عايز أشترى e30 و بأسرع وقت

**semsem78** · 09-07-2008 10:45 AM

بصراحه انا كنت هاشترى زيرو و هادخل فى قصص الاقساط بس قررت أخيرا أجيب e30 ممكن تساعدونى فى حاجتين:
اولا تقولولى مميزاتها و عيوبها لأنى معرفش عنها كتير
وتنصحونى أبص على إيه و أنا بشترى

ثانيا لو فى حد قدامه حاجه كويسه للبيع يقوللى
و متشكر جدا :)

**Xpert** · 09-07-2008 10:10 PM

باشا ...
انا هاقولك ... البي ام E30 عربيه حلوه جداً ... و لو معاك فلوس زياده ابقي هات للعبد الغلبان واحده ههههههههههههههههه
لاء لاء .. ندخل في الجد بقي شويه ...
بص يا سيدي ..
مهم : تعرف الكلام علي ايه بالظبط ... فيه E30 ... و فيه E30 facelift ... و اللي معروفه في مصر باسم M40 ...
ايه الفرق...
موديل القديم من 1983 لحد 1987 .. و الشكل الجديد من 1987 لحد 1990
الفرق كله مبدئياُ في الشكل الخارجي ..اكصدامات الموديل القديم نيكل .. و اكصدامات الموديل الحديث بلاستيك ...
فوانيس خلفيه للموديل القديم صغيره .. و نور الريفيرس جاي واقف و عامل كده I .. فوانيس الشكل الجديد
الفرق في المواتير بين الشكل القديم و الجديد : في ال 6 سلندر واحد و فروقات داخليه في المواتير و انظمه الانجكشن ..
في ال 4 سلندر الموتور نفسه تم تغييره بواحد احدث ..
مهم ... لازم العربيه تكون حالتها ممتازه .. علشان التجديدات فيها مش زي الفيات ... يعني مثلاُ لو حبيت تجدد العفشه .. يبقي هاتعمل الاتي : هاتجيب ركبيتين استيراد لو بتوعوتك خلصانين خالص .. و تشوف الركب الاستيراد دي تكون حالتهم مثلاُ 70% ... يبقي انت بتجدد الباقي ... (يعني بتمسك القطعه تجددها و تركبها) .. و بالتالي فمصاريفك هاتزيد ....(اعمل حساب فك العفشه و الفرامل ورا و قدام 10 بواكي ) ...و بتنساهم طول عمرك لو جبت حاجات اصلي (اصلي مش يعني بس ام اصلي .. لاء .. يعني تجيب ماركات هاي كواليتي اصليه) ..
دي حاجه لازم تاخد بالك منها .. و بالتالي لازم تراجع علي العفشه قبل ما تشتري ...
بالنسبه للموتور ... عندك كل المواتير متوفره ... و هاتلاقي كتير مسقطين مواتير حديثه كمان ... فيه مواتير 4 سلندر و 6 سلندر ... لازم تعرف ايه الموتور اللي تحت الكبوت و حالته عامله ايه ...
لو بتشتري 4 سلندر عندك موتور الشكل القديم لحد 1987 .. و ده موتور حديدي عامل زي بتاع ال 504 بالظبط .. حتي لو الموتور مفوت هايسد معاك ...
الموتور الحديث فيه اعطال بياكل كامات و بيبوظ وش السلندر ...
في ال 6 سلندر كما سبق المواتير فيها الفروق في نظام الانجكشن و حاجات كده ..صغيره ...
خد بالك ان معظم العربيات بتبقي مسقطه مواتير او مغيره مواتير ... مش مشكله طالما الشغل معمول صح ...و خد بالك كمان ان الترخيص غالي .. اللي يعجبك اشتريه ) ...
مهم : ماتشتريش عربيه اي ثرتي و تم عمل الفيس ليفت هنا في مصر .. يعني ماتشتريش عربيه "معدله 90" زي ما بيكتبوا ... لان ببساطه شديده هم بيغيروا الشكل ليه ؟؟ يا اما اركب 85 لو عاجبني شكل ال 85 .. يا اركب 88 لو عاجبني شكل ال 88 .....
مهم جداُ ترفع العربيه و تخلي متخصص يكشف عليها .. سمكري يكون فاهم يعني .. و عفشجي يكون فاهم ... و ميكانيكي يكون فاهم .. و سيبك من التوكيل ... خليك مع الصنايعيه بره ..
اعمل حسابك .. قطع غيار الالماني بتبقي غاليه شويه .. و بتعيش كتير جداُ طالما انت بتعمل صيانه دوريه .. يعني مثلاُ لو جددت عفشه هاتكلفك في حدود 8000 جنيه .. و طول ما انت متابع العفشه مش هايجرالها حاجه (غشيل و تشحيم و الحوارات دي .. مع ان البي ام مابيتشحمش هههههههه) ...
لو المكنه فيها حاجه .. اعمل حساب تغير مكنه علي طول .. البي ام مابنعمرهوش علشان الفنيين فيه اللي هايطلعوا العربيه مظبوطه مش كتير ... اعمل حسابك انت هاتركب بي ام .. مش 127 (نو اوفينس للي راكبين 127.. عندنا واحده برضه ) ...
انصحك ابص علي ايه .. بص علي العربيه كلها ... مسمار مسمار ... لو عدت الفحص اللي باقولك عليه ده .. اشتريها ...
خد بالك كمان .. ان ال E30 عربيه بسيطه جداُ .. بس عاوزه واحد حريص جداُ في المتابعه .. و واحد فاهم جداُ في التصليحات ...
و عموماُ ماتقلقش .. هيا عامله زي ال 504 ... فيه قطع غيار رخيصه جداُ .. و فيه غاليه جداُ .. و كله بيركب .. و كله بيشتغل .. بس انا لازم اقولك علي الصح (مش عارف لازم ليه .. بس اهه باقول و خلاص هههههههه علشان ماتجيش تشتكي بعد كده ان العربيه حصل فيها كذا و كذا نتيجه انك ركبت حاجه تعبانه و كده .. بانصحك دايماُ بتركيب القطع الاصليه او الهاي كواليتي افترماركت بارتز) ... if it isnt a name brand , its nothing , and always remember ... BMW stands for high quality ...
و لكم تحياتي .. مش فاكر حاجه تاني اكتبها الصراحه ...

