تقريري النهائي عن بيجو ٥٠٨ بعد اتمام ٢٠٠٠ كم

[hany63]

مساء الخير
احب اقدم لك تقريري عن العربيه بعد تجربتها في كافة الطرق و الظروف من سفر لزحمه لحرارة جو
احب اعرفكم اعرفكم اني من ١٧ سنه متواصله ما بركبش الا الياباني و غيرت مره للاوربي و كانت تجربه مريره بدون الدخول في تفاصيل و رجعت بعديها للياباني
الصراحه كنت قلقان من حتة ان العربيه ما تبقاش عمليه في الاستخدام اليومي بسبب التجربه الاولى مقارنة بالياباني لدرجة ان مبعتش السيفيك و قلت خليها يمكن تحتاجها تاني و تخلي البيجو للسفر و الفسح بس الصراحه من ساعة ما حطيت رجلي في البيجو مش عايز اسوق حاجه تانيه و نييجي للتقرير

اولا الموتور و الفتيس

الموتور طبعا ١٦٣ حصان تربو و عزم ٢٤٠ نيوتن انتاج مشترك مع شركة بي ام و فتيس اوتو ٦ نقلات سيستم بورش
الكومبو ده عامل اداء تحفه الصراحه بسبب ان التربو بيخلي العزم جاهز على اقل عدد لفات موتور فاول ما بتدوس بنزين تحس ان العربيه فيها زي وثبة الفهد و الموضوع ده بيخليك واثق دايما في العربيه تحت اي ظرف يعني مثلا واحد بيشاور عقله و هيزنق عليك في نص ثانيه تكون عديته او اتزنقت في اي موقف معين و ده بصرف النظر عن طبيعة سواقتك و لو ليك في الجري عايز اقول لك ان العربيه مش هتخذلك ابدا بالعكس هتعمل اعلى من سقف طموحاتك حتى لو سقتها على الوضع العدي d و لو حبيت تحرق على النقلات و بالمناسبه ملهاش لزمه عشان موضوع التربو ممكن تستعمل الشيفتات و دي موجوده كتجهيز اساسي عشان تسوقها مانيوال او تحطها على سبورت مود من الاخر هتستمتع بالسواقه سواء ماشي بسرعه او سايق براحه عشان دايما حاسس ان العربيه فايقه

الفتيس بالمناسبه سلس جدا زي الياباني الاوتو و تحسه سمارت بمعنى مش بيجيب السادس مثلا على سرعة ٦٠ فكل شويه تتضطر تسقط نقله و كمان لو بتسحب هوا هيفهم و هياءخر النقلات لوحده و النقلات بتاعته ناعمه جدا

الاداء على الطرق السريعه لايتاءثر تقريبا بالحموله و لا التكييف تحس بنفس الاستجابه المعتاده و التسارع فوق سرعة ال ١٠٠ كم اكتر من ممناز
العربيه مجهزه بمثبت و محدد سرعه شغالين بتقدر تنقل من نظام للتاني بسهوله من الطاره حسب ظروف الطريق يعني لو الطريق مفتوح تبقى على مثبت السرعه و لو اتزحم تنقل على محدد السرعه عشان هتزود السرعه برجلك للحد اللي انت ظابطه او الطريق ما يفضى ترجع تاني على مثبت السرعه و تسيبها هيا تسحب
بالمناسبه العربيه شغاله زي الفل ببنزين ٩٢ و مفيش شبه تسقيف حتى لو مطلع جراج و انت على التاني بعكس عربيات تانيه تربو بتحط ٩٢ كنوع من التوفير و المواتير بتسقف

ثانيا العزل

العزل نقدر نقول عليه جيدا جدا مفيش صوت مسموع نهائي للكاوتش على الاسفلت و بتسمع صوت للهوا بعد سرعة ١٥٠ كم
اللي ممكن تعديها مرتين تلاته في السنه لو سواقتك في الطبيعي

