التقييم الاول للصاروووج الSX4 sedan ، بعد اول 3000كم

[mekawy002]

السلام عليكم ،
اولا،احب اعتذر عن التأخير فى كتابة هذا التقيم ، بسبب انشغالى الشديد بعد العودة لمصر ، ورغبتى فى نقل تجربة كاملة وتفصيلية مع الSX4

بيانات السيارة:
1.6 لتر M16A (DOHC) اوتوماتيك اربع سرعات
عدد الاسطوانات :4 ، 16 صباب.
قطر الاسطوانة :78 مم
المشوار : 83مم
نسبة الانضغاط 1:10.5
السرعة القصوى : فى الكاتالوج 180 km/h (جابت معايا 190 )
خزان الوقود :50 لتر
من 0 الى 100 :حسب الكاتالوج 12 ثانية
107 HP@5600 RPM
145 Nm@4000RPM
Brakes(Front) : Venatilated disc
Brakes(Rear) : Drum,leading & trailling
Suspension(Front): MacPherson strut & coil spring
Suspension(Rear): Torsion beam & coil spring
Kerb weight A/T : 1,200kg
Gross vehicle weight: 1,650kg

استهلاك الوقود :
مع اسلوب قيادة رياضى ، وسواقة فى الزحمة 50% من الوقت ،وطبعا تكييف طول الوقت : تقريبا 11km/L

الكماليات:
4 زجاج كهرباء(زجاج السائق one touch )
راديو وسى دى MP3 (اكثر من رائع)
4 سماعات و 4 تويترات
مالتى فانكشن
مقعد السائق هايدروليك
جنوط سبور 15
تكييف مانيوال
فوجات امامى
2 ريموت (عن الضغط مرة واحدة،يفتح باب السائق ، والضغط للمرة الثانية تفتح باقى الابواب)
عند فتح السيارة بالريموت ، تغلق اوتوماتيك بعد 15 ثانية لو لم تدخل السيارة
شاشة بيانات تعرض الساعة والحرارة و متوسط ومعدل استهلاك الوقود
2 اير باج
ABS/EBD
تارة دريكسيون جلد طبيعى







تقييمى الشخصى :
اولا الحمد لله ان ربنا وفقنى فى الاختيار ده ،لانى اكتشفت واتأكدت بعد اكتر من 3000كم بالSX4 ،انها من افضل السيارات فى فئتها ، وبالنسبالى هى الافضل على الطلاق فى تلبية احتياجاتى (مع كامل احترامى لكل السيارات المنافسة) ، وانا سأختصر الاسباب فى النقاط التالية :

• المحرك ،ماشاء الله ، قوة سحب جبارة ، وسرعة تجميع مش طبيعية ، صحيح مجبتش بيها اقل من 13 ثانية فى التسارع من 0 ل 100 ، بس من 90 ل 130 مافيش عربية 1600 وقفت قصادى (مجربتش مع السيفيك ، بس انا ديما متحيز للسيفيك) . طبعا مش محتاج اوصف القفزة المرعبة اللى بتحطل مع الكيك داون.
• التكيف ، تلاجة فعلا ، و الساعة 1 الظهر بعد ما اشغلو 10 دقائق بصراحة مابستحملش وبقفله. و اهم حاجة ان التكيف مالوش اى علاقة بمتور العربية وسحبها ،يعنى اوقات بشغل التكيف على الاخر ، وبشد واسحب بالعربية ومستحيل تحس بأى تأثير.
• الثبات : مشاء الله اكثر من رائع حتى 170 وملفات كأنى ماشى على 120 ،وده طبعا برغم ارتفاع العربية 16.5 سم عن الارض ، وتحس على طول ان العربية تقيلة على الطريق.
• ال RPM بيكون 2500 عند 100 و 2900 عند 120 و مابعديش 4000 حتى عند 180 ، بس فى الكيك داون بيوصل ل 5500 ، مع العلم ان ال red zone عند 6500
• العفشة فى منتها النعومة الحمد لله ، كعادة اليابانى ، و العربية بشكل عام وانت سايق تستمتع بالسهوله النعومة الرائعة.
• التحكم فى العربية وسهولة القيادة ، سريع و مش محتاج اى وقت علشان تتعود عليه.
• البوور للدركسيون خفيف جدا جدا ورائع.
• طبعا مش محتاج اقول ان التقفيل فى منتها الاتقان ، لانه طبعا يابانى100%
• عزل الكابينة ممتاز ، وصوت المتور مش مسموع غير مع الجرى ، بس صوتة بيكون ممتع.
• الCD والسماعات بجد تحفة من حيث نقاء الصوت والاوبشنز.
• الشنطة بجدد تشييل من 3 ل 4 جثث ، 540لتر ، اكبر شنصة فى الفئة دى على الاطلاق.
• التابلوه شكله جميل جدا ، وتداخل المعدن مديله فخامة وشياكة ، وباقى الخامات بلاستيك رائع الجودة والتشطيب ، والفرش قماش مش جلد.
• المساحة الخلفة جيدة ومريحة ل3 اشخاص بالغين ، لاكن طبعا مش زى التيدا، هى زى الالنترا مثلا.
• اللى فعلا كان نفسى يكون موجود فى العربية دى : مسند ذراع للسائق ومثبت السرعة ، وان شاء الله يجيبوهم فى التوكيل واركبهم.
• انا بحس ان استهلاك الوقود عالى شوية، بس اظن ان ده موجود فى معظم ال1600 زى السيفيك مثلا.

