تست درايف لانسر 2

[Driver]

TEST DRIVE : LANCER 2007

1600CC 16V 122HP
SPORT EDITION AUTOMATIC
4000كم

في البداية انا اعتذر عن تأخير كتابة التجربة دي....ولكن بحاول ادي العربية دي حقها...و مظلمهاش...عربية محيرة جدا..
وهي بالمناسبة مع واحد قريبي من3 شهور وسقتها اكثر من 5 مرات...ودي النتيجة..

نظرة اولي:(راي شخصي)
افففف...همة مبيزهقوش؟؟ الشكل ده بقاله 100 سنة..هية الناس دول معندهمش افكار جديدة والا ايه؟؟ وقريبي قاللي:لأ ده الاكصدام الادماني غيروه....قلت لمما اشوف...ايه الزلومة دي...؟؟؟
جريمة ارتكبتها ميتسوبيشي في حق الانسر...عملوا بوز محترم للعربية....مين اللي فكر في البشاعة دي؟؟ بس لو ركزت
هتفهم المغزى من الحركة دي....البوز ده اممن حماية للفوانيس اللي قدام اكتر من الاول...لان اقل خبطة زمان قدام كانت بتأثر على الوش بسهولة والفوانيس برضه تلاقيها شرخت من اقل ترييحة...فكان ولابد من الزلومة (و مخبيش عليكم انها برضه وحشة)ولون العربية ساهم في اظهارها (اسود)...تحس انها واحد اهطل مدلدل شفاتيره و ماشي يريل :mrgreen:
من ورا فوانيس كريستال.....وهية هيه زي ماهية :!: :!: ..الصاج عادي... لاكوري ولا الماني...فتحة سقف ، أسبويلر خلفي ، مقابض نيكل ، كاسيت وCD Exchanger 6CDs جنوط 15” 2 Air Bags

القصد...ادخل جوة...هايل يا لانسرشكل الدريكسيون مبتكر مووت و شيك جدا...(والحمد لله مكانش فيها الخشب والكلام الفاضي ده لأنه بصراحة مبياكلش الا مع الBMW MERCEDES....كده)التابلوه مريح للعين جدا سهل و بسيط و ممكن تشوف كل حاجة فيه بدون متبرق او تبربش...ولا يوجد اي تعقيدات فنية تذكر...و الخامات جيدة جدا جدا..
مكان الكاسيت مفيهوش افتكاسات ولا لازم تعملوا كونسولتو علشان تركب واحد تاني...يتسم الطابع العام للسبارة (من الداخل)بالسهولة واليسر و عدم التعقيد...والاتساع ايضا...شنطة العربية مساحتها ظريفة..ولكنها مش الاوسع في فئتها..والكنبة اللي ورا تعاني من بعض الضيق...
العلو عن الارض متوسط واميل لانه يكون واطي سنة...

الاداء:
دور...صوت الموتور يعرفك تماما قدراته...فقررت اني ابص عليه قبل الرحلة...تقدر تتعرف على مكوناته بمجرد النظر..وان كنت اعيب عليه وجود اسلاك مكشوفة(ظاهرة) وان كان ده يسهل الصيانة و علاج الاعطال...
عزل الكابينة كويس لكن صوت الموتور محسوس نوعا ما(مش صداع و مش هادي قوي)..التكييف ممتاز فعلا و في 5 دقائق كنا متلجين..و مراوحه قوية جدا لدرجة ان الدرجة4 صوتها مزعج جدا...و غالبا هتكتفي ب2 او3 على الأكثر..و تاثيره على الموتور مش محسوس....

اجمل حاجة في العربية دي..الطلعات الرياضية اللي صعب تكون في اي عربية بالسعة دي وفي الفئة دي وكمان اوتوماتيك....و عندها القدرة (ركزوا معايا هنا وحيات ابوكو) على مواكبة اسلوب السائق في القيادة و التعود عليه بسرعة...و متحسسكش انه بتزهق من استعمالك للأوتوماتيك ابدا..وان كان وجود الSTEPTRONIC فيها كان هيشكل اضافة هايلة خاصة انها بتتمتع بمحرك جبار فعلا 122حصان..الا انها برضه ماشية بنظام دوس تلاقي..وقدرة برضه على العودة الي الاداء الهادىء الموفر-نوعا ما-للبنزين لمما العفريت اللي راكب على السواق ينصرف :mrgreen: :mrgreen:

اختبار السرعة كانت نتايجه جميلة...وصلت بسهولة لل200 مع ثبات جميل جدا و قدرة على المناورة حتى على السرعات العالية جدا...واظن ان الAERODYNAMICS (بالبلدي كده:تصميم جسم السيارة يخلي مقاومة الهوا في صالحها)هوة السبب في ده..و برضه الموتور اللي مش ممكن يخذلك حتى لو اتجننت عليه...

