ركبت كاوتش Bridgestone MY-01 جديد!

[NaderNabil]

باركولي يا جماعة....تم تركيب 4 فرد bridgestone MY-01 في البيكانتو....و اليكم التفاصيل:

الكاوتشات اللي كانت جاية في العربية أقل ما يقال عنهم ضايعين...اللتنين اللي قدام Maxis اتمسحوا زي الاستيكة و النقشة مش باينة.....و التنين اللي ورا واحدة منهم Maxis برده بس فيها قطع محترم حوالي 2 بوصة و ملحوم من جوة....و الرابعة و الاخيرة Michellin حالتها نضيفة جدا بس فيه قطع محترم تاني في الsidewall حوالي بوصة و نص و متركبلها شنبر....

طبعا بجميع الاحوال يبقي انتحار لو حاولت أسافر بيها:)...ده غير ان شوية ميه اعدي عليهم الاقي النص الادماني رايح في اتجاه تاني:D....و ملف النفق بتاع التجمع مكنتش بعرف اخده....ال127 كانت اثبت بكتييير...و كنت مدايق...ازاي ال127 تبقي أثبت من البيكانتو ده حتي يبقي عيب:D

زود علي كده الدوشة الرهيبة اللي كان عاملها الكاوتش...عشان كان ممسوح خالص فا كان كل نقرة صغيرة بتسمع في ضهري بدون أي عزل....

المهم بعد ما قريت ترشيحاتكم للكاوتش و نزلت برده استفسر في السوق لاقيت ان المقاس بتاعي(185/60 R14) أسعارة تبدا من 250 جنيه للفرده...حاجات زي النانكانج و النيكسين....بس الصراحة قلقت منهم...

وقع اختياري في الاخر علي كاوتش الBridgestone MY-01 من التوكيل في كالتكس عباس....

هاتقولوا ايه سبب الاختيار؟...هقولكم عشان Bridgestone و عشان من التوكيل عدل...و عشان النقشة الجميلة....و الريفيوز علي النت كلها ايجابية....

طبعا الاسباب ديه مش كل الأسباب... فيه حاجات اكتشفتها بعد أما روحت و ركبت و اتكلمت مع الراجل...

المهم كنت في الجامعة و مظبط انه بعد ما اخلص هاطلع علي عباس العقاد أركب...و روحت فعلا ...بس للاسف الراجل قالي لسة ال4 فرد طالعين من ساعة...و راح مكلم فرع عمارات العبور قاللوله في 8 فرد عندنا...فا قاللي روح و أنا حجزتهملك هناك...و بصراحة الراجل ده قمة في الاحترام...ووشة ابيض و بشوشوش...و تحس انه مش مصري كده:D

اتجهت علي عمارات العبور و لاقيت التوكيل بسهولة (جنب Chatex علي طول) و دخلت العربية و طلبت الكاوتش....

سألت الراجل اللي كان قاعد في المكتب...ايه رايك في ال MY-01....قاللي الحمدلله مجلناش منها أي عيوب خالص...و هي تعتبر زي Potenza و ال turanza مع فارق الSuper silent و بلد التصنيع...

الفردة الMY-01 متصنعة في تايلاند...مش اندونيسيا....و علي فكرة هي أغلي من مثيلتها الاندونيسي ب 35 جنيه....عشان في فرق جامد جدا...و هو ان التايلاندي في طبقة نايلون زيادة....انا افتكرت الراجل بيقول أي كلام...بس روحت علي الكاوتش و لاقيت مكتوب 1steel+1polyester+1nylon يعني 3 طبقات...عكس الاندونيسي طبقطين بس...و ده بيحمي العجل من البقاليل و القطع اللي ممكن يحصل بسبب الزجاج و الزلط الصغير...غير انه مزود نسبة الهدوء

حاجة حلوة كمان لاقيتها ان انتاج الكاوتش كان 5107....يعني في ديسمبر سنة 2007

و ده يعتبر تاريخ حديث جدا طبعا


عجبني قوي الكاوتش و همه بينزلوه من المخزن فوق...مش علي ايدهم...لا ب ونش مخصوص مثبت في السقف و ينزل لحد الارض....

فكوا العجل و و شالوا الكاوتش القديم...اللي كان فضيحة:D...و ركب الجديد و قولتله يملي نايتروجين...و رصص ال4 عجلات و ركب تاني.....عجبني برده و هو بيقرط علي العجل...كان بيستخدم مفتاح عزم...مش بيربط بكل قوتة و خلاص... ده غير ان العربية مرفوعة علي ونش مش علي كوريك و يرفع عجلتين في المرة

خلصنا الكاوتش قمت مدخل العربية في ظبط الزوايا...حاجة كده تشرح القلب....أجهزة بالانفرا ريد...و بتطبعلك ورقة عاملة زي التيليكس فيها البيانات بتاعة زبط الزوايا و اداه غريبة كده اول مرة اشوفها بتمسك الدركسيون في النص عشان يظبط عليه:)

خلصنا الزوايا و جاء وقت الحسااااب:

عدد4 كاوتش بريدجستون MY-01 شامل الترصيص و 4 بلوف: 363*4=1452
نتروجين: 20
زوايا: 20

________

خرجت من عنده و قولت اما اشوف الفلوس جات بفايدة ولا لا؟ لقيت تغير مريع في كيان العربية....بدأ من النعومة الرهيبة أثناء المشي...و مرورا بعين القطة اللي مبقتش تحس بيها...و الملفات اللي تاخده وانت ماسك العربية كويس قوي مش تحس انها هاتفلت منك و تتقلب....و دوس في مية ولا رمل...ولا كأن فيه أي حاجة...

