تكييف 128

[mig44n]

انا عارف ان ناس كتير هتقول يوووووووووووه مقولنا مينفعش بقى عربياتكو دى ارموها فى الزباله ازاى يعنى ال 128 تبقى مكيفة وفيها هواء ساقع ده اكيد من رابع المستحيلات....
ليه لا؟؟؟؟؟
1-العربية مبتنزلش مجهزة لتركيب التكييف
2-الموتور التكنولوجى بتاعته قديمة !!!!!!!
3-العربية مش هتستحمل وهتتعب نفسيا
طيب بالراحه كده التكييف اهم حاجه فيه
1-الكومبرسور لانه قلب التكييف وهو الى بيضخ الفريون يعنى هو اهم حاجه وهو الى بيحمل على الموتور.....
طيب مينفعش تركب تكييف لان الموتور مثلا اقل حاجه الى هو 1100 سىسى قديم وعمره 20 سنة!!!!!
طيب احنا مالنا ومال 20 ولا 1000 سنة اهم حاجة الموتور كام حصان وعزمه قد ايه حاله الموتور مش هتفرق طالما الموتور لسة بيخرج نفس القوة بتاعته لما كان زيرو الفرق الوحيد ان الموتور القديم فيه حجات باظطت او بتبدى تبوظ بتاثر عليه هو داخلى بمعنى استهلاك ازيد للزيت او البنزين صوت الموتور يعلى او تحس فعلا بفقد فى قدرة المحرك.....
يعنى طالما الموتور نفس العزم والهورس باور لسه فيه يبقى خلاص....
وبعدين ايه الفرق بين موتور انجيكشن وموتور كربراتير طالما الاتنين نفس القدرة الحصانية والعزم؟؟؟!!!
طيب بالراحه كده تانى العربية الفيات 128 فيها بلوك موتور قوى جدا جدا ويخدوه منها ويركبوه لعربيات تانية هتشارك فى راليات او هتستخدم فى سباقات نفس الكلام لوش السلندر الفيات 128 ممكن تمشى من غير زيت!!....
كل مواتير الفيات مبنية على موتور 128 والفرق بس تكبير السعة اللترية وتغيير نظام الحقن سواء كربراتير او انجيكشن.....

2-العربيات الى فى قدرة الفيات 128 واقل منها كمان وراكبلها تكييف:-
1-السوزوكى ماروتى 800 سىسى 3 سلندر
2-الفيات اونو 1000 سى سى
3-الهيونداى اتوس مش فاكر موتورها كام
4-الدايو ماتيز ومش فاكر موتورها كام


3-الكوندنسر وده عامل زى الريداتير ومكانه موجود قدام الريداتير بتاع 128
4-الخراطيم بتاعت التكييف مفيش مشكله عندك مساحة كبيرة جدا فى الحوض
5-الفلتر وصغير جدا وسهل وضعه فى اى مكان
6-الكويل بتاع التبريد هيتركب فى علبه المروحة بتاعت ال128 الاصلية الى بتيجى بيها والى فيها مروحه....

الكمبرسور هيتعمله قواعد سهل جدا وتوصيل كهرباء للكومبرسور وتركيب الثرموستات سهل جدا......
طيب ايه المشكلة بقى؟؟؟؟؟؟؟
السخونية وهتتحل لانك هتخلى مروحةى الريداتير شغاله علطول طول مانت مشغل التكييف....
العزم طبعا هيقل بس مش مشكلة العزم يقل ولا تسيح فى الحر؟؟؟......
طيب ياريت حد يقول ايه المشاكل الى ممكن تقابل الواحد لو حب يركب تكييف....

وعلى العموم ياجماعه على الصيف الجاى هكون مركب تكييف بأذن الله سواء وافقتو على الفكرة او موافقتوش اصل انا بحب المغامرة ودايما المغامرة بتجيب نتايج كويسة وبتتعلم حاجة...

سورى الموضوع طويل وانا اصلا مرضيتش اطول عليكو وياريت الكل يشارك ويقول رايه بموضوعية مش بكلام استهتار وتريقة خصوصا ان التكييف بقى ضرورى فى جو الصيف الى بيزيد كل سنة ومحدش يقولى بيع وهات مكيف لان اكيد الفلوس هتبقى مشكلة ومحدش يقولى زيرو والكلام ده لان على رايىء المثل على قد لحافك مد رجليك وانا رجلى طلعت منا الاحاف.....