نيجي لعيب العربية....التعليق...(وهعمله في صورة معادلات)
عفشة رياضية=صيانة اقل+تحمل اكبر+احساس اكبر بالطريق(زلط و مطبات و روائع الطرق المصرية :mrgreen: )

واختلفت الاراء...انا مثلا بفضل الرياضية..علشان تستحمل و مش كل شوية ربط وارفع والكلام ده.....وناس تقولك الشوارع بتجيب صداع..ولازم حاجة كده زي الميجان...سحابة طايرة على الارض...وكل واحد حسب ذوقه...

نجحت في تجاوز 70% من مطبات المحروسة...والباقي ممكن نصنفه على انه اقرب للجبل :D

استهلاك البنزين:
بالنسبة لفئتها وانها اوتوماتيك...شايف انه اعلى من الكورولا شوية...بس مش بلاعة...و بيعتمد بالدرجة الاولى على طريقة القيادة (هادي والا ترللي :mrgreen: )
و لبساطة تصميم المحرك و عدم تعقيده بالتكنولوجيا...لا يوجد تقنية لتوفير الوقود (حلوة الوقود دي :mrgreen: )

قطع الغيار والصيانة:
متوافرة زي الرز...البلد كلها لانسر...وان كانت غالية بالنسبة لتمن العربية شوية....و مع تجربتي مع الانسر قبل كده بتلاقي كتير بيفهموا فيها و تقدر تلاقي حد يسعفك لو عطلت بيك (لاقدر الله)

نقطة ظريفة:
سواقتها سهلة و جميلة و ابعادها سهلة الحفظ....ومفيهاش تنفيخ كتير...واي اضافة ليها من بره تفرق في الشكل جامد (سهلة التروييش :mrgreen: )

نقطة غير ظريفة:
الباور بتاعها متغيرش من 10 سنين مثلا...ناشف جنب مثيلاتها..(وتقريبا ده علشان تكملة الطابع الرياضي)

اضف الى ذلك الانتشار المهول واعدادها اللي بقت اكتر من ال128 (مفيش اي نوع من التميز)

الخلاصة:
سيارة ممتازة...بسيطة بالمقارنة لسيارات اليوم...اداء رياضي جميل...ياباني...بصراحة.....اظن� �ا افضل قيمة مقابل السعر لسيارة في السوق المصرية.....لكن الشكل قديم شوية و موضوع لانسر2008 الشكل الجديد..يستحق الانتظار فعلا

[Driver]

122 حصان دي الخليجي سبورت

ما انا عارف يا جميل....تسلم ايدك

الباور يا زيزو كان كويس

مبقلش انه وحش....بس انشف من اليارس مثلا

[tahereyad]

الأخ Driver,

أحييك جدا علي وصفك الرائع للانسر و اسم Driver فعلا اسم علي مسمي,, علي فكره أنا باسوق العربيه دي من سنه و نص و معرفش أكتب كلمتين من اللي انت كتبتهم,,, بس حكاية انها أكتر من ال128 دي دايما علي لساني و تعباني نفسيا
انت ماتكلمتش عن وضع القياده الرياضيه DS و دا علي فكره جامد جدا و بيطلعك من عربيات فوق ال 2000 سي سي و ده عن تجربه و ممكن تغير منه و اليه وانت سايق علي أي سرعه لو العفريت حضر في أي وقت...

[mada121977]

الاخ الفاضل الاستاذ طاهر رياض معتقدش ان الاخ درايفر هايرد على حضرتك علشان هوا موقوف من زمان وبكذا اسم و اتضح فى الاخر ان كل التستات اللى عملها كان من من وحى الخيال

[Eng.Osama.Afifi]

الاخ الفاضل الاستاذ طاهر رياض معتقدش ان الاخ درايفر هايرد على حضرتك علشان هوا موقوف من زمان وبكذا اسم و اتضح فى الاخر ان كل التستات اللى عملها كان من من وحى الخيال

بس ده لا ينفي أن كلامه فيه شيء كبير من الصحة

[Sharky]

بس ده لا ينفي أن كلامه فيه شيء كبير من الصحة

ما هو كان بيجمعوا من أراء الناس و السمع لكنه لم يقم نهائيا بالتجربة الفعلية

[mohaismail]

بس صوت الموتور رخم اوى على فكرة العزل بتاعها وحش جدا