أسباب سوء سمعة الميجان (الحلقة التانية )

[farahat]

أنا بعد ما كتبت بعد التعليقات على أسباب سوء سمعت السيارة الجميلة الميجان في موضوع "بفكر اشتري ميجان " حسيت إن في كلام كتير ممكن يوضح أكتر أسباب الإنهيار اللي حاصل في سعر هذه السيارة و مكنش اتقال في الموضوع دة ، و كمان كلام مفيد في حد ذاته فقلت أعمله موضوع لوحده لعل و عسى يكون فيه الإفادة .

واحدة من أشهر الحاجات اللي طلعت على الميجان (و الناس بتعتبرها نكتة ) إن العربية بتهنج ، يعني ساعة ناس تقولك الكارت بيهنج و ساعات يقولك العربية بتقف لوحدها و ساعات يقولوا لزم تعمل reset عشان تكمل مشوارك و وصلت النكت انها لو هانجت و هي ماشية بتتقلب و إن الكوتش بيتعمله set-up على العربية عشان تمشي عدل و حاجات كدة :)

طيب فين الحقيقة في الموضوع دة و فين النكتة ؟

طبعاً واضحة النكتة .. إن مفيش عربية بتتقلب لما تهنج ، لكن فين الحقيقة ؟

كلنا بنسمع عن حاجة اسمها كمبيوتر العربية و نسبة كبيرة من الناس مش مستوعبة إيه هو دة بالضبط لدرجة إن في ناس بتسأل هو دة بيكون فين في الشنطة ورا ولا تحت الكنبة ولا فين (والله ما تهريج أنا سمعت السؤال دة بنفسي )
الإجابة ببساطة : مفيش حاجة معينة اسمها كمبيوتر العربية ، العربيات الحديثة كلها عبارة عن نظم منفصلة (موتور ، شاسيه ، فرامل ، تكيف ، إضاءة ، ...) و كل نظام من دول بيتحكم فيه وحدة تحكم إلكترونية مبنية على micro-processor أو CPU يعني ذي اللي في الكمبيوتر بالضبط بيكون دوره تظبيط الأداء بتاع الوحدة دي على أحسن ما يكون (يعني بتاع الموتور يطلع أقصى قدرة منه ، و بتاع التكيف يطلع أكتر و أحسن تبريد منه و هكذا و كل وحدة من دول بنسميها ECU)
و طالما في CPU و كمبيوتر يبقى أكيييد في سوفتوير (طبيعي أمل يعني هتألف لوحدها :) ) ، و طالما في سوفتوير يبقى أكيد في إيه ...؟ قولوا انتو بقى يا حلوين ؟
أكيد في تهنيج بمعنى إن ممكن السوفتوير يعمل حاجة خارجة عن المألوف بتاعه و بالتالي الوحدة بتاعته تقف لحد ما يتعملها reset (دة إذا ما عرفتش تصلح وضعها خلال ثواني ) ، و دة اللي بنسميه ال-fail-safe يعني أول ما تلقي نفسها خرفت تحول تصلح الوضع في ثواني من غير ما تأثر على الأداء و لو معرفتش بتروح موقفة نفسها عن العمل في حالة أمان و تقول أنا في عندي مشكلة (تنور لمبة تحذير عشان السواق يعرف إن في مشكلة ) لحد ما سيادتك تعمل start تاني أو تروح تصلحها لو منفعتش تشتغل تاني.

تمام لحد كدة ؟ نقول تمام ، طيب ليه التعقيد دة ما طول عمرنا عايشين بعربية من غير الفيلم دة كله و ماشية تمام ، الإجابة ببساطة إن زمان مكنش في عربية 1600CC بتطلع 115 حصان ، و كان التكيف بيخليها تتقل في السحب ، دلوقتي الوحدات بتاعة الكمبيوتر دي بنها شبكة Network بخلي التكيف لم ييجي يشتغل يبعت يقول للموتور زود البور شوية عشان السواق ميحسش إن أنا اشتغلت و لم تحب تسحب أو تعمل kickdown ممكن الموتور يقول للتكيف استانة شوية و وقف الكباس لحد ما نعدي السحبة دي (ثواني متحسش بيها )
كل الكلام دة بيحصل عن طريق السوفتوير اللي على وحدات الكمبيوتر بتاعة العربية ال-ECUs

و كل ما زاد حجم السوفتوير زادت إمكانيات الراحة اللي في العربية و زادت امكانياتها و كمان زادت فرصة إلتهنيج و مشاكل السوفتوير المعروفة .

