شغل العفاريت فى عربيتى هيجننى

[kantoosh]

السلام عليكم ورحمة الله وبركاته
انا خلاص هتجنن العربيه دى راكبها عفريت غيرت جوان وش السلندر والزيت طحن تانى الميكانيكى قاللى هنقرط على الوش وغيرت الزيت وطحن تانى روحت مشوار حلو لميكانيكى كويس واوريله العربيه الاقى الزيت رجع زى الفل امشى كام مشوار صغيرين الاقيه طحن تانى وكل الميكانيكيه احتاروا خلاص ما بين وش عاوز يتخرط تانى او طبه من طبب الميه عاوزه تتغير او شرخ فى الموتور وانا بدات بالاخير وقولت اجيب ماده الشروخ ما لقتهاش خالص وواحد قاللى يعرف واحد بيحط حاجه على شوية بن ويحطها بطريقه معينه فى المكنه وبتمنع الحاجات دى ده اولا والموضوع ده انا لسه فيه ومش عارف اعمل ايه وخايف اخلى المكنه حقل تجارب والاقى نفسى عاوز واحده جديده
الجديد بقه انى كنت ماشى اول امبارح ويا دوب دورت العربيه ومشيت كيلو مثلا والاقى صوت نقر جامد جدا جدا من المكنه من فوق وكان واحد جايب ظلطه وبيدق على الموتور وكل ما امشى يزيد ويقطع خفيف ويرجع تانى كملت حوالى 2 كيلو كمان وبطلت لوحدها دورتها وركنتها وبطلت تانى جيت ادورها ما دارتش سيبتها يوم وتانى يوم دورتها وجيبت واحد يشوفها عنده خبره لان الميكانيكى مكانش موجود المهم دارت بس كانت بترعش جامد جدا وتبطل تدور وترعش وتبطل والخبط اللى كان من فوق بقى من تحت والمكنه بتبطل لغايه ما بطلت وحلفت ما تدور تانى النهارده بقه جه الميكانيكى ومن اول لمسه دارت وزى الفل وولا فيه خبط ولا حاجه والموتور تمام !!!!! قولتله تعالى نجربها ومشينا شويه وقرصت سمعنا صوت الخبط اول ما يفتح الكبوت علشان يعرف منين الخبط يختفى نمشى تانى يرجع يفتح الكبوت يبطل ركن وفضل جنبها يزود ويقرص الصوت ييجى على خفيف وبعدين يمنع تانى وييجى ويمنع فى الاخر قاللى مش عارف بس غير الزيت يمكن يكون خف من الميه اللى كانت بتدخله بس طبعا كلام مش مقنع الزيت دلوقت مش مطحن ورجعت بالعربيه وماشى بالراحه مقرصتش خالص مفيش اى صوت ولا خبط اعمل ايه بقه اوديها لشيخ ولا اعمل ايه
انا اسف جدا جدا على الاطاله واتمنى المهندس سمير يقرا الموضوع بتمعن ويفيدنى واهل الخبره
وشكرا

[m3touk_85]

ربنا معاك بس من الموضوع مش باين نوع العربية وموديلها ومشيت كم كيلو وهل عملت عمرة قبل كده ولا لأ ومين الميكانيكة اللي بيشتغل لك فيها

[kantoosh]

ربنا يكرمك
العربيه بولونير موديل 81 العداد قلب عملتلها عمره ومغير عامود كرنك بواحد استاندر والميكانيكى قاللى انه ربط السبكه وقرطها جامد علشان تعيش وعلشان كده اخدت وقت فى التليين وده مشيت بعديه حوالى 10000 كيلو وانا فى مدينه بدر مافيهاش ميكانيكيه عدلين كلهم حرميه واللى عمل العمره فى المطريه وياريت حد يقدر يقوللى اعمل ايه انا خايف امشى بيها كده المكنه تقفش ولا تقف منى فى الطريق وانام جنبها وطريق السويس كله صحرا مفيهوش اى خدمات

[kantoosh]

الناس اللى بتفهم وخبراتها عاليه فى الامور دى فييين محدش بيرد عليا ليه يا ريت حد يرد عليا علشان اعرف الموضوع ايه بدل ما ادخل فى فتح ونصب مع الميكانيكيه

[kantoosh]

المهندس سمير فينه وفين كلامه الموزون اللى يتاقل بالدهب

[kantoosh]

يعنى انا كاتب الموضوع من امبارح ومحدش رد عليا

[aYaBooY]

اعتقد ان المشكلة عندك في كذا نقطة اولا الي اعرفة ان طبب الموتور بتسرب مياه على الخارج مش على الزيت
طيب كونتها بطحن و بعد كدة الطحينة تروح ده شغل عفاريت فعلا ههههههه علشان هيا يا تطحن يا تشتغل كويس بس ان محتاج خراط محترم يراجع على الوش
موضوع الصوت بتاع الخبط الي بيظهر ممكن يكون عيب في طرمبة االمياه و ده السهل او وش الموتور
عموما انت محتاج تفتح الوش و تشوف فيها ايه
و كون ان الميكانيكي شد على السبيكة ديه حاجة تحسب عليه مش ليه

[elewey]

يعنى انا كاتب الموضوع من امبارح ومحدش رد عليا

طيب يا باشا ما تريح دماغك من المصاريف و البهدله و تجيب مكنه جديدة اعتقد ان سعرها مش حيبقى غالى و لا ايه

[lada2010]

بص وداى العربية لميكانيكى بيفهم يفك الموتور ويشوف اية اللى فية لان من الواضح ان الميكانيكى بتاعك مش قد كدا

الوش كدة مش مخروط كويس فية عالى وواطى .. بكل بساطة اللى بيحصل الاتى
فى حالة ان وش السلندر مش مظبوط وية عالى وواطى لما الموتور بيسخن الجوان بيشد ويحصل لة حالة تمدد
ويلم ويقفل اي ثغرات .. وطبعا مش بيدخل زيت .. لما تركن والعربية تبرد طبعا مفيش اي تمدد وهنا بيبدء قطرات من المية تدخل
القصة كلها عندك ف خرط وش السلندر .. دة اللى عاملك القلق .. دة تحليلي الشخصى