق ده فاكيد هتلاقي فبره او بالاستيكايه من بتوع العربيه مش متركبه مكانها مظبوط بتعمل الصوت ده لما العربيه تتهز

[Karim_Monir]

يوووووووب
معلش يا احمد ايه اللي حصل ده
ظبط اللون ده كفتجية على فكرة
انا جبت اسبويلر عربيتي وخدتة روحت على الحرفيين وروحت اشتري اللون بنفسي من محل بوية عادي عندة كمبيوتر
بيكتب الرقم على الكمبيوتر ورغم ان عربيتي فضي طلع على الكمبيوتر نسب معينة فيها احمر واخضر واصفر
يعني انا كنت واخد 150 جرام
قالوة تحط كام احمر وكام اصفر وكام اخضر يدولك 150 جرام فضي بتاع التويتا
واللون طلع ما شاء الله زي الفابريكة بالظبط
يبقي التوكيل يعملو كدة
ده اسمه هبل
وانا لو منك كنت بهدلتهم
بس انا بغلطك في حاجة
لما انت شوفت مستوى الصنايعية شكلهم ايه اول مرة في الاكصدام تقوم تسيبلهم العربية تركب سنتر
مش انا قولتلك تعالي واركبهولك اصلي
انا عارف انك استبعدت مشوار القاهرة بس اهو تليينة برضه ونعمل معاك الواجب يا عمي
معلش قدر الله وما شاء فعل
وروحلهم السبت خلوهم ينضفوها عندهم اهو اي تكدير ليهم
وماتسكتش على موضوع الريموت ايه كلام هو تعود ده
دول كفتجية يا حبي وما تسكتش
معلش مرة تانية والعربية واخدة عين جامدة
ومش هاوصيك بالرقية الشرعية والصدقة مانت ماش اشء الله عليك ما تتوصاش

احمد باشا

قدر الله و ما شاء فعل

زى ما كريم قالك, مكنش المفروض خالص تخليهم يركبوا سنتر بما انك لقيتهم سيئين كده

السنتر لو متعملش صح مشاكله كتير و مبتخلصش

انت لازم تروحلهم يوم السبت تنظفوا العربية على حسابهم, و حاول مش عندهم, ده غير يشوفلك موضوع الريموت

و لازم طبعا تشتكى فى تويوتا الوكيل الاصلى علشان تضمن حقك لو بوظوا اى حاجة و هما بيعملا السنتر

[Moh.Fahmy]

الف لا بأس يا ابو حميد
انت ليه ما قولتليش زي ما اتفقنا و كنت اجي معاك لان فيه نوعية من التوكيلات لما يلاقوا الزبون جاي لوحده بيستفردوا بيه
لازم يظبطوا السنتر كويس لان ده حقك عليهم و ينضفوا العربية كويس ده الف باء شغل في التوكيلات
انا كنت ناوي اوديك عند حمدي داوود كان حيظبطلك الانذار و السنتر و الفرش و كله انما ما تعرفش النصيب فين
ابقي طمنا عليك كده و ربنا معاك يا رب


محمد فهمي

[hazem_khidr]

.زعلتني و الله يا ابو حميد :(
قدر الله و ما شاء فعل
عموما المشكله بسيطه حاليا طالما شغل البويه بدا يخش دماغك و دا اهم حاجه تروح لهم علشان السنتر و لازم يتعمل و ما تمشيش و لو طلب الامر تزعق زعق.
و ربنا معاك

[hero]

