درجة حرارة المتور معقولة جدا لكن الصالون سخن جدا

[amir_ezzat]

عندى سؤال مهم جدا جدا ياريت يا جماعه اللى يعرف اى معلومة عن الموضع ده يقولى
انا عندى العربية اوبل فيكترا 2000 سى سى - 1997
درجة حرارة العربية عادية جدا ومفيش اى مشكلة عندى مع سخونة متور العربية لكن المشكلة ان تحت عندى رجلى كدة فى سخونة جامدة جدا بحس ان لا مؤاخذة الجزمة هتسيح
ناس قالت ان العيب فى العازل اللى بين المتور والصالون بصيت علية لاقيتة موجود وسليم
ناس تانى قالت ان ممكن يكون فى خرم فى الشكمان تحت عند رجلى هو اللى بيوصل السخونة غيرت الشكمان كامل وجبتة اصلى ب 1500
ياريت لو فى اى حد يعرف اى معلومة ياريت يفدنى

[shoudy2005]

من الطبيعى ان يكون سخونة لاكن مش لدرجة انو يسيح الجزمة هل كانت السخونة ده من اول ما جبت العربية؟

[harphosh]

عزيزى السائل
أنا هقولك على حاجة بس ياريت ما تتريقش عليها علشان دى حصلت معايا فعلاً فى أحد السيارات وقلبت الدنيا وطلع فى الأخر إن التكييف السخن شغال على مكان الرجلين معلش شوف مفاتيح التكييف جايز تصادف وتكون هى حل المشكلة مع تمنياتى بالتوفيق فى الحل .

[Bahaaeldin]

لو مافيش أى مشاكل من العزل أو الحرارة من ناحية الموتور شوف مفتاح ضبط مخرج هواء التكييف أوالتدفئة .. لأن فيه بعض السيارات بيكون فيها نظام تدفئة للقدمين .. ممكن يكون شغال عندك

[ADM]

انا عندى عربية اخت بتاعتك و رأى من رأى السادة الافاضل الى قالو و مفيش غيرة

[M.Mokhtar]

امير باشا
هربت من عصابه اوبل وجيت هنا لييييييييييييييييه

على العموم لو العازل بين الموتور والكابينة سليم يبقى راجع على مفتاح التكيف واتأكد انه مش على وضه تدفئة الرجلين
وعلى فكره مش كفايه انك تتأكد ان المفتاح على الوضع السليم
ممكن يكون المفتاح مش متظبط صح يعنى بيديك وضع غير اللى هو واقف عليه
جرب كده كل الاوضاع وشوف فعلا شغاله صح ولا لأ

[amir_ezzat]

محمد باشا قفشتينى
بس والله يا باباشا انا اصلا قافل الهويات يعنى المفروض يكون مفيش هواء يجيى من برة اصلا
مش انتو قصدكوا هواء التكيف يدخل من فين صح البكرة اللى الواحد ممكن يختار التكيف يشتخل على الرجل والوجة ولا الوجه بس انا لما بشغل التكيف بغير بينهم عادى
وشغالين لكن انا علطول اصلا قافل بوابات الهواء
ياريت لو المصود زرار تانى حد يعرفنى
والله تبقى مصيبة لو طلع فى زرار تانى وانا مشغلة دا انا هموت على نفسى من الضحك

[M.Mokhtar]

طيب هو لو الهواء السخن ده جاى على رجلك بس اتأكد ان فتجه التكييف اللى عند الرجل تحت مقفوله كويس ومش بتجيب هواء من بره(من غير تكييف)

[amir_ezzat]

اوك يا باشا هروح النهادرة لكهربائى اخلية يبص على الفتحه بس على فكرة انا بردة قولت اقول ليك
ان الكلنسوة بتاعه الفتيس كلها بتسخن قوى بردة
ممكن بردة تكون من الهواء هشوف كدة بس لو فى اى فكرة تانى ياريت تقولى

[ENG\AHMED]

لو فتحات الدفاية كانت هتطلع هوا بارد لما تشغل التكييف
سخونية الدواسات ياما العازل ياما فى طبب متشالة من صدر العربية
الكنسولة ممكن يكون الشكمان مش راكب مظبوط يعنى قريب من جسم العربية او ال heat shield اللى فوقة مش موجودة

[amir_ezzat]

انا لسة جاى من التوكيل حالا قالى ان ال heat shield موجوده وكاملة بيقولوا ان ممكن الشكمان يكون فيه مشكلة وواحد تانى قال دى شغله سروجى علشان ممكن يكون مفيش عازل بين ال heat shield وجسم العربية ( قصدة العازل الحرارى اللى عامل زى الصوف كدة وبيكون عازل ) انا والله احترت مع انه عيب عبيط جدا بس رجلى قربتت تتشوى خصوصا فى الصيف ده
حد يقولى اعمل اية يا اما حد يشترى العربيه دى

[ENG\AHMED]

انا لسة جاى من التوكيل حالا قالى ان ال heat shield موجوده وكاملة بيقولوا ان ممكن الشكمان يكون فيه مشكلة وواحد تانى قال دى شغله سروجى علشان ممكن يكون مفيش عازل بين ال heat shield وجسم العربية ( قصدة العازل الحرارى اللى عامل زى الصوف كدة وبيكون عازل ) انا والله احترت مع انه عيب عبيط جدا بس رجلى قربتت تتشوى خصوصا فى الصيف ده
حد يقولى اعمل اية يا اما حد يشترى العربيه دى

المفروض كان التوكيل قالك على السبب مش يقولك ال heat shield موجودة وخلاص انت كمل بقى !!! شوف سروجى يمكن فعلا العازل مش موجود , هى اة حاجة عبيطة بس تخنق

[amir_ezzat]

والله يا باشا انا زى ما قولت ليك قبل كدة التوكيل اللى هنا فى شرم تعبان موت انا هفضل ورا الموضوع ده ان شاء الله لحد اخر مليم فى جيبى وبعد كدة هبيع واشترى الفكترا الجديده ان شاء الله

[ENG\AHMED]

انت مش بتنزل القاهرة خالص؟؟
ممكن لو مفيش حد فى شرم فاهم فيها تنزل هنا حتى لو ويك اند هيا هتبقى علقة شوية بس هتشترى دماغك

[amir_ezzat]

ان شاء الله هنزل على اول شهر 7 وهشوف كدة اية النظام