بعد اسبوعين من استلام السيتى 1300 سىسى - 2008

[ahmediz2000]

بعد طول تفكير الحمد لله استقريت على الهوندا السيتى واستلمتها من حواللى اسبوعين مانيوال 1300 سى.سى ..وعامل بيها دلوقتى 1600 كم وشويه ..وإليكم انطباعاتى :d :
1- إجمالا العربية ناعمة جدا ومريحة وواسعة من جوه
2- مش هتبقى مناسبة اوى لطوال القامة (اللى من 180 سم وانت طالع ) لان الكراسى ليها حدود فى الرجوع للخلف .. وده ميزة برضه لتوفير مساحة للكنبة الخلفية .. انا طولى 175 وشايف ان العربية واسعة وكراسيها مريحة جدا فى السفر.
3- موتور عزمه وسحبه حلو جدا والتكييف يكاد لا يؤثر على السحب ... ما بتحسش ان التكييف شغال
4- التكييف أداوه جيد جدا .. بالنهار بشغله على الدرجة 2 او 3 حسب درجة حرارة الجو .. وبالليل على درجة 1 حلو اوى .. وفيه كمان فتحات تحت الكراسى الامامية علشان التكيييف يوصل للى قاعد ورا بس لازم تظبط بكرة التكييف على وضعية الاقدام.
5- العفشة ناعمة - مريحة مش ناشفة
6- الباور ناعم جدا ( ميه ) انا صحابى عندهم لانسر بومة .. عجبهم الباور جدا وقالوا انعم من اللانسر بمراحل..
7- عزل الكابينة ممتاز - لما تقفل الإزاز وتشغل التكييف والكاسيت( سى دى طبعا ) هتحس انك فى عالم تانى مالكش دعوة بالناس اللى بره :) ... فى مرة ركبت الفيرنا حسيت بالنسبة ليها انى راكب فى الشارع
8- الشنطة واسعة جدا 500 لتر زي شنطة اللانسر
9- الثبات نقدر نقول انه جيد لانى بحس ان العربية خفيفة شويه بعد 140-150 .. انا جبت بيها 180 بس كنت ماسك الدريكسيون جامد .. و180 اخرها على فكره.. حكاية الثبات دى ممكن تتعالج بجنوط وكاوتش اكبر .. مش قضية اوى .. انما هى ثابتة على 120
10- العربية كراسيها عالية من جوه تحس انك قاعد فى انترية محترم والتابلوه عالى برضه .. العربية عموما عاليه عن الارض :) .. عمرها ما هتحك منك فى مطبات مصر المحروسة . وفى نفس الوقت مش العلو اللى يخلى العربية تعوم
11- التابلوه شيك وفخم والخامات ممتازة احسن بكتير جدا من الهيونداى (الجيتز والفيرنا والماتريكس) مزود بإضاءة برتقالى ... والفرش بيج (قماش شمواه تقريبا) شيك جدا بس طبعا عاوز نطافة .
12- مفيش عداد حرارة .. وده انا شايف انه مش عيب .. لما تشغل العربية الصبح هتلاقى لمبة تقولك ان العربية لسه باردة وفيه لمبة تانية بتنور لو العربية سخنت وعدت مرحلة الامان
13- العدادت وضعيتها مريحة جدا وسهلة ارقامها كبيرة واضائة برتقالى هادئة مريحة جدا فى قرايتها .. عداد السرعة 220
14- استهلاك البنزين رائع .. سافرت مرة من القاهرة لاسكندرية (الصحراوى) انا ماحسبتهاش اوى بالارقام لكن حسبتها من عداد البنزين كان التانك مليان وعملت حوالى 380 كم والمؤشر بقى فى النص ..يعنى تقريبا الصفيحة ممكن تعمل 400 كم
15- صوت الكلاكس رفيع شويه :):) بحس انى راكب موتوسيكل :):) لا بجد هو عالى بس رفييع