ثورة السوفتوير في العربيات دي ابتدت من حوالي ٨ إلى ١٠ سنين و واحدة واحدة كل العربيات بتتجه ليها ، من أوائل العربيات اللي ابتدينا نشوف فيها الثورة دي في مصر كنت الميجان و ابتدت بعديها تبان في الحاجات التانية (يعني كل الحاجات اللي ابتدت تتصمم بعد الفترة دي زي اللانسر الجديدة و الكورلا الجديدة والمازدا و الباسات و غيرها و غيرها ) و هتبتدي تبان فيها مشاكل سوفتوير طبيعية مع الوقت و بتتحل

بس الميزة الجميلة بقى في حكاية السوفتوير دي إن ممكن تتصلح بمجرد إن احنا بنعمل فيرجين Version جديدة تنزل على ال-ECU (مين فينا مجابش موبايل Nokia و طلع فيه مشكلة تهنيج و راح عمله update ؟؟ )

بعد كل اللي فات دة نتكلم تحديداً عن الميجان ، أيوة بتحصل فيها ساعات حركات نص كم و بقولها تاني بتحصل "بتحصل " ، بس كلها حاجات عبيطة و مش مشاكل خطيرة و مش ممكن ، تاني مش ممكن تحصل حاجة خطيرة (عشان فكرة ال-fail-safe اللي قلنا عليها ، غير بقى لو ربنا كاتب لواحد حاجة لا قدر الله و دي مفيش منها هروب )
طيب إيه أمثلة إلتهنيج اللي بيحصل :
١- الكاسيت ساعات ميرضاش يعلى ولا يوطي الصوت (بس شغال ) ، ببساطة إطفيه و شغله خلاص (حصلت مرة واحدة معايا )
٢- ينور لمبة الأعطال من غير سبب واضح و تروح لوحدها بعد ثانية واحدة
حاجات من النوع دة ، و بتحصل في كل العربيات اللي فيها سوفتوير بالحجم دة مش بس الميجان

الخلاصة إن دي حاجة عادية مش حاجة خاصة بالميجان ، وهانشوفها كتير في كل العربيات اللي هتطلع بعد كدة (و أنا أهو و انتو أهو :) )

أسف مرة تانية للإطالة و اتمنى أكون أفدتكم . مع خالص تقديري

[fahd_628]

بجد حرااااااااااام سعر الميجان المستعمل

انا رأى ان محدش يبيع عربيتة و الى عاوز يبيعها يبيعها بالسعر الصح مش ب 70 و 80 الف لية يعنى :(

[osamaos20022]

السعر يا جماعه يعتمد علي الحاله انا كان قدامي ب 75 و85 بس اشتريتها ب 100 موديل 2006 ماشيه 5 الاف كيلو بحاله الزبرو كامله ماعدا البانورما يعني اللي عربيته نظيفه هتجبله

[farahat]

أنا معاك يا فهد باشا إن السعر كدة مش طبيعي و دة راجع لأسباب كتيرة منها الإشاعات ، لكن مش الحال إن الناس تقول مش هنبيع أو هنبيع بكذا و خلاص يا كدة يا بلاش ، و برده مش الصح إن احنا كل ما حد يقول فيها مشكلة نقوله لأ مفيهاش ،و متصدقش ،و دي إشاعات ،
لأ الصح إن احنا نقول بمنتهى الوضوح و الصراحة أدي المشاكل و أدي سببها و أدي حلولها (ذي فكرة مبادرة Sharky إن كل الملاك يكتبوا خبراتهم مع العربية ) ، و مع الوقت الناس هاتفهم إن العربية الميجان مش كائن فضائي مرعب ولا هي مجموعة مشاكل و بس ، لأ هيعرفو انها عربية عادية جداً و يمكن متميزة كمان عشان فيها شوية إمكانيات زيادة في مقابل سعر معقول

مش كدة ولا إييييه ؟!

[Sharky]

كلام مظبوط دا يا فرحات و أحيك عليه

بس أحب أزود إن مش شرط كل عربية ميجان يحصل فيها تهنيج فى أى وظيفة بالعكس فيه عربيات كتير محصلش فيهم حاجة

و على معلومة إن مافيش حاجة إسمها كمبيوتر الميجان دى معلمة صحيحة تماما و الصح زى ما حضرتك شرحت بالظبط علشان الناس بتقعد تفتى و تقول كمبيوتر الميجان بيهنج و تمنه 30 او 40 الف !!!

من الأخر أحيك على الموضوع دا فى إنتظار حلقات أخرى

[farahat]

كلام مظبوط دا يا فرحات و أحيك عليه

بس أحب أزود إن مش شرط كل عربية ميجان يحصل فيها تهنيج فى أى وظيفة بالعكس فيه عربيات كتير محصلش فيهم حاجة

و على معلومة إن مافيش حاجة إسمها كمبيوتر الميجان دى معلمة صحيحة تماما و الصح زى ما حضرتك شرحت بالظبط علشان الناس بتقعد تفتى و تقول كمبيوتر الميجان بيهنج و تمنه 30 او 40 الف !!!

