حزام الامان في الاوبل..

[Ahmad Allawy]

انا عايز اتكلم عن موضوع حزام الامان في العربيات الاوبل..
انا ماعغرفش بصراحة النظام ده موجود في عربيات تانية ولا لأ.. بس انا مشوفتوش في عربيات من اللي ركبتها.. الله اعلم بقي موجودة في ماركات تانية ولا ايه..
يا ريت اللي موجودة عنده يقولنا..
ماعرفش انتم تعرواه النظام ده ولا لأ يا شباب.. ممكن متكونوش تعرفوا انه موجود عندك اصلا..
انا عن نفسي عرفته بالصدفة..
والموضوع ببساطة..
في جنب الكرسيين اللي قدام علي يمين الكرسي اليمين و علي شمال الكرسي الشمال في الارض تحت علي عتبة الباب كده.. في غطاء من الفيبر.. وتحس انه غطاء علبة كده بيتفتح يعني..
وبالمناسبة في الناحية اليمين في نفس المكان في رقم الشاسيع بتاع العربية علي فكرة..
(غالبا كل الاوبل كده يعني لكن انا مش متأكد بس هو عندي في الكورسا كده..)
المهم في ايه بقي في المكان ده.. في مكبس.. بالظبط زي المسدس المتعمر..واصل بفيشة توصل ليه اشارة من الكومبيوتر..
طيب بيعمل ايه و امتي الاشاره دي بتيجي..
بيشتغل امتي.. لما العربية لا قدر الله تتخبط من قدام خبطة جامدة..من نوعية الخبطاتن اللي بتفتح الاير باج لا قدر الله.. بس هي موجودة كمان في العربيات اللي مفيهاش اير باجر..
المهم لما ده بيحصل بيضرب المكبس ده..
طيب ولما بيضرب بيعمل ايه.. بيشد حزام الامان للداخل بقوة جامدة عشان وانت رابط الحزام تفضل بعيد عن التابلوه و الدركسيون و الزجاج
ولما ده بيحصل المكبس ده بيبقي باظ علي كده زيه زي الاير باج.. طيب وانا باعرف منين انه باظ او ضرب خلاص..
في المكان اللي بيدخل فيه جزام الامان اللي هو جنب الهاند بريك..هتلاقي طلعت لسان لونه اصفر كده عليه علامة تحذير و تعجب كده..
وفي الحالة دي انت رزم تغير النظام كله.. يعني المكبس و المكان اللي بيقفل فيه الحزام..
يعني من الاخر لما تلاقي عربيتك فيها اللسان ده طالع كده لبرة فاعرف ان العربية دي اتخبطت خبطة مش سهلة..
انا عن نفسي عربيتي لما اشتريتها كانت عاملة كده (ولسة مغيرتوش لحد دلوقتي)
بس انا عارف انها خبطت خبطة جامدة لدرجة انها غيرت رفرف.. بس ده كان في التوكيل الحمد لله..و طمنوني علي حالة العربية..
انا شوفت الحكاية دي في عربيات اوبل اكتر من موديل..
يعني الكورسا من اول 94 لحد 2000
والاسترا 1200 و 1600
الفيكترا مش عارف بصراحة بس اكيد موجودة..
اما بالنسبة للاسترا الجديدة بقي انا مش عارف.. عشان لما سوقتها ماخدتش بالي من الموضوع ده كنت مركز مع السواقة.. مكانش في دماغ ابص علي الحاجات التانية دي بتركيز..

عموما اللي ليه تجربة مع الموضوع ده يقولنا عن تجربته..
واللي عنده معلومات ادق او اصح من اللي قولته يشرفنا و يقولنا عشان نعرف المعلومة الصح..
عشان المعلومات اللي عندي ممكن متكونش تكنيكيا دقيقة قوي بس اهي بوجه عام بتشرح فكرة العمل..و برضه الكلام منقول علي لساني انا ممكن اكون نسيت حاجة او اسأت التعبير عن حاجة..
وانا مش قريت المعلومات دي بنفسي او دوربت عليها.. لكن سألت عنها ناس متخصصة..
عموما اتمني اني ماكونش بانقل معلومات غلط..

