تسقيط ( منقول للفائدة)

[MOHAMED ABD EL SHAFY]

تسقيط المواتير, كيف و لماذا و قانونيته " كتب عمرو جاما "
كتب عمرو جاما
السلام عليكم و رحمة الله و بركاته
قبل أن أبداء أحب ان انوه على ان هذا الموضوع لن يتضمن نصيحه على اي موتور أفضل لأي سياره, و لكنه سيتضمن معلومات تساعدك على فهم بعض أسس تسقيط المواتير فقط. و سأبدأ بشرح كل ما يلزم تسقيط المواتير على حلقات إن شاء الله. و سأراعي عدم الحشو الزائد في الموضوع.


ما معنى تسقيط؟

يقصد ب تسقيط الموتور هو تغيير الموتور الأصلي بآخر سواء جديد أو مستعمل "إستيراد". و يعاب على المواتير الإستيراد انها مستعمله و غير معلومة الحاله التي قد تكون سيئه أو جيدة جدا و سنشرح لاحقا كيفيه معرفة حالة الموتور الإستيراد.

موتور ولا عمره؟

موتور!! و لكل قاعدة شواذ, بس ليه موتور؟ لإن العمره علشان تبقى صح عايزه معرفه من الميكانيكي علشان يعرف يربط مسمار ايه قبل ايه و كده, و ده مبيحصلش. و كمان فيه مواتير التكنولوجيا فيها عاليه, الميكانيكي العادي ميفهمهاش و بيعك الدنيا. و أشهر مثال على كده السيارات الفورد. أسوء عمره في مصر تتعمل لمواتير الفورد, و البي إم و الهوندا. و في الآخر الموتور بيبقى 80% بس و ساعات أقل على فكره .
لماذا التسقيط؟
لحاجه الموتور القديم لعمره أو لتغيير الموتور بآخر أكبر من حيث السعة اللتريه.

كيف أعلم ان هذا الموتور بالتحديد يركب عندي؟

هناك أكثر من طريقة و لعل أسهلها هي سؤال من قام بهذا الموضوع من قبل سواء كان عن طريق المنتديات المتخصصه في ماركة السياره, أو سؤال من فعل ذلك من قبل شخصيا.

الطريقة الثانيه و هي سؤال متخصص (ميكانيكي) و هي أضمن طريقة بالنسبه لماركات العربيات المشهورة في مصر, ك ال بي إم و الهوندا و الجولف.....ألخ اما إذا كانت سياره من عدلوا عليها قليلين, فالحل الوحيد هو إما إذا كان نفس موديل السياره نزل عليه موتور بسعه آخرى فالأغلب انه حينزل بدون مشاكل, أو عن طريق السؤال كما ذكرنا سابقا.

مشاكل التسقيط

كثيرة و قليله, فهي كثيرة حينما يكون الموتور لم ينزل على نفس شاسيه السياره. و قليله حينما يكون الموتور نزل على نفس شاسيه السياره.


أمثله للمشاكل الشائعة في التسقيط
1- إختلاف قواعد الموتور
2- كبر حجم الموتور عن شاسيه السياره.
3- شاسيه السياره أضعف من ان يتحمل قوة الموتور الزائده

كل تلك المشاكل قابلة للحل (مفيش حاجه متتحلش لو معاك فلوس) عدا تغيير قواعد الموتور فهو غير مسموح به في المرور.

التعرف على حالة الموتور

المواتير نوعان, كاربيراتير و حقن وقود "إنجكشن" و متقلش للميكانيكي حقن علشان حيقولك إنجكشن يعني؟ فبلاش تحرج نفسك.

طريقة فحص الموتور الكاربيراتير
هي أسهل من الإنجكشن حيث أن الكاربيراتير يتم تجربته عند التاجر عكس الإنجكشن الذي يجب ان يكون على السياره ليتم تجربته. إذا ظهر عادم من الموتور دل ذلك على سوء حالته, و ان لم يخرج عادم فهو جيد, و هذا فحص مبدأي فقط حيث انه بعد تسقيط الموتور تتم تجربته على السياره و أمامك شهر للتجربه من حقك تبديل الموتور بآخر من عند نفس التاجر و بلا مقابل.

طريقة فحص الموتور الإنجكشن

فحص عيني فقط و يكون بفك شمعه من شمعات الإحتراق (بوجيه) فإذا وجد زيت دل ذلك على سوء حالته و العكس. تتبع نفس الطريقة مع الكاربيراتير أيضا.
الشكل الخارجي للموتور لا يوضح بالضرورة حالته, فمن السهل غسيل الموتور من الخارج

بعد تسقيط الموتور, التجربه.

