تقرير بالصيانات المبدئية 406 - 2002

[SYD]

بسم الله الرحمن الرحيم

السلام عليكم ورحمة الله وبركاته

أخواني الأعزاء في قسم بيجو نايل موتورز
تحية طيبة،

في البداية أحب أوجه كل الشكر لكل الأعضاء اللي شاركو معايا في موضوعيي السابقين
مشكلة في مفتاح ال406
تجرة قيادة الرائعة 406 ومقارنتها بتجاربي السابقة

وأحب اوضح ان المشكلة بتاعة المفتاح مازالت قائمة لأن بعد لف كتير علي بتوع المفاتيح سواء في القصر العيني او صقر قريش لم أصل انا وأخي لحل غير ان المفتاح جديد هيتكلف حوالي 1150 بالخرط والتكويد

نيجي لموضوعنا وهو تقرير الصيانات الأولية اللي تمت في العربية

أولاً كانت رحلة البحث عن المفتاح
وأثناء البحث واحنا في صقر قريش - القدر خلانا نقف شوية عند مركز صيانة بيجو كبير في المنطقة دي وباين كان اسمه الدهشوري
انا بطبعي بحب استكشف بنفسي كل شئ ودة احياناً بيسبب مشاكل زي المشكلة اللي خلتنا نروح للدهشوري
تفكيري قالي يا واد ما تقفل الأيرباج - وكانت العربية دايرة
فطبعاً فوراً راحت منورة لمبة الأيرباج في لوحة العدادات
ولأن اخويا زيه زي اي حد مش بيحب اي لمبة تحذيرية تكون منورة في الطابلوه فكانت دي اول تجربة لينا مع الصيانة
في الأول الفني حط العربية علي الكمبيوتر (كمبيوتر تعبان بتاع كل انواع العربيات اللي موجودة في الدنيا) وبعد تجربة لأكتر من فئة للعربية في الكمبيوتر اخيراً الكمبيوتر اتعرف علي العربية وبعد الفحص كانت النتيجة ان العربية مش مسجلة اي ايرور

نيجي لقصة لمبة الأيرباج
من غير كشف ومن غير اي حاجة قالنا ان الفيشة اللي تحت كرسي السواق اكيد مهزوزة وهعملها بريدج Bridge - علي اساس ان انا واخويا مش فاهمين يعني ايه بريدج
قولت يا واد سيبه للأخر
لقيت حد صنايعي كدة جايب مفك وقصافة وحتة سلك رديئة ونازل تحت الكرسي
قولتله هتعمل ايه ؟؟؟؟؟؟ قالي هعمل بريدج
قولتله ازاي ؟؟ هتقص ؟
قالي لا مش هقص
قولتله هتقشر السلك وتاخد منه كوبري ؟؟
قالي يا بيه دة شغلي وانا ادري بيه
قولتله ودي عربيتي ولازم اعرف هتعمل ايه ؟؟
قالي الفيشة فيها عيب ودة الحل اللي بنعمله
قولتله سيبهالي علي عيبها انا عايزها منورة

واول لما قام انا روحت فاتح تاني الأيرباج وفتحت كونتاكت لقيت اللمبة طفت

اخويا قال بلاش نمشي بأيدينا فاضية
هات يا عم فلتر هوا وفلتر بنزين وفلتر زيت
الأجمالي بعد كشف الكمبيوتر 160 جنيه (50 كشف - 110 فلاتر)

تقييمي
فتايين وصنايعية زيهم زي اي ميكانيكي في الشارع وبيعتمدوا علي ان الزبون مش فاهم اي حاجة في اي حاجة - يعني ايه يقشر السلك وياخد منه كوبري ؟؟؟؟؟؟؟؟؟؟؟؟؟؟؟

فتية كمان علي الطاير وبردو بدون كشف
العربية حرارتها بتعلي ولمبة Stop بتنور
حساس المياة عايز يتغير

من غير كشف ؟؟؟؟


الصيانة التانية
تغيير سائل التبريد
اخويا لوحده من غير ما اكون معاه راح اشتري مبرد موبيل الأحمر تركيز 33% ومكتوب عليه G30 طبعاً انا عارف ان دة مش بتاعها بس لأن G33 قليل شوية في السوق فمش هتفرق اوي ودة بردو هيشغلها
اللي مضايقني في القصة دي ان بتاع الريدياتيرات انا عارفة وعارف شغله لكنه بردو افتي فتوة ظريفة اوي وأخويا للأسف مشي معاه علي كلامه رغم علمه بالصح لكنه وثق في بتاع الريدياتيرات
الفتوة ان المعلم الكبير زود الدورة بعد ما حط المبرد مياة معدنية
طبعاً انا قولت لأخويا انك بكدة ولا كأنك عملت حاجة وياريتك وفرت ثمنها وحطيت مياة من الحنفية

