فتحت الموتور ومحتاج خبرتكم ؟

[moudy2002]

اخوانى الكرام من فترة وانا بشتكى من نقص زيت الموتور حوالى نص كيلو كل 400 ك او لما بجرى بالعربية شوية ودخنه بيضاء بتظهر لما اجرى بالعربية من غير قرص عليا ..
مشكلتى كاملة فى هنا http://www.nilemotors.net/Nile/showt...3%D1%C9&page=2
المهم لقيت مهندس شغال فى مقار توكيل الاوبل وفاتح ورشة فى المعادى الجديدة .
قبل ما يفك الموتور قاس الكبس بتاع كل بستم طلع 200 لكل بستم ماعادا بستم واحد طلع 175 وقالى كدة الموتور حالتة كويسة بس هنفك الموتور برضوا ونشوف . بعد الفك وجد ان فى بستم واحد فية بوش بسيط وعامل عتب ( حز صغير فى الشميز الى هو اسطوانة بيتحرك فيه البستم ) قالى انه لازم يروح للخراط علشان يوسع الشميز دة و هنشترى طقم بساتم 0 20 او 0 10 ..
وكدة طبعا العربية هتخش فى عمرة كاملة . السؤال دلوفتى هو انه لازم اغير طقم البساتم كلة ولا اخرط مكان البستم الى فية بوش واجيب بستم واحد يس وسيب الباقى زى ما هو ؟؟

المهندس نصحنى انى اجيب كل حاجة من عند المنير الى فى الهرم حد جربة قبل كدة ؟ كمان قالى المصنعية 400 ج كدة كويس ولا كتير ؟ طبعا من غير الخراط .

وومكن حد يقلى اية ممكن ابص علية تانى فى الموتور علشان يطلع كويس فى الاخر والعمرة تبقى ناجحة ؟
وشكرا اخواتى وهقولكوا طبعا انا عملت اية اول بااول
العربية اكسنت 1500 موديل 2000 عاملة 102.000 ك
شكرا مقدما

[ahmed azab]

بص يا باشا انت ممكن تغير بستم واحد بس اللي هو معتب ده لو عايز تلم وهاتجيب طقم شنبر كامل وسبيكة وطبعا هاتودي الماتور للخراط علشان يظبط علي البستم الجديد وشغل التنضيف ولو في حاجة في الوش
تتعمل وبكده هيقي الموضوع كويس اما لو عايز تبني الماتور من أول وجديد اشتري طقم بستم جديد كل حاجة جديدة 400 ده حساب المصنعية معقول بس يكون صنايعي كويس بس خد بالك لسه عندك حساب
- الخراط
- وطقم البستم
- ولو الصبابات هتتغير وانصحك بلاش لو هما اللي فيها كويسين علشان الجديد وحش واحيانا بيقطم
-زيوت وجونات والذي منه
-طقم الشنبر
- طقم سبيكة
يعني ممكن متهيألي تعمل حسابك في 1.500او 2000
ونصيحة اخوية هات انضف واغلي حاجة علشان تقعد معاك كتير وتنسي وتتأكد من كل قطعة هاتشتريها بنفسك

[3mr Farrag]

انا اللي اسمعه ان ينفع تغير عادي بستم واحد
و المنير معروف و مضمون....بس هو في فيصل مش الهرم

[Ahmad Allawy]

