استفسار عن مشكلة في الفتيس (صعوبة في النقلة)

[tamera]

السلام عليكم
عندي مشكلة في الفتيس انه بينقل بصعوية يعني بيدخل في مكان النقلة بصعوبة وبعد كذا محاولة او اني انقل نقلة تانية وبعدين ارجع للنقلة اللي انا عايزها - الكلام دا طبعا وانا واقف مكاني - يعني لما اكون عايز انقل مارشيدير او انقل على الاول قبل التحرك
ووانا ماشي بالعربية بحس ان النقلة مبتكونش ناعمة كأنها بتيجي على مرحلتين او بتحك في حاجة كدا معرفش هل هذا مايطلق عليه (الفتيس بيعض ) ولا ايه!!!
ولما رحت التوكيل قالولي اني محتاج اغير قاعدة الفتيس امامية ومحتاج تغيير طقم الدبرياج بس اللي فيها ممكن يقعدوا شوية..
..
السؤال دلوقتي علشان احل المشكلة اللي في الفتيس هل يكفي تغيير قاعدة الفتيس ولا لازم طقم الدبرياج معاها؟
..
العربية سيراتو 2006
مع جزيل الشكر لكل من يتفضل بالرد

[bee]

بص يا باشا
المفروض متستناش عليه طالما وصل لصعوبة في النقل .. عشان تحافظ عليه من التآكل
ولو ان موضوع القاعده مع طقم دبرياج اشك الاتنين سوا

عشان كده رأيي تغير طقم دبرياج الاول .. ولو المشكلة اتحلت خلاص وكده كده هتستفاد بعدين بالطقم القديم لو كان مش متآكل اوى ..

وسيب موضوع القاعده ده للاخر

[tamera]

بص يا باشا
المفروض متستناش عليه طالما وصل لصعوبة في النقل .. عشان تحافظ عليه من التآكل
ولو ان موضوع القاعده مع طقم دبرياج اشك الاتنين سوا

عشان كده رأيي تغير طقم دبرياج الاول .. ولو المشكلة اتحلت خلاص وكده كده هتستفاد بعدين بالطقم القديم لو كان مش متآكل اوى ..

وسيب موضوع القاعده ده للاخر

أشكرك على النصيحة
بس انا مش فاهم استفيد بالقديم في ايه؟ يعني ارجع استعمله تاني؟

[bee]

الي اقصده ان ساعات في التوكيل بيهولوا عشان يغيروا وبس
وممكن الي يطلع من العربية يكون نص عمر
فحرام يترمي ويتعان اسبير
لكن لو غيرت قاعده هتعمل ايه بالقديمة هي ما شاء الله مش بتبوظ بسهولة
لكن طقم الدبرياج مستهلك
معايا ؟
تحت امرك

[tamera]

الي اقصده ان ساعات في التوكيل بيهولوا عشان يغيروا وبس
وممكن الي يطلع من العربية يكون نص عمر
فحرام يترمي ويتعان اسبير
لكن لو غيرت قاعده هتعمل ايه بالقديمة هي ما شاء الله مش بتبوظ بسهولة
لكن طقم الدبرياج مستهلك
معايا ؟
تحت امرك

معاك يا باشا
يعني انا لو غيرت القاعدة لوحدها المشكلة مش هاتتحل
انا فكرت اغيرها لوحدها الاول واصبر شوية على طقم الدبرياج لانها ارخص بكتير من الطقم
بس ان شاء الله اخد بنصيحتك
مشكور على سرعة الرد

[tamera]

ايه اسباب تلف طقم الدبرياج

لو امكن ياريت نعرف ايه الاسباب اللي بتؤدي لتلف طقم الدبرياج بسرعة علشان نتجنبها

[bee]

أولا يا باشا متحملش رجلك على الدبرياج كتير
بمعنى انك يادوب تلقط الغيار وتشيل رجلك
يعني م الاخر متستمعلش الدبرياج الا عند الضرورة والنقل فقط لا غير حتى متسندش عليه برجلك بعد النقلة

ثانيا لو حضرتك من هواة الامريكاني والحركات .. ده بياكل الاسطوانة بسرعة
والاهم من كل ده خليهم يظبطوا الدبرياج يلقط من تحت اوى عشان بيبقى سلس في النقل وميحملش بزيادة وبالتالي يعيش اكتر ..