الصيانة الثالثة
تغيير زيت المحرك والفلتر
أخويا اشتري زيت توتال 5/40 وغير الفلتر
حابب اقول ان الزيت القديم كان فوق المقياس بشوية حلوين وكان سايل زي الماية ولونه اسود فحم
رغم ان المالك السابق كان قايل لأخويا انا لسة مغير زيت وفاضل فيه حوالي 2000 كم تاني

حالياً صوت الموتور هدي حاجة بسيطة اوي مش ملحوظة
بس وانا بدور العربية بلاقي مربع من بتوع مستوي الزيت ناقص ولو العربية مايلة شوية بيكونوا مربعين
فهل ازود كيلو كمان ولا اعمل ايه ؟؟؟


الصيانة الرابعة
تغيير الفلاتر (هوا وبنزين)
مفيش جديد غير ان الأثنين كانوا منتهيين تماماً


الصيانة الخامسة
تغيير سير الكاتينة وبلي الشداد وسير الدينمو وبلي الشداد
البلي لوحده ثمنه 675 جنيه ودة بس بتاع الكاتينة
بلي الدينمو كان ب100 علي ما اعتقد

سير الكاتينة القديم كان مشقوق بالطول ومقطوع وماسك علي كام شعره
طبعاً الحمدلله حمداً كثيراً ان الصيانة اتعملت في الوقت دة
بالأضافة ان العربية كانت مأخرة سنتين وخالفة تقسيمة وة كان احد اهم اسباب تقل الطلعة بتاع العربية ومخليها بطة شوية

الصيانة السادسة
العجلة اليمين بحسها بتلق تحت رجلي وانا ماشي بالعربية في الشوارع الجانبية الغير مسفلتة او في مطبات عشوائية في الشوارع الجانبية المتسفلتة
بعد الكشف اتضح انه بيض المقصات مبوش تماماً ولازم يتغير
وعليه مأخرين ظبط الزوايا

الصيانة السابعة
مراية الباب اليمين
المراية معلقة في الحركة لليمين (بتتحرك في الأتجاهات شمال وفوق وتحت)
ملحوظة كمان
لو طلعت الزرار لفوق المراية تنزل لتحت ولو نزلت الزرار لتحت المراية تطلع لفوق

أسف علي الأطالة
بس ليا بعض الأستفسارات
اولا بالنسبة للمفتاح
هل لو اشتريت مفتاح استيراد هينفع اكوده علي العربية (مشكلتي ان الريموت بايظ والزرار طاير منه)
ثانياً بالنسبة لزيت الفتيس - اجيب زيت ايه ؟؟ بأي لزوجة ونوع ايه ؟؟
ثالثاً بالنسبة للسخونة ولمبة Stop الميكانيكي بتاع اخويا بيعتقد انها ممكن تكون احد المراوح بتعلق احياناً ودة سبب السخونة المفاجئ
ويمكن اعمل موضوع منفصل بموضوع السخونة دة لوحده لأنه في غاية الأهمية

تحياتي للجميع

و عليكم السلام و رحمة الله و بركاته
مبدأيا إن شاء الله ما تقلقش من المشاكل اللى انت شايفها و كلها تتحل

أنا هجيب لك من الآخر

بالنسبة للمفتاح أطلع على التوكيل فى غمرة و اعمل مفتاح ب 900 جنيه زيرو و فى مكان أمين او بمعنى أدق مؤتمن اكثر من غيره

سلك الايرباج فعلا مكانه تحت الكرسى و ممكن يكون مهزوز بس ما يتلغيش هو ممكن يعمل دعامة ليه و ممكن يكون عيب سوفت وير و سيبك من السوفت اللى انت كشفت بيه !!!!!!!!


لصيانة الثالثة
تغيير زيت المحرك والفلتر
أخويا اشتري زيت توتال 5/40 وغير الفلتر
حابب اقول ان الزيت القديم كان فوق المقياس بشوية حلوين وكان سايل زي الماية ولونه اسود فحم
رغم ان المالك السابق كان قايل لأخويا انا لسة مغير زيت وفاضل فيه حوالي 2000 كم تاني

+
سخونة العربية = ممكن كدة علب الشكمان عندك فيها مشكلة و هتضيع جزء من السحب و هو ما ارجحه أو مشكلة فى دورة التبريد أو ضبط اتاكيهات

راجع الموضوع دا : http://www.nilemotors.net/Nile/39637...post3875344566


" بس وانا بدور العربية بلاقي مربع من بتوع مستوي الزيت ناقص ولو العربية مايلة شوية بيكونوا مربعين
فهل ازود كيلو كمان ولا اعمل ايه ؟؟؟ "

المعيار فى الحالة دى هو المقاس الحديد لان المقاس الديجيتال ساعات بيخرف و هى و لا ناقصة و لا حاجة

