مركز الصيانة الرئيسي وبداية الإهمال(مع خالص شكري للمهندس طارق ومهندس محمد)

[elpasha009]

الموضوع بإختصار إن البرابريز الأمامي إتكسر عندي من أكتر من إسبوع وسألت المهندس طارق عن سعرة وهل يستلزم الحجز قبل ما أروح ولا لأ وكان الإجابة إني أروح في أي وقت عادي بدون حجز.
المهم رحت النهاردة فرع جسر السويس الساعة 9:30 وقلت لمهندس الإستقبال محتاج أغير الإزاز قالي ممكن تيجي يوم تاني لأن العامل المسؤل مجاش النهاردة.فطلبت منه إنه يكلم فرع قليوب علشان يتأكد إن العامل موجود فقالي أنا هديلك الرقم وكلمهم إنت بس عموما كده ولا كده هتلاقي حد هناك لأنهم 3 عمال للإزاز هناك مش معقولة ماجوش كلهم النهاردة.
المهم كلمت فرع قليوب واللي رد عليا قالي حضرتك شرفنا يوم الحد عشان إحنا قافلين باب الإستقبال لحد يوم الأحد!!!قولتله أنا جاي أغير إزاز بس ممش جاي أعمل صيانة المهم من هنا لهنا قالي خلاص تعال يوم السبت بس هحولك للمخزن الأول تسألهم هل الإزاز موجود ولا لأ.بصراحة بدأت أحس إن فيه حاجة غلط وخصوصا إن المهندس طارق أكدلي إني أروح في أي وقت مش لازم أحجز.
طبعا كلمت المهندس طارق علطول وعرفته بنفسي وحكيتله الموضوع المهم عمل إتصالاته وقالي تعالى دلوقتي هم في إنتظارك.
فعلا وصلت هناك الساعة 10:20 ودخلت على الإستقبال ولسه بقول عاوز أغير إزاز قالي إسئل في المخزن لو موجود هنغير.رحت المخزن أسئل وللأسف كانت الصدمة العنيفة(بالمناسبة للي راحوا هناك قبل كده في مخزنين واحد الكبير اللي موجود بره وده مخصص للناس اللي راحة تشتري قطع غيار والتاني جوه في منطقة الصيانة وممنوع الدخول طبعا ليه)الإزاز مش موجود وهيجي كمان 15 يوم تقريبا.مش عاوز أقولكم كنت حاسس بإيه ساعتها:)
المهم توكلت على ربنا وقولت أطلع للمهندس طارق أسلم عليه وأمشي وفعلا أول ماطلعت بيقولي سلمت العربية قولتله لأ وحكيتله اللي حصل فقالي طيب أستريح ثواني ونزل وجه قالي الإزاز موجود إنزل سلمهم العربية وكمان بعت معايا المهندس محمد.
طبعا أنا مش عارف من غير المهندس طارق والمهندس محمد كنت عملت إيه.بجد ربنا يكرمهم ويوفقهم ويجازيهم خير.وبالذات المهندس محمد بجد فظيع بيفضل مع الواحد من ساعت ما العربية تتسلم لحد ماتخرج بيها من باب التوكيل:)بجد راجل بمعنى الكلمة.والمهندس طارق طبعا مش محتاج أتكلم عليه.يكفي إني دخلت عليه الصبح لقيته فاتح نايل موتورز في موضوع الإستشاري ومسبش المنتدى غير لما رد على الناس كلها وبعت سأل على طلباتهم.
الحاجة المهمة بقى واللي بجد مديقاني جداااااااااااا إن واحد صحبي كان سايب معايا أمانة في العربية وهي علبة سجاير.(قبل ما أي حد يقول أي حاجة أنا مش بدخن ومانع كل صحابي من التدخين في العربية تماما)وإكتشفت حالا إن العلبة مش موجودة.
أنا بجد مش عارف الشخص اللي خدها دها خدها إزاي وإحنا في رمضان!!!!!!!!!!!!!!يعني بيسرق في رمضان وكمان بيسرق حاجة أصلا حرام.حسبي الله ونعمة الوكيل.
أنا بجد بتوجه بشكوى رسمية للمهندس طارق بسبب الموضوع ده وبطالب بمعاقبة المسؤول.
طبعا كلكم ممكن تستغربوا من الكلام ده وتقولولي بتعمل ده كله علشان علبة سجاير هقولكم أنا بعمل ده كله علشان ديه أمانة في رقبتي واحد صاحبي سابها معايا وأصلا مكنتش أعرف هي إيه وقالي في أمانة أنا سيابها في عربيتك وهبقى أخدها بعدين.أنا عرفت بعد ماسبها إنها علبة سجاير.المهم إنها أمانة.
أنا بجد مش مسامح الشخص ده.أنا عارف إنها غلطتي وبالذات إن المهندس محمد وأنا بسلم العربية قالي شيل الحاجات المهمة بس بجد مجاش في بالي خالص العلبة.وكمان العامل ده مش مضمون المرة اللي جايا هياخد إيه من عربية حد تاني.
بجد ياباشمهندس طارق ممكن أتخذ إجراء رسمي في الموضوع ده؟وإزاي؟وهل محتاج إني أبقى موجود؟؟
وشكرا.

