إختبار قيادة للهووفر Hoover Test Drive

[Adham]

يوم الجمعه عملت اختبار تست درايف للسيارة الهووفرHoover

و هي لمن لا يعلمها جيب SUV صيني شبيهه بال بي ام دبليو BMW ال X3

و بصراحه انا كنت مبهور و متعجب تماماَ

العربية خفيفة و سحبها كويس جدا و ثباتها هايل و الراجل صاحب المعرض اللي جربها معايا كان عنيف عليها جدا
لدرجه اني كنت حاسس انها حاتنقلب بينا

طلع بيها رصيف فجأة و احنا ماشيين بسرعه متوسطة 20-30 كم/س و نزل من الناحية التانية
و نزل بيها برة الطريق عند كارفور المعادي في الرمل و نزل حفرة بعمق حوالي متر (حفرة اساسات بيت لسة بتتحفر)
و الغريب ان العربية دفع خلفي مش دفع رباعي و مافيهاش فتيس غرز وبالرغم من ذلك ماغرزتش خالص
يمكن بسبب وزنها الخفيف و كاوتشها العريض حيث جنوطها 17 بوصة

العربية من جوة حلوة
اللي عجبني فيها فرش الابواب, شيك قوي و فية مخادع جلد تحفة شبية قوي ببتاع البي ام
التابلوة متوسط
تصميمة حلو و شيك بس صناعته تحس انها مش عالمستوى, يعني وش الكونسول في منتصف التابلوة تحس انة ملزوق لزق مش نضيف و باين من الجوانب
التكييف بتاعها متوسط القوة
مروحتة (الفان) سريعه بس التبريد متواضع

شكل العربية من برة شيك و فوانيسها حلوة بس اكصداماتها بلاستيك ضعيفة قوي
كان بالفعل الأكصدام مكسور

فيها ABS بس من غير EBD و مافيهاش DVD ولا LCD واسعه نسبيا من جوة

بيقول ان العربية موتور لانسر 1600
بس العربية أدائها مش كدة خالص

و لقيت البورشور بتاع السيارة اللي اخدتة منة مكتوب فية انها بتنزل بموتورين
2.4 بنزين
و 2.8 ديزل

بس مشطوب بقلم جاف على ال2.4

اعتقد انهم جايبينها 2400 بس ثابتينها في الفواتير انها 1600 علشان الجمارك و الضرايب و بالتالي الزبون يتشريها متطمن و ادائها يعكس صحه النظرية دي

العربية حلوة و سرعتها و تسارعها و نعومه عفشتها كويسين جدا بس سعرها عالي قوي
موديل 2009 ب 175 الف و موديل 2008 ب 160 الف تقريبا

كتير قوي عليها برغم اني لا انكر انني انبهرت من مستوى و معدلات أداء السيارة دي

صورت كام صورة للعربية من جوة
صالون و تابلوة
و موتور العربية

بالمناسبة موتور العربية مركبين علية وش بلاستيك قميء الشكل اسود و مرسوم علية بالفضي كأن الموتور مثلا V8

حاحاول انزل صورة العربية من برة ومواصفاتها من بورشورها اللي اخدتة منهم لاحقاً

[Hacker5]

175000 ؟
لا خليها بقى لعز العرب يركبها هوا :)
بجد دة استعباط

[CBR]

ممكن تجيب بتمنها تريوس دفع رباعي وسبعه راكب لو عايز كمان ب 155 الف

ويباني بردوا (تقفيل اندونيسي) افضل من الصيني

لو يخليها زي اللاند روك ب 130 الف تكسب براحه

بس نقطة انها مثبوته انها 1600 كويسه بردوا

[blazer]

اتفضل يا باشا

http://www.nilemotors.net/Nile/showthread.php?t=36071

[Adham]

اتفضل يا باشا
http://www.nilemotors.net/Nile/showthread.php?t=36071

الله ينور ياباشا
انت فعلا سبقتني في الموضوع دة

بس انا ملاحظ ان العربية اللي شفتها
مافيهاش اير باجز و سألت عليها قالةلي لا مابتنزلش

و حضرتك ذكرت ان التكييف قوي

بصراحه انا شايف ان أداؤة متواضع جدا في التبريد
ايوة المروحه قوية بس الهواء يادوب ساقع بالعافية

و اعتقد ان مافيهاش سي دي كمان

و فعلا السعر غالي قوي

ماتنساش ان مثلا التريوس و الفيتارا ارخص منها

و لو زودت شوية تجيب نيسان اكس تريل ب 220 مثلا

و في الاخر العربية مانيوال و مافيهاش دفع رباعي و صيني

يبقى اية الاحسن ؟؟؟!!!