من الأخر أحيك على الموضوع دا فى إنتظار حلقات أخرى

واحشنا بجد يا Sharky باشا

فعلاً زي ما إنت قلت و الطبيعي إن في عربيات يحصل فيها تهنيج في وظايف معينة و عربيات لأ و عربيات يبقى بيحصل فيها الخلل كل فترة ، و دة الطبيعي حسب ظروف تشغيل كل عربية ،
دي مش قاعدة ، دي حاجة عشوائية ، زي بالضبط الكمبيوتر إلي عند كل واحد مننا في البيت أو في الشغل ممكن يهنج مرة كل شهر و ممكن مرة كل سنة و ممكن ميهنجش غير مرة في العمر (و ممكن برده مايعملهاش أبداً .. لو مش بتشغله أصلاً ؛) )


يعني مثلاً موضوع صوت الكاسيت ده حصل معايا مرة واحدة فقط مع إن العربية موديل ٢٠٠٥

[Ahmed Selim]

كلامك 10\10 يا فرحات باشا

أنا أول ما حبت العربية كان ساعات ال CD يفصل و يشتغل تانى مع تقليب النور العالى
الموضوع ده قعد معايا بتاع شهرين كده وأختفى لوحده

برضة العربية مو 2005

ربنا يسهل و موضوع تجمع أسرة الميجان يتم عشان أنا عندى فكرة كويسة ممكن نعملها بس لما نتقابل أن شاء الله

كلامك 10\10 يا فرحات باشا

أنا أول ما حبت العربية كان ساعات ال CD يفصل و يشتغل تانى مع تقليب النور العالى
الموضوع ده قعد معايا بتاع شهرين كده وأختفى لوحده

برضة العربية مو 2005

ربنا يسهل و موضوع تجمع أسرة الميجان يتم عشان أنا عندى فكرة كويسة ممكن نعملها بس لما نتقابل أن شاء الله

يا ريت إن شاء الله موضوع المقبلة يكمل عشان فعلاً نستفيد من أفكار و خبرات بعض

و شكراً على ذوقك يا أحمد باشا :)

[Ramy_Tantawi]

لا فض فوك الحلقه التانيه يا فرحات باشا :).

طبعاً مش محتاج اقول كلامك صح 100 % وان فعلاً 90 % من المشاكل اللي طالعه على العربيه دي اشاعات وتخوف من جيل جديد من التكنولوجيا خصوصاً كمان انها نازله بسعر معقول وغير مبالغ فيه وعن تجربه شخصيه من سنوات كنت في السعوديه وبانزل اتفرج على العربيات المهم الوقت ده بالصدفه كان الهيونداي بدءت طرح النيو اكسنت هناك في السعوديه وكان في موديلات نازله من كذا نوع المهم رحت لوكيل رينو في السعوديه ( الزاهد ) وقلت اسأل على العربيه كان وقتها الاكسنت عامله كام !! 38.000 ريال ...الكورولا عامله ال 1300 منها عامل حوالي 47000 حاجه كده الميجان لم تكن معروفه هناك على الاطلاق لكن اللي لفت انتباهي هو عامل السعر الناس بقت تقول لبعض والله بالنص ( يا عم عربيه فيها التكنولوجيا دي وبي 45.000 اكيد طبعاً عربيه تعبانه وبعدين اصل العربيات دي تشتريها رخيص وتاني يوم تفضل تدفع دم قلبك وتصرف عليها اللي وراك واللي قدامك واللي جنبك كمان اذا لزم الامر.

باختصار عاوز اقول ان احنا او الغالبيه العظمى متبرمج ومنهم والدي والجيل ده عشان ماحدش يفتكرني بازم في المطلق ان عربيه فيها تكنولوجي وشوية اوبشن و امكانيات لازم تكون تمنها حاجه كده 200 -300 الف حاجه كده انما عربيه محترمه وفيها كل ده وبالسعر ده !!!! اكيد فيها مشاكل كتير.

مع اني واعتقد اغلبنا من ملاك الميجان مش شايفين ابداً لا قطع الغيار مبالغ فيها ولا الصيانه مكلفه للدرجه ولا ده كله صحيح مش رخاص لكن معقوله واسعارها قريبه لعربيات نفس فئتها في السوق تقريباً .

فا يمكن وده انا مقتنع بيه مش عارف ليه ان سعر الميجان لانه على قد تمنها ده خاضض الناس ومخوفهم لئن فعلاً العربيه الوحيده في نظري اللي تمنها قد اللي فيها بدون لا مبالغه في التسعير ولا تفعيص فيها زي ما بنشوف للأسف الوكلاء عندنا نسبه كبيره منهم عندنا في الشرق الاوسط يجيب العربيه ويبقى هاين عليه يفك منها الفرش ويحط حاجه ارخص وحاجات كتير من كده انما الرينو ماعملتش كده لغاية دلوقتي ده غير ان فئات الرينو بجد مش تحيز والله كلها بتفرق في رفاهيه وراحه زياده لكن اتحدى موديل من موديلات الميجان نزل قال الفئه الاولى شيلنا منها ايرباج وشوية انظمه . العربيه الفئات بتاعتها كلها في رفاهيه وكماليات فقط لكن عند الامان واداء العربيه في المطلق لم تمس ابداً وهو احترم ده وساوى بين كل فئاته ودي حاجه انا محترمها جداً في الرينو .

[rayaojt]

طيب وكمبيوتر الرحلات ده ايه وكومبيوتر الاعطال