[OldVic]

غريب جدا موضوع العلبة التى أخذت، أنا دائما أترك أشياء فى السيارة و عمر ما يد اتمدتلها! ممكن يكون عامل جديد.

[limo]

مبروك يا باشا على تغير البرابريز
انا عندى فى عربيتى البرابريس مشروح ومكسل اروح اغيره بس مخلينى مقلق جدا لايفتح منى على الطريق وانا سايق
ان شاء الله هغيره بعد رمضان
البشمهندس طارق غنى عن التعريف بمواقفه وشهامته ومرؤته ربنا يجازيه خير يارب
بس انا حسيت من كلامك ان التوكيل فى معامله مع العملاء مش اد كده تقريبا زى غبور فى المعامله طبعا لولا تدخل البشمهندس طارق وحرصه دايما على انه يخلى التوكيل فى احسن صوره ممكنه بافعال وليست اقوال مكنش الزجاج ركب فى نفس اليوم

بالنسبه لعلبه السجاير فسامح فيها وخلاص ممكن الصنايعى يكون افتكر انك سايبله علبه السجاير على اساس انك بتعمل معاه واجب يعنى :)

[Dr Ahmed]

لأ فيه مشاكل فى صغار العمال وحاجات صغيرة بتضايق جدا
أنا لما رحت من كام شهر سلمونى العربية بعد ما خلصت بوقت كتير ولما رحت لها لقيت الكاسيت شغال ، يعنى اللى كان بيشتغل فيها بيروق نفسه بالكاسيت على حسابى وسابه شغال ويخلص فى البطارية وكله على حسابى ، ولولا ذوق المهندس طارق والأستاذ محمد كنت علقت بعنف وقتها على الموضوع ده ، لكن فعلا فيه مشاكل بتتعلق بالحفاظ على الأشياء اللى فى السيارة وياريت يكون فيه حل ونظام صارم

تانى حاجة ليه مافيش إتصال بين الإستقبال والمخزن؟ وليه الزبون هو اللى يروح يسأل؟ ويعنى إيه يقولو مافيش ويطلع فيه؟ وهو لازم كل حاجة تتحل بنزول مدير من مكتبه؟؟؟؟؟

[elpasha009]

لأ فيه مشاكل فى صغار العمال وحاجات صغيرة بتضايق جدا
أنا لما رحت من كام شهر سلمونى العربية بعد ما خلصت بوقت كتير ولما رحت لها لقيت الكاسيت شغال ، يعنى اللى كان بيشتغل فيها بيروق نفسه بالكاسيت على حسابى وسابه شغال ويخلص فى البطارية وكله على حسابى ، ولولا ذوق المهندس طارق والأستاذ محمد كنت علقت بعنف وقتها على الموضوع ده ، لكن فعلا فيه مشاكل بتتعلق بالحفاظ على الأشياء اللى فى السيارة وياريت يكون فيه حل ونظام صارم

