حكايتي مع بنزين 80

[SHNORY]

السلام عليكم ورحمه الله وبركاته
امبارح كنت في رحله سفاري (اللي هي البحث عن البنزين ) وحصل اللي ححكيهولكم ده
الساعه 11 ونص بالليل قولت اطلع اتمشي شويه بالعربيه وقولت بالمره امون العربيه (اللمبه كانت بتنور علي المطبات شديده الانحدار)
اتصلت بواحد صاحبي كنت شايل عنده جركن كبير علشان قدامه بنزينه وهو عامل واجبات كتير معاهم قولتله ايه الكلام الجركن اخباره ايه
قالي للاسف المحطه بقالها 5 ايام مش بينزل فيها 80 قولتله ليه
قالي الحكومه منعته علشان السيوله المروريه من محطات وسط البلد قولتله يعني القرار ده ملهوش علاقه بالجركن (قولت يمكن علشان المنطقه سياحيه شكل الجيركن معجبهمش واجيبلهم كولمان كبير بداله )قالي لا دا تقريبا اتمنع من بنزينات وسط البلد قولتله والمدموع ماليه عيني وماله ياعم شوفلنا بيعه للجيركن بقي
واتوكلت علي الله ودورت العربيه وقولت اتفسح واتنقل وسط محطات البنزين
(كنت فاضي وعندي حاله ملل )
روحت اول بنزينتين لقيت مفيش طبعا
لقيت بنزينه من بعيد عليها طابور صغير (10عربيات بس) لما دخلت ملقيتش 80
برجع بضهري خبطت في سواق تاكسي فهلوي كان بيلف علشان شاف برضه نفس الطابور شرخلي الفانوس اللي ورا وطبقتله نص الرفر اللي قدام
قولت وماله اللي ييجي في الحديد مش مهم المهم انا سليم
طلعت ناحيه المرور واخيراااااااااااااااا لقيت بنزينه فيها 80
بس فيه مشكله صغيره
الطابور طالع من البنزينه ومعدي من جنب توكيل لادا وداخل جنب سور منطقه عسكريه ودا كل اللي شوفته علشان الباقي واقفين في الضلمه جوه ومش شايفهم
اتكلت علي الله وقولت الف وادخل اخر الطابور (4 كيلوا متر من الطرق المروريه السليمه و500 متر لو دخلتها رونج)
دخلت اخر الطابور وطبعا انا شايف الشارع اللي فيه البنزينه علي مرمي البصر بس مش شايف البنزينه نفسها
الكلام ده كانت الساعه 12 ونص (بعد منتصف الليل )
وبدات الحكايات
اول ما دخلت راح واحد قايل المفروض الملاكي ميمونش 80 وعدي الموضوع
الطابور كان حوالي 200 عربيه فيهم 8 ملاكي والباقي تاكسيات
السواقين مشاء الله عليهم جايبين كل مستلزمات الرحلات معاهم من اول شرايط ام كلثوم مرورا بالساندويتشات وحتي الكيوف من مخدرات وما يتبعها كان موجود
وكان فيه ترابط جميل جدا اللي عمال يفضي تانك البنزين علشان يملا جركن لواحد واللي عمال يغسل عربيات واللي نايم
المهم
وتسمع بقي التعليقات اللي تموت من الضحك
سواق تاكسي داخل ومعاه صاحبه جنيه راح واحد قايله ايه ده انت جايب واحد بس معاك فالتاني قاله لا الباقي جايين في اتوبيس ورا مننا
وكلمه من هنا وضحكه من هنا
وفييييييييييييييييييييييييييين وصلت وشوفت الاسفلت الساعه 3 الا ربع (الشارع اللي كنا واقفين فيه كان تراب)
وربنا كرمني بعد نص ساعه وشوفت مضخه البنزين من بعيد والساعه 4 الا ربع كان قدامي عربيتين
راح العمال اللي في المحطه قايلين حنريح المضخه ربع ساعه
واكتشفت ساعتها ان مكانش فيه غير نص مضخه بس هو اللي شغال (خرطوم واحد بس)
وربنا كرمني ومونت العربيه ومشيت من محطه البنزين الساعه 4 وربع فجرا وسط مئاذن اسكندريه وهو تكبر وتقول الله اكبر استعدادا لصلاه الفجر
هههههههههههههههههههههههههههههههههههههههههههههههه
والله يا جماعه دا اللي حصل معايا امبارح من الساعه 11 ونص لحد الساعه 4 ونص
وعلي فكره انصح كل واحد بيدور علي بنزين 80 ياخد عياله معاه علشان لو وحشوه
وياخد اكل وشرب كفايه
واي حاجه يتغطي بيها علشان لو نام وميقلقش انه يتسرق حتي في مكان مهجور لان حواليه نص الشعب واقف
وياخد سبراي للناموس علشان ممكن يجيلك انيميا من كتر الدم اللي حتفقده في معركتك مع الناموس
واهم حاجه يكون فاضي جدا وعنده حاله ملل رهيبه ويا ريت لو يكون عنده اكتئاب كمان علشان لما يتزنق الزنقه دي ويفك يخف من المرض
ومتروحش بالعربيه وهي لمبه البنزين منوره علشان ممكن يخلص منك اثناء الطابور وتزق العربيه
علي فكره دي بنزينه التعاون اللي بعد مرور محرم بيك في اسكندريه اللي علي الصحراوي
اتمني انك متملوش من الحكايه انا شفت انه يوم مسخره وضحكت فيه كتير برغم صعوبه الموقف وحيبت اني اشارككم الحكايه لان دي ححكيها لاحفادي واستاذنكم علشان السمسار جه علشان نويت ابيع العربيه وحشتري عجله بدالها او عربيه بحمار (اهو اي حاجه بياكلها وممكن تمونه من اقرب صندوق زباله جنب البيت )
والسلام ختام

