سؤال فى اوتوماتيك اللانسر 1600

[Dr.SherifMansy]

باركولى يا جماعة ، أخيرا ربنا سهل لى و كرمنى و جبت لانسر 2008 شكل قديم خليجى أوتوماتيك هاف سبورت .
الحمد لله العربية جميلة و كانت عاملة بس 9 كم لما استلمتها من اوتوداينامكس فى مصر الجديدة بعد مستشفى هليوبوليس ، و الحمد لله ربنا وفقنى و علقت النمر (من حنك السبع و الله).
عندى سؤال محيرنى برغم كده :
أنا حتى الآن باسوق على D و طبعا عادى و لكن لو عايز ازود العزم علشان مطلع جامد او مطلع عادى لكن العربية محملة أعمل إيه ؟ المانيوال بيقول ان لازم العربية تبقى واقفة قبل ما اختار النقلات المختلفة فهل معنى كده انى لازم اقف خالص علشان انقل على Ds أو L ولا اعمل إيه ؟؟ و لو أنا ابتديت مطلع على L أو Ds و خلص و حبيت اجرى بالعربية ، ينفع أجيب D ولا لازم أقف ؟؟؟ أرجوكم الرد يا جماعة و بخاصة الباشمهندس طارق ، و عذرا و لكن سامحونى فى سؤالل تانى ، ال Kickdown هو انى اجيب دواسة البنزين للأرض و لا اشيل رجلى و أرجع ادوس عليها بسرعة تانى ؟
شكرا لكم و مستنى الردود

[fahd_628]

انا مش حقدر افيدك غير فى موضوع الكيك داون دة

الكيك داون هوة انك تدوس البنزين على الأخر و تفضل دايس حتلاقى العربية سقطت نقلة و سحبت

و لكن انت عربيتك Cvt و مفيهاش نقلات

[شاهين - بنز]

أولا ألف مبروك على العربية
أما بسوق اللانسر بنقل من D ل Ds عادي وأنا ماشي على أي سرعة وعلى حسب إعتقادي إنه عادي جدا إنك تغير وإنت ماشي والله أعلم
وبالنبر للكيك داون هو انى اجيب دواسة البنزين للأرض بدون ماتشل رجلك في الأول

[limo]

الف مبروك
انا سبقتك من عشر ايام وجبت خليجى هاف سبورت 1600 اوتوماتيك وكانت عامله 8 كم مش 9 كم
انا بنقل من d الى ds عادى منى غير اى مشاكل بس طلما انت بتقول ان مكتوب فى الكاتلوج ان ممنوع النقل اثناء المشى يبقى امشى مع الكاتلوج احسن وكويس انك قولتلى
بالنسبه للكيك داون هو انه وانت ماشى تدوس بنزين جامد شويه تقوم العربيه مسقطه نقله ادنى والعربيه تأخذ عزم جامد
اما الانسر وفتيسها الاتوماتيك العجيب مفيهوس نقل بتالى مفيش كيك دوان بس انت لو زودت بنزين شويه هتلاقى العربيه استجابه معاك احسن من الكيك داون فى الاتوماتيك العادى
صحيح انت عربيتك ايه كمالينها بالضبط وجبتها على كام؟

[Dr.SherifMansy]

عزيزى ليمو قرأت مقالتك السايقة و الف مبروك ، هى زى عربيتك بالضبط بس اغلى 500 جنيه لكن نفس المواصفات. و لو سمحت راجع الكتالوج فى قسم 4 و قول لى رأيك يمكن انا فاهم غلط. و شكرا

[اسلام المصرى]

باركولى يا جماعة ، أخيرا ربنا سهل لى و كرمنى و جبت لانسر 2008 شكل قديم خليجى أوتوماتيك هاف سبورت .
الحمد لله العربية جميلة و كانت عاملة بس 9 كم لما استلمتها من اوتوداينامكس فى مصر الجديدة بعد مستشفى هليوبوليس ، و الحمد لله ربنا وفقنى و علقت النمر (من حنك السبع و الله).
عندى سؤال محيرنى برغم كده :
أنا حتى الآن باسوق على D و طبعا عادى و لكن لو عايز ازود العزم علشان مطلع جامد او مطلع عادى لكن العربية محملة أعمل إيه ؟ المانيوال بيقول ان لازم العربية تبقى واقفة قبل ما اختار النقلات المختلفة فهل معنى كده انى لازم اقف خالص علشان انقل على Ds أو L ولا اعمل إيه ؟؟ و لو أنا ابتديت مطلع على L أو Ds و خلص و حبيت اجرى بالعربية ، ينفع أجيب D ولا لازم أقف ؟؟؟ أرجوكم الرد يا جماعة و بخاصة الباشمهندس طارق ، و عذرا و لكن سامحونى فى سؤالل تانى ، ال Kickdown هو انى اجيب دواسة البنزين للأرض و لا اشيل رجلى و أرجع ادوس عليها بسرعة تانى ؟
شكرا لكم و مستنى الردود

