حرام ولا حلال اللى بيحصل ده يا جماعه !!!!!

[Terrible_DaRsH]

لا حول ولا قوه الا بالله ....
امبارح كان يوم فظيع بجد .. الواحد شاف حاجات صعبه ...!
انا هحكى على طول ...
امبارح 20/9/2008 طالعين على مكرم عبيد كالعاده ...
فى طريقنا بعد نادى السكه المنصه .. ماشيين و الكاسيت عالى شويه وبنتكلم وطايرين طبعا فى الشارع ده ..
ومرة واحده ابص كده الاقى (شوال) فى نص الطريق مرمى بالعرض واحنا مش واخدين بالنا وماشيين عادى ..قمت انا باعلى صوت فيا حاااااااااااااااااااااااسب حاااااااااااااااااااسب صاحبي بص كده وراح مفادى الشوال ده مع السرعه طبعااا والحمد لله مخبطناش فى حد ...
ايه الشوال ده بقي !!!
ده واحد مخبوط خبطه ما يعلم بيها الا ربنا متكسر 100 قطعه فى الارض وزجاج العربيه اللى خبطته متكسر حواليه ومحدش واخد باله خاالص منه وكله فاكره زينا شوال واللى خد باله منه مرضاش يبلغ مع ان فى نقطه شرطه على بعد 90 متر تقريبا .. كمان احنا مرضناش نبلغ كله كان خايف على نفسه ... والناس ولا كانها شايفه حاجه ..
بس يا رب الراجل ده ميكونش حد داس عليه لان احنا لولا ستر ربنا كان زماننا دايسين عليه والمصيبه انه مرمى على الارض بالعرض فى طريق سريع ...!!!!!!

-------- ---------
ده الموقف الاول ..
الموقف التانى بقي ان عندنا فى المنطقه واحد مالتى مليونير ..
غنى بمعنى الكلمه يعنى ( ربنا يذيده ).. المهم
عنده عربيات كتيرة من ضمنهم عربيه ماتريكس وعنده ابن صغير عنده 12 سنه اعوذ بالله من ده عيل مش ممكن واد فظيع !!!
المهم رجعنا من مشوارنا وواقفين فى الشارع ومرة واحده نبص نلاقى عربيه ماتريكس طايره والشارع مش واسع اوى ومرة واحده فرامل تااااااااخ ..
بنبص ايه اللى لاقينا توتو ابن البيه هو اللى سايق العربيه لوحده وداس راجل غلبان على اول الطريق ...
مش هحكى اللى حصل فى باقي الموقف ده علشان محدش يتحرق دمه بجد .....
و يا ريت لو حد كان فى مكانى كان هيعمل ايه فى الرجل اللى كان مرمى ده ؟!!!!!

[MMamdouh]

ولا اى حاجة....

مش انت اللى خبطة بالتالى مش انت المسؤل
هو اللى غلطان لان الحتة دى مفيهاش عبور مشاه
لو حاولت تساعدة سهل اوى تلبس انت القضية خصوصا لو الراجل مات

تصرفك صح 100%

MMamdouh

[Ghamrawy]

أؤيد رأى محمد ممدوح
و الراجل ليه رب كريم

[Sameh]

الرد فيه شئ من القسوة يا بشمهندس م ممدوح ، أنا مقدر ظروف البلد الظالمة وإن الشرطة محتاجة دايماً متهم تغلق بيه المحضر من غير ضمير ، إنما بحط نفسى مكان الإنسان اللى إتخبط ، وراه عيال ؟ ليه زوجة ؟ أم وأب ؟ يمكن لسة عايش ومحتاج مساعدة تنقذه ؟ يمكن تأخر المساعدة يخليه يعيش طول عمره بإعاقة أو أسوأ من كدة

من كام سنة والدتى خبطتها عربية ربع نقل أمام البيت من سواق مدمن ، ربنا ما يكتبها على حد أبداً ، المصاب فى اللحظة دى بيبقا محتاج أى مساعدة ومش مهم أبداً هو اللى غلطان ولا اللى خبطه اللى غلطان أو هتتسوى إزاى ، أعتقد لو وقفت لله بس ومديتله إيدك عشان ربنا ، ربنا مش هيظلمك فى حاجة مالكش ذنب فيها وإنت بتعمل خير عشانه

[sab3aawy]

المساعدة اللى تقدر تعملها للراجل المصاب انك من ابعد مسافة ممكنة عنه تتصل بالاسعاف ، بشرط ان لا حد يشوفك ولا يشوف عربيتك وانت بتتصل بالاسعاف ، يفضل تتصل من تيفون فى الشارع ميكونش تليفونك ، وممكن كمان تتصل بنقطة الشرطة بس برضه متتصلش من تليفونك

اى حاجة هتعملها غير كدة يبقى كل اللى انت هتعمله انك هتزود الضحايا واحد هو حضرتك شخصيا

[ahmed_su]

للاسف بقينا كده

ربنا يسترها علينا ...بس ازاى واحنا مش بنعمل اللى علينا حاجة تحزن

[MMamdouh]