السلام عليكم..
العربية دي لونها فضي مش كده..؟؟
انا باتعامل اصلا مع فادي في عربيتي.. اللي هو مهندس اوبل اللي في المعادي الجديدة.. وكنت عنده امبارح ساعة ما الموتور بتاع سعاتك شرف علي ارض الورشة..
المهم اللي عرفته بقي ان الموتور هيتخرط 0-40 وده اللي خلاني استغرب جدا..
وده علي كلام الصنايعية اللي في المحل.. بس مش عايز اظلم حد يمكن اللي قاللي كده مش عارف او مسمعش كويس.. بس انا فاكر سمعت الكلام ده..
وبعدين الغريب اصلا ان الموتور بتاعك يعمل كده علي 100 الف كيلو بس.. وعلي كلامك ان العربية علي الهادي بتدخن برضه.. معني كده ان العربية دي اتبهدلت جري و قرص و شد.. عشان تعمل كده في المسافة دي..
المهم يعني انا كل اللي اقصده انك تتأكد هيخرط 0-20 ولا 0-40 ولو 0-40 معني كده ان الموتور ده اتخرط قبل كده.. او اتبهدل خالص..في الفترة اللي فاتت..
بالنسبة للمصنعية.. انا عملت عمرة كاملة لعربية فيات.. و اخد مصنعية 350 ..(مش فادي طبعا.. ميكانيكي كنت باتعامل معاه في العربية القديمة..)
بالمقارنة كده مش كتير المصنعية علي فكرة.. كويسة..
عموما ربنا يعينك و يباركلك فيها وعايزة محافظة شوية و اهم حاجة فترة التليين تكون تعامل العربية بحرص وامشي علي التعليمات.. عشان العربية تعيش معاك..

[moudy2002]

شكرا عزب بية على نصحتك وققتك وانا فعلا بعمل بنصحتك وجايب احسن حاجة فى السوق ومش عايز استرخص علشان الموتور يعيش ...

احمد باشا هى عربيتك الاوبل كورسا الى مركونة جانبى ؟؟
فعلا عربيتى هى الى عند مهندس فادى زى ما انت شفت وموضوع 0 40 دة صحيح ..
ودة اكتشفته لما الموتور راح للخراط قال ان العربية كان معمولها طقم شنبر قبل كدة ..
للاسف الى اشترتها منه طبعها مقليش كدة وحلف ميت يمين ان الموتور متفكش قبل كدة وكبست الموتور قبل ما اشترى وكان عامل 75 % .. حسبى الله ونعم الوكيل ..

انا حبيت بس اقول ايه الى عاملة فى العربية علشان احب افيد الكل
طقم بستم جديد . طقم صباب يابانى . طقم شمبر 040 . طقم جوان . طقم سبيكة . طلمبة زيت . سير كاتينة . بلية كاتينة .. فية حاجة لسة تانى مش عايزة تتغير ؟؟؟؟

اظن كدة ان الموتور مش محتاج حاجة تانى وربنا يستر .. على فكرة العمرة هتعمل حوالى 2200 جنية .

بس انا كمان بستغرب ممكن الموتور يرجع تمام تانى مع انه هتخرط للمرة التانية ؟؟

على فكرة المهندس صاحب الورشة راجل فاهم جدا وامين وصبور جدا وكمان معاه صنيعى كويس وشغال برضة فى التوكيل .. وشغال فى كل العربيات بس الانجكشن بس ..

[أبو ياسين]

انا اسف على التعليق
بس ازاى عربيه عامله 102 الف يحصل فيها كل ده ؟؟؟؟؟؟؟؟؟

[moudy2002]

والهى يا ابو ياسين انا فعلا مستغرب زى حالتك كدة وبجد مش عارف لية مع انى مش بشد بالعربية دية خالص ومحافظ عليها جدا بس زى ما انا قلت الى انا اشتريت منه العربية شكلة كان مبهدلها .. بس مش عارف لية مكنش باين على العربية موضوع العمرة دة خالص .. العربية بدور من اول تكة وسحبها كويس والموتور ملوش صوت وهادى ومفيش تخبيط فى العربية وكنت بجيب بيها لغاية 130 ك مستريح .. ولولاا انى شفت الموتور بيعنى كنت قلت حاجة تانية بس هو دا فعلا الى حاصل وبرضة لغاية دلوقتى مش شايف تفسير للى لقيتة فى العربية وبسال انا كمان ازاىىىىىىى ؟؟

[Ahmad Allawy]

انا عربيتي لونها كحلي.. مش السيلفر اللي كانت واقفة..
السيافر دي متبهدلة خالص.. من جوة زبالة.. و من برة نضيف قوي..
راكب فيها موتور 1600 مفتري..

