تجربتي مع عيب صناعة فى A5 خليجي 2007

[Ahmed Samy]

هذا الموضوع يهدف فقط للإفادة لمن قد يتعرض لا قدر الله لمثل هذا الموقف


العربية بتاعة حمايا عاملة 39000 كم ..هاف اليجانس زي ما بيقولوا

لاقيت حمايا مكلمني و بيقول ان العربية (بتنتش) في النقلات و في حاجة مش مريحاه ..
و بعدين بدأ يقوللي ان النتشة بتزيد و الفتيس بيتأخر في النقل

و العلامة التحذيرية بتاعة التبريد بتنور و الحرارة كويسة و المية كويسة

و بعدها ظهرت علامة التحذير و صفارة التوقف و اختفت مؤشرات النقلات ...

طبعا قولتله وقفها و نجيبها بونش

و للأسف كان مش عايز يتأخر على الشغل و عربية الشغل ما ينفعش تطلع خارج المحافظة تجيبه ..فقرر انه يكمل للأسف

ومشي بالحال ده 12كم بحالهم و بعدين وديناها لواحد ميكانيكي (بيقولوا متخصص سكودا في دمياط -محل عمل حمايا-)

المهم الميكانيكي فتح قربة المياة لاقيناها غرقانة
زيت !!!!!:k20:



و بصلنا بصه ماريحتنيش (اكتر ما أنا مش مرتاح)

و نزل صفى الرادياتور من تحت و كانت مفاجأة أخرى



نزلت المية الحمرا عايم عليها زيت ...أحمر برضه بس أحمر تقيل

و ساعتها فهمنا ان ده زيت الفتيس و العياذ بالله

انا ماكنتش مجمع ايه دخل زيت النقل على مية التبريد لحد ما سألت ولاد الحلال و فهموني جميعا ان لازم مية تبرد زيت الفتيس عن طريق cooler

المهم

فكينا طبة الفتيس ولاقينا نازل ...........ميه ايوة ميه من الفتيس :K14:

فقلنا أكيد هو الكولر ده اللي ضرب و هو جزء متصل بدورة المياه و مثبت على الفتيس علشان الزيت السخن يعدي على مواسير المية تبرده و تاخد حرارته للرادياتور.... الفكرة ان المواسير بتاعة المية الصغيرة جوا الكولر ضربت و جابت ميه على زيت و ده مكانه في الموتور




طيب طبعا اللي زود الطين بلة هو الـ12 كم اللي مشيتهم العربية على الوضع ده
و طبعا كنا متوقعين ان افتيس ودع و خصوصا بعد محاضرات من الميكانيكي و السادة الحضور عن البلوف و الورق التروس و انها مش ممكن تستحمل الميه طبعا ..

بس الميكانيكي قال نبدأ واحدة واحدة و ندور على كوولر و نجرب الفتيس و ربنا يستر

المهم دورت على الكولر لاقيت ده





استيراد وتمنه 450 جنيه

والزيت ده و تمن العلبة 150 جنيه



الزيت ده ياباني على فكرة بس من ورا كل الكلام ألماني فقط

اشتريت 4 علب

و خدت الحاجة و رحت دمياط .... وهوب ...طلعت مش هي نفس القطعة

و دول القطعتين جنب بعض



اللي على اليمين هي المطلوبة اللي على الشمال طلعت بتاعة بورا و A4 (تبين فيمابعد) و الفرق هو الحجم بتاعت سكودا اتخن مرتين و شكل المواسير كما هو موضح ..

طيب ....ماشي

ندور بقى على الحتة دي

كلمت كل أصدقائي اللي ليهم في سكودا و طبعا الBig Boss نادر بيك نبيل اللي طبعا قاللي عليك و على التوكيل لأنه مستقيم بطبعه :D

نكلم التوكيل العبور قاللي مافيش (خلصانة):k41:

كلم غمرة أو مركز الأقصى

الأقصى ما عندوش

و غمرة قعدوا ما يردوش و نمرتهم بترد فيها واحدة ست نايمة طول النهار (صحتها 4 مرات يا حبة عيني):k46:

المهم ....

