الكارينز زهقتني

**محمد كمال الب** · 19-02-2013 02:21 PM

السلام عليكم
انا معايا كارينز 2013 مانيوال مش عارف ليه العربية بحس انها علي طول بتحدف شمال يعني لو عاوز امشي في خط مستقيم لازم ابقي جايب الطارة يمين سنة مش عارف هل دا عادي و لا انا بيتهيالي ؟؟؟!!!

**mohamed_selim** · 19-02-2013 02:29 PM

ضغط الكاوتش بياثر قوى فى الموضوع ده ... ساعات بلاحظه و بلاقى عندى عجله مريحه شويه ... لما اظبطها الموضوع بيختفى

**AhmedNaeem** · 19-02-2013 02:50 PM

راجع ضغط الكاوتش
لو لسه الحدفه موجود يبقي ظبط زوايا
والله المستعان

**temo85** · 19-02-2013 03:31 PM

اولا الطريق اللى انت ماشي عليه مستوى ؟؟ ممكن يكون مايل
ثانيا راجع ضغط الكوتش
نصيحه بلاش لعب فى الزوايا ولا تظبيط ولا بتاع مفيش حاجه بترجع زى ما كانت و محدش فى مصر بيفهم فى تظبيط الزوايا يقلك كمبيوتر يقلك بتاع بلاش نصيحه

**mhf_77** · 19-02-2013 03:41 PM

المشاركة الأصلية كتبت بواسطة temo85

اولا الطريق اللى انت ماشي عليه مستوى ؟؟ ممكن يكون مايل
ثانيا راجع ضغط الكوتش
نصيحه بلاش لعب فى الزوايا ولا تظبيط ولا بتاع مفيش حاجه بترجع زى ما كانت و محدش فى مصر بيفهم فى تظبيط الزوايا يقلك كمبيوتر يقلك بتاع بلاش نصيحه

صح الكلام ده
اوعى تظبط زوايا دلوقت خالص العربيه زيره حرام عليك
وبالنسبه للحدفه يا اما الطريق مايل او ضغط الكوتش غير متساوى

**hi_nmr** · 19-02-2013 04:09 PM

المشاركة الأصلية كتبت بواسطة ahmednaeem

راجع ضغط الكاوتش
لو لسه الحدفه موجود يبقي ظبط زوايا
والله المستعان

+1111

**Mohamed.Muslim** · 19-02-2013 04:26 PM

انا برضه معايا كارينز 2013 هاى لاين من ساعة ماأخدتها من التوكيل وانا ملا حظ انى عشان امشى فى طريق مستقيم لازم طارة الدركسيون تكون يمين شوية , المهم روحت مركز صيانة العامرية قالولى دى عاوزة ضبط زوايا و طارة مع بعض ب 130 جم , سبتهم وكلمت مندوب المبيعات اللى شارى منه قالى فكك من التوكيل عشان غالى وروح fit&fix بتوع كاوتش بريجستون دول انضف ناس تعمل عندهم ضبط زوايا , وفعلا روحت الراجل قالى العجلة اليمين مرحلة شوية ضبطها وادانى ورقة الكمبيوتر ان الارقام كلها مضبوطة , طلعت أجرب العربية لقيتها تمام التمام الحمد لله , التكلفة كانت 70 جنيه , واضح ان دفعة الكارينزدى نازلة زواياها مش مضبوطة , نصيحة منى لو عندك مركزfit&fix فى دمنهور اعمل عندهم مفيش تعالى اسكندرية فاتحين فى لوران على البحر و فى شارع مصطفى كامل دول اللى فاهمين ومتعملش عند حد تانى عشان ميعكش ....... نسيت أأقولك ان عشان ضغط الكاوتش ده حاجة مهمة عشان كدة الراجل قبل مايضبط الزوايا بيضبط ضغط الكاوتش الاول , فانت اضبط ضغط الكاوتش عن واحد كويس وجرب لو لقيت العربية لسه مش مضبوطه يبقى روح ل fit&fix وربنا معاك

**Domestix007** · 20-02-2013 08:16 PM

أه والله حاسسها بس بأحاول أقنع نفسي انها مش موجودة .. أنا 2013 برضو :(

**hi_nmr** · 21-02-2013 12:21 PM

يا باشا في 9 فروع لـ fit&fix في اسكندرية لوحدها
ادخل هنا وشوف المكان اللي يناسبك
http://www.fitandfix.com/view/Showrooms.aspx

**hossam_elwani** · 22-02-2013 04:44 PM

المشاركة الأصلية كتبت بواسطة mohamed_selim

ضغط الكاوتش بياثر قوى فى الموضوع ده ... ساعات بلاحظه و بلاقى عندى عجله مريحه شويه ... لما اظبطها الموضوع بيختفى

كلام مزبوووووووط انا بعد ما زبطت الهوا عند بتاع الكاوتش الى دايما المقياس عندهم بيبقى مش تمام العربيه بقت بتحدف شمال

انا حشترى مقاس هوا ديجيتال من عند راديو شاك عشان اجيب من النهايه واريح دماغى ... ملحوظه عربيتى برضو زيرو