تقرير صيانه 20000 كلم للكورولا mmt

[moosaleh]

حبيت أحكيلكم عن تجربتى للصيانه الدوريه بالتوكيل أولا مكان الصيانه بالتوكيل فرع الاسكندريه بجوار منطقه الحرفيين ودى كانت ثانى مره اتعامل معاهم اول مره فى صيانه 5000 وبعدها كنت بتعامل مع مركز الرزق المعتمد انا وصلت حوالى التاسعه صباحا على اساس ميعاد حجز مسبق مهندس الاستقبال قابلنى وقالى تحب تغير زيت بس ولا صيانه كامله قولتوله لا كامله ويريت تشيكوا على فلتر الهواء اذا كان محتاج يتغير او يتنضف بس قالى حاضر وحسبلى التكلفه التقديريه لوغيرنا الفلتر يبقى حوالى 820 جنيه ومضانى على السعر ده والميعاد المتوقع لانهاء الصيانه الساعه 12 ماشى مش مشكله وتقريبا الساعه الواحده قلولى اتفضل علشان تشوف الفاتوره وتستلم عربيتك ماشى يا اخونا خير قالى كله تمام بس عربيتك عاوزه تيل وطنابير المره اللى جايه سعتها بقى كنت هتجنن عليهم ليه بقى طنابير قلى التيل متاكل وكان لازم تغيره فسبته بوظ الطنابير طبعا كنت لسه هزعق لقيته طلب مسئول الصيانه بالورشه قولتولهم بقى ثوانى اجيب كتيب الضمان من عربيتى وفعلا ورتهم ان اخر صيانه كان فى مركز الرزق على 17000كلم من حوالى 6 شهور مهندس الاستقبال الشاطر طبعا قالى اهه العيب بقى على الرزق يابيه رديت بحده شويه وياباشا مش ده برده معتمد منكم يعنى زيه زيكم رد مسئول الورشه انت مزعل نفسك ليه هى مش خارج الضمان طبعا الافندى مقراش كويس ومخدش باله ان لسه على الضمان سنه فورتله التاريخ حسيت انه اتصدم وبعد كده رد اه دى خليجى من الرزق رديت لا ياباشا دى وكيل بصراحه وشه جاب الوان وبدا ان مهندس الاستقبال يجز على اسنانه وقلى ثوانى يا بيه وذهب طبعا يسأل يعمل ايه فى الورطه دى ورجعلى وهو قرفان مفيش مشكله هنغيرلك الطنابير الاربعه فى الضمان وانت هتدفع ثمن الاربعه تيل قولتله ماشى انتظر كمان ساعه ونصف وفعلا تم التغيير بعد فحصى انا للطنابير والتيل ثمن التيل امامى وخلفى 1100 جنيه الامامى بوش المانى والخلفى فرنساوى بس معرفتش بلد صنع الطنابير عارفين الطنابير بكام لو كنت غيرتهم على حسابى 3600 جنيه مش رخيصه بس بقى سؤال محيرنى انا اعرف الطنابير دى تتغير على 150 الف كلم او اكتر ازى بقى ده يحصل وتتغير على 20 الف للدرجه دى الخامات رديئه وبعدين ردود فعل العاملين فى التوكيل ينم عن عدم مصداقيه وقله خبره ظاهره وقله الذوق طباعا متوفره بيحسسوك انك بتشحت منهم طبعا شوفت مشكلتين وانا فى الانتظار واساسهم عوجان الساده مهندسى الاستقبال وبالذات مع الناس البسطاء وخدت قرار بصراحه بعد قرف التوكيل ده انى بعد انتهاء فتره الضمان ان شاء الله هعمل الصيانه عند اى ميكانيكى محترم بره للاسف توكيل تويوتا مخيب فعلا للأمال .

[BLOODY_STONE]

الكورولا الجديدة فعلا شفت ناس كتير مغيرين طنابير على 20000 او 30000 ...... المرة الجاية اديني خبر قبل ما تروح اخليهم يشيلوك عن الارض شيل

[moosaleh]

الف شكر ليك على اهتمامك

[mohamed Gamal]

أنا غيرت الطنابير الأمامية على 5000 كم
طبعا بعد ما حاولو يقنعوني انها سليمة ومفيش فيها أي مشاكل

[ابوشريف]

أنا غيرت الطنابير الأمامية على 5000 كم
طبعا بعد ما حاولو يقنعوني انها سليمة ومفيش فيها أي مشاكل

بنشترى اليابانى غالى علشان معمر

على كده الواحد يشترى الصينى ويوفر الفرق يغير طنابير براحته

[mohamed Gamal]

المفروض أن الطنابير الجديدة سليمة ومفيش فيها أي عيوب صناعة
هما غيروها فالضمان طبعا

[wwaeel]

معروف ان الطنابير خامتها وحشه وبتبوظ كتير وطول ما انت في الضمان بتغيرها وساعه ما بتغير الطنابير في ناس كتير غيرو التيل كمان علي حساب التوكيل في الضمان برضو لان بالعقل كده التيل الي يبوظ الطنابير ولا العكس التوكيل بس عاوز تتخانق معاهم عشان تاخد حقك

[moosaleh]