باختصار أنا شايف انها افضل فرده في السوق للمقاس ده...الا لو كان معااك فلوس تجيب الياباني:D

[elpasha009]

أولا ألف مبروك طبعا وعقبال الحتة الياباني السوبر سايلنت المرة الجاية إن شاء الله:)
بس ممكن أسأل حضرتك هو في من النوع ده مقاس 15 وله كله 14؟؟؟

[NaderNabil]

الله يبارك فيك يا باشا:)

و موجود منه 15

[Karim_Monir]

طبعا بريدجستون كماركة وصناعة ومركز تحفة
المهندس بتاع بريجستون كالتكس فظيع فعلا محترم وزوق فوق الوصف
الفردة اللي معاك عيبها الوحيد انها بتلم حصى
لكن السوبر سايلانت لاء
ربنا يباركلك فيها

[fahd_628]

الف مبروووووووووووك يا نادر باشا

[aliabutaleb]

ألف مبروك يا نادر وربنا يسترها معانا كلنا :)

[Ahmed Samy]

مبروك على الهدوء و الثبات ........و زوايا ال Ir :)

[modux]

الف مبروووك بس عايزين صور النقشة يا نادر

[NaderNabil]

أنا كنت ناوي أصورها علي الطبيعة...بس ديه صورة من علي النت....و علي الحقيقة افضل بكتيييير

[mbluethunder]

ألف مبروك يانادر

ال bridgestone من أكتر الأنواع اللي بحترمها جدا جدا وبجد إختيار موفق

النوع اللي راكب عندي واللي جاي مع العربيه هو ال Hankok ومريحني على الأخر ولو أنا فكرت وغيرت هاجيب السوبر سيلنت بأذن الله

بس تفتكر فيه المقاس ال 165 و r14 ولا لأ

ومش عايز أقولك يا نادر موضوع النيتروجين ده. بيريح العربيه مووووووت

ده انا مره حصل ومليت فرده منهم بالهواء العادي .. مش عايز أقولك العربيه كانت شكلها أيه.. كنت حاسس إن في طوبه ركبه في العربيه وماقدرتيش أستنى ورحت مليتها نيتروجين علطول

أهم نصيح بقى يا نادر وده مهمه جدا جدا جدا جدا

كل 10000 كيلو متر غير مكان الكاوتش بطريقة ال (x) يعني الفردتين القدام رجعهم ورا وكل واحد من اللي ورا طلعهم قدام بس عكس بعض

مش عايز أقولك الموضوع ده بيحافظ على الكاوتش إزاي وبيطول في عمره

انا دلوقتي مابتعاملشي في موضوع الكاوتش أصلا غير مع توكيل بريدجستون اللي في عباس العقاد

توكيل محترم بمعنى الكلمه

ألف مبروك ياباشا للمره التانيه

[eng_mkhalaf]

إلف مبروك يا نادر أنت سخنتنى خالص أنا فاضل 5-7 إلف وإعلن ثورة التغير - بس أنت إية رايك فى اليابانى يستاهل الفرق

[Karim_Monir]

اهم حاجة في تبديل الكاوتش لو ليه روتيشن مش عاتعرف تبدل حرف اكس
كل اللي هاتعملة تجيب اللي قدام ورا واللي ورا قدام عشان اتجاة النقشة

[elrasy]

حد معاة تليفون توكيل بريدجستون عباس العقاد او عمارات العبور؟؟

[د.أحمد سمير]

اهم حاجة في تبديل الكاوتش لو ليه روتيشن مش عاتعرف تبدل حرف اكس
كل اللي هاتعملة تجيب اللي قدام ورا واللي ورا قدام عشان اتجاة النقشة

توكيل بريدجستون عباس العقاد هيعملك روتيشن ببلاش .. ودي معلومة مؤكدة .
الروتيشن المضبوط بيكون بنقل الاتنين اللي ورا قدام زي ما هما .. وعكس الاتنين إلى قدام ورا يعني شمال قدام تبقى يمين ورا . وهكذا لو حسبتها هتلاقي كل 40000 الفردة رجعت مكانها .. وما تنساش ترصص اللي هييجوا قدام لكن اللي هيرجعوا ورا مش مهم ترصصهم .. وعادة مش هتحتاج ترصص في أول مرة .
وما تعملهاش يا نادر إلا عند بريدجستون لأنك على الأقل محتاج كوريك رباعي وده مش هتلاقيه إلا في المراكز المحترمة وبس .

[Karim_Monir]

توكيل بريدجستون عباس العقاد هيعملك روتيشن ببلاش .. ودي معلومة مؤكدة .
الروتيشن المضبوط بيكون بنقل الاتنين اللي ورا قدام زي ما هما .. وعكس الاتنين إلى قدام ورا يعني شمال قدام تبقى يمين ورا . وهكذا لو حسبتها هتلاقي كل 40000 الفردة رجعت مكانها .. وما تنساش ترصص اللي هييجوا قدام لكن اللي هيرجعوا ورا مش مهم ترصصهم .. وعادة مش هتحتاج ترصص في أول مرة .
وما تعملهاش يا نادر إلا عند بريدجستون لأنك على الأقل محتاج كوريك رباعي وده مش هتلاقيه إلا في المراكز المحترمة وبس .

يا باشا لو العجلة ليها اتجاة مش هاينفع تعمل اللي بتقول علية
لازم اللي ورا قدام واللي قدام ورا على نفس الصف عشان الاحتفاظ باتجاه السهم
اللي انت بتقول علية ده ينفع لعربيات الجر الامامي اللي من غير سهم يحدد اتجاة الدوران
لكن انا عندي سهم لازم امشي علية ويكون متجة للامام وده اللي بيخلي العجلة ما تلمش حصى تقريبا
one-way rotation