المرسيدس

[kind]

هل من الممكن تعديل شكل المرسيدس الخنزيرة من الخارج لتصبح مثل التمساحه ( 200 المعدله ) مع العلم ان انا ركبت تاكسى كان من بره معدله ومن جوه خنزيره وسألته قالى انه معدلها

كنت عاوز اعرف ولا لأ ولو ينفع ايه اللى تحتاجه عشان تتعدل

وشكرا

[kind]

للأسف الموضوع اتنقل ل كــماليــات السيـــارات و الإكسسوارات معرفش ايه علاقتها بالتعديل بس ما علينا ياريت حد يجاوب يا جماعه

[chihab18]

انت بتفرأ افكاري ياباشا ؟ نفس السؤال لسه سأله وعاوز اجابه

[kind]

انت بتفرأ افكاري ياباشا ؟ نفس السؤال لسه سأله وعاوز اجابه

ياريت حد يحن علينا ويجاوبنا احنا الاتنين بقى

[Xpert]

بص يا سيدي .. احب اقولك ان خبرتي ليميتد في المرسيدس برضه ... يعني معلومات عامه ... بس المبداء اللي انت بتتكلم فيه عام ...
انا مشيت في الحرفين عندنا هنا لقيت واحد جايب 132 و مركبلها اكصدام + فوانيس + شبكه كامله بي ام اي ثرتي فيسليفت ...هل ماينفعش اللي هوه عمله ؟ لاء نفع ... هل شكله حلو ؟ لاء شكله "تييييييت" ... لو عربيتي كنت ولعت فيها ...
ايه الفكره ؟ الفكره يا سيدي ان انت بتشوف المقاسات بتاعه العربيتين و تقارن بينهم ... و لو مقاساتك اتظبطت .. بتشوف امكانيه تعديل القواعد و الصدر علشان يشيل الفوانيس و الشبكه و الاكصدام الجديد ... فل كده ؟
هاتحتاج ايه لو الاتنين دول ظبطوا ؟ سمكري نضيف جداً جداً جداً... الفوانيس و الشبكه و الاكصادم و الصدر و رفرفين اللي انت عاوز تركبهم .. و صبر و فن طويل في الظبط و التركيب ..
نظرياُ بالنسبه للمرسيدس .. و بما ان احنا عندنا واحده برضه .. اقول شكلها كده 90% هاينفع .. و لو انت متاكد ان التاكسي اللي انت كنت راكبه ده خنزيره و متعدله يبقي كده ده دليل حي انه ينفع ... محدش يقدر يأكدلك انه ينفع ولا لاء الا لو شاف دليل حي متحرك ...
طيب .. دي من النقطه النظريه ... طب فيه حاجه .. العربيات دي كلاسيكيه .. انا عن نفسي حتي لو لقيت واحده متخرده ... هاجددها بالاستايل بتاعها الاصلي ... انت من الاخر كده .. مسموح ليك تلعب في الات الجر و ماتلعبش في البودي .. انت ممكن تجيب واحده و تسقطلها موتور 6 سلندر بتاع 280 او 300 او اياُ كان ... و ماتلعبش في الشكليات الخاصه بالكلاسيكيه و الانتكه .. لان دي روح العربيه ... تخيل نفسك راكب واحده كلاسيك زي دي و لونها اسود مثلاً و فرش بيج و كل النواكل فيها بتلمع كالجديده و الشكل الاصلي و يا سلام لو فوانيس امريكاني مثلاُ .. كده تبقي تمام ... انما تركب واحده كلاسيك و فيها فوانيس معدل و شبكه مش بتاعتها و مش عارف ايه ؟ لاء ده كده يبقي اقرب الي الميكروباصات الترامكو مش العربيات الكلاسيكيه ...
اي عربيه في الدنيا .. خليك في حاجتها الاصليه هاتكون في السليم .. هاتبداء التعديلات هاتنحرف عن سكه السليم .. في البيع و الشراء بيقلل من تمن العربيه .. في نظره الخبراء هاتقلل من قيمه العربيه و مركزها ..
نصيحه جددها بالشكل بتاعها احسن
و انت يا اخ شيهاب ... قدامك واحده نضيفه و 100 100 .. و عاوز تلعب فيها ؟ ليه يا عم .. حرام عليك يا راجل !!