[HATEMHANY]

انت نسيت حاجه مهمه

عزل الصالون

العربيه مش مجهزه بصالون عازل للحراره يعنى الببان و الشبابيك و خلف الطابلوه كل ده بينفد هواء لداخل الصالون ولا يمكن تصلحه

[mig44n]

على فكرة العزل بينك وبين المحرك لو العربية متلعبش فى اللباد الحرارى بتاعها او الجوانات الجلد الى بتقفل المنافذ بينك وبين حوض الموتور.....
ساعتها هيبقى العزل مناسب جدا جدا.....ولو عاوز تعرف ان عزلها حلو ولا لا اقفل العربية والزجاج كله ومش هتسمع صوت وفى نفس الوقت درجة الحرارة داخل السيارة هتفضل محتفظه بنفس الدرجة.....
وبعدين فى فرق بين عزل الصوت وعزل الحرارة وعزل الهواء رغم انهم بيصبوا فى اتجاه واحد الهواء متصل بالصوت متصل بالحرارة بسش اهم حاجة عندك هى عزل الحرارة......
انت عندك اهم حاجة ميدخلكش هواء سخن من الموتور لان كده ساعتها اداء التكييف هيتاثر.....
العربية ال 128 عزلها فى الصالون حلو......
وبعدين شبابيك عازله للحرارة حلها فى استيكر بيمنع حرارة الشمس وبيدخل الضوء.....
البيبان مش هتحتاج عزل لان العربيات الى بيبقى فى بيبنها عزل بتبقى علشان الصوت....
وبعدين لا البيبان بتنفد هواء ولا الشبابيك فى ال128....
مفيش غير العزل بينك وبين الموتور وسهل تعمله هو اصلا معمول بس من كتر اللعب فى العربية من الصنايعية بوظوه....

[ahmed1981]

تركيب التكييف في ال 128 ليس من المستحيلات
بل هو ممكن بل وموجود

وأنا رأيت أحد السيارات ال 128 سنة 2000 تقريباً في معرض القاهرة الدولي بأرض المعارض تباعغ زيرو بتكييف من الشركة
ولكن عندما سألنا المسؤول قال إنه لنسخة العرض فقط

الخلاصة أنه أمر ممكن

ولكن السؤال هو ما مدى جدواه
وهل سيكون مؤثر أم سيكون كأنه منظر فقط
لقد جربت تكييف مركب للادا 2107 1600 CC والتكييف ساندن ياباني والسيارة لسة كسر زيرو
ولكن أحسست أنه إكسسوار غير مؤثر
وتبريده ضعيف جداً

فالمقصود أنه لابد أن نتأكد من أحد المجربين الفعليين لذلك الإختراع هل هو مجدي أم مكلف بدون جدوى ؟؟؟

[mig44n]

كلام جميل جدا جدا.....
فعلا هل هيكون فى جدوى من تركيبه ولا وجع دماغ وصرف مصاريف على الفاضى؟؟!

فالمقصود أنه لابد أن نتأكد من أحد المجربين الفعليين لذلك الإختراع هل هو مجدي أم مكلف بدون جدوى ؟؟؟

باذن الله اكون اول من جرب وباذن الله تكون تجربة مجدية ومفيدة للكل.....

وعموما من كلامك عن الادا...هقول انه فيه شروط لازم تتبعها علشان تحصل على احسن النتائج من نظام التكييف الى متركب فى العربية....
يعنى حجم كومبرسور مناسب حجم كوندنسر مناسب وحجم كويل مناسب...واهم حاجة التاكد من عمل الكوندنسر بشكل كامل هو والكويل لانهم اكتر حاجة بتقلل من كفائة التبريد....

[mohamed2002]

طيب معلش ما تفكر تبيع ال 128 وتجيب حاجة مكيفة اريح لانك حتصرف كتير في حوار التكييف دة ,مجرد رائ

[mig44n]

مين قال انى هصرف كتير فى حورا التكييف!!!
انا هجيب حاجة التكييف مستعملة....
وبعدين اول عربية مكيفة هى الريجاتا وهتلاقيها مش هتقل عن 27000 جنية....
انا عارف انه كل واحد ودماغه فى ناس مبتحبش اللف والدوران وبتحب الحاجة تبقى فبريقة.....
وانا عارف ان الموضوع ده هواجه فيه اعتراضات كتير بس ربنا يسهل....

[mohamed2002]

اة بس برضة انت بتتلكم في انك ناوي تعمل حاجة جديدة تكييف في 128 ,حتحتاج تظبط قواعد للكمبروسور ,تظبط الكهرباء ,تشوف عزل العربية ,طبعا وانت ماشي السحب مش حيكون مقنع مع التكييف ,انا مش بحبطك بس انا بوضح لك الدنيا حتمشي معاك ازي قبل ما تدخل في الموضوع ,نتمني لك النجاح والتوفيق ,ننتظر النتيجة قريبا وباذن الله تكون ايجابية

[mig44n]

باذن الله تكون النتيجة ايجابية وشكرا لنصايحك.....
وعموما انا مش هبتدى فى موضوع التكييف دلوقتى يعنى باذن الله على الصيف الى جاى يكون ركب يعنى هشترى الحاجه واركبها فى الشتاء...
وبعدين انا مش هشترى الحاجه مرة واحده..لا اناهجيب حاجه حاجه وكل لما اجيب حاجه هركبها على طول لحد لما تبقى كل حاجه فى مكانه بعد كده نبدا التوصيل والتظبيط....

[aliabutaleb]

الأخ الكريم mig44n
انا مش داخل أتكلم في أمور فنية
انا داخل أبدي إعجابي الشديد بحماسك وبادعيلك من كل قلبي ربنا يوفقك يارب