فروق بين اللانوس و الافيو

[MMamdouh]

يوم الجمعة وقعت تحت ايدى عربية افيو فا قلبت فيها زى الناس عشان اشوف الفروق الجوهرية الميكانيكية بينها و بين اللانوس...

1- الافيو فيها علبتين بيئة... واحدة ورا الفرن على طول و التانية زى بتاعت اللانوس من تحت... و دة معناه ان الافيو بتطلع انبعاثات مضرة من الاعادم اقل من اللانوس

2- لقيت حساس الشكمان اللى فى الفرن بسلكتين و دة معناة ان فيه سخان... و طبعا طالما فيها علبتين بيئة حيبقى فيها حساسين شكمان و غالبا التاني حيبقى بين علبتين البيئة

3- هى حساس الMAP... حساس الافيو زى بتاع الليجانزا بيركب على المنافولد عدل مش على الصدر و متوصل بخرطوم و كدة

4- الافيو مفيهاش EGR

5- هى سكترة الدركسيون و هى راكبة تحت فى الصدر مش فوق زى اللانوس و بكدة هى اقرب لسكترة النوبيرا عن اللانوس

6- الميزان بتاع الافيو راكب زى ميزان النوبيرا (بفيه وصلات صغيرة زى بيض الدركسيون كدة)

7- مقصات الافيو خليط بين مقصات اللانوس و النوبيرا من ناحية الجلب... يعنى فيه جلبتين فى المقص... واحدة زى بتاعت اللانوس و التانية زى بتاعت النوبيرا


8- فلتر بنزين الافيو راكب امام العجلة الخلفية يمين... معرفش مين ابن الناصحة اللى فكر فى الفكرة المنيلة دى

9- الافيو فيها سير واحد للدينامو و طلمبة الباور و كومبريسور التكييف... برضة زى النوبيرا

10- الافيو فيها حساس تسقيف راكب على البلوك جنب فلتر الزيت

11- قاعدة الموتور اللى فى وش الموتور راكبة تحت ترس الكاتينة و طلمبة الباور على جنب... برضة زى موتور النوبيرا

12- حوض الافيو اضيق من اللانوس

13- رادياتير الافيو شكلة اصغر من اللانوس و بمروحة واحدة

14- تيل الفرامل الامامى مختلف لكن الطنابير هى هى

MMamdouh

[Nistelrooy]

شكرا يا استاذ ممدوح وهي قريبة من النوبير علي كدا مش اللانوس

____
ايو هو ال egr

[MMamdouh]

من ناحية القواعد و السيور و الاسكترة... الباقى زى اللانوس

MMamdouh

[Shiref_mohamed]

مسوقتهاش يا مستر ممدوح تقولنا الفرق بينها وبين اللانوس في السواقة ايه يعني الراحة والثبات إلخ

[MMamdouh]

انا يدوبك لفيت بيها حوالين البيت فا مقدرش اكون راى...الفرق اللى حسيتة انها فراملها استجابنها احسن و قاعدتها عالية عن اللانوس

MMamdouh

[Nistelrooy]

ماقولتليش اية هو الي Egr

[shanodaa]

انا سمعت ان سعر الافيو نزل الي 70000 جنيه وسمعت ان ابو الفتوح ترك تصنيع الافيو وبيصنع شفورليه ابترا ولغي الافيو

[badblood]

'طب اي الحكمة ان فلتر البنزين يبقى كده

[ads]

'طب اي الحكمة ان فلتر البنزين يبقى كده

يااما علشان ضغط البنزين بيبقى اقوى نظرا لوجود الطلمبه فى التنك او لضمان نضافة الدوره من اول التانك الى الماتور

[khaledazizeg]

يا جماعة انا شفت ماتورها وسقتها اولا الماتور واحد التنين نفس النوع والشكل وكل حاجة وانا سقتها بس على طريق سريع بس عيبها انها بتخوف مع السرعات العالية بتحس ان العربية هتطير منك بسبب ارتفاعها الكبير عن الارض ولكن اللانوس بجيب بيها 160 والعربية كويسة معايا لكن الافيو عند 130 تلاقى العربية بقت خفيفة

[MMamdouh]

انا سوقت الافيو شوية امبارح و دة اللى حسيتة:

اولا الافيو مش اسرع من اللانوس ولا حاجة... الاتنين زى بعض... يمكن الافيو تديك احساس انها اسرع عشان صوت موتورها اوطى لكن انا محستش باى فرق فى السحب

تكييف الافيو حلو.. يمكن احسن من اللانوس

الباور فى الافيو موووووز... خفيف زى الهوا

الفرامل... حدث ولا حرج... استجابة هايلة... حتى هى احسن من اللانوس المتعدل فراملها