والله اللى انا عارفه ان التيل المنتهى يبوظ الطنابر بس انا اكتشفت حاجه واحد صديقى قالى عليها ان ممكن دايره الفرامل فيها مشكله فى الضغوط وممكن يكون ضغط التيل على الطنابير فى حاله عدم الضغط على الفرامل زائد عن الحد الطبيعى فيعمل احتكاك زائد اثناء السير بالعربيه يؤدى الى سخونه زائده فى حراره التيل فيحصله تفحم يؤدى لتلف الطنابير بمعنى ان التيل خامته بتتغير مع الحراره بس مش بيتاكل ويبتدى ياكل فالطنابير وممكن ده احتمال وارد لان اى حد راكب العربيه دى بعد اى مشوار بيها وحط ايده على الجنوط الحديد هيلقيها سخنه جدا ده ممكن احتمال وارد ويبقى ده عيب تصميم وليس عيب خامات للتيل والطنابير مش عارف والله الواحد يركب ايه ده كل العربيات بأنوعها فيها عيوب حتى الالمانىيبقى الصينى احسن لان ميزته السعر يعنى ممكن اركب اسبرانزا 516 بسعر 65 الف وبعد خمس سنين ابيعها ب 30 الف كويس جدا طبعا وهى هى المشاكل وخلاص

[omaroof]

اول مرة اعرف ان الطنابير بتتغير على 20 الف
ده اكيد عيب صناعه
اللى بيتغيير عند ال20 الف هو:
1- زيت الموتور وفلتر الزيت ( دول كل 5 الاف بيتغيرو)
2- البوجيهات ( لاعطاء افضل اداء للسياره)
فقط لا غير + تنظيف فلتر الهوا بالكومبرسور+ تشحيم الابواب + تغيير العجل مع ضبطه ( يمين ورا تروح يمين امام -ويمين امام تروح شمال ورا - وشمال ورا تروح شمال امام - وشمال امام ترجع يمين ورا)

[jiko]

في كلام كتير مش صح يا جماعه
اول حاجه انا معايا العربيه هاي لاين موديل 2009 ام ام تي
عامله 38000 كم
باعمل الصيانه في التوكيل في اسكندريه على طول
و غيرت تيل خافي في التوكيل على 30000
و غيروا طقم الدبرياش عند 30000 و ده بيتغير في كل ال ام ام تي
لازم يا جماعه نروح التوكيل الأصلي لأنه هيكون احسن بكل الاحوال من مراكز الخدمه و ده علشان التوكيل بيتراقب عليه من الشركه الأم و بيشتغل بكواليتي سيستم محترم و ده واضح معايا جدا
و بالنسبه لصيانه ال20000 كم مافيهاش تغيير بوجيهات \ البوجيهات في العربيه دي بتتغير علي 100000 كم

[wwaeel]

في التوكيل الاصلي بيغيرو علي نفس المعدلات مش هيعملولك حاجه يعني :) نا سكتير غيرت تيل عند 30000 وغيرو طقم الدبرياج عند 30000 في التوكيل الاصلي

[massoh]

فى التوكيل بيغيروا قبل المعدلات هما حالا يهمهم الربح وليس العميل للأسف. أنا قراءت فى اكتر من مكان موضوع الطنابير وتيل الفرامل وغالبا دى عيوب فى كورولا الحبيبة للأسف ..البوجيهات تتغير كل 100 ألف لو بلاتينيوم اوعى يغيروها قبل كدة...ومياه الردياتير بعد 150 ألف / 7 سنين على الأقل : أرجو الرجوع إلى كتيب التشغيل والأستيكر على الكبوت....كل المطلوب مراجعة دورة التبريد يعنى لو فيه تسريب مياه او المياه قلت ومراجعة معادلة ال ph للمياه لانها مياه مصنعة وده ممكن تعملة لدى محطات بنزين موبيل امام عينك أرجوك (كتبت موضوع عن معاناتى فى ذلك لدى توكيل العباسية وسأنشره بجميع المواقع وأقدم شكوى لدى تويوتا برة لانهم هنا ولا يفرق معاهم).....رجاء التأكيد وكتابة ما لا تريد تغيره وما تريد عمله بالسيارة وتأخذ صورة منه حتى لو بالموبايل لانه اساس اى شكوى خاصة لو عاوز تروج جهاز حماية المستهلك (لو لسه شغال بعد الثورة)

[احمد فهمى]

مش فاهم ليه الكرولا الجديده التوكيل مبالغ فى قطع غيارها

[Unendlich]

فى التوكيل بيغيروا قبل المعدلات هما حالا يهمهم الربح وليس العميل للأسف. أنا قراءت فى اكتر من مكان موضوع الطنابير وتيل الفرامل وغالبا دى عيوب فى كورولا الحبيبة للأسف ..البوجيهات تتغير كل 100 ألف لو بلاتينيوم اوعى يغيروها قبل كدة...ومياه الردياتير بعد 150 ألف / 7 سنين على الأقل : أرجو الرجوع إلى كتيب التشغيل والأستيكر على الكبوت...

البوجيهات أيريديوم مش بلاتينيوم و كنت سألت عشان اشوف هينصبوا ولا لأ قالولي عند 100 ألف كم والمية بعد 160 ألف كم (الكتالوج مش محدد زمن) و بعد كده كل 80 ألف (ده في الكتالوج) إنما هم بعد تغيير المية الفبريقة بيحطوا مية موبيل و دي بتقعد 40 ألف أو سنتين

مش فاهم ليه الكرولا الجديده التوكيل مبالغ فى قطع غيارها

و يا تري حضرتك سألت على قطع غيار السيفيك ؟