بعد تسقيط الموتور تتم تجربته من خلال القياده و تجربه "سحب" الموتور و من خلال قياس كبس الموتور و يتم ذلك في بعض محطات البنزين و ليس كلها. و تكلفة قياس كبس الموتور تكون 50 جنيه شاملة قياس العادم. و يعطى التقرير معلومات عن نسبه العوادم المنبعثه و كبس البساتم و الحاله العامه للموتور كام %.

موقف المرور من تسقيط المواتير

لا يسمح بتغيير مكان أو عمل اي تعديل على اي قاعدة من قواعد المحرك الأصليه بجسم السياره.

لا يسمح بتركيب محرك لغير ماركة السياره. يعني مينفعش تسقط موتور ميتسوبيشي في هوندا. إلا إذا لم يتوفر محرك لتلك السياره. ك الرانجلر و السوزوكي الساموراي.....الخ

عدا ذلك فهو مسموح به حتى و إن كان سعته اللتريه أعلى من الموتور الأصلي. و لو حصل مشاكل فتح دماغك مع الراجل و حتبقى كل حاجه مسموح بيها إن شاء الله بس هو مش ممنوع عامة لإني سألت في المرور.

هل يعيب التسقيط العربيه عند البيع؟

لا.. و اه... على حسب حالة العربيه هي إلي بتحكم في الأول و الآخر. بمعنى, إذا كانت العربيه موديل 98 و مسقطلها موتور إستيراد من نفس سعه الموتور ده يعيب العربيه بالتأكيد. و لكل قاعده شواذ. فإذا كانم الموتور سعته أكبر فهذا يميز العربيه إذا كان معمول صح و ده بيتعرف لما العربيه بتترفع في البنزينه.

طيب فيه ايه مشاكل تانيه ممكن تقابلني في التسقيط و مدى تآثيرها على إمكانيه التسقيط؟

الدينامو!! في بعض الأحيان مكان الدينامو بيكون خلف الموتور و في بعض العربيات بيكون لازم يكون الدينامو من الأمام و المشكله دي بتتحل عادي و بيتعمل قاعده للدينامو بس بتكون مكلفه.
المارش: برضه ساعات بيكون في الخلف و دي ملهاش حل لو حوض العربيه مش حياخده يبقى ملهاش حل للآسف.


ما يلزم تغيره قبل التسقيط

الفرامل: أهم حاجه تتغير قبل التسقيط هي فرامل العربيه, علشان لو مثلا العربيه فيها موتور 1100 سي سي مينفعش نسقط موتور 1600 أو 2000 سي سي منغير تغيير الفرامل لإن الفرامل بتكون مصممه على انها توقف موتور 1100 مش 1600.
طيب ماهو ممكن حد يقول أنا كنت أيام ال 1100 بمشي على 100 و برضه أيام ال 1600 مش حمشي غير على 100
إلي بيقول كده ناسي أن عزم الموتور مهم جدا يعني عزم ال 1600 عالي و بيحتاج قوه أكبر لتوقيفه حتى لو على 10 كم. ليه لإن الموتور بيدي دفعه أعلى و أسرع و محتاج حاجه توقفه بنفس السرعه دي.

العفشه

برضه العفشه المصممه أنها تشيل موتور 1100 غير العفشه المصممه انها تشيل 1600. فلازم العفشه الأمامي على الأقل تتغير و دي بتتضمن المساعدين و السوسات و الفرامل طبعا.

ما يلزم تغيره مع الموتور


الكبالن

الكبالن لازم تتغير لو الفتيس حيتغير إنما لو هو هو نفس الفتيس أو الفتيس من نفس العائله فأنت مش محتاج تغير حاجه.

الكورونه

بالنسبه للعربيات الخلفي فبرضه بتحتاج تغيير في بعض العربيات يعني مثلا البي إم ال 316 ممكن تخليها بنفس الكرونه لو حتسقط موتور 2500 بس مش حتكون حلوة زي لو ركبت الكورونه إلي بتيجي مصممه للفتيس بتاع الموتور ال 2.5. حتكون حاميه على السرعات القليله و ضعيفه على السرعات العاليه. يعني تجميعها سريع بس بتفقده بسرعه و السرعه القصوى حتبقى أقل.

الكورونه بتيجي بعمود الكردان يعني لازم يكونوا زي بعض

حاجات لازم تيجي مع الموتور

لو كاربيراتير: يبقى لازم الموتور كامل بالكاربيراتير بتاعه.
لو إنجكشن يبقى الموتور ييجي كامل بحاجته و لو عليه طرمبه باور يتأكد أن المواسير كلها سليمه و التكييف بيجي على الموتور كومبريسور بس (كباس). و لازم الموتور ييجي بالضفيره و الكونترول و المشظ بتاعه و متفصلش ضفيرة عند الكهربائي لإن الأصلي غير إلي بتتعمل.

