نقل ملكية من مرور لاخر

[kimo75]

--ميعاد تجديد ترخيص السيارة ينتهى الشهر اللى جاى
ما هى اجراءت التجديد. مع العلم بان معايا توكيل من صاحب السيارة بالبيع لنفسى وللغير

وهل ابدا الاجراءت من المرور التابع لى(اسكندرية-طوسون) ام من المرور اللى السيارة تتبعه حاليا (اسكندرية-محرم بك)
وشكرا
,ولو تعرفوا الرسوم المطلوبة لذلك يبقى كتر خيركم
السيارة لانوس2002

[mshamy]

بسم الله الرحمن الرحيم
أخي العزيز انا لسه ناقل الملكيه من القاهره لبورسعيد من أسبوعين و اللي حصل كالأتي:
1- تعمل عقد بيع لنفسك بموجب التوكيل اللي مع حضرتك
2- تروح للشهر العقاري الخاص بالسيارات تسجل العقد و تدفع الرسوم "في منطقة طوسون" ولازم تتأكد ان التوكيل اللي معاك الأختام اللي عليه واضحة و مقرؤة علشان متخبطش مشوار لمحرم بك و تصور بطاقتك و رخصة السياره اربع نسخ وايضا التوكيل
3- تطلع على المرور بتاعك "طوسون" و تطلب نموذج فحص فني بغرض نقل الملكية و تقوم برفع بصمة الشاسية و الموتور
4- يقوم المهندس المختص بتأشير البصمة طالبا المطابقة من المرور الأصلي "محرم بك"
5- حضرتك تصحى بدري و تروح لمرور محرم بك و تعمل المطابقة بتاعة البصمة هناك
6- و انت في محرم بك بتقوم بعمل شهادة المخالفات "براءة الذمة" و تدفع المخلفات لو وجدت و تختم الشهاده
7- تقوم باستخراج شهادة البيانات الخاصة بالسيارة
8- العوده لطوسون و اعتماد مطابقة البصمة و استكمال بنود الفحص الفني
9- عمل و ثيقة التأمين الأجباري
10- دفع مصاريف الترخيص "سنه او سنتين او ثلاثه"
11- استلام اللوحات المعدنيه و الرخصة
12- ألف مبروك

[kimo75]

ارجو الافادة اكتر لان واحد صاحبى قاللى ان بعد البيع لنفسى فى الشهر العقارى اطلع اولا على المرور اللى السيارة تتبعه مش اللى هفحص فية......................دوخة

[Akram]

بعد إذن أ/mshamy

انا هقول الخطوات تاني بعد إذن أ/mshamy
** لو الرخصة سارية :
1- تروح لمكتب الشهر العقاري الخاص بعمل عقود للعربيات وده ممكن يكون اللي انت تبعه , و تطلب عمل عقد بالبيع لنفسك بموجب التوكيل و هيقدروا الرسوم و هي حوالي 615ج لأن عربيتك إنتاج محلي و متنساش تصور الرخصة و البطاقة و التوكيل صورتين و تجيب ملف علشان تحط فيه الورق و تقدمه للمرور .
2- هتروح للمرور اللي انت تبعه و تروح للخزينة و هتطلب نماذج لعمل نقل الملكية وهي بتكون نماذج فحص و تجديد و دمغات و طوابع , و سعرهم هيختلف لو عايز تجدد سنه أو سنتين أو تلاتة , و كانت قبل الزيادة 27ج للسنة ، 35ج للسنتين ، 45ج للثلاث سنين (و ده معناه انك هتدفع الضريبة و التأمين نفس المدة).
3- هتروح لمهندس الفحص و هيفحص العربية و يختم على نموذج فحص العربية و نموذج فحص الطفاية (لازم يكون تاريخ إنتاج الطفاية معداش عليها 5 سنين) .
4- هتروح لمخزن اللوح/النمر و هيكتب رقم نمرة جديدة على نموذج الفحص .
5- هتروح تدفع الضريبة و التأمين على الرقم الجديد و بنفس المدة اللي جبت بيهم النماذج من الخزينة و دي كانت 65ج ضريبة + 115ج تأمين إجباري , يعني 180ج في السنة - و ده قبل الزيادة و تقريباً المبلغ ده هيزيد 150ج لكل سنة لو هيحاسبوك بالزيادة الجديدة .
6- هتروح للمكتب/الشباك المختص بنقل الملكية و تقدم كل الأوراق دي و هيراجعها و هيقولك على المكتب/الشباك اللي هتستلم منه الرخصة .
7- تروح تفك النمرة القديمة من العربية و لما تخرج الرخصة الجديدة هيدولك ورقة لمخزن اللوح علشان تسلم النمر القديمة و تستلم النمر الجديدة , و هترجع تاني لنفس المكتب/الشباك ده فيديلك الرخصة الجديدة .