قعدة الافيو وحشة... انا حسيت انى سايق عربية جيب... عالية كد بشكل غلس و تديك احساس انك فى ماتركس

لما التكييف اشغل بقت بطة برضة زى اللانوس

انا والدى كان جنبى فا معرفتش اجرى و لا اعمل اى حاجة على الطريق عشان اجرب الثبات

قعدت اقلب فى الكتالوج بتاعها لقيت:

موتور الافيو اقل قوة من اللانوس ب 2 حصان (84 مقابل 86)

الافيو عزمها 128 نيوتن عند 3000 لفة و اللانوس 130 عند 3400 لفة

الاتنين وزنهم واحد... و السرعة القصوى 170 كيلو فى الساعة

MMamdouh

[shanodaa]

سيبك انت لانوس هي الاصل والباقي شكل مختلف تبريد اقل للماتور عفشه من الانوس والنوبيرا يس يا ريت استهلاك الافيو في البنزيين يكون اقل

[emadno1]

معنى كدة ان الواحد ميعرفش يركب موتور افيو مكان موتور اللانوس لان القواعد مختلفة انا اتفرجت عليها فى المعرض طبعا انا معرفتش اميز كل الحاجات اللى انت قولت عليها دى كل الفرق اللى حسيت بيه انه مكتوب e-tec 2 بدل etec و فيه حاجه مدوره بتبقى فوق الرشاشات مش موجوده فى الافيو
انا فعلا بدات اتخنق من موتور الدايو لانى بحس انه بطى جدا و معدل التسارع بطىء جدا و بالذات لو مشغل التكييف بحس انها بطه بلدى غير انها مبتجبش غير 170 ساعات بتكسر الرقم ده بس لما تجرب مواتير زى اللانسر ال 1300 او ال كورولا 1300 بحس بفرق كبير فى التسارع و السرعه القصوى

طبعا الناحيه الميكانيكيه انا مش بافهمها قوى لكن اهم ميزه باحبها فى اللانوس انها مشاكلها و اعطالها نادرة الحدوث مش زى عربيات تانيه احدث بس مقرفه مشاكلها اكتر و علطول عطلانه يكفى انها بعد 9 سنين شغل عملت فيهم 155000 كم لسه الحمد لله بحالتها و مفيش حاجه حسيت انها بقى فيها فرق بينها و بين اللانوس الزيرو

[Sherif Khalifa]

يااما علشان ضغط البنزين بيبقى اقوى نظرا لوجود الطلمبه فى التنك او لضمان نضافة الدوره من اول التانك الى الماتور

سوزوكى سويفت كدة

[MMamdouh]

معنى كدة ان الواحد ميعرفش يركب موتور افيو مكان موتور اللانوس لان القواعد مختلفة انا اتفرجت عليها فى المعرض طبعا انا معرفتش اميز كل الحاجات اللى انت قولت عليها دى كل الفرق اللى حسيت بيه انه مكتوب e-tec 2 بدل etec و فيه حاجه مدوره بتبقى فوق الرشاشات مش موجوده فى الافيو
انا فعلا بدات اتخنق من موتور الدايو لانى بحس انه بطى جدا و معدل التسارع بطىء جدا و بالذات لو مشغل التكييف بحس انها بطه بلدى غير انها مبتجبش غير 170 ساعات بتكسر الرقم ده بس لما تجرب مواتير زى اللانسر ال 1300 او ال كورولا 1300 بحس بفرق كبير فى التسارع و السرعه القصوى

طبعا الناحيه الميكانيكيه انا مش بافهمها قوى لكن اهم ميزه باحبها فى اللانوس انها مشاكلها و اعطالها نادرة الحدوث مش زى عربيات تانيه احدث بس مقرفه مشاكلها اكتر و علطول عطلانه يكفى انها بعد 9 سنين شغل عملت فيهم 155000 كم لسه الحمد لله بحالتها و مفيش حاجه حسيت انها بقى فيها فرق بينها و بين اللانوس الزيرو

فيه مقولة بتقول ان اماكن مسمير القاعدة الامامية و قاعدة الباور ممكن يمشوا على بعض و بالتالى ممكن تركب قواعد اللانوس على الافيو... انا مجربتش الكلام دة فا معرفش مدى صحتة

السؤال الاهم هو: هل لما تحط موتور 84 حصان مكان موتورك ال86 حصان مشكلتك حتتحل؟؟

لو انت بتبحث عن قوة اكبر يبقى ركب موتور اللانوس ال1600 و دة بيطلع 106 حصان انما موتور الافيو مش حيفيدك باى حاجة

MMamdouh