بسم الله الرحمن الرحيم
ألف مبروك العربية :) ربنا يباركلك فيها و يعطيك خيرها و يبعد عنك شرها.
حضرتك ممكن تغير و حضرتك ماشى عادى خالص بدون الحاجة الى التوقف من الD الى الDs , و الى الL و لكن ليس على السرعات العالية بالنسبة للL يعنى حضرتك و أنت ماشى على 100 كم مثلا ماينفعش تنزل للL , كده أو كده حضرتك و أنت ماشى لو جربت تحرك الفتيس الى الأمام فى أتجاه الR أو الP لن يتحرك و ماتقلقش حضرتك :) ممكن كمان حضرتك و أنت ماشى تجيب الN عادى و ترجع تانى تجيب الD و الكلام ده عن تجربة لأن عربيتى أتوماتيك برده.
ربنا يكفيك شر الطريق.

[nobody]

بما انكم معاكم اتوماتيك فهل مسافة دواسة الفرامل فعلا طويلة
وبتكون مقرفة في الاشارات؟؟

[اسلام المصرى]

بما انكم معاكم اتوماتيك فهل مسافة دواسة الفرامل فعلا طويلة
وبتكون مقرفة في الاشارات؟؟

بسم الله الرحمن الرحيم
"مشوار" الفرامل عادى بالنسبة لى , أبدا الدواسة كويسة و عريضة و مش مقرفة فى الأشارات , و مع الوقت حضرتك هاتتعود عليها :) و بينى وبينك لو راكب عربية بمليون جنيه و ماشى بيها فى زحمة القاهرة هتبقى مقرفة و خانقة كمان ;) أو يا سلام و أنت واقف ذيك ذى أى مواطن على المحور لمدة ساعتين بس :D الخلاصة: أى حاجة هتبقى مقرفة.
اللهم لا أعتراض , الحمد لله أحسن من غيرنا.

[alaa_dash]

يعني يا استاذ اسلام ممكن انقل من ال L لل 2 و 3 و D عادي ؟
على فكرة انا رديت عليك في موضوع عيد ميلاد كاسبر 1500 ..:)

[اسلام المصرى]

يعني يا استاذ اسلام ممكن انقل من ال L لل 2 و 3 و D عادي ؟
على فكرة انا رديت عليك في موضوع عيد ميلاد كاسبر 1500 ..:)

بسم الله الرحمن الرحيم
أنا عربيتى مفيهاش 2 أو 3 , عندى بالتحديد L Ds D N R P
على فكرة فى عربيتى على الأقل أكتشفت أن عصاية الفتيس لن تتحرك فى أتجاه خطأ طول مل أنت ماشى يعنى ماينفعش أنقل من الD الى الR على سبيل المثال و أنا ماشى و حتى و أنا واقف فى لسان بتدوسه لجوه علشان تجيب الR أو الP عند حضرتك أكيد نفس الشىء , جرب تطلع بالL و بعدين ال2 و هكذا.
و أنا رديت على حضرتك لسه حالا :) هو رمضان قرب؟ :D

[Dr.SherifMansy]

الأخ العزيز إسلام ، شكرا على ردك المفيد و الرائع ، يعنى ممكن انقل بدون قلق طول ما السرعة فى حدود المسموح للنقلة اللى عايز انقلها ، و لكن انت فتحت لى سؤال جديد (اعذرنى) ، انت قلت

عندى بالتحديد L Ds D N R P
على فكرة فى عربيتى على الأقل أكتشفت أن عصاية الفتيس لن تتحرك فى أتجاه خطأ طول مل أنت ماشى يعنى ماينفعش أنقل من الD الى الR على سبيل المثال و أنا ماشى و حتى و أنا واقف فى لسان بتدوسه لجوه علشان تجيب الR أو الP

يعنى مش ممكن انقل من D الى R أو P و انا ماشى ، انا فاهم كده لكن لو دست على لسان التغيير هل برضه ها يمنع الغيار الغلط ولا لأ ، و برضه صلح لى لو انا غلطان ، اللى فهمته انى لو ماشى مثلا على 10 او 20 كم و حبيت اجيب Ds أو L فمافيش مشكلة ، صح ؟
برضه ماقلتليش بتعمل الkickdown ازاى ؟ انا بدوس الدواسة للآخر ، صح ولا غلط ؟
و أخيرا اشكر لك ذوقك و اعتقد ان كلنا اخوة هنا فمافيش داعى للرسميات القوية بتاعة "حضرتك"

حضرتك ممكن تغير و حضرتك ماشى عادى

و ماتقلقش حضرتك ممكن كمان حضرتك

، يعنى خللى البساط احمدى يا باشا ، ولا ايه رأيك ؟;)
فى انتظار ردك و الف الف شكر:D:D:D

[اسلام المصرى]