الرد فيه شئ من القسوة يا بشمهندس م ممدوح ، أنا مقدر ظروف البلد الظالمة وإن الشرطة محتاجة دايماً متهم تغلق بيه المحضر من غير ضمير

و نسيت تقول ظروف الحادث اللى حصلى فى يناير 2008 و لحد النهاردة انا بروح المحكمة و لسة القصة مخلصتش عشان واحد قرر يعدى صلاح سالم وسط العربيات و كان نصيبة انى اخبطة و يتوفى

، إنما بحط نفسى مكان الإنسان اللى إتخبط ، وراه عيال ؟ ليه زوجة ؟ أم وأب ؟ يمكن لسة عايش ومحتاج مساعدة تنقذه ؟ يمكن تأخر المساعدة يخليه يعيش طول عمره بإعاقة أو أسوأ من كدة

و لما هو عندة عيال و زوجة و اب و ام ليه مفكرش فيهم قبل ما يعمل بهلوان و ينزل يعدى طريق مفيهوش عبور مشاة ولا اشارة مرور و كلنا عارفين عرض الطريق فى الحتة دى قد ايه و تقريبا مستحيل تعدى الحتة دى بامان

من كام سنة والدتى خبطتها عربية ربع نقل أمام البيت من سواق مدمن ، ربنا ما يكتبها على حد أبداً ، المصاب فى اللحظة دى بيبقا محتاج أى مساعدة ومش مهم أبداً هو اللى غلطان ولا اللى خبطه اللى غلطان أو هتتسوى إزاى ، أعتقد لو وقفت لله بس ومديتله إيدك عشان ربنا ، ربنا مش هيظلمك فى حاجة مالكش ذنب فيها وإنت بتعمل خير عشانه

و نعم بالله لكن الواقع غير كدة... اى مصاب فى حادث سيارة بيوصل المستشفى فى عربية بيتاخد صاحب العربية فى الرجلين... حتى لو اثبت ان مش عريتك اللى خبطتة حيكون دة بعد خراب مالطة... انا بقالى 9 شهور فى الحوار الاسود دة و الموضوع شبه منتهى و مش محتاج اختراعات... تعالى بقى انت اثبت ان مش عربيتك هى اللى عملت الحادث و اعمل معاينة فنية للعربية و تقرير طبى بيوضح سبب الوفاة الخ الخ الخ... كل سنة و انت طيب

يا راجل اذا كان اللى خبطة موقفش مع انه مش غلطان... يبقى واحد يعمل شهم و ابو الرجال و يقف بمحض ارادتة و يشرب القضية؟؟؟ مستحيييييييييييل

MMamdouh

[mmolazem]

قد يأتى اليوم الذى نشكر فيه لهذا العهد ان ازلنا واهاننا وافقرنا وافسدنا حتى عرفنا الفرق بين الاحرار و العبيد.

لله الأمر من قبل ومن بعد.

[دموع الثلج]

ايه ده انا اتخضيت من رده الفعل على الراجل اللى مرمى
ليه بقينا كده استغفر الله يعنى خايفين من الحكومه ولا الشرطه ومش خايفين من ربنا

لما هيسالنا يعنى لو كل واحد افترض نفسه لاقدر الله فى مكان الشخص المصاب وفى موقفه والناس بتعدى حواليه وكانه شى لا يذكر المفروض احنا بنعامل ربنا

فين اتباعنا لسنه الرسول نسينا تقريج الكربه ومساعده المحتاج واغاثه الملهوف
فعن أبي موسى - رضي الله عنه - قال: قال رسول الله - صلى الله عليه وسلم -: "على كل مسلم صدقة.قالوا: يا نبي الله! فمن لم يجد؟ قال: يعمل بيده ويتصدق.قالوا: فإن لم يجد؟ قال: يعين ذا الحاجة الملهوف...

[A.samy]

على رأى الشعراوى ( شعب اسف ان يكون سلبى )ود كانت كلمتة للريس

[Noha.M]

ربنا يرحمه يا جماعة هو اكيد ربنا احن عليه من البنى ادم

بس معلش رد م/ممدوح مفهوش اى قسوة للاسف دة الواقع اللى احنا عايشين فيه
اقدم انا مساعدة لحد ازاى و فى الاخر اقوم لابسة الموضوع و الاقي نفسي داخلة فى قضية ما يعلم بيها الا ربنا

جلسة اخويا ان شاء الله يوم 25 الجاى و ماما كل يوم بتعيط مع ان محمد مش غلطان و ماشي عالدائري و الراجل عجوز عنده 75 سنة و بيجري فى الطريق و اهله ميعرفوش عنه حاجة و سايبينه قى الشوارع و عرفنا انهم جايبين محامى عشان الدعوى المدنية و التعويض و الكلام دة دة لما افتكرو ان ليهم اب ! و مكنوش يعرفو بايت فين اساسا !
طيب انا اخويا ذنبه ايه فى حاجة زى دي !!