قدر الله وما شاء فعل....
معلش يا ابو حميد....
بس هو للاسف الشديد والكلام دة انا سبق وقلتة ....
توكيل تويوتا علي قد ما هو علي قدر من النظام.....الا انة سايب الدنيا عكعكة مع الموزعين المعتمدين.....وواضح ان الموزعين المعتمدين وجدوا حكاية مراكز الصيانة المعتمدة هي كمان مربحة.....فقالوا نعمل مراكز معتمدة برضة من التوكيل....وبما ان التوكيل مالوش اي سيطرة علي عمليات البيع المغالي في اسعاراها عن اللاسعار الرسمية .....فاكيد برضة التوكيل مالوش اي رقابة ولا سيطرة علي العك في المصنعيات في مراكز موزعينة الافاضل المعتمدين.....
الحكاية عايزة وقفة مع التوكيل .....وممكن بسهولة حضرتك....برقم شاسية العربية ورقم الموتور....(لان دول اصلا مسجلين في تويوتا ايجيبت لانها المستورد والمالك الاول للسيارة وهي ايلي بتطلع الافراج الجمركي...) تتقدم بشكوي فعلية لخدمة العملاء في تويوتا ايجيبت....وتقولهم انك هاتوصل الكلام دة وسؤ المستوي الفني لتويوتا اليابان.....علشان يبدأو ياخدو موقف من العالم دي......

وربنا يعينك علي مابلاك.....بس ما تعديش الحكاية دي....واقلبها عليهم....دول واخدين مبلغ محترم في العربية.....

حسبنا الله ونعم الوكيل....

[mido777]

متزعلش يا ابوحميد ........

قدر الله وماشاء فعل

لو عايز اجى معاك عند واحد كهربائى معرفة وكوبس جدا يشيكلك على الأنذار قولى وانا اجى معاك

وزى ما كريم بيقولك العربية دى واخده عين جامده ...

[goodwave]

السلام عليكم

والله الواحد بيبقى حيطأ ولكن لما بيقعد ففي وسط إخواتة في المنتدى بيحس براحة ! كريم منير ومحمد فهمي ومحمد الطويل شكرا لكم وعلى عرض المساعدة! والله يا كريم مشوار كبير لمصر وكمان انا معرفش الالف من كوز الذرة في القاهرة وانا قلت الفرق في السعر مش كبير وكمان لو حصل حاجة مش حفضل واخدها إسكندرية - القاهرة!

محمد باشا فهمي والله عندك حق كان المفروض أخدتك معايا او اي حد من إخواتي في المنتدى لأني زي ما أكون كنت متبنج.... بس نصيب!

الاخوة أحمد أنور وابو عبد الله ومعاذ وهيرو جزاكم الله خير على النصيحة والمواساة.... انا كنت ناوي اروح تويوتا مصر بس قريت موضوع لأخ لينا في المنتدى بيحكي عن تجربة سيئة معاهم في إسكندرية فقلت ما بدهاش وزي ما المعركة بدأت عند الرزق لازم تنتهي عند الرزق! وحدث التالي:

1- إتصلت بالمبيعات إللي إشتريت منهم العربية وحكيت كل الحكاية وما خلتش.... بصراحة كانوا مستائين وقالولي اروح لواحد إسمة مهندس مجدي ودة مدير الورشة وهما بدورهم حيبلغوا الحاج (المفرو الحاج رزق صاحب التوكيل).

2- السبت (النهاردة) إتصلت الصبح الساعة 9 ونص وسألت على المهندس مجدي وقلت عاوزة علشان أشتكي من تجربتين سيئتين في التوكيل.... ردت عليا مهندسة شابة مسئولة عن خدمة العملاء وقالتلى ممكن اروح أقابلها وهي حتعمل الازم لحد ما المهندس مجدي يوصل.

3- إتكلت على الله وروحت وركنت العربية ودخلت أقابل مهندسة خدمة العملاء.... بصراحة هادية ومستمعة جيدة وهو المطلوب!.... بالمناسبو انا تعمدت اروح السبت وكمان متأخر شوية علشان يكون في جمهور لما أعمل لهم فضيحة.... أصلي كنت ناوي على فضيحة!
المهم حكيت لها بالتفصيل عن السنتر المعكوس وقلتلهل إنتم فاكرني "بصمجي" علشان تقولوا دة بينزل كدة!؟ وقلتلها على الفرش المتوسخ والتكيف المتساب والكرسي إللي من غير كياس وغيرة!
اثناء الحوار تدخل واحد كدة من خدمة العملاء وإللي إستلم مني العربية يوم السنتر وبيقوللي إحنا مش ذنبنا.... هو قال كدة وأنا طحت فية وصوتي علي والناس بدأت تتفرج وقلتلوه إمال ذنب مين؟؟؟ هو أنا جي توكيل ولا ورشة تحت السلم؟.... دة انا لو في الحرفييين حيكون عندهم إهتمام أحسن من كدة! المهم أخد الكلمتين وإختفى ما شوفتوش بعد كدة:)

