ممكن شوية اسئلة على ابيزا 2001

[casper1500]

بعد اذنكو يا رجلة سيات انا عايز اعرف كل حاجة عن العربية دي
هل الموتور الـ 1000 كويس عليها انا حاسس ان مش هيبقى اداءها قد كدة .. يعني يبقى التسارع بتاعها كام ثانية من 0-100
و هي فيها كام غيار
تكيفها حلو و لا لأ .. العافشة اخبارها ايه ناشفة و لا ايه , انا متصورها ناشفة لانى اسمع ان ثابتها ع السرعات حلو
فيها ار بي ام و لا لأ ... قطع الغيار نظامها ايه و متوفرة ولا لأ
صناعة المانى 100% ؟؟
اسئلة كتير معلش بقة
و يا ريت كمان شوية صور من جوة و ما يمنعش من برة :)

[SEATLOVER]

دور بس شوية يا casper فى القسم هنا
كل الاسئلة بتاعتك متجاوب عليها بالتفصيل
من اول السؤال الاول الشهير لغاية اخر سؤال

[casper1500]

دور بس شوية يا casper فى القسم هنا
كل الاسئلة بتاعتك متجاوب عليها بالتفصيل
من اول السؤال الاول الشهير لغاية اخر سؤال

ايه يا عم سيات مالك قافش منى كدة انا دورت بس ملقتش من الاول للاخر :)
يعني عرفت ان الموتور الـ 1000 معقول لكن مش اوى مع التكييف و الشد
بس معرفتش تعمل من 0 - 100 في كام ثانية , ممكن يكون حد كتب بس موصلتش بالبحث :) بردة معرفتش فيها كام نقلة
عرفت ان ثابتها حلو و تكيفها مش اوى و عفشتها مرنة الى حد ما
بس معرفش فيها ار بي ام و لا لأ و قطع غيار الـ 2001 نظامها ايه انا اعرف ان الـ 94 قطع غيارها كتيرة و سعرها معقول
اعرف انها المانى فولكس بس مش عارف التقفيل ايه مثلا !!
بالنسبة للصور مش لاقي موديل 2001 في موقع netcarshow.com اللي موجود 2002 هل هو نفس شكل 2001 من جوة و برة ,, شوف الصور دى كدة :


هل دى صور 2001 ولا الـ 2006 :)
يا ريت توضحلى و شكرا

[mohamed ibiza]

اولا يا باشا الصور اللي ظاهرة صور كورفيت مش ابيزا 2001 و تاني حاجة الموتور ال 1000 علي الابيزا معفرت و قوي في الشد و يصلح للاستخدام الرياضي جدا جدا اما الثبات فموديلات الابيزا كلها ثباتها بيضرب بيه المثل بدون نشفان العفشة عفشة مرنة و قوية جدا جدا جدا و حمولة جدا جدا جدا و ثبات مرعب و رهيب و دي شيء معروف عن الابيزا اما عن التصنيع فالعربية موتور شاسيه عفشة فتيس الماني made in volkswagen التقفيل و التجميع اسباني في مصنع سيات في جنوب اسبانيا و تقفيل فوق الرائع و في مستوي الالماني بدون غلطات تقفيل خالص و اظن ده باين جدا جدا في كل الموديلات حتي الابيزا 94 بتاعتي تقفيلها كان تحفه اول ما جت بس طبعا العبد لله بهدلها:):) و بالنسبة للتكييف طبعا هيأثر علي السحب ده موتور 1000 بس الموتور كموتور ممتاز و حمول جدا و قطع غيارها متوفرة في التوكيل و برا التوكيل و اسعارها اغلي من 94 لكن في المتناول و معمرة و سعرها بالمقارنة بعمرها الافتراضي حلو اي سؤال مؤسس عصابة سيات موجود:):) عقبال ما تنضم لنا

[SEATLOVER]

بعد اذنكو يا رجلة سيات انا عايز اعرف كل حاجة عن العربية دي

يا سيد casper موضوعك فى اسمة و محتواة يحتوى على الكثير من (شوية)
شوية اسئلة , شوية صور , شوية
فبجملة الشوية .... شوية (بحث)

دة لمصلحتك ...عشان تعرف اللى بيتقالك صح ولا غلط

نيجى لاسئلتك
والاجابة هاتكون واضحة و قاطعة ومش عايمة

هل الموتور الـ 1000 كويس عليها انا حاسس ان مش هيبقى اداءها قد كدة ..

