تقييم الطلقة: سريون 1500 Glx (متجدد)

[معاذ الشرباصى]

بسم الله الرحمن الرحيم

ده ان شاء الله موضوع متجدد بخصوص تقييم العربية باستمرار

سعر العربية : 90 الف جنيه

الكماليات:


موتور 1500, 16v, DOHC
اتوماتيك
4 زجاج كهرباء
تكييف
باور كهرباء
سنتر لوك
مرايات كهرباء
راديو سىدى مدمج فى التابلوه (audio)
4 سماعات (2 امامى و 2 خلفى فى الابواب)
وصلة AUX
2 ايرباج
ABS, EBD
جنوط سبور 14
مقابض بلون السيارة+ مقابض نيكل بالداخل
سبويلر خلفى
امكناية التحكم فى ارتفاع كرسى السائق
مسند يد بين الكراسى الامامية
4 حامل اكواب امامية + 1 خلفي (مسند اليد مثبت فى مكان 2 حامل اكواب خلفى)
فرش اسود فاخر + 2 مخدع رأس خلفى
امكانية طى الكنبة (6:4)


---------------------------------------------------------

العداد حاليا :2200 كم

--------------------------------------------------------


1- الحجم: ناس كتير فى مصر مش مقتنعة بالهاتشباك, و شايفين ان العربية لازم تبقى سيدان و كذا متر علشان تبقى عربية تملى العين, لكن دى فعلا اذواق, العربية بالنسبة لى حجمها ممتاز بسبب الاماكن اللى الواحد مضطر يتعامل معاها زى منطقة القصر العينى, ركنة صعبة جدا و زحام شديد, و طبعا كل اصحابى بيحسدونى على حتة اننى بركن فى "خرم ابرة"


2- الوسع الداخلى: العربية واسعة جدا من الداخل, عكس ما يوحى شكلها من بره. و ده كمان سببه ارتفاع الكراسى و الكنبة الخلفيه للعربية عن المتوسط بتاع معظم العربيات, فتقدر تاخد نفس النتيجة من الراحة فى الجلوس, و انت مش مرجع الكرسى للخلف, و مضايق اللى وراك


3- موتور العربية : هو 1500, 16 صباب DOHC. موتور قوى بالنسبة لعربية بالحجم ده, ده غير انه مسهل الحركة بالعربية و هى اتوماتيك, و مع تشغيل التكييف, الفروق بتبقى "شبه" غير محسوسة, زى فرق السحب


4- العفشة : مش ناعمة اوى زىما انا كنت متخيل, انا لسه عامل صيانة الالف بتاعة تربيط العفشة و خلافه, علشان كده مش عاوز احكم عليها بدرى, لكن ادائها الحالى مرضى بالنسبة لى.


5- النظام الصوتى : كنظام صوت فهو جيد جدا, خاصة انى مش من هواه ال sound system, او مبفهمش فيه. انا كل اللى عاوزه من النظام بتاع العربية انى اسمع الحاجة بصوت نقى, و موزع بشكل جيد فى اركان العربية. و ان كان يعيب عليه موضوع ان السى دى audio فقط, غير ان التعامل معاه مش سهل حتى بعد الاستعانة بالكتالوج (فى حاجات مش مفهومة بالنسبة لى), كمان مفيش مثلا خاصية ال Pause. لن يعوض موضوع ال audio ده وجود وصلة AUX.


6- التكييف: لم استعمله لفترة طويلة, تقريبا اخر 200 كم. الصبح طبعا هيبقى مشكلة بسبب لون العربية, لكن بالليل فعلا اداءه عالى, و ده المتعارف عليه فى العربيات الاسيوية المنشأ.


7- الثبات: ان لحد 1800 كم, كنت ماشى اخرى 80 كم/ساعة, مبقرصش على العربية, و مبحاولش اجرب ثباتها عامل ازاى. شوية شوية بقيت ابدأ اجرب ادائها فى الملفات على سرعة, فى المناورات على سرعة. النتيجة ان ثباتها جيد جدا (اخره 8 من 10), يساعدها فى كده طول قاعة العجلات, لكنه لن يرتقى لدرجة الامتياز بسبب ارتفاع العربية النسبى لمثيلاتها من نفس الفئة, ده غير العفشة بتاعتها و المعادلةالمعروفة (ثبات اكتر = عفشة انشف)


8- الشنطة: الشنطة صغيرة طبعا, لها اينعم ارتفاع, و ممكن يتشال اللوح الخلفى و تحط حاجات بشكل افقى, لكن عدم وجود عمق للشنطة, ساعد على الاحساس بالضيق اكتر


9- حوض الموتور: ده اكتر حاجة بترعبنى فى العربية, صغر حجمه مع اقتراب الموتور من مقدمة العربية, مقلق بدرجة كبيرة. انا مش قلقان على الصيانة, لأن المفروض الويل عنده عمالة مدربة, لكن فعلا قلقان من لو لا قدر الله حاجة خبطت من الامام, الخساير مش هابق هينه (ربنا يكفينا شر الحوادث).