16- الفتيس حاراته قريبة وحركته سلسة جدا ..
17- الدواسات ناعمة جدا ووضعيتهم مريحة .. بس كان يبقى اظرف لو كانت دواسة البنزين ابعد شويه عن الفرامل (اصل انا بلبس كوتش كبير شويه:):)) بس عموما هم مريحين
18- صوت الموتور والعربية واقفة ناعم جدا مع انى كنت خايف من حكاية ان سير الكاتينة خنزير (ده المفترض انه بيخلى صوت الموتور اعلى شويه ) لكن فوجئت اول ما استلمت العربية كان واحد صاحبى دخل ودور العربية وانا مش واخد بالى وبعدين دخلت ووالله ما حسيت خالص ان العربية دايرة غير لما لفيت المفتاح وسمعت المارش بيزعق بيقولى ان العربية دايرة يا ..... وفى مرة واحد صاحبى ركب جنبى لقانى بجيب على الغيار الاولانى قالى انت هتطلع والعربية مش دايرة . قلتله العربية دايرة فعلا
19- السى دى صوته حلو جدا العربية فيها سماعتين فقط فى الابواب الامامية بس صوتهم ممتاز .. عاوز اشترى سماعتين ورا بس مش عارف اجيب نوعهم ايه ( هو مكانهم موجود ولازم يبقوا مدورين مش بيضاوى)
طيعا غير الاوبشنز التانية زى المرايات الكهربا (تحريك المرايات فقط مش فتح وقفل) وازاز كهربا فى الاربع ابواب والريكسيون بيطلع وينزل وامكانية ضبط نور الفوانيس الامامية يعنى ممكن تقرب النور او تبعده .. ودرجين تخزين (صغيرين مش كبار اوى ) و4 حامل اكوب اتنين قدام واتنين ورا- وسنتر لوك
20 - الابواب حلوة اوى فى فتحها وقفلها حتى والازاز نازل ما بتسمعش اى رزع فى الإزاز
21- ابعاد العربية حلوة واتعودت عليها بسرعة
العيوب:
1- زى ماقلت ممكن ماتبقاش مريحة للى طولهم 180 او اطول (ده لو هو اللى هيسوق يعنى ) لانه هيحس ان رجله متنية .. انما لو هيعد جنب السواق هيحس ان العربية واسعة عادى.
2- الصاج خفيف زى كل اليابانى على ما اعتقد . بس ساعات بيكون ميزة لو خبطت خبطة خفيفة الصاج بيروح ويرجع تانى ما بيحصلوش حاجة.
3- حاجة انا شايف انها كانت ممكن تتعمل احسن من كده هى زرار الانتظار .. كان ممكن يبقى مكانه احسن من كده .. انا علطول على سفر وباحتاج الزرار ده كتير .. مكانه بعيد شويه عن ايد السائق .. حاطينه جنب فتحة التكييف ..تحس انه عالى وبعيد شويه .. بس مش مهم مش عيب اوى يعنى :):)
4- بالنسبة لقطع الغيار .. انا طبعا لسه ما غيرتش حاجة ويارب ما اغيرش ... بس اعتقد انها فى نفس اسعار قطع غيار العربيات الجديدة .. انا بتكلم عن الاصلية طبعا ..
5- مفيش ريموت (كان نفسى فيه )
5- الشماسات ما فيهاش مرايا .. مش عارف بيتراخموا علينا ليه شايلين حاجات تافهة اوى . والكنبة اللى ورا ما بتتقفلش زى السيتى 1500..
غير كده مش لاقى صراحة اى عيوب تذكر فى العربية .. انا راضى عنها جدا والناس اللى بتقول ان سعر اعادة البيع وحش ... انا شايف ان العربية بدأت تنتشر بشكل ملحوظ يعنى انا بشوفها كتير فى القاهرة والمنصورة ( مدينتى العزيزة) وده هيخلى العربية سعر اعادة بيعها كويس جد على ...

