سوال في تغيير زيت البيتلز

[drjadoire]

هاي ياجمعه
انا معايا فولكس بيتلز موديل 78
العربيه حلوه الحمد لله
بس عندي سوال انا بلاقي كل فتره الزيت ناقص شويه يعني كل اسبوعين كده
هل ده عادي عشان هي تبريد زيت
مع غالعلم ان الموتور مش بيجيب زيت خالص ولسه معموله عمره

ولما ازود زيت ازود لغايه علامه الماكسمم ولا اخليني بين الماكسمم والمينيمم افضل
ناس قالتلي لو زودت لغايه العلامه اللي فوق الزيت حيطرطش عالبوجيهات

يا ريت تفيدوني

[أحمد سالم]

السلام عليكم
اولا دايما خلى الزيت على العلامة الثانية دايما افضل
عن تجربتى انا دايما مش بخلى الزيت يعدى الاعلامة الثانية يعنى اما عليها او قبلها بشويه
وعمرى ماحصل معايا موضوع البوجيهات ده
ثانسا لو بتزود مثلا فى الشهر ربع كيلو ده مش مشكله
اما لو بتنقص كثير حاول تركن العربيه بعد مشوار طويل
ولما ترجع لما بص من تحت على الارض وحاول تلاحظ هل فى زيت بيتسرب ولا لا
وحاول تتأكد ان غطا وش التاكيهات راكب كويس فى مكانه وحاول تغير كمان جوان وش التاكيهات لان ده الشائع انه بيسرب الزيت
شوف المشاركة دى

http://www.nilemotors.net/Nile/showthread.php?t=46290&page=2

[drjadoire]

الف شكر يا باشا

متشكرين يا باشا
انا كده حزود لغايه الماكسمم
طيب تنصحني اجيب زيت ايه ليها
الميكانيكي قالي التعاون الجركن الاحمر
وفيه واحد جاري قالي بتاع مصر للتبرول
يا ريت تفيدني ولو اختلف الزيت ده يفرق معايا في بروده العربيه وسحبها
؟؟

[أحمد سالم]

بالنسبة ليا انا بستعمل زيت واحد من الثلاثه دول
الاول زيت شيل 100 اكس وده مكتوب على الجركن بتاعه انه خاص بالمواتير الاقدم عمرا بس ماعنديش صوره للجركن بسش هو زيت لزوجته جيده
2- كالتكس ديلو الفضى
3- التعاون توب فاكت
ودول فى الصوره

[أحمد سالم]

[hotboja]

بالنسبة ليا انا بستعمل زيت واحد من الثلاثه دول
الاول زيت شيل 100 اكس وده مكتوب على الجركن بتاعه انه خاص بالمواتير الاقدم عمرا بس ماعنديش صوره للجركن بسش هو زيت لزوجته جيده
2- كالتكس ديلو الفضى
3- التعاون توب فاكت
ودول فى الصوره

ايوة تمام صح احلة زيت التعاون جركن اسود
او شيل او موبيل وان

وبتاخد 2 ونوص كيلو والياقى خالية معك احتياطى

وبعدين حكاية انة بتسحب زيت اقولك على حاجة روح البنزينة واغسل باجاز الموتور
بس اوعى حاجة تانية مياة على شان لو الاسبرتيتر جاة على مياء مش هتدور غير زق
المهم بعد الغسل باجاز امشى شوية بية وافتح الموتور هتعرف هل فى تسريب فى حتة

لو لا يبقى الموتور ضعيف وعايز طقم شنبر او حاجة
وخصوص ان حتى فى البتلز لو الموتور ضعيف مش بيجيب دخان

بس بتعرف لو مسرع والعربية مش عايز تشد عن المية او حاجة

العربية معاك اية اخبار السرعة ؟

[El.Hossieny]

طيب يا جماعة انا لسة شاري العربية من حوالي شهر .... و غيرت الزيت مرة واحدة .. و جبت زيت التعاون ( اللي هو الجركن البرتقالي ) .... بس صراحة ناس كتير معاهم بيتلز نصحوني اغير لزيت شيل X100 ... و قالولو ان ده احسن

يا تري افضل علي التعاون ؟ و لا اغير ل شيل X100 ؟ خصوصا اني هغير زيت اليومين دول

برجاء سرعة الرد للاهمية

و شكرا

[hotboja]

طيب يا جماعة انا لسة شاري العربية من حوالي شهر .... و غيرت الزيت مرة واحدة .. و جبت زيت التعاون ( اللي هو الجركن البرتقالي ) .... بس صراحة ناس كتير معاهم بيتلز نصحوني اغير لزيت شيل X100 ... و قالولو ان ده احسن