الأخ العزيز إسلام ، شكرا على ردك المفيد و الرائع ، يعنى ممكن انقل بدون قلق طول ما السرعة فى حدود المسموح للنقلة اللى عايز انقلها ، و لكن انت فتحت لى سؤال جديد (اعذرنى) ، انت قلت يعنى مش ممكن انقل من D الى R أو P و انا ماشى ، انا فاهم كده لكن لو دست على لسان التغيير هل برضه ها يمنع الغيار الغلط ولا لأ ، و برضه صلح لى لو انا غلطان ، اللى فهمته انى لو ماشى مثلا على 10 او 20 كم و حبيت اجيب Ds أو L فمافيش مشكلة ، صح ؟

برضه ماقلتليش بتعمل الkickdown ازاى ؟ انا بدوس الدواسة للآخر ، صح ولا غلط ؟
و أخيرا اشكر لك ذوقك و اعتقد ان كلنا اخوة هنا فمافيش داعى للرسميات القوية بتاعة "حضرتك" ، يعنى خللى البساط احمدى يا باشا ، ولا ايه رأيك ؟;)
فى انتظار ردك و الف الف شكر:D:D:D

بسم الله الرحمن الرحيم
أيوه ممكن تنقل براحتك :) أنا على العموم عمرى ما جربت أو فكرت أو خطر على بالى :D أنى أحرك الفتيس فى أتجاه الR P و أنا ماشى أو حتى أجرب و أدوس اللسان و لا فى الخيال ده ممنوع و محظور , الفتيس الأتوماتيك حساس جدا و مشاكله كتير ربنا يحفظنا , أعتبر نفسك و أنت بتتعامل مع الفتيس أنك شايل طفل لسه مولود :) :) واحده واحده و براحه.
و أنت ماش على 10 أو 20 ممكن تجيب الL Ds مفيس مشكلة خالص و ده عن تجربة , أنا عادى بنقل من الD الى الDs و أنا ماش 80 100 مفيش اى مشكلة خالص.
الكيكداون نادرا لما بستعمله لأن البديل بتاعه موجود و أسرع أستجابة و هو الDs , هو على العموم ذى ما أنت قولت و أنت رجلك على دواسة البنزين دوس على الدواسة للأخر و الوحش سينطلق :) بس ماتفضلش دايس كتير :D
طبعا كلنا أخوة و ماش نخلى البساط أحمدى :) , و نخليها كمان اسلام من غير باشا :) لحسن كلمة باشا و بيه بيعملولى حساسية و أرتكريا شديدة جدا ;)
وراجع برده على الموضوع ده و لو عندك أى أسئلة أخرى أنا تحت أمرك :)
http://www.nilemotors.net/Nile/showthread.php?t=18548

[Ahmed Taha]

حصلت معايا

سؤال للأخ إسلام:

واضح إنك خبير في الأوتوماتيك

أنا نقلت من D إلي R و العربية ماوقفتش 100% و أنا خارج من ركنة و سمعت صوت مرعب و الحمد لله ماحصلش حاجة.

السؤال هل المفروض إن الفتيس مايتحركش في إتجاه غلط؟ ولا زى المانوال ممكن أبهدل التروس ف حركة زي دي؟

[Ahmed Hassan]

المانيوال بيقول ان لازم العربية تبقى واقفة قبل ما اختار النقلات المختلفة

علشان تجيب غيار من N الى R لازم العربيه تكن واقفه و طبعا نفس الشيءينطبق على النقل من L, Ds, D ال R

يعني باختصار متنقلش عكس اتجاه حركه العربيه (طول ما العربيه بتتحرك للأمام متجبش نقله خلفيه و طول ما العربيه بتتحرك للخلف متجيبش نقله اماميه)

النقل بين L,ds, D ممكن لأنها كلها نقلات اماميه مع الأخذ فى الاعتبار مراعاه عدم تجاوز سرعه النقله (يعني متكونش ماشي على 100 و تحاول تجيب نقله L)

[limo]

انا قراءت الكتالوج بتاع العربيه ومكتوب فيه تخذير مش تنبيه ان ممنوع النقل بين الغيارات الا والعربيه واقفه
بس انا مش مفتنع لان سعات الواحد بتزنق وهوه ماشى وعايز يطلع من عربيه تانيه فمش معقول انى هقف خالص واجيب الفتيس على Ds وامشى تانى
كمان معروف ان الاوفر دريف بشتغل فى اى عربيه فى اى وقت وعلى اى سرعه
بس طبعا ال L مينفش يجى على اى سرعه ويفضل ان العربيه تكون واقفه

الاخ العزيز اسلام المصرى الف شكر يا غالى على المعلومات الجديده الى الوحد اول مره يعرفها كمان مليون شكر ليك علشان وانا براجع المواضيع السابقه استفدت كتير من مشاركاتك بجد انا اكتشفت كنز وانا براجع المواضيع الى موجوده فى الارشيف
الف شكر ليك وربنا يخفظلك عربيتك