" الصيانة الخامسة
تغيير سير الكاتينة وبلي الشداد وسير الدينمو وبلي الشداد
البلي لوحده ثمنه 675 جنيه ودة بس بتاع الكاتينة "

يا راجل دا السير و البليتين فى التوكيل بالضرايب ب 576 جنيه

العربية مش بطة..... العربية وزة (و دوس على الكلاكس و شوف ههههههههه) ....قصدى كويسة يعنى...... مش بالصورة انها تقيلة و الكلام دا

و فى معلومة مهمة جدا ان طلمبة المياه هى كمان على سير الكاتينة " على نفس السير " وممكن تعمل خشانة فى الحركة خصوصا لو فيها أملاح و يا ريتك كنت غيرتها بالمرة-- فى التوكيل ب 550 تقريبا بالضرايب برة ممكن تعمل 580 600

http://www.nilemotors.net/Nile/41955...post3875556261


"الصيانة السادسة
العجلة اليمين بحسها بتلق تحت رجلي وانا ماشي بالعربية في الشوارع الجانبية الغير مسفلتة او في مطبات عشوائية في الشوارع الجانبية المتسفلتة
بعد الكشف اتضح انه بيض المقصات مبوش تماماً ولازم يتغير
وعليه مأخرين ظبط الزوايا"

بعد ما تعمل كدة ممكن العربية نعومتها تقل بس اتفرج عليها بقى فى الثبات على السرعات

"الصيانة السابعة
مراية الباب اليمين
المراية معلقة في الحركة لليمين (بتتحرك في الأتجاهات شمال وفوق وتحت)
ملحوظة كمان
لو طلعت الزرار لفوق المراية تنزل لتحت ولو نزلت الزرار لتحت المراية تطلع لفوق "
المرايا الاصلية للعربية مرايا تعتيم غامقة (هى و مراية الصالون و فيها تعتيم اوتوماتيكى) مش بيضة و هى جديدة بتعمل 150 جنيه و استيراد تعمل 100 جنيه و وواضح انها اتخبطت قبل كدة و الترس الداخلى معلق او السنون مقطومة

و الحل انك تغير الترس الداخلى و دا بيعمله 80 جنيه و كمان اللى جه يركبها عاكس الفردتيين بتوع فوق و تحت

فى نصيحة مهمة جدا الناس اللى انا بتعامل معاهم كانو شغالين سابقا فى التوكيل يعنى يوماتى عربيات و مشاكل بالكوم و الاعطال و العربيات حافظينها

عندك محمد زكى (ميكانيكى) و زكريا (كهربائى) فى الزاوية بتوع توكيل بيجو ناس فاهة جدا جدا كانك فى التوكيل و زكريا كشف الكمبيوتر عنده ب 100 جنيه بس بيفصص العربية و عمل لى عطل تكييف مش ناسيهوله و طلع بلاوى كانت ناس عاملاها فى كهربة المراوح لوحده (كانت املاح عاملة سدد ...حاجة زى كدة) هما قريبين من سكنى القديم

م/أحمد غلوش فى الحرفيين خبير فرنساوى بشكل عام

زيت الفتيس بتاع الفتيس ال AL4 هو ATF 4HP20 خاص ببيجو و ستروين ب 125 جنيه للتر و بتاخد من 3 الى 4 لتر ممكن تجيبه من التوكيل زى ما انا عملت او من التوفيقية و السعر واحد

ومهم جدا تقيس ضغط الزيت بالكمبيوتر بعد عملية التغيير و لا تعتمد على الكمية النازلة و انك تحط بدالها و الكلام دا لانها ممكن ما تكونش مظبوطة اساسا

بالتوفيق ان شاء الله

[SYD]

يا باشا انا متشكر جداً ليك والله كلك ذوق
انا طبعاً سمعت عن زكريا بتاع الزاوية بس للأسف أخويا ماعرفش يوصله وقعد يلف في الزاوية كتير وتاه
فممكن لو أمكن عناوينهم بالظبط سواء زكريا او محمد زكي
أخويا بيتعامل مع حد ميكانيكي علي دائري المريوطية بس مش فاكر اسمه

تحياتي ليك

الاتنين جنب بعض و جنبهم سروجى كمان و محلات قطع غيار

محمد زكى ميكانيكى و ده رقم تليفونه 01002739292

زكريا كهربائى و ده رقم تليفونه :01001571493

كلمهم و اعرف العنوان منهم افضل لان انا بروح على شكل الشوارع مش اساميها

[SYD]

الف شكر يا باشا علي تعبك

تحياتي

بالنسبه للسخونه هل بتلاقي مؤشرات الحراره كلها نزلت للصفر ولا بتعدي90 معاك ؟

[azhk]

كان عندى نفس القصة رحت لواحد اسمه سعيد مفتاح فى عمارات الفاروق بجسر السويس بعد مطعم الشبراوى و اتكلف وقتها تقريبا 100 جنيه على ماافتكر الكلام ده من حوالى سنتين