[kind]

الف شكر يا xpert باشا بس انا كنت بسأل عشان قدامى واحده واقعه بسعر واقع وطالما هنجدد يبقى نلعب براحتنا ولا انتا ايه رايك :D

[Xpert]

يا باشا خدها عادي .. و غير لون رشها اسود ... و مكنه 6 سلندر .. و فرش بيج .. و اديها شكل الستوك بتاعها .. وهات النواكل كلها جديده و شبكه جديده و اكصدامات جديده .. و طقم جنط الومونيوم بتاعها الاوريجينال .. و اتفرج عليها ;)

[chihab18]

شكرا اووي يا خبير بس الفكرة اتعرضت قدامي كده صدفه اني شوفت عربيه صاحبها معدل الفوانيس الخلفيه الي معدله + مجرد دردشه مع كذا واحد
وبعدين قصدك ايه " بتشوف امكانيه تعديل القواعد "
هو مش الرفرفين حيركبوا + الشبكه النيكل + الفوانيس +وش الكبوت ؛ اما الاكصدام ممكن يترك مكانه
طب ايه المقصود بالقواعد ؟
بعدين اللي شجعني ان الحاجات اللي حتتغير سعرها مايكملش الف ونصف + اجرة سمكري وتبقي معدله ؛ وخاصه ان مقاسات العربيتن من الخارج والداخل والشنطه واحد ؛وبرضه حدرس الفكرة الاول ميه في الميه قبل مااقدم علي خطوة زي دي ؛وخاصه انها عاوزة سمكري استاذ في الصنعه ؛اما التابلوة من الداخل ممكن نفكر نغيرة الي معدله ؛ واهو كله افكار ياخبير ؛ والف شكر ليك ياباشا

[Xpert]

هوه الرفرف و الشبكه و الفوانيس دي هاتركب في الهواء مثلاُ ؟ ولا بتركب في العربيه ؟ :d
و عامه طالما شفتها معموله يبقي اكيد يعني ينفع هههههههعهعهعهع .. بس لو تعرف تصورهالي يبقي تمام يا برنس

[chihab18]

اللي شوفته تعديل الفوانيس اللي في الشنطه من الخلف مش من الامام ؛ وبعدين الموضوع فكرة في الهوا؛ لاني مش ناوي اعدل دلوقتي الا بعد دراسه الموضوع دراسه جامده

[Xpert]

لاء ورا ده عادي .. ده حتي فوانيس المرسيدس بقت تركب في الترامكو يا راجل ههههههعهعهعهع ... المشكله الحقيقيه قدام .... بعدين لو ماعدلتش و خلتها استوك يبقي احسن برضه ...

[hazem_khidr]

ما ينفعش
الخنزيره شايسه و التمساحه شاسيه تاني
ممكن اه تغير الموتور زي ما بيشو قالك
لان الالمان بيغيروا الشكل و بيعدلو المواتير لكن بيحافظوا علي الابعاد الميكانيكيه زي ما هي!!!
و دا ذكاء الالمان بقي.

[BENZ230]

حتى كمان فتحة تغيير الفوانيس الخلفية بالمعدل ماينفع ...هوا حضرتك نسيت إن تانك البنزين فتحتة في الخنزيرة بيبقى ورا جنب الفانوس على طول وطبعا زي ماهو معروف إن فوانيس المعدل بتبقى أطول من الخنزيرة يعني صعب قوي التعديل ده وأنا من رأيي إنك تشده على شكله ده والله يابني هاتكون تحفة ماشية في الشارع بس إصبر عليها ...انا معايا واحدة شديتها في الصيف إللي فات ده وإتكلفت حوالي 15000إلى 18000 مش فاكر التكلفة كام بالضبط وقعدت معاها 3 شهور بس إتفرج عليها دلوقتي والله الناس بتبص عليها لحد ما أعدي ولونها أحمر ((دم غزال أو مالبورو))
وأسف على الأطالة