4- جابوا كهربائي تاني وقالي الريموت ما ينفعش هو بينزل كدة.... قلتلوة طب مش من الذوق وال؛ترام للعميل تقولوا كدة قبل ما تركبوة! بس قلت حعمل إية؟ المهم شوفوا صوت الإحتكاك او التزييق جاي منين؟ بعد حوالي 20 دقيقة لقيت نفس الكهربائي جالي وبيقولي إحنا ظبطنا الريموت وغيرنا المكنة بمكنة من عندنا ومعرفش إية!!!!!!!!!!!؟؟؟؟؟ طب فين كلامكم إن ده بينزل كدة ومينفعش و و و!!!!؟ المهم

5- انا كنت قلت لمسئولة خدمة العملاء إن كان فية كمان بلاستيكة بتبقى في الباب علشان تصد لو بتفتح جنب الحيطة او عربية تانية وطبعا إختفت عندهم.... بصراحة جابتلى بتاعة كدة بتتلزق على كل البواب وتؤدي نفس الغرض بس مش بنفس المتانة... هي حاجة كدة يوم ما تتشال وتتهبد مش حتحصل 5 جنية! بس أهو لفتة طيبة..........:(

6- نيجي لصوت التزييق... طلع معايا المهندس وسمع الصوت وتأكد منه ولم يعرف مصدرة (بصراحة مهندسين كفتة!) وسابوا العربية مع السروجي والكهربائي يفلوا فيها ويفكوا ويربطوا ويقولوا الصوت من تحت التابلوة وفك يا عم تحت الدريكسيون وربط والصوت موجود .... ااااه إظاهر لازم نفك التابلوة كلة علشان ده مفارق من الفرش ( والبطيخ في المريخ.... والشكرمون طااخ في الترلوللي ..... وعمود الكردان في اللبان.... وسلس الأزوح في المفتوح) وكلا عبيط والمهم العربية حتتشرح! كل دة وانا واقف بتقطع في الورشة لأني المرة دي ما سيبتهومش وفضلت واقف جوة الورشة فوق راسهم!

7- بفضل من الله "فقط" يسأل واحد من الصنايعية واحد صنايعي صاحبة معدي بالصدفة ويقولة بكل بساطة .... الصوت منين وشكلة إية؟؟؟؟ يقوم ببساطة يفك تحت كرسي السواق (مكان الكوريك) وأتاري الكوريك محلول ومش متثبت كويس!!!!!!! شفتم بقة العربية كانت حتتشرح على إية؟؟؟؟ وطلع كلامي صح لان الصوت كان صوت "نحر" حديد مش صوت تزييق بلاستيك زي ما هما كانوا بيدوروا! كان هاين عليا ابووووس الراجل إللي كان معدي وإللي نجدني "بفضل الله" من الجزارين!

8- قفلوا تحت الدريكسيون وطلعوا العربية علشان أستلمها.... ولكن كنوع من الغلاسة خليتهم رجعوها علشان ينظفوا التابلوة إللي هما وسخوه يوم الخميس ونضفوة بس بإية؟ بإسنجة متعاصة بنزين!........ بس المهم نضف.


أخدت العربية وروحت ومدفعتش ولا مليم غير "11" جنية تمن نسكافية وكرواسون (كاوتش) في إستراحة العملاء!!!! أسعااار سياحية!

وتووووووبة .... توبة!

بالنسبة لمووع العين الجامدة إللي واخداها العربية....... ياريت تنصحوني أعمل إية؟ والله الواحد تصدق لوجة الله بغرض المباركة من عند الله....... بس ياريت توضحوللي هيا الصدقة ليها نسبة محددة مثلا من تمن العربية؟ ولا دعاء ولا دبح مع إني أعرف إن الدبح على العربية دة بدعة والمهم الصدقة..... بصراحة مش لاحق أفرح بالعربية وبدأ الوسواس يسيطر عليا!

افيدوني أفادكم الله.