موتور بالفتيس ولا لا؟

ساعات الفتيس القديم ممكن يركب على نفس الموتور لو هو هو نفس الموتور أو لو الفتيس يركب لإنه من نفس عيلة الفتيس الجديد.
الأحسن ان الفتيس يتغير بنفس الفتيس إلي راكب على الموتور و فرق السعر بيكون هايف فالأحسن الموتور بفتيسه.

أودي فين الحاجات القديمه؟

سؤال بايخ جدا لإن فيه تجار في الحرفيين مبيرضوش ياخدوا الحاجات القديمه و ينقصوا سعر الموتور الجديد من القديم, و دي ميزه في التاجر مش عيب. ميزة لإنك بتضمن انك بتجيب منه حاجه إستيراد مش خلع. إجابه السؤال ده كلمه واحده الوكاله. و بياخد الموتور منك خرده فمبيجبش تمنه إطلاقا بس على الأقل خلصت منه .

ما يلزم تغيره بعد التسقيط

زيت الموتور و الفتيس لازم يتغيروا فورا, و أول زيت بتحطه ميعدش في العربيه أكتر من أسبوع و يتغير بواحد تاني و ده إلي بيعد في العربيه لحد ميعاد تغيير الزيت الطبيعي. و زيت الفتيس لاء بيتحط في الفتيس و مبيتغيرش زي زيت الموتور.
البوجيهات و الكاتينه و فلتر الزيت و البنزين و الهواء لازم يتغيروا فورا برضه. و لو الموتور كاربيراتير يبقى أبلاتين و كوندنسر لو الأسبيراتير مش إلكتروني.

أعتقد إني بكده أبقى غطيت كل حاجه خاصه بتسقيط المواتير ,

[Ahmed Hamdy]

موضوع جميل جدا جزاك الله خير ..

لكن عندى سؤال ..
لو لقيت ان الموتور عندى محتاج عمرة وقررت إنى أغيره بواحد تانى بس زيه بالظبط ..
محتاج أعمل ايه فى المرور ؟؟؟
هل لابد من تغيير رقم الموتور فى الرخصة ولا ايه بالظبط ؟؟

معلش اصلى معنديش فكرة أوى عن المواضبع دى ..

[MOHAMED ABD EL SHAFY]

اكيد طبعا بتروح تعمل اثبات ليه بورق الموتور وبتاخد معاك العربية عشان تعمل فحص لكن اى تفاصيل اخرى بعد كدا انا معرفهاش بصراحة يعنى هتدفع كام - هتطلع رخصة فى نفس اليوم ولا لا - ايه ورق الموتور المطلوب بالكامل و....الخ علمى علمك
ياريت حد يقولنا

[Goodle]

الف شكر يا باشا على المعلومة
وعلى المجهود

[el3awaam]

ربنا يباركلك عالمعلومات العظيمة دى
و نتمنى المزيد
و ليا رجاء .انا العربية عندى واقفة على تسقيط الموتور
و تغيير العفشة اللى تناسب الموتور.
هل تعرف ميكانيكى كويس يعملى التعديلات اللازمةلتسقيط الموتور
و يعالج المشاكل الناتجة عنه.
و ربنا يباركلك..

[mahamedaraby]

موضوع رائع ومفيد

جزاءك الله كل خير بس اسعار المواتير تعملها فى حدود كام

[MegaDeth]

كل تلك المشاكل قابلة للحل (مفيش حاجه متتحلش لو معاك فلوس) عدا تغيير قواعد الموتور فهو غير مسموح به في المرور.


عدا ذلك فهو مسموح به حتى و إن كان سعته اللتريه أعلى من الموتور الأصلي. و لو حصل مشاكل فتح دماغك مع الراجل و حتبقى كل حاجه مسموح بيها إن شاء الله بس هو مش ممنوع عامة لإني سألت في المرور.

,

طب انا عاوز اظبط فى الموضوع ده يعنى عاوز اغير نوع موتور العربيه اصلا
اعملها ازاى حتى بتفتيح المخ اللى بتقوله ؟
فيه واحد باين قاللى حات جواب من اداره المحارت و الهندسه بس ده برضه بيتعملازاى ولا ايه قصته ؟

[yuyu0000yuyu]

مشكور علي الموضوع الشديد ده

[osamaos20022]

طيب انا كنت عاوز اسقط ماكنة 1600على لانسر 98 كريستالة ممكن اعرف هل هحتاج برده تغيير الفرامل والعفشة الامامية مع الماكنة ولا لا مع العلم ان الماكنة هتركب على فتيس ما نيوال

[osamaos20022]

انا اسف ....نسيت اشكرك على الموضوع الشيق ده