ولا وهدان عنده

ولا الهاشمية- اللي هو مشهور قوي انه عنده لبن العصفور (في العباسية)- عنده

و سألت في بورسعيد مالاقيتش و سألت في الحرفيين قالولي مش هانفكه من فتيس سليم ونعيبه أسفين ....

و بكده بدأ اليأس يتسلل الى قلبى و لدرجة اني فكرت اشتريها من بره أو نجيب فتيس و نخلص ....بس طبعا صعبة يعني

لحد ما جه الفرج :smile:

لاقينا فتيس محروق (بايظ يعني مش محروق محروق:) ) و ممكن نفك منه القطعة دي :D:D

و الحمد لله جبناها و ركبناها بعد ما قضينا يوم نغسل دورة المياه من بقايا الزيت بالكومبريسور و الميه

و غيرنا زيت الفتيس مرتين (يعني اشتريت 4 علب زيت كمان)

و كل ده و ايدي على قلبي ....الفتيس

و ما حصلش حاجة ....... العربية رجهت تنقل و تجري و كله تمام

و ده بجد فرحنى جدا جدا


اللي عايز أوصله من التجربة دي :

1 - مفيش عربية معصومة يعني أي حاجة ممكن تحصل في أي حته
2 - ده لا يؤثر على سمعة العربية لأنها سيارة ممتازة فعلا
3 - ان التوكيل مافيهوش القطعة يعني حتى الضمان كان هايقعدنا شهرين ولا حاجة و ماكناش هانستنى
4 - اعجبت بالعربية لما الفتيس ما ضربش (صحيح العيب زعلني منها بس عادي)
5 - الناس الي بتهاجم أي عربية علشان شاف منها واحدة قزازها علق و لا سلكها لمس ياريت يتعلموا ان العربيات دي بيعملها في الأخر بني أدميين برضه


و شكرا لكم

[iBiZa]

غريب موضوع الIntercooler بتاع الفتيس يضرب عند 39 دية.

الحمدلله على اد كدة و فداة, بس قلة لما يلاقى اضواء تحذيرية كدة يقف على طول و ميمشيش عليها.

[ahmedfd]

ألف شكر على التجرية اللي نقلتها لإخواتك في المنتدى و معلش قدر الله و ما شاء كانت علقة بس الحمد لله عدت على خير.
و فعلاً كلمتك في الآخر حكمة و ياريت الناس تركز فيها ... الكمال لله وحده.

[ahmed_su]

حمدا لله على سلامة الفتيس

وشكرا لمشاركتنا تجربتك اللى اكيد كانت مضنية كفاية عناء البحث عن الكولر فى محافظات الجمهورية (كعب داير)

والموضوع وارد حدوثه فى اى ماركة والعربية عملت اللى عليها (اعطت اضواء تحذير )


والف شكر على الصور - والحمد لله على كل حال

متشكر لكلامكم الجميل
الحمد لله جت سليمة و الموضوع انا عملته علشان يكون تجربة موثقة لو حد احتاجها لا قدر الله

[Ahmed Selim]

الحمد لله على كل شئ
بس بصراحة الميكانيكى ده فاهم كويس......

شكرا على المعلومات و طريقة السرد الرائعة

[Sharky]

قدر الله و ماشاء فعل يا احمد

و الحمد لله إنها إتحلت و إستريحت من اللف

و فعلا أى عربية فى العالم معرضة لعيوب صناعة لكن الميزة بقى إن يكون عندك فى العربية علامات تحذيرية قبل ما تحصل المشكلة علشان ماتزيدش

[AHMEDCAR]

بجد موضوع ممتاز و يستحق التقدير

و الكلمتين اللى فى الاخر دول هما الخلاصه

[Ahmed Samy]

انا ما شفتش الردود اللي من السنة اللي فاتت دي الا النهاردة و أنا باخد لينك للموضوع في موضوع تاني

العفو يا شباب لا شكر على واجب (بعد سنة) ههههههههههه