تحياتي

[tamera]

والاهم من كل ده خليهم يظبطوا الدبرياج يلقط من تحت اوى عشان بيبقى سلس في النقل وميحملش بزيادة وبالتالي يعيش اكتر ..
تحياتي

مش من هواة الامريكاني ولا حاجة انا للاسف شاريها كدا :(
بس انا مش فاهم النقطة اللي بتقول عليها دي !!
يعني النقلة مش هاتتم غير لو وصلت لاخر مشوار الدبرياج ولا ايه؟
ولا انا اقولهم يظبطوه كدا وخلاص وهما هايفهموا ؟
اشكرك على تعاونك :)

[tamera]

معلش ليا طلب كمان
لو حد يعرف ميكانيكي كويس اروح له يشوف لي الموضوع يمكن تكون حاجة ابسط من تغيير طقم الدبرياج بالكامل
وجزاكم الله خيرا

[bee]

انا قصدي يا باشا مكان فصل الدبرياج
بمعنى لما بتدوس دبرياج وبتدي نقلة بتزود بنزين وترفع سنة سنة دبرياج لحد ما توصل لمكان بيفصل فيه الدبرياج .. انا الي اقصده يظبطلك الدبرياج يفصل من تحت يعني يكون واطي .. وصلت :)
تحت امرك بس والله انا معرفش في القاهره حد كويس لاني من بورسعيد :)
باقي الاعضاء هينصحوك بحد كويس
بس متقلقش خير باذن الله

[FLYINGPEUGEOT]

قبل ماتغير طقم وتعمل......اعمل 3 حاجات
عشان انا حاسس انه مش عيب ديسك

1-اكشف على المعلقه
2-عللى الدرياج شويه من الريجلاش بتاع الفورش
3-غير زيت الفتيس حتى لو لسه مغيره من قريب

حاجات بسيطه ومش هتكلفك حاجه
اعملها الاول وشوف

[tamera]

طب بقول لحضراتكم ايه
التوكيل بيقولي طقم الدبرياج ب 825ج
وسألت في محل برة بيقولي طقم الدبرياج ب 450 كوري
أغيره بالكوري دا وخلاص ولازم بتاع التوكيل
العربية سيراتو 2006

[bee]

وهو الي جوا التوكيل نوعه وصناعته ايه اصلا ؟؟؟

[tamera]

وهو الي جوا التوكيل نوعه وصناعته ايه اصلا ؟؟؟

اللي في التوكيل اكيد كوري بس نوعه ايه معرفش اكيد بتاع كيا وهيونداي
بس اللي بره التوكيل دا اكيد نوع تاني لانه مش معقول نفس النوع ويكون بينهم الفرق دا في السعر

[tamera]

السلام عليكم
أنا شاكر جدا لكل الاخوة الاعضاء اللي تفضلوا بالمشاركة معي
واحب اعرفكم اني الحمدلله غيرت طقم الدبرياج ..
جبت طقم Valeo ب 520ج من عند نافع
بالنسبة للطقم القديم اللي كان متبهدل اوي البلية بس انا حاسس ان الديسك والاسطوانه شكلهم معقول .. قدر الله وماشاء فعل
أولا: هذه المعلومات لابد منها:
1- العربية سيراتو 2006
2- الدبرياج مش بسلك ولكن ماستر
3- زيت الفتيس متغير ومكملش 800 كم

بداية اعلق على كلام الاخ الفاضل

قبل ماتغير طقم وتعمل......اعمل 3 حاجات
عشان انا حاسس انه مش عيب ديسك

1-اكشف على المعلقه
2-عللى الدرياج شويه من الريجلاش بتاع الفورش
3-غير زيت الفتيس حتى لو لسه مغيره من قريب

حاجات بسيطه ومش هتكلفك حاجه
اعملها الاول وشوف

1- الميكانيكي قالي مفيهاش معلقة
2- زي ماقلت مافيش سلك ولكن ماستر ولذلك الميكانيكي قالي الدبرياج ملوش غير ظبطة واحدة
3- زيت الفتيس مكملش 800 كم أغيره برضه ولا ايه؟

ثانيا: الاستفسارات او المشاكل التي تواجهني وارجو من الزملاء الافادة
بعد تغيير الطقم السحب تحسن بفضل الله ولكن وجدت ان الفتيس مازال به صعوبة في النقل بمعنى ان النقلات ليست ناعمة اوي.. فالميكانيكي قالي استنى عليه شوية لحد مايطبع وفعلا بعد يوم اويومين الفتيس بقى سلس في النقلات
ولكن بعد فترة قصيرة ظهرت مشكلة ان نقلة المارشيدير او الاول مبتجيش احيانا (مبتجيش خالص غير لما اغير النقلة وبعدين ارجع لها)
فرحت للميكانيكي قالي دي مشكلة ماستر وعايزين نغيره .. المهم بص عليه وقالي مفيش فيه مشاكل خالص! بس قالي هاسحب منه الهوا .. وحصل
المهم النقلات بقت كلها تيجي الحمدلله بس الفتيس مبقاش سلس في النقلات تقريبا بقى بيعض أو بمعنى ادق وانا بنقل النقلة بحس ان عصاية الفتيس بتحك في حاجة
ياترى حد يعرف حل للمشكلة دي؟
وهل ينفع مع وجود الماستر اني اخلي الدبرياج يفصل من تحت اوي؟
ولكم جزيل الشكر وكل عام انتم بخير