تانى حاجة ليه مافيش إتصال بين الإستقبال والمخزن؟ وليه الزبون هو اللى يروح يسأل؟ ويعنى إيه يقولو مافيش ويطلع فيه؟ وهو لازم كل حاجة تتحل بنزول مدير من مكتبه؟؟؟؟؟

صحيح فكرتني يا دكتور أحمد ده أنا نسيت أحكي عن المشكملة ديه كمان وهي إن العامل خرج العربية وسابها في الإستقبال وعلى مادخل الورق الإستقبال وأنا رحت دفعت وإشتريت فلتر زيت من المخزن وقبل ما أطلع أسلم على المهندس طارق والمهندس محمد قولت لما أروح أبص الأول على الإزاز وكده لقيت المفاجأه وهي إن الكونتكت مفتوح والراديو شغال على إف إم مع إني داخل والعربية على إذاعة القرأن والإزاز مقفول والتكييف والتكيف كان شغال.طبعا الباشا واضح إنه مشغل الراديو طوال الثلاث ساعات تقريبا على بطارية العربية ولما جه يطلع العربية في مسافة 15 متر شغل التكييف وكمان غير التظبيط بتاعه.
ده غير إني لقيت بقع كتير جدا للسيليكون على الكرسي بتاعي مع إنهم مغطيين الكرسي بكيس بلاستيك وأنا بسلمها.مش فاهم بجد إيه ده.
وفعلا المهندس محمد كان معايا ساعتها وعلشان كده مرضتش أعمل مشكلة من زوقه وكمان كتر خيره على وقفته معايا ده كله.

أستاذ limo الله يبارك في حضرتك وطبعا أنصحك بتغيره في أقرب وقت لأن قبل الكسر ده علطول كان عندي شرخ طولي وزاد في فترة قصيره جدا بس الحمد لله كنت عملاه عند دكتور خالد ووقف على كده.
فعلا أنا قولت للمهندس طارق إنتوا بدأتوا تبقوا زي غبور حتى كان فيه عربية أتوس حمراء اللون راكنة في الإستقبال وعاليها بادج مصرية فبهرج معاه وبقولوا إنتوا بقيتوا مركز معتمد ولا إيه:)

[mohamedway]

بصراحه انا شايف فى الموضوع ده وجه تانى خالص غير موضوع علبه السجاير و هو كدب عامل قطع الغيار و اخباره بان الازاز مش موجود و هو موجود فعلا ده غير المطوحه و تعالالنا اليوم الفلانى و العلانى و هم يقدروا يخلصوا الموضوع خصوصا ان موضوع الازاز ده حاجه طارئه و عشان كده بتتعمل من غير حجز وواضح انهم بيمطوحوا و بيكدبوا عشان مش عاوزين يشتغلوا....يعنى لولا البشمهندس طارق ما كانش موضوع الازاز اتحل خالص و مش كل الناس تعرف البشمهندس طارق عشان يحللهم مشاكلهم اللى هى المفروض متبقاش مشاكل اساسا وكل واحد يشوف شغله بضمير.

[medo1970]

على فكره الموضوع ده خطير جداً جداً
يعنى ايه اروح اركب زجاج للسياره يقولولى مفيش او العامل بتاع تركيب الزجاج مش موجود وأروح أسأل عليه فى المخزن موجود ولا لأ هى دى شغلتى ولا وظيفة التوكيل ان يكون فى ربط بين الاستقبال والمخزن امال مكانوش واخدين حقه تالت ومتلت كانوا عملوا اكثر من كده ايه فين إدارة الرقابه على الجوده وراحة العميل هذه الأشياء تؤكد ان فى حاجه غلط بداخل التوكيل.
ولولا تواجد المهندس طارق " جزاه الله خيراً " وحبه لخدمة الناس لأزدادت مآساة العضو الباشا009
فيجب توعية العاملين بداخل التوكيل بكيفية التعامل مع العملاء والحفاظ على السياره ومكوناتها لأن هذه الأشياء تؤثر على سمعة التوكيل.
ومرة ثانيه اكرر شكرى للمهندس طارق على مجهوداته فى خدمة اعضاء نايل موتورز واتمنى من الله ان يجازيه عنا كل خير