**Xpert** · 10-07-2008 11:55 PM

عاين دي كده :
http://www.nilemotors.net/Nile/showthread.php?t=31727

**semsem78** · 11-07-2008 02:19 AM

أولا انا متشكر جدا يا اكسبرت انك رديت عليا بس انت خوفتنى شويه طب العربيه الكويسه دى تعملها كام تقريبا و كنت عايز اخد رايك فى حاجه انا اتعرض عليا سيفيك 92 عامله 148000 كيلو على 40000 جنيه وهى حالتها كويسه بس عايزه شويه سمكره و دوكو ياترى هى احسن ولا ال e 30
وبالنسبه للبى إم انا كنت عايزها 1600 عشان البنزين زى مانت عارف

بالمناسبه العربيه اللى انت قلتلى عليها شكلها كده كويس من كلام صاحبها بس دى 1800 cc انت ايه رايك؟
و اشكرك مره تانيه على اهتمامك

**Xpert** · 11-07-2008 09:49 AM

بص يا سيدي ... افتح اللينك اللي في توقيعي كده و شوف ابه رايك في كلامي ..
سعر ال E30 الكويسه بيبتدي من 38 الف لحد 65 الف ... اه بجد ... كله موجود ...الراجل لسه هايعدل فممكن تساله و تخليه يجيب موتور 1600 ... بس ان كنت هاتجيبه علشان استهلاك البنزين احب اقولك ان الاستهلاك مش هايفرق حاجه خالص بين ال 1600 و ال 1800 ...
بالنسبه للسوال الازلي الهوندا ولا البي ام .. دي حاجه ترجعلك انت مش انا .. و خد بالك ان دي حاجه و دي حاجه .. الهوندا جر امامي و البي ام خلفي ..الهوندا شكلها هلامي البي ام فيها تصميم زوايا و edges ..البي ام فيها عصب شويه عن الهوندا .. بترجعلك انت و شوف انت عاوز ايه .. و خد بالك برضه اهم حاجه الحاله ..
و سيبك من عامله 148 الف كيلو دي .. ممكن تلاقي عربيه عامله 100 الف كيلو و مغيره نص .. و ممكن تلاقي عربيه عامله 400 الف كيلو و حالتها تمام..