[Ahmad Allawy]

العربية لما يكون موتورها خفيف..
مش بتعمل مشاكل في الدوارة عادي جدا..
بتجري كويس قوي.. عادي.. وصوتها مش بيطلع غير لو الموتور مبهدل قوي..
كونه انه مكانش ليه صوت يبقي الموضوع اتلحق بدري

[Ahmad Allawy]

التفسيرات الممكنة..
انه ميكونش لين العربية كويس.. يعني اول ما اشتراها افتري عليها في الجري و القرص..
او يكون من النوع الللي بيطنش الزيت خالص.. و بيمشي عليها و الزيت وحش..
او من النوع اللي مش بينقل قبل ما الار بي ام بيوصل للرد زون..

ملحوظة/: معلش الرد انا باقطعه كده عشان كل ما ابعت رد واحد كبير بيطلع رسالة خطأ من السرفر..

[Ahmad Allawy]

نسيت اقولك ان الاوبل دي رشة دواخل كمان..يعني من الاخر لو ههتشتري مش اكتر من 25 الف..
و فيها طلمبة بنزين و ردياتير هيتغيروا..

موتورك بعد العمرة.. اهم حاجة تهتم بيه ف التليين..
متقرصش عليه نهائي و الار بي ام ميعديش 3 باي حال..
و تليف ممسافة كبيرة.. مش متصلة..
لأ مشاوير صغيرة.. و تلين مش اقل من 1000 كم..
تغير زيت مرتين كده في الاول علي 500كم و يكون زيت نضيف..
عشان بيبقي في رايش في الموتور من جوة ممكن متكونش باينة للعين بس دي ممكن تضر المكنة في التليين..
الحرارة خلي بالك متعلاش خالص.. ويفضل ان تلين العربية بالليل او الصبح بدري قوي قبل الشمس ما تطلع.. عشان الجو يبقي بارد شوية..
الموتور بعد الموضوع ده ممكن يقعد معاك اكتر من 200 الف كم لو سواقتك كويسة و هادية..
وربنا يعينك عليها..و تخلص بالسلامة ان شاء الله..

معلش انا باتأسف تاني عن موضوعا لرد المتقطع ده..
بس معلش..
اصلي كتبت رد كبير جدا كان ييجي صفحتين..
وانا بابعت قام طلع رسالة ايرور.. كنت هاضرب دماغي في الجهاز..
وراحت الرسالة..
عموما انا باعتذر تاني و اتمني اني اكون افدتك..

_____________
تم دمج الثلاث ردود المتقطعة
ارجوا مراجعة فواعد المنتدى بعد التعديل
مشرف القسم.

[moudy2002]

يا احمد باشا انا مش عارف اشكرك ازاى على كل النصايح دية شكرا لوقتك ... جزاك الله خيرا اخى الفاضل ..
انا مش هشترى الاوبل الى واقفه دة يمكن انت فهمتنى غلط انا افتكرتها بتاعه معاليك .. حصل خير

واللهى الاحتمالات الى انت بتقلها شكلها صح وفعلا ممكن الراجل الى قبلى كان مبهدلها خالص والحمد الله انى لاحقتها ..
بس انا اسف ممكن حضرتك توضحلى تانى موضوع التلين دة اعمل فية اية لانى مش فاهم قوى قصدك
يعنى اخدها مشاوير طوالى على طول مسافات كبيرة ولا الين برحتى كل يوم شوية كدو فى الطراوة بليل ..
واية احسن طريق الواحد يلين فية تا تا ...
واية رأيك فى م / فادى انا حاساس انه كويس ومحترم وبيفهم ؟
ومتنساش تعمل copy من الرد قبل ما تعمل reply علشان دماغك غليا علينا قوى ..coll

[Ahmad Allawy]

