أشتريت قرطبه 2008 - وده المختصر المفيد !!

[XPLod]

السلام عليكم ورمضان كريم

الحمد لله أستلمت قرطبه 2008 يوم الخميس وهقولكم مواصفاتها وبعد كده عندى كام سؤال لأصحاب القرطبات ..

السياره قرطبه 2008 توكيل

اللون نبيتى

المواصفات: كامله مانيوال

1400 سى سى - 85 حصان

4 زجاج كهرباء - 2 مرايات كهرباء - 2 أيرباج - تكييف بكر - سى دى Audio - التحكم فى شدة أضائة التابلوه - جنوط 15 حديد و4 طاصات - التحكم فى الدركسيون بالتحريك الى اعلى والى اسفل والى الأمام والى الخلف - باور ستيرنج - سنتر لوك - مفتاح مشفر - الشنطه كبيره جداً جداً جداً بشكل غريب مش عارف عملوها أزاى.

السعر: 105900 جنيه مصرى.

الضمان: سنتين بدون حد أقصى للكيلو متر.

دى مواصفات العربيه بس الحلو ميكملش فى شوية حاجات بسيطه ناقصه بس لو كانت موجوده كانت تبقى ممتازه زى مثلا :

لا يمكن فتح الشنطه من الداخل.

لا يمكن فتح تانك البنزين من الداخل.

لا يوجد فرامل ABS.

السى دى لا يدعم أم بى ثرى.

لا يوجد وحدات رفع للزجاج مع غلق السنتر.

ده رأيى فى العربيه:

العربيه موتور وعفشه المانى من انتاج شركة فولكس وده هيبان أول متفتح كبوت العربيه فى كل مكان هتلاقى شعار فولكس على الموتور وعلى الصاج وعلى الخراطيم وعلى البطاريه وعلى الكنترول يونت حتى هتشوف الشعار على المسامير.

الموتور صوته جميل جدا بحب أسحب بيها وشد عشان اسمع زئيره , غير كده صوته مش بسمعه وانا واقف أو لو ماشى عادى مش بجرى بيها.

العربيه سحبها ممتاز جدا وبتجرى جامد وبشد بيها مع عربيات كتير وأتزانها ممتاز ماشاء الله انا جبت بيها 130 على المحور ولا كنت حاسس بحاجه وبصراحه خفت مكملتش بيها بعد 130 .

التكييف ثلاجه يعنى مش هتستحمل تجيبه على أكتر من 2 لو جبته على 3 ممكن تتلج اما بقى لو جبته على 4 ممكن يجبلك التهاب رئوى ( بعد الشر عليكم بهزر :) ).

السحب طبعاً مع تشغيل التكييف بيقل شويه.

العفشه فى المطبات بتكون ناشفه شويه وده سؤالى لأصحاب القرطبات وأهل الخبره هل ده طبيعى ولا ايه ؟؟؟ يعنى أنا مش بحس بالمطب بس بسمع صوته بيخبط جامد لو على سرعه ده عادى ولا ايه ؟؟؟

بس فى المجمل انا مبسوط من العربيه كسعر واداء وقوه وتميز .

قطع الغيار موجوده ومتوفره فى التوكيل بأسعار معقوله بالمقارنه مثلا بالألنترا والانسر , يعنى الفانوس الأمامى للقرطبه ب 800 جنيه أما فى الالنترا ب 1200 جنيه .

وشكرا ليكم ومنتظر الرد على سؤالى ..

.........................................

ممنوع إستخدام اللون الاحمر لإن مخصص للإدارة فقط

مشرف القسم

[theking2690]

الف مبروك يا باشا على العربيه و مشكور على التقييم

[ahmed_su]

مبروك عليك

ربنا يديك خيرها ويكفيك شرها

منتظرين شوية صور من الداخل والخارج

[shosny]

الف مبروك يا باشا وربينا يبركلك فيها ويكفيك شرها وشر الحسد وانتا اكيد فاهم طبعا.

[mohamed ibiza]

الف الف الف مبروك 2 كوردوبا دخلوا المنتدي في اسبوع واحد يا مرحبا يا مرحبا السياتاوية بيزيدوا كل سنة و انت طيب و رمضان كريم:):)

للعلم بس ان العربية فيها abs+ebd مش عارف مين اللي قالك انها مفهاش انا عندي البروشور بتاعها غير الاعلان اللي كان عامله Smg من فترة كبيرة كده لما نزلوا الابيزا و الكوردوبا اللي بالتعديلات الجديدة اللي هي عبارة عن(85 بدل 75 حصان-فوجات ادام-تغيير في شكل الشبكة الامامية خلوها زي الشبيكة كده بدل ما كانت خطوط بالعرض)

عموما المطبات و النقر الواحد بيحس بيها لما ياخدها بسرعة انا عندي مثلا في الابيزا 94 لو عديت علي عيون القطط بسرعة احس بيها انما او خدتها علي الهادي مبحسش بيها فعادي انك تسمع صوت خبط لو علي سرعة انما جرب مطب شديد و انت بتاخده علي الهادي هتلاقيها خدت المطب و امتصت الصدمة زي ما تكون كتمتها كده و مش هتحس بيه....

الف مبروك عليك و ربنا يديك خيرها و يبعد عنك شرها

[mohamed ibiza]

عايزين الصور صحيح:):)

[XPLod]

الله يبارك فيكم وشكرا يا محمد على الرد الله يكرمك طمنتنى وأن شاء الله هصورها فى اقرب وقت وارفعلك الصور ..

[XPLod]

اه نسيت اللى قالى ان مفيهاش abs مهندس المبيعات فى التوكيل.
وكمان شكل الشبكة الامامية عندى خطوط بالعرض مش شبيكه

[معاذ الشرباصى]

الف مبروك

ربنا يبارك لك فيها و يحفظها لك من كل سوء

هى فعلا مفهاش Abs, و لا الابيزا المانوال فيها كمان

الاتوماتيك فول اوبشن هى اللى كان فيها

[bassemali]

ألف مبروك ياباشا القرطبه عربيه جميله وأنا إن شاء الله هجيب واحده .

[bassemali]

أه نسيت أقولك إرجع لكاتالوج العربيه في موضوع ال abs وشوف أو إتصل على التوكيل وأتأكد لكن أنا اعرف أن فيها abs +ebd

[XPLod]

الشبكه عندى خطوط بالطول زى الصوره اللى فى المرفقات بس من غير فوج لايت .

[Chicco]

ألف مبروك يا باشا و اختيار موفق إن شاء الله

حوار ال-abs عجيب .....هو التوكيل بيقول حاجة و المعارض بتقول حاجة ....أكنها عربيات عربيات اللي بينزل فيها مش كل العربيات نفس المواصفات ....عشان حضرتك تقطع الشك باليقين أفتح الكابوت و شوف بنفسك وحدة ال-abs موجودة و لا لأ

[ahmad--ezzat]

يا فرحتك يا محمد ابيزا ههههههههههههه
السياتوية زادو واحد

اللف مبرووك

[mohamed ibiza]

بص عشان تقطع الشك باليقين افتح الكبوت و شوف لو لقيت حاجة زي موتور صغير طالع من 4 مواسير يبقي فيها لو ملقيتش يبقي مفهاش لان الكوردوبا نزل منها موديلين واحد فيه و واحد لا و ده ميمنعش ان فراملها جبارة برضه:D