شاكك ان فى ثعبان فى الجراج اتأكد ازاى ؟ اعمل ايه؟

[michohat]

السلام عليكم ورحمه الله وبركاته
اخوانى انا الايام دى عايش فى رعب
انا بركن العربية فى جراج مشترك مع عربيات تانية عبارة عن محل كبير واسع تحت بيت وارضية الجراج مصبوبة اسمنت وعليها تراب من الزمن
المهم وانا بركن العربية اول امبارح بليل لاحظت فى ارضيه الجراج زى ما يكون خط متعروج فى التراب فمش دققت وركنت ومشيت
تانى يوم الصبح نزلت اطلع العربية لاحظت ان الجراج كله مليان الخطوط دى وهيا زى ماقولت خطوط فى التراب متعروجه وملوية فمن هنا الشك بقى زيادة وخصوصا ان الخطوط دى في منها جنب الحيطه وتحت العربيه كمان
الخطوط دى فى سمك الصباع وكنت ممكن اشك انها معمولة بايد او باى حاجه تانيه لولا ان التعرجات اللى موجوده ف الخطوط صعب ان الواحد يتحكم فيها للدرجه دى وبرضه صعب ان الواحد ينزل تحت العربية علشان يرسم خطوط

عاوز اعرف اللى انا شاكك فيه ده صح ولا غلط وكمان هوا ممكن لو كان ثعبان فعلا هل ممكن يدخل لصالون العربية؟
لو حد عنده اى معلومه تساعدنى ياريت مش يتأخر فى الرد انا مستنى منكم تقولوا لى اعمل ايه

[Tamer-Ezzat]

ان شاء الله ميكونش فيه حاجة ...
وللتأكد اعتقد ان الثعسبان بيحب البيض هات طبق وأكس فيه بيضتين وحط فيه سم فيران قوى اعتقد ممكن يجب نتيجة ....

[moh_kamal67]

كلم حد يكون بيعرف يتعامل معهم ، مستشفى او حد من الزراعة ، وقبل ماتركب العربية ادعى (بسم الله الذى لا يضر مع اسمه شيئ فى الارض ولا فى السماء وهوالسميع العليم )
شوف مين عنده امصال بتاعة التعابين هوة هايقوم بالازم علشان هيكون عنده خبرة وناس فاهمين فى كدة ، ممكن تكلم طوارئ المستشفيات ولا حتى طوارئ الاسعاف تعرف منهم نمرة نجدة الحاجات دى وتتصل بيهم
واطمئن تتحل باذن الله

[michohat]

هوا السم بيأثر فيهم ازاى وهما اصلا بيسموا اللى بيعضوه

[michohat]

فى ناس بتقول اجيب من العطار شيح واحطه فى الجراج وهيطرده بس لما دورت على الانترنت على حكايه الشيح دى لقيت ان ريحته مش بتطردهم وانها بتخليهم كسلانين بس

[MoToRiZeR]

ممكن جداَ .. إحنا لاقينا ثعبانين قبل كدة واحد كان في محل مقفول تحت البيت و طلع علي مدخل العمارة و البواب موته .. و التاني كان في الجراج قدام البيت .

عامة انا لي واحد صاحبي من هواة الثعابين و الحاجات دي قاللي إن الثعابين بتدوخ من ريحة الجاز .. و إنه اما بيحب يمسك ثعبان بيرش في المكان اللي ساكن فيه جاز فا يطلع و يمسكه .. فا يا ريت تتأكد من المعلومة دي أولاَ و لو طلع صح .. ممكن تخلي حد يرشلك الباكية بتاعتك في الجراج كلها جاز و ربنا يسترها إن شاء الله .

