الحمدلله كوكا رجعت بالسلامة

[Ahmed1987]

بسم الله الرحمن الرحيم

البداية كانت يوم 24/10/2012 لما صحيت الصبح ورايح الشغل لقيت العربية مش موجودة مكان ماكنت راكن وعربية تانية راكنة مكانها وازاز مكسور مرمى فى الارض طبعا صدمة وكان الواحد حاسس انه حلم ونفسه يصحى منه سألنا فى الشارع كله محدش شاف حاجة

اتجهنا عالقسم كان فيه حوالى 4 عربيات مسروقة من نفس المحيط وفين وفين عقبال ماخلصنا كنا فى القسم 8:30 الصبح ومشينا حوالى الساعة 12 الظهر طلعنا بعدها على مديرية الامن فى باب الخلق مكافحة سرقة السيارات عمله تعميم بالسرقة وادونا ورقة نوديها المرور عشان يحظرو الملف بتاع العربية وبصورة محضر السرقة طلعنا على شركة التأمين عشان نعمل اخطار بحادث السرقة

المهم الحمدلله ان اليوم ده خلص على خير

بعدها بإسبوع جالنا اتصال من واحد بيقول ان اسمه الأمين محمود وانهم لقو العربية فى طريق مصر اسكندرية والعربية هتكون موجودة فى قسم الدخيلة فى اسكندرية ,طبعا كنت انا فى الشغل فاتصلت بوالدى عشان يروح القسم يسأل عن الموضوع ده وبالفعل ده الى حصل راح القسم لقاهم معندهمش خبر بأن حاجة زى كده حصلت

كلمنا مأمور قسم الدخيلة مكانش عنده فكرة كمان راح اخد رقم الامين الى كلمنى وكلمه قله العربية مقفوشة فى كمين على الطريق وهتدخل قسم الدخيلة على الساعة 9 بالليل وصدقو القصة بتاعته

المهم البيه الامين راح مكلم والدى وقاله العربية مقفوش فيها مخدرات وسلاح ولو العربية اتسابت على كده هتدخل فى قضية وشغلانة ممكن تطول لفوق ال 6 شهور تكون العربية اتهلكت خالص عشان كده هما هيعملو محضرين محضر ضبط عربية مسروقة ومحضر ضبط للمخدرات والسلاح بس لازم نراضى الأمين الى هيكتب المحضر وعشان هما فى اسكندرية وممكن ناخد وقت عشان نوصل تكون القصة اتعرفت عشان كده ممكن نحوله رصيد ب 1500 جنيه وهو هيتصرف (عمرك شوفت سفالة أكتر من كده؟) وفكر ورد عليا بسرعة

الواحد ابتدى يقلق كلمنا مساعد مير الأمن فى اسكندرية قالى هات الرقم عشان يكلمه بعدها بشوية اتصل بينا وقالنا ده نصاب وجاب الرقم من على النت ومفيش حاجة من دي حصلت ولو اتصل تانى سيبك منه صدمه تانية طبعاً

حصلت الحكاية ديه مرة كمان وكان واحمد تاني بيقول ان اسمه الأمين عادل ونفس القصة بالظبط اختصرنا وكلمنا مديرية أمن اسكندرية اكدولنا انهم ملقوش العربية لسه (النصابين دول معندهمش ابتكار خالص)

يوم 13/01/2013 الساعة 2 الظهر اتصال من رقم غريب برد لقيت واحد بيقولى انت مبلغ عن عربية مسروقة قولتلو ايوة قالى نوعها ايه وايه نمرها حسيت انه واحد تانى بيشتغلنى عشان يطلع بمعلومات ينصب عليا بيها بس كملت معاه للآخر لقيته بيقولى ثوانى رئيس المباحث هيكلمك سألنى انت مسروق منك عربية سيراتو قولتلوايوه والمحضر معمول باسم كذا وادانى معلومات المحضر لحد ما اتأكدت قالى العربية موجودة عندنا فى قسم المرج تقدر تيجى عشان تعاين العربية وتتأكد منها

رحنا القسم على الساعة 8 كده ومجرد مدخلت القسم لقيت عربيات كتير مركونة قالولى كل دول جايين النهاردة قولتلو طب انا عربيتى سيراتو سودا قالى فيه واحده سودا مركونة جوة خالص لوحدها دخلت ابص جوه وفعلا كانت هيا العربية واقفة على رجليها والحمدلله مش مخبوطة متقلب منها شوية حاجات بس الحمدلله انها رجعت ودى صورتها لما رجعت




ودي تفاصيل الخبر
http://www2.youm7.com/News.asp?NewsID=910627#.UQFgvrrClms.facebook
اللهم لك الحمد والشكر

ولو فيه حد ضايعة منه حاجة يواظب على الدعاء ده وربنا هيكرمه

"اللهم يا هادى الضال وراد الضالة, أردد على ضالتى بعزتك وسلطانك فإنها من فضلك وعطائك"

[egyptiandiver]

الف مبروك... الف مبروك....

[Land_Cruiser]

الف مبروك على رجوع السياره يا فندم و ما تنساش يا فندم تزيد من عوامل الامان فيها عن طريق قفل دريكسيون و جهاز انذار محترم

[Ahmed_Ramadan]

ألف ألف ميروك ..... و الله و لا تعرفنى و لا أعرفك بس أنا فرحانلك جدا ..أمنها كويس بقى و وزع حاجة على الفقرا -بطاطاين أكل أى حاجة

[eng.m7md.ali]

الف مبروووووووووووووووووووووو وووووووووووووووووووووك

خلي بالك المرة اللي جاية وادبحلها حاجة

[Ahmed1987]

الله يبارك فيكو ياجماعة وان شاء الله ماحدش يشوف حاجة زى كده ابداً وفعلا مشكور على كلامك يا أحمد وبالنسبة لعوامل الأمان انا لو أطول أكهربها مش هتأخر ولو حد عنده خبرة فى المواضيع دي ياريت يفيدنى عشان فى التوكيل قالولى اى حاجة بتركب على ضفيرة الكهربا بتطلع العربية من الضمان وهما معندهمش غير زرار الفصل والانذار ومش عارف اخبارهم ايه
وان شاء الله انا ناوى فعلا اوزع حاجة وربنا يقدرنى
شاكر ليكو مرة تانية كلامكو الحلو

[احمد المصرى]

الف مبروك يا باشا

الف الف مبروك على رجوع كوكا

[MohammedAladel]

ألف مبروك

[mshmshm3]

الف الف مبروك حمدلله علي سلامتها