[dr_abooody]

ههههههههههههههههههههههههههههههه

[Mohamed-Saoud]

ههههههههه
هم يبكي و هم يضحك صحيح هههههه

اللي عجبني ان بتوع التاكسي احتلوا محطات البنزين و عايزين يفرضوا حظر تجول كمان على الملاكي :)

[SHNORY]

المفروض مثلا يخصصوا محطه لل 80 ويخلوا فيها مضخه للملاكي والباقي للتاكسيات يشبعوا بيها
او انهم يمنعوا التاكسيات من انهم يحطوا 80 لانهم بيحسايبوا الزبون علي انهم بيحطوا بنزين طيارات وكده ولا كده هما برضه كسبانين

[islambana]

بتوع التاكسي فاكرين اللي راكبين ملاكي دول بيتاجروا في المخدرات اوبيزرعوا الفلوس مثلا اوبيلاقو الفلوس في الشارع مثلا

[thegoodhacker]

بتوع التاكسيات المفروض انهم ما يمونوش 80 خالص لانهم زودوا البنديرة علي اساس ان البنزين غلي يبقي المفروض يمونوا 90 مش يمونوا 80 و يغلسوا علي الموظفين الغلابة اللي جابوا عربيات ملاكي قديمة ترحمهم من قرف المواصلات.....

[mohamed2002]

فعلا موضوع البنزين دة بقي مشكلة والحكومة لاحياة لمن تنادي وبالاضافة ان السيد الفاضل اللواء عادل لبيب محافظ الاسكندرية ربنا يكرمه ,كلم وزير البترول وقرور زيادة الحصة من بنزين 80 لمحافظة الاسكندرية وبعد الزيادة الطوابير زادت اكتر !

[SHNORY]

بتوع التاكسيات المفروض انهم ما يمونوش 80 خالص لانهم زودوا البنديرة علي اساس ان البنزين غلي يبقي المفروض يمونوا 90 مش يمونوا 80 و يغلسوا علي الموظفين الغلابة اللي جابوا عربيات ملاكي قديمة ترحمهم من قرف المواصلات.....

يا سيدي حنقول نوصل لحل وسط
الملاكي يمون من وسط البلد والتاكسي يمون من بره البلد والحكومه تغلي البنديره من 60 قرش لجنيه وكده ولا كده محدش بيدفع بالعداد مش كفايه قارفينا بتزقينهم علينا وقله ادبهم وهما سايقين ودا مش طبعهم كلهم علشان الواحد ميظلمهمش
او بدل ما البنزينه مليانه مضخات علي الفاضي يعملوا واحده للملاكي ميمونش منها الاجره ولا ييجي جنبها

[mohamed2002]

طيب يا جماعة يا ريت كل يعرف بنزينة فيها 80 يتفضل يقولها بس فس الاسكندرية بس
في بنزينة مصر للبترول دي عند سينما المنتزة علي البحر
بنزينة امارات مصر ودي في المكس تقريبا ودي ممتازة
بنزينة التعاون اللي بعد استاد حرس الحدود
وكل واحد حيضيف بنزينة يا ريت يقتبس الاماكن اللي قالها الاعضاء السابقين

[Ah.Farid]

ممكن الحكومة تكون هاتنزل ال80 على البطاقة التموينية على اساس انة مدعم وكل واحد يصرف 5 لتر فى الشهر

[Ayman_Abdullah]

هههههههههههههه
الحمد لله انى بعت العربية من شهر مارس اللى فات وزى مايكون توقعاتى طلعت صح
كان الله فى عونك

[Noha.M]

يا خبر ابيض !!
ضحكتنى بجد موووت يعني !!

طالع رحلة عشان تحط بنزين يعني ؟! هيهيهيهيهيهي

[Migo123]

يا خبر ابيض !!
ضحكتنى بجد موووت يعني !!
طالع رحلة عشان تحط بنزين يعني ؟! هيهيهيهيهيهي

هم يضحك وهم يبكي
انا شفت الطابور ده بكل تفاصيله اللي انت حكيت عليها في القاهره في بنزينه في صلاح سالم بعد الفسطاط والطابور بيبتدي من مدخل حديقة الفسطاط لغايه البنزينه (حوالي 1.5-2 كيلو).... ساعتها مفهمتش الناس دي واقفه كده ليه

ربنا يكون في عون الناس دي
اكيد مش واقف الوقفه دي بمزاجه
الا لو كان الفرق بين سعر 80 و 90 هيمثل بالنسبه له قيمه كبيره
ربنا يغنيهم ويغنينا بالحلال ان شاء الله

[Noha.M]

الا لو كان الفرق بين سعر 80 و 90 هيمثل بالنسبه له قيمه كبيره
ربنا يغنيهم ويغنينا بالحلال ان شاء الله

فعلا والله

ربنا يصبرهم كمان :)

[mo7amed_omara]

طيب يا جماعة يا ريت كل يعرف بنزينة فيها 80 يتفضل يقولها بس فس الاسكندرية بس
في بنزينة مصر للبترول دي عند سينما المنتزة علي البحر
بنزينة امارات مصر ودي في المكس تقريبا ودي ممتازة
بنزينة التعاون اللي بعد استاد حرس الحدود
وكل واحد حيضيف بنزينة يا ريت يقتبس الاماكن اللي قالها الاعضاء السابقين

و فية كمان بنزينة مصر للبترول عند مدخل المعمورة الشاطى
و بنزينة موبيل فى طريق الاصلاح امام بوابة المعمورة الشاطى