و ممكن يطلع خرطوم مياه في الأخر :) إنما في الحالتين بسيطة لأن مش حتي في أسوأ الظروف أعتقد الثعابين اللي بتبقي في المدينة دي بتبقي ضعيفة .. ولا إيه يا جماعة ؟ مفيش حد في كلية زراعة قسم تعابين هنا ؟

[michohat]

شكله مش خرطوم لان الخرطوم مش هيقطع تعليمه الكاوتش فى التراب ومن تحت العربية فدماغى بتودى وبتجيب ومش عارف اعمل ايه لو وانا ركبت العربية ومشيت بيها واتفاجأت بالضيف ده جوه العربية معرفش ساعتها هعمل ايه:k34: ولا يمكن ملحقش اعمل حاجه :k24:

[دموع الثلج]

عاااااااوز تتاكد ان فيه تعباااااان هات حااااااااااوى وخليه يزمر له :k48:


بص يا سيدى متحاولش تمسكه ولا تبحث عنه حتى


انت تروح عند اى عطار تشترى منه 2 جنيه ششششششششيح


وتجيب شاش تحط معلقتين شيح فى شاشه وتربطها وتعمل كذا واحده وترميهم فى الاركان بتاعه المكان ده جمب الحيطه ريحه الشيح بتخليه يهج ولو رجع الشيح هيطفشه تانى


ولا هتشوف لا ثعبان ولا سحليه ولا اى زواحف الشيح ذى البعبع بيقطع ريحتهم خالص

[michohat]

فى ناس بتقول اجيب من العطار شيح واحطه فى الجراج وهيطرده بس لما دورت على الانترنت على حكايه الشيح دى لقيت ان ريحته مش بتطردهم وانها بتخليهم كسلانين بس

دورت على الانترنت ولقيت معلومه الشيح دى مش صح -على حسب الانترنت ما بيقول-

[دموع الثلج]

اجدادنا كلهم فى الارياف والصعيد ميعرفوش علاج يطفش الثعابين غير الشيح

هقولك حاجه عندنا شقه مساحتها كبيره فى الدور السابع بس الشقه دى احنا قافلينها ومش بنروحها الا كل 6 شهور مره


من فتره لقنيا الشقه مليييييييييييييييييييييانه برص ومخلف كثير ووسحليات

حطينا شيح الحاجات ده قلت خف وجوده بس فيه بيض منها


جبنا شركه اللى بترش الحشرات
عدموا البيت بحاجه بتترش المهم مفيش اى ريحه للاخوه الزواحف فى لشقه خلاص

انت ممكن تكلمهم وتعرف منهم اللى يموت الثعابين

او تجيب لو مقتنعتش بالشيح فيه سم فيران قوى المفعول بيعمل سيوله فى الدم للفار اللى ياكله وبيعدى الفيران الثانى وسععر الكيس 10 جنيه
حطه على بيضه مكسوره بقشرها وسيبه يتعشى

[michohat]

مش حكايه مش مقتنع بالشيح انا سمعت بيه قبل كده و هجرب كل الوسائل دى -بس اللى استغربته لما قريت على الانترنت انها من المعتقدات الشعبية - بس اطلع بالعربية من الجراج معرفش ليه ركنتها فيه بعد ما شوفت الخطوط دى

[Dr.A.Nabil]

خلاص
اعمله كمين:

انت تطفي النور
وتبات تحت العربيه
وتخليك مراقب الجو
لو شفته
يبقى فيه تعبان !!!

[دموع الثلج]

خلاص
اعمله كمين:

انت تطفي النور
وتبات تحت العربيه
وتخليك مراقب الجو
لو شفته
يبقى فيه تعبان !!!

قصدك لو قرصه يبقى فعلا فيه تعبان وبكده يبقى قطع الشك باليقين :D:D

[michohat]

قصدك لو قرصه يبقى فعلا فيه تعبان وبكده يبقى قطع الشك باليقين :D:D

وطبعا لو قرصنى يبقى ثعبان
ولو قرصتنى تبقى حيه
:ack2:

[Hussein_Ramdan]

ياعم انا مش عارف انتا تاعب نفسك لية طيب متريح نفسك وتلفون صغير لبتوع الرش يجو يكلو الثعبان مش يموتو