**-- دعــــــوة مجــــــانيــــة لكــــل الأعضــــــاء --**

[memo_hefnawy]

قبل ما أتكلم عن الدعـــــــوة أحب أخص بالشـــــــــكر العضو الفعال الذى أضاف الكثير و الكثير لنايل موتورز ألا وهو العضو درش صــاحب الدعوة الكريـــــمة لكل أعضـــــاء نــايــل موتـــورز الكرام :) --أعضاء بس مش جيران و معارف الأعضاء ههههه--

و قبل الدعوة برده لازم نهنى درش و نباركله على وصــــــــــول أحـــــــــدش جـــــــهاز ضبــــــــــط زوايـــــــــا مش فى مصر بس لأ ده فى الشرق الأوسط كله :)

وبمناسبة وصول الجهاز الجديد درش بيدعوا كل الأعضاء الكرام بالكشف المجانى على الجهاز الجديد فى أى وقت فى يوم الأحـــــــــد القـــــــادم بعون الله الموافق 17-6-2007

الدعوة عامة و الكل مدعوا إن شاء الله بس ياريت درش بقى يكلمنا حبه عن مواصفات و محاسن الجهاز الجديد و يكلم الناس عن وصف المكان عشان إللى عنده الزوايا معقداه :)

على فكـــــــرة أنا أكثر واحد عربيتى دوختنى مع بتوع الزوايا و الكل كان بيفتى و بيعمل فاهم و محدش صلح و ظبط غيـــــــــر درش و أعتقد الكل أو معظم الناس سمعوا حكاياتى مع الحدفة و الزوايا قديما حتى ظهر أبو درش الله يكرمه هو إللى ظبطها :)

[Nader]

انا جاي انشاء الله يا درش مقدرش اقاوم الدعوات المجانية :mrgreen:

[Nader]

في انهي فرع يا محمود وياريت العنوان علشان خدمة البحث الانت حارمنا منها

بس بلاش شرح المكان بال GPS احسن انا ابيض خالص فى البتاع ده :lol:

يعنى مثلا انا جى من مدينة نصر او المعادى فى اليوم ده, اوصل المطرية ازاى؟

و لا اخد المترو و اربط العربية فيه من ورا :mrgreen:

[PAYOO]

واحده واحده يا جماعه ونبي

أيوه كده

تعالو بقى عشان أعرفكم على الجهاز والماركه والصناعه والأمكانيات بتاعت جهاز "درش" إللي هوه مش هايقدر يوصلها لكم

ومش هايقدر يوصل لكم أمكانيات جهازه عشان الراجل ده مابيحبش يتكلم كتير عن نفسه ولا عن شيء يملكه

عشان كده سيبوني انا أقول لكم على القصة كلها

درش راجل بتاع زوايا بس مش زي أي حد ... ليه ؟ عشان هو بيحب التكنولوجيا ومابيحبش الوقوف عند حد معين وخلاص

الراجل ده اول معرفتي به شوفت الجهاز إللي عنده من سنتين لقيته أحدث جهاز على الأطلاق في ظبط الزوايا حاجه كده بدون أسلاك ولا أحبال ولا يحزنون كله WIRELESS وتلاقي العربيه بعدها أتظبطت توماتيكي توماتيكي
وتشوف بنفسك على الشاشة عربيتك وهيه بتتظبط توماتيكي توماتيكي كل ما الصانيعي يربط صاموله تلاقي الشاشاه عليها جرافيك محاكي لما يقوم به الصانيعي تحت في المجرى

المهم مش هاطول عليكم بعد ما أتعرفت على درش وبقينا أكثر من أصحاب رحت وأتدربت عنده لمدة شهور على ظبط الزوايا ومن خلال معرفتي به لقيت نفسي عاوز أفيد الراجل ده باي حاجه وربنا قدرني ورديت جزء صغير جدا جدا من الجميل إللي في رقبتي له (كفاية أنه كان مستحمل بليه زيي)
ومن كتر حب درش في التكنولوجيا قدرنا نجيب أجهزة حاسب ألي في الفروع وقدرنا نربط الفروع ببعض عن طريق "النت" وكمان عملنا برنامج مخصوص للعملاء عشان يبقى في لكل عربية ملف خاص بها لدى المركز وحاجات كتير قوي درش مابيتأخرش ابدا في عمايلها طالما في مصلحة العميل وبالتالي في مصلحة المركز لان رضا العميل يجعله يتمكسك بالمركز

جهاز درش





واخيرا "درش" جاب الجهاز الأحدث من الجهاز الحديث إللي هوه احدث من أحدث جهاز وبقى عنده الجهاز إللي أحدث من الجهاز اللي أحدث من الأجهزة ههههههههههههههههههههههههه ههه


طبعا أنا منحاز لصاحبي وبكتر في الكلام وعارف أنكم مش هاتزهقوا مني

المهم قولولي كتر يا "بايوو" كتر

هاقول لكم أن درش جاب جهاز نيتروجين لنفخ العجلات في فرع المطريه والجهاز ده بقى هو مش عازم حد عليه مجانا لكن أنا بدبسه قدامكم أهه وبقوله خاللي اليوم الأول للجهاز بتاع النيتروجين مجانا يا درش (هو صاحبي بس أنتم حبايبي هههههه ولازم أدبسه برضه)

ها قلت أيه يا "درش" ؟

يا بايو باشا عاوزين نعرف نوصل هناك ازاى؟

ؤصفة لواحد اول مرة يجى المطرية بالعربية

[PAYOO]

يا بايو باشا عاوزين نعرف نوصل هناك ازاى؟

ؤصفة لواحد اول مرة يجى المطرية بالعربية

عينيه الأتنين يا دكتور معاذ

بس هاستأذنك بكره عشان انا عاوز انام بعد أذنك وطلبك ده أول حاجه هانفزه بكره إن شاء الله

[معاذ الشرباصى]

يا باشا خد وقتك مفيش استعجال

و متشكرين, دايما كده تعبينك معانا

[درش]

يا جماعه والله أنا مش عارف أقول أيه أقل واجب أني أعمله معاكم أني أدعوكم عشان تشوفوا أحدث تكنولوجيا في مصر والشرق الأوسط وبكل فخر لي أن تشرفوني بان تقوموا بتجربة هذا الجهاز مجانا لجميع أعضاء المنتدى
وجبت كمان جهاز النيتروجين في فرع المطريه
وجهاز النيتروجين أنا صممت أني اجيبه بعد ما طلبتوه مني

[memo_hefnawy]

ياريت يا أبو درش تشرح وصفه للناس القادمة للورشة تكون سهله :)