** المشكلة إن مفيش نمر
و لو الرخصة مش سارية قوللي علشان أوضح ليك هتعمل إيه ........
و أرجو إني أكون أفدتك .......

[aliabutaleb]

--ميعاد تجديد ترخيص السيارة ينتهى الشهر اللى جاى
ما هى اجراءت التجديد. مع العلم بان معايا توكيل من صاحب السيارة بالبيع لنفسى وللغير

وهل ابدا الاجراءت من المرور التابع لى(اسكندرية-طوسون) ام من المرور اللى السيارة تتبعه حاليا (اسكندرية-محرم بك)
وشكرا
,ولو تعرفوا الرسوم المطلوبة لذلك يبقى كتر خيركم
السيارة لانوس2002

عربيتي لما اشترتها كانت زي حضرتك بالظبط مرور محرم بك
وانا سكني تابع لمرور طوسون
الإجراءات هايفيدك فيها الإخوة طبعاً لا خلاف
بس اللي انا فاكره ان اول مرحلة كانت في مرور محرم بك الأول وبعدين اتنقلت على مرور طوسون

[Akram]

لو الرخصة سارية هتروح المرور التابع ليك فقط (اسكندرية-طوسون)

[osama]

استاذ Akram بالنسبة لتسجيل نوبيرا بالشهر العقاري المصاريف اد اية

[Akram]

نسيت أقول انك لازم يكون معاك شهادة براءة ذمة يعني ميكونش عليك مخالفات و دي بيديهالك الراجل اللي باع ليك العربية و تاريخها ميكونش عدى عليه شهر , و لو عدي عليه شهر لازم تروح لنيابة المرور التايع ليه العربية و تجيب الشهادة دي منه .
و إذا كان فيه مخالفات فحاول إنك تتظلم فيها لأن الموضوع تقديري بيختلف من وكيل نيابة لآخر .

[Akram]

تسجيل النوبيرا

استاذ Akram بالنسبة لتسجيل نوبيرا بالشهر العقاري المصاريف اد اية

الحقيقة معرفش و لكن هسألك واحد صاحبي و أرد عليك إن شاء الله.

[osama]

الحقيقة معرفش و لكن هسألك واحد صاحبي و أرد عليك إن شاء الله.

شكراً للاهتمام

[Akram]

انا سألت واحد صاحبي و قاللي لو محلي في حدود 1000ج و لو كوري في حدود 2000ج ,
انا شايف إنه فرق كبير بس ده اللي قالهولي .....
مع الأخذ في الإعتبار سنة الإنتاج .....

[aliabutaleb]

نسيت أقول انك لازم يكون معاك شهادة براءة ذمة يعني ميكونش عليك مخالفات و دي بيديهالك الراجل اللي باع ليك العربية و تاريخها ميكونش عدى عليه شهر , و لو عدي عليه شهر لازم تروح لنيابة المرور التايع ليه العربية و تجيب الشهادة دي منه .
و إذا كان فيه مخالفات فحاول إنك تتظلم فيها لأن الموضوع تقديري بيختلف من وكيل نيابة لآخر .

أيوة كدة افتكرت :)
انا رحت معاه بقى وهو بيجيب شهادة المخالفات دي واتأكدت إنه دفعها قدامي
حاجة تانية عشان متتعطلش زي مانا اتعطلت
بعد ما يدفعها لازم تروح في الدور الأرضي في مرور محرم بك الأرشيف تخليهم يسجلوا براءة الذمة من المخالفات
وبعدها بقى تبتدي رحلتك في مرور طوسون

[kimo75]

شكرا للاستاذ اكرم
بس كدة لو معايا شهادة المخالفات يبقى مش محتاج اروح مرور اللى السيارة تتبعه ومش محتاج شهادة بيانات منه او مطابقة بصمة.........
ارجو الافادة وشكرا استاذ اكرم

[Akram]

في موضوعين ,
أولاً لا لو اللي معاك رخصة مش تصريح و سارية يبقى مش محتاج تروح للمرور اللي العربية تبعه و تجيب شهادة مخالفات أو مطابقة بصمة ,
أما موضوع شهادة المخالفات لو معداش على تاريخها شهر فمفيش مشكلة لكن لو اكتر من شهر يبقى انت محتاج تستخرجها مرة تانية من نيابة وحدة المرور اللي العربية تبعه .

[kimo75]

ايوة الرخصة حتى7-7-2008
بس مش معايا شهادة مخالفات