بجد احنا بنكلم و كل واحد قاعد على كرسيه و مش حاسس بالكارثة دي بتبقي عاملة ازاى و ربنا ما يوري حد ابدا شعور انك تخبط حد و يتوفى
انا اخويا لحد اللحظة دى مش عارف يركب عربية ولا عايز و فييييييين لما بقا بينزل يخرج

من شهر تقريبا ابن خالتى ماشي على الدائري و على يمينه واحد بيجري و خبط واحد المهم الراجل وقف و ابن خالتى كمان وقف قال عشان يساعد ! تخيلو الراجل عمل ايه لما لقا الناس اتلمت و كدة و خاف قام مزعق بعلو صوته لابن خالتى و قاله حرااام عليييييييييك خبط الرااااااااااجل الغلبان حرااااااااااام علييييييييييك و ركب عربيته و جري و بجد ابن خالتى كان هياخد علقة مووووت و ودوه القسم و فييييييين فى الاخر جه شاهد و قال يا جماعة مش دة اللى خبط دة اللى كان راكب اللانسر و رقم العربية كذا كذا ... ادي اللى حصل لما الواحد حب يعمل خير!


ربنا يستر طريقنا كلها

[Dr_Mido]

لا حلال صرف
عملا بمبداء { ولا تلقوا بأيديكم إلى التهلكة }
و احكومه اليويمن دول تهلكه
على فكرة برضه اتعلمى موقف على الدائرى من سنه واحد بيعدى الطريق الساعه 4 ونص ال فجر
كت سايق شاهين بتاعه واحد صاحبى ماشى على 100 ومفيش عربيات بس انا مبحبش الجرى
مرة واحدة لقيت اللى طاير من فوق الكبوت على الارض
وبقدرة قادر لقيت عربيات كتير وقفت ورحنا المستشفى
و البيه جاله كسر فى الحوض ومعرفش كسر فين تانى فى رجله واهله جم المستشفى وعايزن يكسرو العربيه برة وحاجه اخر قله ادب انا كنت هدفع تكاليف المستشفى علشان حالته اكنت تعبانه بس حلفت مهدفعها وقلتلهم اللى ليه مزاج يرفع قضيه يرفع ويحينا ويحيكو ربنا
لانه لا فى عبور مشاة
ولا فى اصلا سلم يطلع الطريق
ولا عربيه عطلانه ومشغله انتظار
ولو الموقف دة اتكرر فى اى شارع عادى بنفس السيناريو كنت هروح فى داهيه
فطبيعى مش هقف اسعاد حد مهياش ناقصه مصايب كفايه كم القوانين اللى حالف انك لازم تروح فى داهيه لازم تروح فى داهيه

[Noha.M]

لا حلال صرف
عملا بمبداء { ولا تلقوا بأيديكم إلى التهلكة }

فعلا زى ما انت قلت واحد لما يعدي على طريق سريع ولا دائري و عمال يتنطط بين العربيات يبقي دة عمل اصلا بالمبدأ دة ؟ لا طبعا !

دة انا مامتى لما نقلو البنك على الكورنيش عند مستشفى النيل البدراوى و بتروح الصبح قبل شغلها عشان ترجع تانى المعادى والله مشيــــــــت عللى رجلها من البنك لحد مدخل المعادي عند المحكمة الدستورية عشان خايــــــــفة تعدي الكورنيش و تاخد تاكسي ترجع بيه !!!!!!!!!!

دة الفرق بين حد بجد مش عاوز يرمي نفسه بايده للتهلكة و حد عارف ان نفسه دي مش ملكه لوحده و انها امانة ربنا ادهاله لازم يحافظ عليها

[Eslam_A]

انا لو مكانك هعمل زيك
بس كان ممكن ازود اني اتصل بالنجدة من اي تليفون في الشارع ( مش من تليفوني )

[Dr_Mido]

فعلا زى ما انت قلت واحد لما يعدي على طريق سريع ولا دائري و عمال يتنطط بين العربيات يبقي دة عمل اصلا بالمبدأ دة ؟ لا طبعا !

دة انا مامتى لما نقلو البنك على الكورنيش عند مستشفى النيل البدراوى و بتروح الصبح قبل شغلها عشان ترجع تانى المعادى والله مشيــــــــت عللى رجلها من البنك لحد مدخل المعادي عند المحكمة الدستورية عشان خايــــــــفة تعدي الكورنيش و تاخد تاكسي ترجع بيه !!!!!!!!!!

دة الفرق بين حد بجد مش عاوز يرمي نفسه بايده للتهلكة و حد عارف ان نفسه دي مش ملكه لوحده و انها امانة ربنا ادهاله لازم يحافظ عليها

ربنا يخليهالك ويحفظها
مهى المشكله انه هو واحد مجنون مفيش مشاكل ربنا يهديه انما جنانه دة يضيع مستقبل واحد وراة ناس وعيله يبقى سورى يتحرق بجاز على اللى بيعمله ومحدش يساعدة باى حاجه ولو لقيت تليفون بعيد عنى هعمل زى ماسبعاوى قال غير كدة ولا هعبرة كل واحد يتحمل نتيجه غلطه ميبقاش غلطان وودى نفسه فى داهيه ويودى واحد ملوش ذنب برضه فى داهيه