10-اماكن التخزين : متعددة فى العربية, و بكثافة. و من اهتمامهم بالتفاصيل الصغيرة, فى فراغ صغير تحت الراديو سىدى تشيل فى الحاجات اللى محتاج انها تبقى فى متناول بسرعة, المكان ده, مع اضاءة نور السيارة الخالرجى, بينور هو كمان, لسهولة الوصول لمحتوياته.


11- العزل الداخلى: العربية العزل بتاعها مش جامد اوى, و ده بالنسبة لى بحبه, علشان ابقى متفاعل مع اللى حول منى, زى صوت الموتور و العربيات و خلافه.


12- استهلاك البنزين: الاستهلا ان بيتراوح بين 260-280 لتر للصفيحة فى وقت التليين, و مع تشغيل التكييف بقى حوالى 240 لتر للصفيحة, لن انا ناوى احسب الاستهلاك ده بعد اما التليين خلص و اقولكم على ارقام اكثر دقة من دى.


13- اخر حاجة, العربية وجدت فيها نظام اسمه “VSC” و ده حسب كتالوج العربية بيعزز ثبات العربية فى المنحنيات و الملفات, و اكاتبين " لا تعتمد عليه فى القيادة المتهورة".


دى الحاجات اللى قدرت اجمعها علشان احاول اكتب تقييم للعربية على قد ما اقدر. لو لاحظت حاجات جديدة سواء سلبية او ايجابية ان شاء الله هزودها هنا, و قريب قوى هرفع صور لها.

[hogo_9i]

تقيم جميل جدا وربنا يحفظهالك

[fahd_628]

تقييم جميل جدا من شخص محترم و بحبة والله منغير ما اشوفة

ربنا يباركلك فيها يا معاذ و شكرا على التقييم الجميل دة

[3mr Farrag]

تقيم فعلا اكثر من رائع
و يارب يباركلك فيها

[ows212]

13- اخر حاجة, العربية وجدت فيها نظام اسمه “VSC” و ده حسب كتالوج العربية بيعزز ثبات العربية فى المنحنيات و الملفات, و اكاتبين " لا تعتمد عليه فى القيادة المتهورة".


النظام ده شغال طبيعى ولا بيشتغل حسب انت عايز ولا لأ ؟؟؟


العزل الداخلى: العربية العزل بتاعها مش جامد اوى

يعنى وانا جوا العربية بكون سامع صوت الموتور ولا ايه يعنى مافيش هدوء ؟؟؟؟

[معاذ الشرباصى]

13- اخر حاجة, العربية وجدت فيها نظام اسمه “VSC” و ده حسب كتالوج العربية بيعزز ثبات العربية فى المنحنيات و الملفات, و اكاتبين " لا تعتمد عليه فى القيادة المتهورة".


النظام ده شغال طبيعى ولا بيشتغل حسب انت عايز ولا لأ ؟؟؟


العزل الداخلى: العربية العزل بتاعها مش جامد اوى

يعنى وانا جوا العربية بكون سامع صوت الموتور ولا ايه يعنى مافيش هدوء ؟؟؟؟

النظام ده شغال باستمرار, و لو حصل حاجة بتنور لمبة فى التابلوه اسمها VSC

بالنسبة للعزل, هو كويس, و الموتور لسه داير ممكن متسمعش صوته, لكن لما تشد عليه هتبقى سامع

[3mr Farrag]

طيب تقدر تقولي الفرق بين البولو و السريون في الثبات
هل حسيت بفرق ملحوظ ....للبولو

[YoussefMostafa]

تققيم جميل وواضح وفي منتهي الحياد

[Mustafa_Farouk]

مبروك يا معاذ، العربية دي بموت فيها

[Jato.33]