وفى الاخر انا الحمد لله راضى عن العربية دى ، اتمنى تدعولى ربنا يباركلى فيها ، ويسترها معيا ان شاء الله.

[mo7amed_omara]

مبروووك العربية وربنا يسترها معاك و يديك خيرها و يكفيك شرها ان شاء الله

[YoussefMostafa]

الف الف شكر علي التقييم

وربنا يباركلك فيها

[bassam nagy]

الف شكر على التقييم وربنا يباركلك فيها

[MoMohsen]

هو مين توكيل السارة فى مصر.وسعرها فى حدود كام؟

[mekawy002]

التوكيل هو مودرن موتورز اللى صاحبه عبد الرحمن سعودى ، وهو معاه نيسان كمان .
والعربية كانت ب 107 من شهرين فى الدفعة الاولى ، اظن انها غليت الف او اتنين ، مش متأكد..

[haneena]

تقييم رائع والف مبروك على العربية وربنا يباركلك ويباركلى فيها يا رب

التكييف بتاعها فعلا تلاجة وهو بيشتغل بره الموتور بدليل انك ممكن تشغله والعربية موتورها مش داير بخلاف العربيات التانية وعشان كده هو له موتور خاص بيه وعشان كده مش بيأثر فى السحب

العربية فعلا تحفة بكل المقاييس وباحمد ربنا انه وفقنى فى اختيارها

العربية فى الدفعة الجديدة زادت اربع الاف ونص ده من كلام التوكيل بس مش عارفة ده صحيح ولا ايه

بس غريبة موضوع البنزين ده انا مش شايفة انها بتعمل 11 كيلو لكل لتر هى بتعمل معايا اقل من كده وانا لسه فى التليين على فكرة بس مش عارفة ممكن تكون السواقة هى اللى فارقة

من الاخر العربية دى بسم الله ماشاء الله طلقققققة انا نفسى اخلص التليين بسرعة عشان اجرى بيها براحتى

وهى فعلا تستاهل تمنها وانا شايفة انها هتكتسح السوق ان شاء الله

[mekawy002]

شكرا ، مبروك عليكى انتى كمان ، وفعلا اكيد استهلاك البنزين متأثر بأسلوب قيادتى السيئ
بس الحمد لله العربية مغرية جدا للجرى ، وبصراحة ما بقدرش امسك نفسى حتى لو مش مستعجل

[Migo123]

بناءا على تجربتكم و المدح والاطراء الغير مسبوقيين اللي سمعته عن العربيه من حضراتكم .... وبما اني بدور على عربيه في نفس الفئة وعاجبني شكل الهاتش باك

لما حاولت اتفرج على العربيه في معرض اتوماك ... الكهربا قطعت اول مادخلت جناح سوزوكي و مقدرتش اشوف اي حاجه غير الفلاشر .......
رحت مدينه نصر عشان اتفرج على العربيه في معرض الشركة .... مالقيتش غير الفيتار والجيمني ..... والباشا مسئول المبيعات الموجود في الفرع مكلفش خاطره اساسا يقوم يشوف اللي داخل عايز ايه
المهم اتفرجت شويه على الفيتارا 1600 و معجبتنيش خالص
رحت للباشا اللي قاعد يتخانق مع واحد زميله باين
سألته عن Sx4.......... الرد بكل تناكه لا مش موجوده يمكن تيجي بكره ولا بعده