انا العربية عاجباني

بس سعرها مايزيدش عن 90 الف بالكتير, ماتســـــــــــــــــــواش

[Adham]

أدي صورتين كمان للبورشور و فيهم صفحه المواصفات

لاحظوا السعه اللترية Displacement اللي مشطوبة بالقلم الجاف

[blazer]

بوص هو التكييف فعلا مروحته قويه بس تبريده مش قوى فى الحر و دا عن تحربه :(:(
انما فيها 6 cd changerفى المسند بتاع الكرسى بتاع الايد الشمال لو فتحته هتلاقى ال cd changer هو مكانه غريب شويه انا عارف
بس هى احسن من التريوس اكيييييييييد انما لو الفيتارا ممكن يبقى فى كلام ودا كمان لان سعرهم متقارب جدااا
بس هى احسن فى انها اوسع بكتيييير و اعلى من الفيتارا جدااا
و العربيه مبتنزلش لما تحمل فيها غير مسافه صغيره جدا و دا انا مستغربله جدا
و عفشتها قويه جدااا و دا هتحسه لو عملت ال test drive وسوقت انت هتحس ان معاك دبابه
وكمان صاجها قوى بلذات لو اتركبلها ديفيندرز
وسعرها هو يمكن عالى عن اى عربيه صينى فى نفس الفئه بحوالى 40000
بس مش لدرجه 90000 خالص طب حتى قول 145000

[pinkfloyd]

فعلا انا اتفرجت عليها وعجبانى قوى بس فى مشكلتين هو ان الوكيل جايب شوية عربيات من برة لا تتعدى المائة عربية وهو اسمة الحرمين قبل كارفور المعادى والمشكلة الثانيه سعرها العالى اللى المفروض ميزيدش باى حال من الاحوال عن 120 الف جنية ودة سعر مناسب جدا عليها.

[Adham]

و العربيه مبتنزلش لما تحمل فيها غير مسافه صغيره جدا و دا انا مستغربله جدا
و عفشتها قويه جدااا و دا هتحسه لو عملت ال test drive وسوقت انت هتحس ان معاك دبابه
وكمان صاجها قوى بلذات لو اتركبلها ديفيندرز

خللي بالك ان انا اساساً راكب شيفرولية فرونتيرا

فمش ممكن حاحس ان العربية دي لا دبابة و لا عالية و لا مابتنزلش و لا ان صاجها قوي

العربية موتورها مش حايوصل في القوة و لا عفشتها في القوة و الاحتمال و لا الصاج و الشاسية لنسبة تذكر في مقارنتها بالفرونتيرا

[Adham]

وسعرها هو يمكن عالى عن اى عربيه صينى فى نفس الفئه بحوالى 40000
بس مش لدرجه 90000 خالص طب حتى قول 145000

لو سعرها 145000 يبقى اية اللي يخللي الواحد يسيب تريوس او فيتارا و يجيب دي

معلش الاتنين ياباني

الاتنين في السعر دة تجيبهم اوتوماتيك بفتيس غرز كمان

يبقى اية اللي يجيب عربية صيني بدل دول علشان اوسع منهم شوية

مش عقل برضة

انا رأيي بالكتير تساوي 90000

[blazer]

لو سعرها 145000 يبقى اية اللي يخللي الواحد يسيب تريوس او فيتارا و يجيب دي

معلش الاتنين ياباني

الاتنين في السعر دة تجيبهم اوتوماتيك بفتيس غرز كمان

يبقى اية اللي يجيب عربية صيني بدل دول علشان اوسع منهم شوية

مش عقل برضة

انا رأيي بالكتير تساوي 90000

والله رائيك وانا احترمه
انا مش عاوزك تشتريها ولا حاجه (مش انا الوكيل )
بس بذكر للك المميزات مش اكتر عشان ابقى قدرت اساعدك
وطبعا الجراند فيتارا ملهاش حل بلذات ال 2000 و شكلها جامد جدا بس تحس انها عضلات كدا زى بقيت ال 4*4
و مش مرتفعه عن الارض قد كدا
بس طبعا هى من احلى العربيات فى فئتها

[Adham]

ولا انا في نيتي اشتريها اساساً

مانا بالفعل راكب 4*4 , بس بنحاول نقيم السيارة و نقول ماليها و ماعليها لعل و عسى تفيد حد عاوز يشتري

[mummy_47]

العربية منتشرة في السوق الايطالي....وفي السوق السعودي..وبعدين الموتور ياباني والشاسية بتاع عربية نصف نقل تقيل جامد...طيب فين المشكلة...بعدين شكلها حلو وافضل من الفرونتيرا اللي عاملة زي البيك اب المتقفلة...عشان كده منتشرتش جامد...مع خالص تقديري لكل ملاك الفرونتيرا لكن ده راييي الشخصي فقط..

[Adham]

العربية منتشرة في السوق الايطالي....وفي السوق السعودي..وبعدين الموتور ياباني والشاسية بتاع عربية نصف نقل تقيل جامد...طيب فين المشكلة...بعدين شكلها حلو وافضل من الفرونتيرا اللي عاملة زي البيك اب المتقفلة...عشان كده منتشرتش جامد...مع خالص تقديري لكل ملاك الفرونتيرا لكن ده راييي الشخصي فقط..

ياراجل يا طيب ماينفش تقول على عربية صيني 1600 او 200 مانيوال 2*4 انها احسن من عربية ياباني 3200 v6 اوتوماتيك 4*4

الفرونتيرا منتشرة جامد لان الوكيل باع كل اللي انتجة في 5 سنين انتاج من 98 ل 2003 مش لان الناس مش عاجبهم ان وشها وش الدبابة لكن طبعا الكمية اللي انتجها الوكيل في 5 سنين اقل بكتير من انتاج شيروكيي مثلا من 92 ل 2010 و العربية سعرها اغلى من الشيروكي (في سنة انتاجها)