ثالثا الصالون و التشطيبات الداخليه
النقطه دي ولا كلمه قمه في الفخامه و جودة التشطيب و من اول فئه للتوب لاين هيا هيا نفس الخامات ماعدا ان الفئه الاولى فرش نص جلد و نص قماش بس فخم جدا مع طاره جلد طبيعي تديك احساس انك سايق عربيه بنص مليون جنيه و كراسي مريحه و مساحات واسعه و وضعية عدادات جميله بتنور ابيض و ٢ شاشة معلومات واحده في نص العدادات و التانيه على اليمين طبعا الخليجي بيبقى فيها اي درايف و شاشه كبيره زي بتاعة الاتسجنيا بس طبعا كله بتمنه

رابعا العفشه

احلى عفشه ركبتها الصراحه و يدوب بسمع صوت المطب في الكاوتش و دمتم و كمان ارتفاع العربيه ١٦ سم مخلي قلبك جامد و انت بتاخد اتخن مطب او حفر و ده بالمناسبه مع الجنط ال ١٦ ممكن الاحساس يزيد سنه في ال ١٧

خامسا التكييف

حلو جدا و بيبرد بسرعه زي الياباني و dual zone و فيه فتحات للكنبه الخلفيه عيبه انه مفيهوش زرار اغلاق لازم تطفيه من زرار سرعات المروحه و كمان بلاحظ في حالة تشغيله ان الحراره بتاعة العربيه بتعدي ال ٩٠ بشرطتين لو زحمه جدا و درجه حراره خارجيه ٤٠ درجه مئويه و ده بيبقى لمدة دقيقتين و ترجع تنزل تاني الفكره الواحد عشان واخد على ثبات مؤشر الحراره في الياباني قلبه بيقع

سادسا الثبات و الهايندلج و الفرامل

رغم ان العربيه عاليه انما ثباتها تحفه و بتدي احساس برشاقة الحركه غير طبيعي و الهاندلينج اكتر من ممتاز تحسها لازقه في الاسفلت حتى لو عملت حركه غلط هيا هتصلح المسار و ماسكه نفسها في الملفات احسن بكتير من عربيات في فئتها لدرجة ان نسبه الميلان لو خدت الملف بسرعه قليله وده بفضل انظمه الفرامل و الثبات الاليكتروني المعتاده بس تحسه متطور جدا و الفرامل تحسسك انك راكب عربيه الماني العربيه بتثبت من اقل لمسه

سابعا النظام الصوتي

الحقيقه دي يمكن كانت هتبقى نقطة ضعف واضحه في حق العربيه عشان حاطين نظام اقل من الخليجي اللي بتنزل بنظام جي بي ال صوت محيطي بس انا فضلت اجرب لغاية ما توصلت اني اسمع صوت تحفه عن طريق توصيل الايبود باليو اس بي و راضي حاليا بنسبة ٨٥ في الميه عن الصوت

ثامنا نظام الاضاءه و كماليات اخرى

الاضاءه عندي هالوجين بتدي نور ابيض قوي و راضي عنه بنسبه معقوله رغم اني واخد على الزينون بس الاضاءه كويسه و كافيه و العربيه مزوده ببلوتوث كتجهيز اساسي و شيفتات في الطاره و حساس مطر و نظام دعم لفقرات الظهر و اضاءه اوتوماتيكيه في الاماكن المظلمه و خاصية التتبع للمنزل و حساسات ركن خلفيه و مرايات ضم بتعمل ضي نور ابيض على الابواب و هيا بتقفل تحفه و غلق الزجاج بالريموت و مرايه ذاتية التعتيم و امكانية تشغيل الاغاني من الموبيل عن طريق البلوتوث و فوج لايت و اضاءه نهاريه

تاسعا قطع الغيار

باستثناء تيل الفرامل اللي تمنه زي الكوري نقدر نقول ان قطع الغيار حاجه ببلاش كده و تقدروا تدخلوا على الموضوع الخاص بيها في المنتدى و تحكموا بنفسكم