[M.Mokhtar]

انا اللى اعرفه ان العربيات اللى بينزل فيها ايرباج فى الاوبل بتبقى حزام الامان كهربه
عشان الايرباج مش بيشتغل الا للراكب اللى حاطط حزام امان عشان الايرباج ما يفتحش على الفاضى وده كلام من واحد شغال فى التوكيل
يعنى لو واحد راكب جنب السواق ومش حاطط الحزام الايرباج بتاعته مش هتفتح
عشان كده فى نظام الكهربه ده اللى انت بتتكلم عنه
لكن العربيات اللى من غير بتنزل بحزام امان عادى وده اللى اعرفه فى الفكترا لكن باقى الاوبل مش عارف الصراحه

[Ahmad Allawy]

باشمهندس محمد..
انا عربيتي كورسا 1200 مفيهاش ايرباجز ولا حاجة..
بس فيها موضوع الحزام اللي قولتلكم عليه.. ومش موديل عربيتي بس 97
وكمان موديل 94 و 95 فيهم نفس الموضوع..

[h_hezzah]

اسمها Seat Belt pretensioner ودى موجوده فى اغلب العربيات اللى بتهتم بالأمان،
معلومات عن طريقة عملها http://auto.howstuffworks.com/seatbelt4.htm

[Ahmad Allawy]

تسلم ايدك يا حازم بك..
هو ده الكلام..
طيب هو موجود في ماكات ايه تاني غير الاوبل ؟؟
انا باتكلم عن مصر هنا يعني..

[h_hezzah]

مش عارف طبعا الماركات اللى موجودة فيها، بس اكيد هاتلاقيها فى المرسيدس، البي ام، فولكس وسكودا بأنواعها.......
انا عندى بولو موديل 98 وموجوده فيها.
بس حكاية العربية اللى بتطلع لسانها الاصفر دى جديدة ماكنش اعرفها :d

[Ahmad Allawy]

يبقي معظم الالماني فيها الحكاية دي..
كويس جدا..
وحكاية اللسان الاصفر هي وسيلة تنبيه .. ممكن تكون الوسيلة نفسها مختلفة من نوع لأخر..
ممكن تبقي لمبة في التابلوه..
او اي حاجة زي كده..
والله يعرف اكتر عن الانواع التانية يقول يا جماعه..
والف شكر ليك يا حارم بك علي الرد السريع و المتابعة..

[M.Mokhtar]

باشمهندس محمد..
انا عربيتي كورسا 1200 مفيهاش ايرباجز ولا حاجة..
بس فيها موضوع الحزام اللي قولتلكم عليه.. ومش موديل عربيتي بس 97
وكمان موديل 94 و 95 فيهم نفس الموضوع..

انا عربيتى اوبل فكترا موديل 2000
بصراحه انا ماشوفت اللسان ده يمكن عشان لسه ماتخبطتش بس هشوف موضوع المكبس اللى جنب الكرسى ده وهرد عليك مع ان الكتالوج بتاع العربيه ماذكرش اى حاجة عنه

[Ahmad Allawy]

ربنا يسترها معاك و متشوفش اللسان ده طالع خالص ان شاء الله
وربنا يحفظك و يحفظ عربيتك..
بس هو موجود.. وانا شوفته في فيكترا ايه
مش بي زي اللي معاك..

[د.محمود صلاح]

الشدادات أو البريتينسورز موجودة فى أغلب السيارات المجهزة بالأير باج - رينو ميجان مثلا - ويحتاج الى صيانة وتغيير تام لكل النظام ( الايرباجز والبريتينسورز ) كل 10 سنوات كما هو مكتوب فى كتيب الميجان