[مصراوي جدا]

انا متعود في الشكاوي اللي زي كده اني بابلغ بيها مدير عام الصيانة وهو بيحقق في الموضوع بنفسه ويتخذ فيها اجراءات مناسبة


يمكن تفتكروا موضوع السيديهات اللي اختفت برضه من عربية احد العملاء (من اعضاء المنتدى) وتم تحميل قيمتها لمسئول استلام العربية لأنها مسجلة في محضر استلام العربية . بس طلع انه سلمها لعربية تانية صاحبها اعتقد انها بتاعة صاحبه وسايبها في العربية


بخصوص موضوع علبة السجاير هو يضايق جدا رغم بساطة قيمتها خاصة انها امانة. طبعا احنا بنأكد على كل العملاء على اخذ كل المتعلقات الشخصية قبل دخول العربية للورشة انما برضه انا هابلغ مدير الورشة لأن كل عربية معروف مين العامل اللي اشتغل فيها


كذلك موضوع السيليكون على الكرسي ده غريب جدا ولازم يتعرف حصل ازاي لأن موظفي الاستقبال حريصين على وضع الكيس على الكرسي قبل دخول العربية


موضوع تشغيل الراديو في عربيات العملاء ده طبعا يضايق واكيد الادارة هتتخذ فيه اجراء مناسب


بخصوص موضوع توفر الزجاج في المخزن. ففيه اصناف لما بتوصل لكمية معينة (بنسميها الكمية الحرجة او كمية توقف البيع المباشر) بنوقف بيعها المباشر من المخزن للعملاء ونسمح فقط بتركيبها في ورش الشركة. والزجاج الأمامي كان وصل للكمية دي وبالتالي لما راح الأستاذ احمد سأل في المخزن الرئيسي قالوا ان مش موجود انما طبعا هي غلطة موظف الاستقبال انه يقول له اسأل في المخزن. المفروض هو اللي يسأل في مخزن الورشة الداخلية.


بشكل عام بالطبع فيه أوجه قصور لا يمكن انكارها انما احنا بنحارب والله للقضاء عليها وباذن الله ننتصر على حزب معلش وبسيطة وموروثات مصرية كثيرة أخرى.

والله يا بشمهندس طارق الواحد بيعمل كده حبا للمكان وحرصا على جعله أفضل.والله العظيم أنا من الناس اللي بحب إسم متسوبيشي وبفرح لما بلاقي إن التوكيل مازال محترم غير توكيلات تانية كتير جدا.ويمكن ديه أول مرة أشتكي من التوكيل من عدد زيارات بلغت الستة مرات معايا ومع أصدقائي.
وبعدين وجود حضرتك هناك بيهون على الواحد حاجات كتير جداااااااااااا وبيحببه في المكان أكتر وأكتر.بس للأسف الحاجات الصغيرة ديه بضايق الواحد جداااااااا.
بالنسبة للسجاير أنا عارف إنها غلطتي بس بجد أنا نسيت أخدها معايا.
بالنسبة لموضوع السيليكون أنا فعلا إتغظت جدا من وجود البقع ديه على الكرسي مع إن الكيس البلاستيك كان موجود.وللأسف فيهم بقعة مش راضية تروح وكمان إكتشفت دلوقتي بقعة على التابلوه بس خفيفة.
بس في النهاية أنا لايسعني غير إني أشكر حضرتك جداااااااااااااااا والمهندس محمد أيضا على المجهود ده وكمان على تحسين الصورة على قدر الإمكان للمكان وده إن دل يدل على كرم أخلاقكم.وجزاكم الله خيرا وجعله في ميزان حسناتكم.