خرجت من المعرض وكلي اسف اني دخلته
شركه بتتعامل بهذا المنطق مع العملاء المتوقعيين
مش منتظر منها اي خير لما تتعامل معاها كوكيل المفروض يديلك حقك


على فكره انا قريت تجارب شخصيه عن الموديل ده في مواقع اللي استخدمو العربيه اجمعو انهم مبسوطين جدا في الاول ...................... بس اللي معاه العربيه من فتره كتير منهم عندهم مشاكل متعلقه بالعفشه (اصوات واهتزازات غريبه) ومتعلقه بالموتور انه تقيل و اداءه مش قد كده .... (العربيه بره 2000 CC طبعا هما بره متعودين على عربيات بمواتير كبيره فاكيد كلامهم صعب تطبيقه على مصر )

[wawoo]

بس اللي معاه العربيه من فتره كتير منهم عندهم مشاكل متعلقه بالعفشه (اصوات واهتزازات غريبه) ومتعلقه بالموتور انه تقيل و اداءه مش قد كده .... (العربيه بره 2000 CC طبعا هما بره متعودين على عربيات بمواتير كبيره فاكيد كلامهم صعب تطبيقه على مصر )

العربية زاد سعرها 5 الاف جنية فى كل مودلاتها , و فعلا من مراجعة التجارب على السيارة بالخارج , فى ملاحظات على الثبات و الاهتزازت , وصوت الموتور مرتفة شوية , العربية جيدة لكن بعد الزيادة المبالغة فيها دخلت فى فئة سيارات اخرى قد تكون افضل كثيرا .

[mekawy002]

ميجو باشا ، طبعا انا مقدر رد فعلك ده اللى مبنى على تجربتك فى اوتوماك او فى معرض مدينة نصر ، بس بعيدا عن الانفعال ،خلينا نناقش الموضوع بموضوعية :

لما حاولت اتفرج على العربيه في معرض اتوماك ... الكهربا قطعت اول مادخلت جناح سوزوكي

طبعا انتا متفق معيا ان دى حادثة عارضة ، و المسوْول عنها منظموا اوتوماك مش توكيل سوزوكى.

اتفرج على العربيه في معرض الشركة .... مالقيتش غير الفيتار والجيمني

طبيعى علشان الشحنة الاولى كانت خلصت.

والباشا مسئول المبيعات الموجود في الفرع مكلفش خاطره اساسا يقوم يشوف اللي داخل عايز ايه

طبعا دى حاجة تحرق الدم ، وانا حصللى كده برضو،نفس الموقف مرتين مع غبوور ، وده كان من الاسباب الرئيسية اللى خلتنى اصرف نظر عن الالنترا (طبعا زائد اجماع الناس ان غبوور مش محترمين)
بس للامانة انا اشتريت من فرع الدقى ، انا كنت مسافر ، بس اللى استلملى العربية قللى ان الناس هناك كانوا فى منتها الاحترام والاحترافية فى المعاملة ، واظن ده رأى الاستاذة حنينا فى فرع اسكندرية ، و ممكن يكون الموظف اللى حضرتك قابلتوا زى اغلب الموظفين فى مصر ، وممكن برضو يكون اللى انا قابلتو يكون هو يكون من القليلون المحترميين ، بس بشكل عام مافيش اجماع على ان الناس بتوع التوكيل ده مش كويسين.
بس طبعا انا حصللى نفس اللى حصلك كنت حفكر تانى قبل لما اشتريها.

أما مركز الصيانة ، فانا بتعامل معاهم من حوالى سنتين بالعربية القديمة (ابو رواش -الدقى زحمة و ممل) و كل المهندسيين هناك بصراحة محترميين جدا فى المعاملة وعمرى ماشفت عميل بيتخانق قدامى علشان اى مشكلة ،لاكن طبعا انا الحمد لله مجربتهمش فى اى مشكلة كبيرة ، فا برضو ده مش حكم مطلق عليهم ، و ممكن ملاك النيسان والسوزوكى القدامى يكون حكمهم ادق واكثر واقعية. انا هنا مجرد بانقل تجربتى بامانة وحيادية.