اداء ممتاز لعربية صٌممت لاستخدام راقى ...وليس فحت وحرت وغرز
لان الهدف الرئيسى من تصميم العربية دى هى ( استخدام عائلة شابة )
بهدف رئيسى توفير هايل فى استهلاك البنزين (850 كم فى التانك)

يعني يبقى التسارع بتاعها كام ثانية من 0-100

التسارع من 0 الى 100 فى 13 ثانية (حالات فابريكة بالكامل -كلة مظبوط)

و هي فيها كام غيار

6 غيارات 5 امامى 1 خلفى (نسب تخفيض الفتيس منخفضة )

تكيفها حلو و لا لأ ..

تكييف رائع وغير مسموع وخصوصاً فى الطرق المفتوحة - ولكن يتأثر بالاحمال عند وجود ركاب او الاهمال فى الصيانة

العافشة اخبارها ايه ناشفة و لا ايه

العفشة هى خليط بين خشونة الالمانى و نعومة اليابانى
يعنى ثبات مع شىء من المرونة

, انا متصورها ناشفة لانى اسمع ان ثابتها ع السرعات حلو

دى بتبقى مسألة نسبية حسب انت ركبت اية قبل كدة

فيها ار بي ام و لا لأ ...

طبعاً فيها تابلوة رياضى عدادين سرعة+rpm (لون احمر )

قطع الغيار نظامها ايه و متوفرة ولا لأ

قطع غيار معقولة اغلى من اللانسر كريستالة حاجة بسيطة (عشان انت متابع اللانسر)

صناعة المانى 100% ؟؟

ميكانيكا المانى - بودى و بعض الااكسسوارات اسبانى

و يا ريت كمان شوية صور من جوة و ما يمنعش من برة

شوية الصور جاينلك فى الطريق

الخلاصة : عربية راقية جداً بركوبة المانى بسعر اسبانى اجمالاً و قطع غيار تفصيلاً, مع فخامة المكونات و اداء مثالى يجمع بين القوة و الثبات مع المرونة و سرعة المناورة و الرياضية باتزان و بأعلى توفير ممكن للبنزين مع الحفاظ على مستوى عالى جداً من قلة الاعطال

ولكن ليست سيارة للجرى و الشد و غرز جامعة الدول :)

اى خدمة

[emadspeed]

الله ينور عليك بجد

تقييم ولا اروع ولا احلى من كده

[casper1500]

الف شكر , مش عارف و الله اقولكوا ايه
و بالنسبة للصور هي اتعملت كدة غلط مع انها كانت شغالة من شوية بس يظهر الموقع عامل حاجة عشان الصورمتظهرش منه مباشرة (ممكن خايف على الباندويدث)
عموما انا كان قصدي على صور 2002 اللى في موقع netcarshow
بشكركوا مرة تانية :)

[casper1500]

طيب انا اسمع انها في اوائل الـ 50 دة رينجها
طيب ايه رأيكوا انى ازود 8 مثلا و اجيب اوبل كورسا 1600 سيدان 2004 ولا 2005 اسمها احدث و 1600 و سيدان و موتور المانى بردة

[mohamed ibiza]

سعرها لو حالة ممتاااااااااااااااااااااا ااااااااااااااااااااااااا اازة و فابريقة بتوصل 56 الف و كان ادامي واحدة علي 56 الف ماشية بتاع 60 الف كيلو و حالتها كانت تحفه تحفه و ثبات الابيزا يضرب ثبات الكورسا بالنااااااااااااار