ولا يهمك سعاتك.. وانا تحت امرك في اي حاجة..
انا عارف انك كنت فاكرها عربيتي.. بس انا اصلي شكلها عجبني ف الاول.. بس لما ركبتها اتضايقت قوي..عشان من جوة مبهدلة.. و رشة حوض و دواخل كمان..
التليين بقي..
لينها في مسافة مش اقل من 1000 كيلو.. ولو زودت عن كده يبقي احسن.. معاك يعني لحد 1500 يبقي فل قوي..
هاقولك بقي..
العربية لما تخلص اكيد هتلين تحرق صفيحة او 2 علي الواقف..يعني يسيبوا العربية دايرة لحد ما تخلص بنزين..
المهم.. بعد ما تاخدها.. تمشي بيها مشاوير صغيرة براحتك.. يعني 100كم مثلا اقصي حاجة..
بلاش تعمل زي ما معظم الناس بتعمل و تطلع سفرية طويلة تخلص فيها التليين و خلاص..
انزل بالعربية بالليل.. بلاش النهار عشان السخونة..
و خلي عينك علي مؤشر الحرارة متعلاش منك خالص..
الزيت .. تغير زيت بعد 500 كم من العمرة و تحط زيت نضيف.. اي زيت بس ميكونش التعاون ولا مصر للبترول.. و متحطش زيت من اللي بيقعد 10 الاف و الكلام ده..
حط زيت عادي. 3 او 5 الاف.. و غير اول مرة علي 500 بس..و تاني مرة علي 1000
يعني علي 500 و 1500 علي العداد..
عشان بيبقي في رواسب و رايش في البلوك جوة.. تنزل و الموتور يبقي نضيف بقي وزي الفل..
انت ساكن في مدينة نصر زي ماهو باين في المعلومات بتاعتك..
هاقولك بقي علي طريق تمشي فيه.. و المفضل جدا انه ميبقاش في مطالع خالص ولا كباري في اول 500 كم دول..و السرعة متوصلش 60 خالص..و الار بي ام ميوصلش 3 خالص..
ممكن تمشي ازاي بقي.. تاخد شارع مصطفي النحاس كله رايح جاي.. و شارع ذاكر حسين...
ممكن تاخد الاوتوستراد من اول نادي السكة كده لحد الكوبري اللي عند النادي الاهلي و تدخل من جنبه يمين.. و تمشي في شارع الثورة بقي براحتك..
المهم تبعد عن الكباري.. وانت اعمل طريقك الخاص براحتك
بس يا باشا..
بالنسبة لفادي.. هو فعلا دماغه نضيفة و خبرة التوكيلات فرقت معاه كتير.. يعني هو اشتغل فتر كويسة في اوبل مقار اللي في البحوث.. و حاليا بقاله كام يوم في توكيل سكودا اللي في غمرة..
وبعدين انت بنفسك شوف العربيات اللي بتتعامل معاه ما شاء الله كتير و ماركات..
معظم اللي عنده اوبل و دايو.. وسكودا و فولكس بس مش كتير..
يعني ما شاء الله حاجات مش تعبانة يعني..
انا اعرفه عن طريق ابن خالي ده كان زميله في مقار.. هو اللي قاللي علي العربية دي كمان اللي معايا.. لما شافها عجبته و انا كنت بادور ساعتها.. ودلني علي العربية دي..
ومن ساعة ما اشتريتها من 3 شهور معملتش حاجة برة غير مفتاح كونتاكت مشفر بس.. عشان هو ميعرفش حد بيعمله.. بس هو تمام..
ربنا يكرمك يا باشا و يوفقك..