بس اللي معاه العربيه من فتره كتير منهم عندهم مشاكل

متعلقه بالعفشه (اصوات واهتزازات غريبه) ومتعلقه بالموتور انه تقيل و اداءه مش قد كده

انا بصراحة غير متفق معاك فى المعلومة دى بسبب ، انى قبل لما اشترى عملت بحث شامل عن العربية على النت ، والعربية بقلها سنتين بتنزل فى امريكا واليابان ،و محققا مبيعات ممتازة ، و الامريكان بيعتبروها من افضل 10 عربيات فى فئتها ،متقدمة على الكورولا الجديدة واللنسر الجديدة والانترا ،و طبعا رقم واحد هناك السيفيك ، والتقييم ده متكامل ، وبقيم العربية من كل النواحى (الاداء والشكل وتجهيزات الامان.... الخ)
ده غير ان اغلبية تجارب الناس اللى انا قرأتها كانت بتشكر فيها ، و موضوع اصوات العفشة ده انا استبعده لسبب منتقى، هو ان العربية دى مبنية على نفس الplatform للسويفت الجديدة ، واللى واخد جوائز السنة اللى فاتت عالمة على تصميمه ، واضافة الى ان ال SX4 بتنزل بره iAWD يعنى زىالسوبارو الايمبرازا كده ،وهى برضو عربية راليات بتتميز بعفشة قوية ذات قوة احتمالية عالية ، او على الاقل ده اللى انا بتمناه.

وعموماالفيصل فى الموضوع ده حكمنا احنا عليها فى مصر، فممكن تجرب العربية دى فييا لانى عملت 3000كم فى اسبوعين وبالمعدل ده ، لو ربنا ادالى عمر ان شاء الله شهرين او تلاتة كمان و اكمل ال 20000 وساعتها يبان الحكم النهائى على العربية ،

ومتقلقشى انا لو بس حسييت انى اضحك عليا فى العربية دى وطلعت مقلب ، ان شاء الله حشردها على المنتدى .

[mekawy002]

العربية زاد سعرها 5 الاف جنية فى كل مودلاتها , و فعلا من مراجعة التجارب على السيارة بالخارج , فى ملاحظات على الثبات و الاهتزازت , وصوت الموتور مرتفة شوية , العربية جيدة لكن بعد الزيادة المبالغة فيها دخلت فى فئة سيارات اخرى قد تكون افضل كثيرا .

حتى بالرغم من الزيادة دى ، مازالت سعرها ممتاز لو محتاج عربية عائلية ذات اداء رياضى ، ودى زيادة متوقعة زى اى عربية جديدة ، تانى دفعة بتغلى شوية ،و هى خارج مصر سعرها تقريبا زى السيفيك ، فاسعار العربيات فى مصر كلها فيد التوكيلات ، و متنساش ،الالنترا واليارس اول لما نزلوا كانوا بكام و دلوقتى بكام !!!!
واظن لو اتفرجت عليها و جربتها مش حيكون ده رأيك :)
و اظن انهم عملين حملت دعاية جمدة للعربية دلوقتى ، وممكن تجربها فى مارينا ويمكن اماكن تانية .

[Migo123]

اقتباس:
لما حاولت اتفرج على العربيه في معرض اتوماك ... الكهربا قطعت اول مادخلت جناح سوزوكي
طبعا انتا متفق معيا ان دى حادثة عارضة ، و المسوْول عنها منظموا اوتوماك مش توكيل سوزوكى.

طبعا ده مجرد نصييب .... انا مش بلوم الشركه في الموضوع ده خالص
انا قصدي اوضح بس اني لغاية دلوقتي مش عارف اتفرج على العربيه كويس ... لاسباب قدريه


بالنسبة لموضوع التقييمات انا ها احط اللينك .. عشان اللي عايز يقيم العربيه قبل الشراء

http://www.whatcar.com/car-review-readers.aspx?MA=41&RT=771&Submit1=GO

بالنسبه لحضرتك .... الف مبروك على العربيه وربنا يباركلك فيها و تفضل حلو في عينيك على طول

[hazem_khidr]

الف مبروك و ربنا يديك خير و يحميك من شرها يا رب:)
يا ريت تكلمنا عن نظام الصيانه و قطع الغيار

[إبراهيم.صادق]

شكرا على التقييم
ربنا يباركلك فيها ويرزقك خيرها ويكفيك شرها