ارجو ان التقرير ده يكون فيه فايده للجميع و تحت امركم في اي سؤال

[AhmedNaeem]

الف مبروك ربنا يديك خيرها ويكفيك شرها
هي فعلا عربية مميزة وجميلة

[Moratoz]

يا فندم ربنا يبارك لحضرتك فيها أن شاء الله

[M7amD_7amDy]

الف مبروك يا أستاذ هانى وربنا يديك خيرها ويكفيك شرها

والتقرير ممتاز جدا تسلم إيدك

والعربية ما شاء الله جميلة جداا وصفقة رابحة ربنا يباركلك

والفيس ليفت اما ينزل هيزعل الانسجنيا جامد :)

سؤالى لحضرتك .. هى الخليجى بكام؟ وتزيد ايه غير الـ idrive وسماعات الـ JBL ؟ وتنقص ايه برده عن الوكيل؟

تحياتى لحضرتك

والله العربية فعلا من احلى و اجمل العربيات الموجودة دلوقت فى الفئة السعرية دية ومنتشرة دلوقت بشكل كبير على الطريق
و التقرير ولا احلى ولا اروع بجد
تسلم ايديك يا استاذ هانى :)

الف مبروك لحضرتك .انا مقتنع بالعربيه دى جدا بس مستنى الشكل الجديد.اتمنى الشكل الجديد مايقلش فى اﻻداء عن القديم

[hany63]

الف مبروك يا أستاذ هانى وربنا يديك خيرها ويكفيك شرها

والتقرير ممتاز جدا تسلم إيدك

والعربية ما شاء الله جميلة جداا وصفقة رابحة ربنا يباركلك

والفيس ليفت اما ينزل هيزعل الانسجنيا جامد :)

سؤالى لحضرتك .. هى الخليجى بكام؟ وتزيد ايه غير الـ idrive وسماعات الـ jbl ؟ وتنقص ايه برده عن الوكيل؟

تحياتى لحضرتك

الله يبارك في حضرتك
الخليجي ما بتنزلش مصر عشان غاليه بس فاكر ان واحد كان منزلها من السعوديه ماشيه حاجه بسيطه كان طالب ٣١٠ الف
و بتزيد عن التوب لاين المصري حساسات ركن اماميه بالاضافه للاي درايف بالساشه و الجي بي ال

[swimmer25]

مباركة عليك
وأرجو إن التغيير اللي حصل في الموتور من 2013 إلي 2014 فعلا فرق في السحب زي ما حضرتك حكيتلي في موضوع أخر

أنا جربت ال 3008 وفعلا كان فيه فرق واضح في السحب

سؤال صغير...هي العفشة الخلفية لل 508 تصميمها إيه..مالتي لينك ولا تورشن بيم ولا دبل ويش بون؟

مباركة عليك
وأرجو إن التغيير اللي حصل في الموتور من 2013 إلي 2014 فعلا فرق في السحب زي ما حضرتك حكيتلي في موضوع أخر

أنا جربت ال 3008 وفعلا كان فيه فرق واضح في السحب

سؤال صغير...هي العفشة الخلفية لل 508 تصميمها إيه..مالتي لينك ولا تورشن بيم ولا دبل ويش بون؟

الله يبارك فيك
احتمال تكون العربيه اللي حضرتك سقتها و كانت بطيئه من الدفعه الاولى اللي منفعش معاها ابديت و المفروض تمشي بال ٩٥ و صاحبها حاطط ٩٢ زي ما اتقال في المنتدى و الله اعلم
التعليق الخلفي ملتي لينك

[hany63]

الف مبروك لحضرتك .انا مقتنع بالعربيه دى جدا بس مستنى الشكل الجديد.اتمنى الشكل الجديد مايقلش فى اﻻداء عن القديم

الله يبارك فيك
وانشاءالله الشكل الجديد يكون احسن و مبروك مقدما و ما تنساش تعمل تقرير بيها