فاتت عليا صيانة ال 2500 لبيجو 301 .. المفروض اعمل ايه

[drmuh]

السلام عليكم
انا اشتريت بيجو 301 من 5 شهور تقريبا من الوكيل اللي ف صلاح سالم .. وللأسف مكنتش أعرف ان اول صيانة بعد 2500 كم .. كنت فاكر ان اول صيانة بتبقى 5000 كم ..
انا دلوقتي عامل 6000 كم و قلقان من الزيت اللي جاي في العربية يكون معمول لمسافة قليلة وانا كدة عديت ال2500 بكتير .. وحاجة تانية, لما كلمتهم قالولي ان تفعيل الضمان بيتم ف صيانة ال 2500 كم , طب انا دلوقتي مفعلتش ضمان ولا حاجة لأني مرحتش اصلا صيانة 2500 كم .. كدة انا برة الضمان ولا ايه موقفي؟؟؟؟؟؟؟؟؟؟؟

عاوز اعرف اعمل ايه وجزاكم الله خيرا

[hany63]

مش هيحصل حاجه و هما هيفعلوا الضمان على تاريخ استلامك للعربيه و كده كده الصيانه كل اللي بيتعمل فيها تربيط عفشه فقط
و الزيت اللي فيها بيتغير على ال ١٠ الاف لا تقلق بس يا ريت تروح على طول

[mhmd_farouq]

رووووح اعلمها ولا يهمك، قولهم مكنتش اعرف

[ARKOON]

رووووح اعلمها ولا يهمك، قولهم مكنتش اعرف

+++++++
عادي جدا هتعمل الصيانة وتفعل الضمان

[Ashraf Fawzy]

اول صيانة بتكون مجانية و بيتم تربيط العفشة و مراجعة سوائل العربية و تحديث السوفتوير بتاع العربية لو محتاجه تحديث, و الزيت بيتم تغييره اول مره عند صيانة الـ 10000 كيلو أو ستة شهور من أستخدام العربية (أيهما أقرب).

عموماً, إتصل بـ 19207 و اطلب حجز ميعاد صيانة للـ 2500 فى أقرب مركز ليك, بس غالباً هايقولك تدخل على صيانة الـ 10000 كيلو على طول, مش معقولة تروح النهارده تعمل صيانة الـ 2500 و تربط عفشة, وبعد شهر أو أقل تروح تانى تعمل صيانة الـ 10000 و تربط عفشه تانى مع تغيير الزيت و الفلاتر, وخصوصاً إن عندهم ضغط اليومين دول على مراكز الصيانة عشان العربيات كلها رايحه تعمل تحديث للسوفتوير بتاعها.

عموماً أتصل و شوف هايقولولك ايه و تابع معانا التطورات و مافيش اى داعى للقلق, حفاظك على جدول الصيانات بيكون حفاظاً على عربيتك مش عشان تبقى متكدر لا قدر الله.

[drmuh]

تسلمو ياشباب والله طمنتوني
أن شاء الله هكلم الصيانة وابلغكم باللي حصل
بس عندي استفسار.. هي صيانة ال 10000 مش مجانية؟ ؟
وتنصحوني اروح مكان مااشتريت العربية من صلاح سالم ولا في مكان أفضل؟ المفروض ايه اللي بيتعمل في ال 10000
لأني كنت قريت مواضيع عن غطا علب التحكم وفتحات التكييف الخلفية وحاجات زي دي ممكن مكونش واخد بالي، فاللي يقدر ينصحني بحاجة جزاه الله خيرا يقول...

ومعلش حاجة تانية كمان.. انا عاوز اركب مسند بين الكرسيين اللي قدام من اللي بيتفتح ده ،عربيتي مش هاي لاين "للأسف" ... وكمان السماعات الخلفية عاوز اركبها... الكلام ده هيكلف جامد ف التوكيل؟؟؟

[drmuh]

:) :)

[medori]

تسلمو ياشباب والله طمنتوني
أن شاء الله هكلم الصيانة وابلغكم باللي حصل
بس عندي استفسار.. هي صيانة ال 10000 مش مجانية؟ ؟
وتنصحوني اروح مكان مااشتريت العربية من صلاح سالم ولا في مكان أفضل؟ المفروض ايه اللي بيتعمل في ال 10000
لأني كنت قريت مواضيع عن غطا علب التحكم وفتحات التكييف الخلفية وحاجات زي دي ممكن مكونش واخد بالي، فاللي يقدر ينصحني بحاجة جزاه الله خيرا يقول...

ومعلش حاجة تانية كمان.. انا عاوز اركب مسند بين الكرسيين اللي قدام من اللي بيتفتح ده ،عربيتي مش هاي لاين "للأسف" ... وكمان السماعات الخلفية عاوز اركبها... الكلام ده هيكلف جامد ف التوكيل؟؟؟

لأ صيانة ال 10 مش مجانية، بتكلف حوالى 600-700 جنية لو مش هتغير التيل. بالمناسبة لو التيل صفر معاك روح غيرة قبل ال 10 فى الضمان عشان لو عديت ال 10 هيدفعوك تمن التيل.

الصيانة ممكن تروح اى مركز، بس الاحسن صلاح سالم او المركز الرئيسى فى غمرة، بيركبوا غطا الطنترول، و مفيش فتحات تكييف خلفية، دى اشتغالة. بيغيروا زيت و يشيكوا على مياة المساحات و التبريد و يربطوا عفشة و يتأكدوا ان السوفت وير updated و يغيروا فلتر زيت و فلتر بنزين لو محتاج.

المسند ناس كتير سألت علية قبل كدة و كان الرد انة مش متوفر، السماعات الخلفية بتركب ب 1000 جنية لو مكانوش غلوها