غريبة السعر ده
حضرتك متأكد
90 ألف بس
دية ال1300 الأوتوماتيك الكاملة بالمبلغ ده
لو متأكد ممكن أعرف جبتها منين عشان هنزل أجيبها

[معاذ الشرباصى]

غريبة السعر ده
حضرتك متأكد
90 ألف بس
دية ال1300 الأوتوماتيك الكاملة بالمبلغ ده
لو متأكد ممكن أعرف جبتها منين عشان هنزل أجيبها

يا باشا نا جايبها بالسعر ده من دايهاتسو المعادى

ال 1300 كاملة سبور اخر سعر كان 86500

[Karim_Monir]

معاذ الف مبروك وربنا يباركلك فيها
العفشة هاتنعم بعد ما تكمل 5 الالاف كم
اللي عايز اسال عن اخبار استهلاك البنزين ايه
والكاتينة بتاعها سير ولا جنزير زي كرولا

[3mr Farrag]

هي الكورولا جنزير!!!!!!!!
انا اول مره اعرف كده
طيب و صوت الزنه اللي فيا ده بقي....رشاشات ولا سير

[أبو عبدالله]

4- العفشة : مش ناعمة اوى زىما انا كنت متخيل, انا لسه عامل صيانة الالف بتاعة تربيط العفشة و خلافه, علشان كده مش عاوز احكم عليها بدرى, لكن ادائها الحالى مرضى بالنسبة لى.

انا كنت فاكر زيك كده في الاول ولكن بعد ما العربيه مشت اكتر يعني انا دلوقتي حاجه وعشرين الف
العفشه بقت مريحه اكتر من الأول بكتير

كمان مفيش مثلا خاصية ال Pause

أزاي الخاصية دي عندي في العربيه
مش عندك ازاي

7- الثبات: ان لحد 1800 كم, كنت ماشى اخرى 80 كم/ساعة, مبقرصش على العربية, و مبحاولش اجرب ثباتها عامل ازاى. شوية شوية بقيت ابدأ اجرب ادائها فى الملفات على سرعة, فى المناورات على سرعة. النتيجة ان ثباتها جيد جدا (اخره 8 من 10), يساعدها فى كده طول قاعة العجلات, لكنه لن يرتقى لدرجة الامتياز بسبب ارتفاع العربية النسبى لمثيلاتها من نفس الفئة, ده غير العفشة بتاعتها و المعادلةالمعروفة (ثبات اكتر = عفشة انشف)

الثبات بصراحه يا معاذ انا مش معاك خالص

وهاعتبر انك لم تجري بالعربيه علشان انت لينت فتره كبيره

ولكن العربيه كل اللي بيركبها مش كلامي انا ان الثبات بتاعها ممتاز
وسهلة اللم جدا
يعني التحكم في العربيه جيد جدا

وجرب وانت ماشي في طريق فاضي على 100 مثلا وهات الدركسيون يمين خطف وشمال تعرف ان العربيه ثابته جدا في الحالات الطارئة كمان

ده انا في ملفات جامده على الطريق بعدي فيها ناس بسبب الموضوع ده علشان بعرف اقرص على الملف

11- العزل الداخلى: العربية العزل بتاعها مش جامد اوى, و ده بالنسبة لى بحبه, علشان ابقى متفاعل مع اللى حول منى, زى صوت الموتور و العربيات و خلافه.

العزل برضه مش معاك قوي فيه
لأن العربيه العزل حاجات كتير منها صوت الهوي اللي بيدخل من الشبابك وده شوفته في عربيات كتير ولكن عندي مش موجود يعني لو سمعت بودنك على كل شباك والعربيه ماشيه 140 مش هتلاقي صوت الهواء داخل العربيه وانما سوف تسمع صوت الهواء وهو بيرتطم في الخارج

اما صوت الماتور فده شئ طبيعي لأن الماتور قريب منك مع ان برضه عزله يعتبر جيد



وفي النهاية هو مفيش عيوب للعربيه ولا ايه ؟


اما بخصوص سير الكاتينه فهو جنزير برضه يا كريم زي الكورولا

[معاذ الشرباصى]

طيب تقدر تقولي الفرق بين البولو و السريون في الثبات
هل حسيت بفرق ملحوظ ....للبولو

و الله يا عمرو زى ما انا كاتب لسه واحدة واحدة بقرص عليها, او اجرب ثباتها

لغاية دلوقت بتعمل اللى البولو كانت بتعمله, و ده مبشر

لكن الحكم النهائى مش دلوقت