يا تري افضل علي التعاون ؟ و لا اغير ل شيل X100 ؟ خصوصا اني هغير زيت اليومين دول

برجاء سرعة الرد للاهمية

و شكرا

التعاون احسن حاجة فية الجركن الاسواد اللى هو زيت ديزيل على شان احنا تبريد هواء فلزم يكون زيت تقيل على شان يبرد الموتور صح

عن تجربة فى الزيوت احسن زيت هو التعاون

كنت زمان بغير شيل بس لقيت التعاون احلة

[El.Hossieny]

يعني المرة اللي جايه اغير التعاون الجركن الاسود ؟؟؟ احسن من شيل X100 ???

[ahit]

السلام عليكم

يا جماعة إستخدموا أى زيت عاده لأنه تقيل بس غيروه على 1000 كيلو بالكتير
و دا رأى 90% من ميكانيكية البيتلز

أنا جربت كالتكس ديلو الفضى و التعاون توب فاكت الأسود و شيل X100 و زيت التعاون الأحمر أو البرتقالى و زيت الوطنية الأحمر العادى
و كان أفضلهم أداء و فى صوت الماتور شيل X100 و بعده على طول التعاون و الوطنية.
و لكنى من فترة قابلت ناس معاها بيتلز من 11 سنه و أكتر قالولى خليك فى أى زيت عادة أحسن لأن الزيت العادة بطبيعته تقيل جداً و ينفع البيتلز و الأفضل فى الصيف تحط معاه علبه زيت شمبر و تغيره على 1200 أو 1300
و فعلاً جربت دا مرتين و كان الأداء و الصوت ماشاء الله و بعد كدا ماحطتش العادة و لا زيت شمبر و استخدمت شيل X100 تانى و لكن حسيت بالفرق و هارجع تلنى زى الأول

و بعدين نلاحظ كل الميكانيكية عندهم جراجن الوطنية و التعاون الحمرا مش بيستخدموا غيرهم لأن سعره رخيص و أداءه عالى و يفضل تغيير الزيت فى المواتير القديمة بعد 800 كيلو أو 1000 كيلو

و شكراً

[drjadoire]

الحمد لله السرعه تمام يا جماعه في البيتلز
انا الله اكبر بجيب بيها 120 مرتاح
من غير مقرص عالموتور
العربيه سريعه جدا و حلوه ونامعه عالطريق وثابته
هو بس الواحد عاةوز يسال سؤال
نفسي اعمل صوت الصفاره اللي بتكون مع الموتور
يا تري اعملها ازاي وهل تضر بالموتور
يعني الميكانيكي قالي فيه حاجات بتتحط في الشكمان او كده بس انصحك بلاش
هل ده صح ولا ايه رغم ان موتوري مزبوط بس نفسي اعمل الصوت ده

[ahit]

السلام عليكم

يا جماعا زيت التعاون بكام دلوقتى و زيت الوطنية كمان العادى طبعاً

أرجو سرعة الرد

شكراً

[ابوهاشم]

زيت البيتلز المفروض 2.5 ك بالظبط لا يزيد ولا يقل ولو زاد بيطرطش الزيت والموتور بيجيب زيت من تحت وعلشان كده انت بتلاقى الزيت نقص مش لازم يكون على العلامه اللى فوق بس المهم يكون 2.5 ك بالتمام وماتسمعشم حد يقولك غير كده حتى لو كان الشخص اللى بيغيرلك الزيت لانهم بيفتو كتير واسال الميكانيكى هياكدلك كلامى
وعلى فكره جرب زيت بترومين الجركل 5 ك بيتغير على مرتين

[drjadoire]

يا جماعه محدش جاوبني علي حكايه صوت الصفاره الحلوه في بتكون في موتور البيتلز نفسي اعملها
بس فيه ميكانيكي حذرني وقالي حاجات بتحطها في الشكمان او كده عشان تعمل الصفاره ديوانتي ماشي
يا ريت تفيدوني اعملها ازاي

[noni67]

الصفارة دى بتطلع من الديلين النيكل اللى فى الشكمان
هات ديلين جداد بس هاتم معاهم طقم جوان وكلبس ديول شكمان لانهم لما بيتفكوا ما بينفعوش تانى
وركب الديول وأضبط الكربراتير كويس وانت تسمع احلى صفارة لاجمل واجمد واطعم عربية فى العالم