انا استمت العربية معاها مفتاحين (شكلهم حلو اوى واحد منهم علامة الهوندا فيه معمولة بالفضى) والاستبن والعدة وشنكلين جر - والكوريك .

اتمنى انى اكون افدتكم زى مانا استفدت كتير من هذا المنتدى الرائع اللى خلانى استقر على السيتى فى الاخر

وسلام عليكم

[YoussefMostafa]

الف الف مبروووك وربنا يباركلك فيها
بجد تقييم ممتاز وشامل كل حاجة

[zeyad1810]

الف مبروك وربنا يباركلك فيها

[bassam nagy]

الف مبروك وربنا يباركللك فيها

[eng_mkhalaf]

تقييم 10/10 ومن وشكلك كدة بتاع مبيعات محترف :) هية عربية كويسة طبعا وكفاية أنها هوندا بس يعيبها سعرها و1300 بتاعها مش كويس خالص زى 1500

ربنا يباركلك فيها ويديك خيرها ويكفيك شرها

[mshamy]

الف مبروك وربنا يديك خيرها و يكفيك شرها و شر الطريق

[fahd_628]

الف مبروووووووووووك و شكرا على التقييم

[ahmediz2000]

متشكر جدا يا جماعة ... بالنسبة لسعر العربية انا شايف انه مناسب جدا لهوندا .. شوف اللانسر الشكل القديم دلوقتى بكام 1300 سىسى ... 100000 جنيه على موقع كونتكت كارز .. سعر مبالغ فيه اوى على عربية 1300

الموتور 1300 فى الودا سحبه حلو جدا بالنسبة لاى عربية 1300 .. معاك طبعا فى ان 1500 هيبقى اكيد احسن ... لكن انت لو جربت مواتير 1300 فى اى عربية هتلاقى ان الهوندا اشدهم

[NaderNabil]

ألف ألف مبروك....عقببال ما تتم بيها 2 مليون اسبوع ان شاء الله :)

[ابوشريف]

مبارك عليك العربيه الجديده أ . أحمد .. ربنا يعطيك خيرها ويكفيك شرها

بعض الأشياء اود معرفتها عن الهوندا سيتى

هل بها مفتاح مشفر ؟؟ واذا لم يكن فى المانيوال هل موجود فى الاتوماتيك منها ؟؟

نور الصالون هل بيطفى بعد 30 ثانيه كما بالكتالوج ( نسيت ترد على صاحب السؤال فى الموضوع http://www.nilemotors.net/Nile/showthread.php?t=20778)

هل بها اريال خارجى ؟؟

وما هى أفضل ألوانها ؟؟

مقاس الجنط 14 ولا 15 ؟؟

وشكرا جزيلا

[ahmediz2000]

اله يبارك فيك

بالنسبة للمفتاح المشفر .. ماعنديش اى فكرة عنه ياريت لو توضحلى مواصفاته ايه .. هو المفتاح اللى مع العربية متعلق معاه ورقة باركود فهل دى الشفرة اللى تقصدها ولا ايه ؟؟

نور الصالون بيطفى اول ما تقفل الباب
فيها اريال خارجى ناحية السائق على القايم الشمال بترفعه بايدك مش كهربا
طبعا اللون ده مسألة اذواق بس انا شايف ان افضل لونين هما الفضى والذهبى خصوصا الفضى مش هيبان فيه الخدوش البسيطة
الجنط مقاس 14 (جنوط حديد بطاسات ) مش جنوط سبور

[Hassan Khalil]

الف الف مبرووك ..
ربنا يبارك لك فيها .. و تستعملها دائما في الخير

18- مع انى كنت خايف من حكاية ان سير الكاتينة خنزير (ده المفترض انه بيخلى صوت الموتور اعلى شويه )

:) :) :)
انا كنت فاكرك في الاول بتشتم في سير الكاتينة او متضايق منه لخصومة شخصية و اللا حاجة .. و يعد كده عرفت انه جنزير

[Noha.M]

ألف الف الف مبروووووووك يا احمد

العربية دى بحبها فعلا

ربنا يباركلك فيها بس متسوقش بسرعة بيها خالص عشان فعلا كنت بقلق منها لما

بقرص عليها

ربنا يديك خريها و يبعد عنك شرها

[ahmediz2000]

هههههههه اعذرنى كتبتها غلط
اقصد سير الكاتينة جنزير (مش خنزير)

[kimoboy]

Worst part is the brakes aren't that good.