[Adham]

طالما فية شميز جايب عتب يبقى فية حل من اتنين

اولا ان الشميز دة يتوسع و يركب بستم اكبر شوية يبقى على قد التوسيع اللي اتعمل - طبعا دة يتم في البساتم كلها مش واحد بس
ودة الحل الامثل و الاضمن و اللي يعيش معاك و كمان تغير الشنابر و الصبابات و السبايك مع خراطة الكرنك و تجليخه و تعمل قواعد و دلايل لوش السلندر ضروري و كمان رودية للصبابات

و الحل التاني لو انت عاوز تلم العربية و مش ناوي يخليها ان الخراط يوسع في الشميز و بعدين يركب شميز تاني اضيق يشحطة جوة الشميز المتوسع و بتخانة 3 مم مثلا و يبقى على قد البستم الموجود و بكدة توفر تمن طقم البساتم و خراطة كل الشمايز كمان
بس الحل دة مش حايعيش معاك بالكتير 50 الف كيلو لان خامة الشميز اللي حايتركب بتبقى اضعف من الاصلي و مش حاتعيش كتير و بتتآكل بسرعه

و الحل التالت انك تجيب موتور استيراد او بلوك موتور بدون ادوات التغذية و تنقل علية كل حاجة الموتور اللي عندك طالما حالته كويسة

وبالنسبة للتليين الاحسن انك تاخد طريق مفتوح زي مثلا من الحي العاشر لكارفور او تطلع طريق السويس رايح جاي عالهادي و ماتمشيش على سرعه ثابتة و لكن بسرعات متغيرة و من غير ماتقرص عالعربية خالص و كذلك من غير ما تحمل عالغيار او تصقف منك يعني تدي الغيار حقة من غير اقلال و لا افراط و احذر ان العربية تسخن منك
لكن تلينها في عباس العقاد او الثورة لأ طبعا لأنها شوارع زحمة و مش ماشية يعني حاتبقى واقف اكتر مانت ماشي غير ان العقاد يعتبر مطلع نسبيا و مش حاتلحق تجمع فية سرعه العربية بسبب الزحمه

يفضل بالليل في الطراوة تاخد طريق السويس رايح جاي مثلا بس زي ماقلتلك بسرعات متغيرة يعني ماتثبتش رجلك على سرعه واحدة 60 مثلا
لكن تمشي شوية على 50 و شوية على 55 و شوية على 65 و شوية على 60
و حط بنزبن 90 مش اكتر من كدة و كمان سيب العربية الاول يومين دايرة عند الميكانيكي قبل مشوار التليين
و بعد ماتمشي 500 كيلو تغير زيت و فلتر فورا علشان بيبقى فيهم رايش صغير من التليين و تكمل تليين كمان الفين كيلو او الفين استعمال عادي بدون قرص و لا سخونة و لا تصقيف

و ربنا يستر طريقك و يباركلك فيها و يكفيك شرها

تحياتي

[moudy2002]

ادهم باشا متشكر جدا على نصايحك الغالية ياباشا ربنا يكرمك
بالنسبة للحلول الى انت ذكرتها انا خلاص اخترت اول حل وهو
طقم بستم جديد- طقم صبابات يابانى جديد - طلمبة زيت جديدة - خرط كل من الكرنك والشميز وكحط وش السلندر - طقم جوانات - طقم شمبر جديد - سير كاتينة (مع انى لسة مغيرة ) بلية شداد - بليه دبرياج - طقم سبيكة جديد .
اظن كدة انا غيرت الموتور كلة ويارب يرجع زى الاول تانى انا فعلا خايف ميرجعش زيرو تانى ولو حتى 90 % زى الزيرو ..
الميكانيكى الى عمل الشغل شغال فى توكيل اوبل . بأشراف مهندس برضة شغال لفى توكيل الاوبل .
قطع الغيار كلها من عند المنير ..الخراط واحد مشهور جدا فى عين الصيرة ..

بعنى من الاخر مستخصرتش حاجة فى العربية على امل انها حتى ترجع قرب الزيرو . فعلا انا قلقان
وربنا يستر ..

على العموم انا هاخد بنصايحك انت واخى احمد وربنا ييترها معانا جميعا

سوال برضة فى التلين ؟
ينفع الين طريق طويل فى الاول زى العين السخنه رايح جاى حوالى 250 ك وبعدين ابتدى اروح بيها الشغل بعد كدة ( من مدينة نصر الى الحسين ) ولا لازم ال 1000 ك الاولنين تكون كلها مشاوير مفتوحة ؟؟
وشكرا لكم جميعا