شراء ام عمرة موتور

[emadosman63]

صباح الخير ياجماعة اناعندى بيتلز 74 ومش عارف الأفضل شراء موتور جديد استيراد 1200 او1300cc او عمل عمرة للموتور الذى اتعمل له عمرة من قبل اكثر من مرة ولكم جزيل الشكر

[dr_3eshoo]

اشتري متور استيراد علشان تبقى مطمن

[mohamed ibiza]

استيراااااااد انت موتورك اتعمر كذا مرة قبل كده هات واحد تاني بحالة احسن و خلاص

[emadosman63]

شكرا على الرد بس منين اجيب لموتور وسعره كام

[PASST2000]

شكرا على الرد بس منين اجيب لموتور وسعره كام

نفس السؤال ل جولف 2 1800

[hotboja]

اكيد من بورسعيد بس لزم يكون معاك ميكانيكى كويس بس المشوار دة هيكلفك للميكانيى لوحد 200 جنية

و الموتور سعرة من اول 2500 وانت طالع
الاسعار كل يوم فى الطلع خصوصا الموتير

وشكرا
والله اعلم

[emadosman63]

اكيد من بورسعيد بس لزم يكون معاك ميكانيكى كويس بس المشوار دة هيكلفك للميكانيى لوحد 200 جنية

و الموتور سعرة من اول 2500 وانت طالع
الاسعار كل يوم فى الطلع خصوصا الموتير

وشكرا
والله اعلم

شكرا ياباشا على الرد ولكن كنت اريد معلومات تفصيلية اكثر ولكن الغريب ان السيارة موجودة بكثرة ولكن الردود بشأنها قليلة جدا مش عارف ايه السبب

[mostaf_aly]

بالنسبة للموتور الاستيراد في ناس بتجيبه من القاهرة عادي خصوصا في فيصل والهرم في ناس بتوع فولكس كتير.
ودا اكيد حيكون افضل حتى لو أغلى شوية علشان بيبقى تحت التجربة.

[ihab]

لو موتورك ما اتفتحش قبل كده يبقى تعمر احسن طبعا و بكده حاتبقى مطمئن و عارف مشاكله ايه و اتحلت ازاى بعكس الاستيراد عمره ما حايبقى زى موتور متعمر كويس
و اعتقد تكلفة العمرة مش حاتقل عن 3000 جنيه

[kroma81]

انا عربيتى موديل 1972 الماكينه اصلها بترزع
الاحسن اشتريلها موتور ولا اعملها عمره ولو هشترى موتور اشتريه منين القاهره ولا بور سعيد احسن الموتور بتاعى عمل كذا عمره قبل كده اخرها كان من سنه ارجوكم الرد سريعا

[ابوهاشم]

ممكن تكتب الموضوع تانى بخط صغير اوضح علشان انا كده مافهمتش حاجات كتير

[ahmed2y]

السلام عاليكم

بالنسبة لسوال الاستاذ emadosman63 و والاستاذ kroma81 عن شراء موتور جديد ولا عمل عمرة للموتور فاظن شراء موتور استيراد افضل ودة عشان من الواضح من كلاموكو انكو عملتو عمرات كتير للموتور فخلاص عمرة ما هيرجع تانى لانى اظن خرط الماتوروالبلوك والحاجات دى بتبقى مرتين اوتلاتة والربعة تشترى استيراد وخصوصا الاستاذ kroma81 الى عمل عمرة من سنة والفيصل فى الموضوع بردو المكانيكى ممكن يكون شايف ان الموتور يستاهل يتعملو عمرة ويكون كلامة صح ويا ريت تقوللنا اسماء الميكانيكية الى بتتعاملو معاهم لان الشباب هنا فى المنتدى عندهم فكرة تقريبا عن كل مكانكية البيتلز وممكن يفيدكو فى المواضيع دى وربنا يوفئكم

[ابوهاشم]

استاذ اكرم انا وصلتنى رسالتك على الخاص ورديت عليها وهرد هنا كمان
علشان نستفيد من باقى الاراء
معلش قدر الله وماشاء فعل والحمد لله انك بخير

طبعا مجرد كلام الميكانيكى فى التليفون لايعبر عن واقع مع العلم ان اكيد كلامه اقرب للصح

بس طبعا الافضل انك تروح لكام واحد يشوفها بنفسه وتشوف رأيه ايه

بالنسبه للسؤال انك تشترى موتور استيراد ولا تعمل عمره

طالما ان البلوكه بتاعة الموتور سليمه اللى هى صندوق الموتور نفسه

كده يبقى الافضل طبعا انك تعمل عمره عند واحد كويس وشاطر وده احسن بكتير من الشراء

لانك لما تشترى موتور استيراد بيبقى انت وحظك وممكن يكون هو كمان عاوز عمره

وانا ارشحلك ميكانيكى اسمه عزب فى جسر السويس خلف حديقة بدربعد المزلقان

انا ماتعاملتش معاه بنفسى لكن ليا صديق لسه معمر عنده قريب وبسم الله ماشاء الله عليها بعد العمره كأن

الموتور زيرو بجد والله

كمان فى معلومه مهمه ان العمره 90% خراط مش ميكانيكى بس طبعا لما نختار ميكانيكى كويس

يبقى هو اكيد بيتعامل مع خراط كويس وهيقفل الموتور كويس

وقدر الله وماشاء فعل وربنا يوفقك وترجع عربيتك احسن من ماكانت

[ahit]

السلام عليكم

الفيصل فى العمرة أو الشراء هو راى الميكانيكى الأمين إن الماتور مش هايتعمر لأنه ليه أربع خرطات فقط تقريباً ( 010 - 020 - 030 - 040 ) .
و طبعاً الماتور الإستيراد زى البطيخة المقفولة و إنت و حظك و بيكون مع التجربة
و الميكانيكى اللى فاهم كويس و الأمين ممكن يوقعلك ماتور حالته جيدة جداً إن شاء الله
و كلام هاشم مظبوط جداً و انا بقول إن العمره 80% خراط و 10% قطع غيار سليمة و 5% ميكانيكة و 5% تليين مظبوط
و ربنا يوفقنا جميعاً للخير

[ahit]

ممكن تكتب الموضوع تانى بخط صغير اوضح علشان انا كده مافهمتش حاجات كتير

الأخ kroma81 بيقول إن عربيته موديل 72 و الماتور بيرزع و إن ماتوره إتعمله عمره كذا مره آخرها السنة اللى فاتت و هو بيسأل يشترى ماتور إستيراد ولا يعمر